دياجير الغرام

البارت التاسع عشر

لا تـرد ما ظل أثر كلشي إنتهه إبسفركم
لا تـرد مـات الورد من إنقطع خبركم
كـتـبـت إعله دارك...دمعة إنتظارك
—————————

غزيل /

بعدني ما مدركة موت ابوي و اخوي احسة حلم وراح اكعد منه بعد شوية اي غزيل هذا حلم هسه تگعدين

انظاري تتنقل بين الناس عسى و لعلى واحد يگولي ابوج موجود هذاكيا واگف بينهم هسه يطلع و يحضني يگلي بصوتة الحنين صوتة الدافي حضنة الامن نضراتة الهادية يگلي بوية انا يمچ لا تبچين

يگلي و هو يمسح دموعي دموعج غالية بنيتي حبيبة ابوها و صغيرونتة انا يمج باباتي ابوج ما يعوفج

بس ماكو ما طلع ابوي ما طلع ، اشوف مهيب حالتة ما اتمناها لعدويني يفطر الگلب

وينه هذا الي چان اهم شي شكلة من يطلع قميصة مرتب و عطرة يوصل قبله جاي اشوف واحد شعرة نازل على وجهة و مبلل قميصة مفتوح و صدرة الاحمر من الضرب طالع

دموعة الي ما تنشاف من ورة الورم بسبب البچي ، مهيب اهخ يا خويا حولت انظاري على اختي

ما بقالي غيرهم هذول اهلي ليش بابا ليش اركان عفتنا ليش اركان مو اختك انا ليش هيج خويا

اشوف ابوي و اخوي بتابوت ، ما حسيت بس على زمهرير طلعت وجهة ابوي متشوه !!!

ماكو ما مبين وجهة وين ملامحةةة هذا مو وجهة ابويييي ، غطا اجود ابوي وقتها انقطع تواصلي وي العالم

تقربت بهدوء و احس كل الاصوات سكنت ، ماكو احد ما جاي اسمع شي بس اشوف تابوت ابوي

شلت الكفن عنه و شفت وجهة ، تلمست ملامحة ، خليته يبتسم اي بابا دوم ابتسم حتى و انت ميت

گلت بصوت رايح
-بابا

غمضت عيوني و انا اتخيل ردة
-غزيل بنيتي الحلوة ، لا تبچين يبعد ابوچ لا ينزلن دميعاتچ يأذني بگبري كومي حبيبة سندي خيتچ ما بقالچن احد بس انتن اريدن وحدة تسند الثانية انا هسه بمكان حلو لا تخافين علية انا يم الي خلقني ها بويا ها بنيتي

رجعت اسمع الاصوات مرة ثانية ، صريخ نسوان ، غطيت وجهة ابوي و درت وجهي اشوف زمهرير واگعة ، شالها اجود يركض بيها ايديها نازلات و شالها فلت ، شالها الاسود وكع على الكاع

چانت مثل طير مذبوح ، ركضت وراهم و صعدت بالسيارة ، اجود حاط زمهرير بحضنة و اسمع يترجاها ما تموت ، اسمع صوتة و غصتة و هو يترجاها

اذا راحت زمهرير يعني انا انتهيت ، ما يبقى الي احد ، وصلنا للمستشفى طير ، شالها ركض و يصرخ على الموضفين يريد واحد يجي

حطوها بسدية و هو كله يرجف من فوگ لجوة ، ينكث نكث ، يفتر و يعيط ، راح للمدير مال المستشفى شوية و رجع و المدير وجهة اصفر على اخضر

كعد يمي و هو يقرة ايات و يستغفر و ما بقة شي ما گالة ، تاليها باوع عليه و گال و صوتة واحد راح يبجي ، يبلع ريگة حتى يسيطر
-انتو الشيعة مو عندكم قربان للامام علي اذا الي تردو انحل ؟

هزيت راسي بين دموعي الي ما وگفت من الصبح لهسه
-قربان مني لعلي اذا طلعت من هنا عايشة اروح لمرقدو و اذبح عجلين

دار وجهة و رجع كام يريد يعرف شصار ، لا ساعة و لا ساعتين و محد طلع ، ما اعرف شصار بأبوي و اخوي وين اخذوهم

بالي كله يم زمهرير ، و اجود وگفت المستشفى على تك رجل ، كلهم خايفين من اي حركة يسويها شنو مقامة بالدولة بحيث هيج مرجفهم ؟

و اخيرا طلع الدكتور ، كمشة اجود و هذا الدكتور صار وجهة ينطي اللوان من الخوف

گال الطبيب برجفة واضحة بصوتة
-سيدي هي هسه زينة اخذناها على غرفة بس صار عندها ذبحة صدرية لان بيها سكر ما تحملت ، اطرافها ما تگدر تحركهن لفترة ياريت تراعوها

اول ما خلص راد يفلت كمشة اجود
-كيف يعني ما فهمت ؟ ما تمشي بعذ ؟

-سيدي ارجوك مالي ذنب انا والله شبيدي و ما سويت ترى كلشي سويت والله سيدي اترجاك

استغفر اجود و مسح وجهة
-شبيك بابا ترجف ما گلت شي ترى بس سألت سؤال

عافة اجود و راح لغرفة زمهرير ، و انا كل هذا ما حچيت حرف احس صوتي رايح و لهسه احس الي صار كله حلم و راح اكعد و اسولفة لامي و تگلي ما متغطية عدل

چانت نفس المستشفى الي بيها امي و زمرد ، سألت عن امي طلعت بالعناية المركزة ، رحتلها بلكي تساعدني

اشوفها ملفوفة من كل مكان جهاز التنفس عليها
-ها ماما حبيبتي يلا گومي اجيت انا اريد غدة

ما جاوبتني

-ماما حبيبتي عمري انتي ترى جوعانة انا اليوم تعبت هواي گومي

هم ما جاوبت

-زين ماما انتي تحبين بابا اكثر صح ؟ راح تعوفينا و ترحين لبابا - شهگت بين دموعي - لا حبابة ماما لا تروحين حبابة

اي ماما حبابة فدوة ابوس ايدج لا تروحين ماما ترى تعبت انا ما اكدر گومي يلا ساعديني زمهرير تخربطت گومي اقري على راسها خطية اختي تعرفين ما تكدر تنام اذا گعدت بعد تتوجع و جسمها يتخدر

يلا يلحنينة گومي لبناتج وحدة عليلة بالفراش بينها و بين الموت شعرة و الثانية ما تدري وين تروح

ماما حبيبتي وين اروح انا ها ؟ اخواني واحد بالگبر و الثاني يدفنة خواتي وحدة نايمة يمچ ما تگعد و الثانية انذبح گلبها

ها ماما حبيبتي يلا گومي شوفي كل ما تنامين تصير مصيبة گومي اگعدي ينحلن يلا حبابة يلا ماما والله اجيب معدل عاليي و ادخل طب حاضر مثل ما تردين بس گعدي فدوة گومي

ها زمرد ولج رجلج اندفن ، هذا الي حبيتي خمس سنوات و ما لحگتي تتهنين بي ها خيتي ما عندج حظ سودة بوجهي

ما كدرت ابقى اكثر و انا اباعلهن و هنه نايمات اناشد امي و ما تگوملي عفتهن وراي و ظهري مكسور امشي و احس الدنيا كلها فوگاي

اول ما وصلت لغرفة زمهرير اسمع صوت بچي ، فتحت الباب شوية شفت اجود حاضنها و يبچي ، يبچي بحرگة !

—————————
للحكاية تكملة ......

التفاعل كلش نازل يمعودين على بختكم 😭😭
تابعوني تيك bluecordelea

علقو بين الفقرات و صوتوا على البارت و زيدوا التفاعل حبابون 🫶🏻