دياجير الغرام

البارت الثاني

مرت سنة ورة سنة و سنة ورة سنة كبرت زمهرير و لهسه ما ناسية تيم تحسه جزء منها ، كل يوم تروح للفرع تشوفة عسى و لعله يطلع موجود ماكو سنوات مرن و هي تنتظرة بفارغ الصبر و هو ما موجود ولا لمحت شي يدل هو عايش اتاكدت هو مات و عافها و صار شي بطفولتها

.
.
.
سديت دفتري و انا اسمع صوت امي تصيح بأسمي

-زمهرير زمهرير وينچ

-ها امي ها

-تعالي ماما انزلي سويت ريوگ تريگي وياي

اخذت نظرة على الكتب الي داير ما دايري تنهدت ، گمت من الكرسي و نزلت يم ماما ، گعدت على الكرسي مال ميز الطعام و گالت ماما

-ما تعبتي حبيبتي من الدراسة

-ماما هذا اخر امتحان كون ربي يسترها و اخلص تعبت كلش ماما احس جسمي كله متكسر ليمته اخلص السادس يربي طلع بلوة و مصيبة

-يخلص حبيبتي يخلص نفس الحچي اخوچ گالة و هذاك هو بعيادتة

-اسكتي يمه ابنچ يتنفس كتب و معادلات و الحقير اگله علمني يگلي سر المهنة

-انچبي لا تگولين عن اخوچ هيج

-مچذبة ها مچذبة انا بروح العباس شگد اقرة اريد نص من درجاتة ماكو ولا تگولين اخوي حتى ما يشبهني

-انتي طالعة على عمامچ

-شقصدچ شتلمحين

-اي ابني و بنتي حلوين علية شحلاتهم شعرهم سرح و عيونهم سود علية و بيض يخبلون

-و انا يمه بت البطة السودة لو من مرة رجلج الثانية

تقربت امي باستني و گالت

-انتي الروح و رية انتي فرحتي الچبيرة اموت عليچ

-لا لا واضح كلش

-ديلا ولچ اكلي و اصعدي كملي

-اوف يربي فضها و خلصني بجاه كلمن عنده جاه عندك

خلصت ريوگي طبعاً بالسادس صرت دبة بس اكل و ادرس و ابچي و النوب دموعي ما يخلصن كل شوية ابچي كل كلمة ما احفظها بچيت

يربي كون باچر امتحن و اخلص و اجاوب اففف دمي ينشف بالامتحان حتى الي حافظتة يطير ، تريكت و صعدت ركض اكمل

گاعدة احفظ خلصت تقريباً بقالي بس كم شي سمعت صوت فتحتة الباب اكيد بابا اجة ، نزلت ركض اجيت اوكع من الدرج بس تماسكت ، شفت بابا ركضت حضنتة

-بابا

-هلا بروح ابوها

-انطيني عنك بابا

-لا بوية عوفي ثگال تتعورين

-لا مو زين عليك انطيني

-دوخري ولچ اشوف امچ وينها