دياجير الغرام

البارت العاشر

أَشكو النَوى وَلَهُم مِن عَبرَتي عَجَبٌ
كَذاكَ كُنتُ وَما أَشكو سِوى الكَلَلِ
وَما صَبابَةُ مُشتاقٍ عَلى أَمَلٍ
مِنَ اللِقاءِ كَمُشتاقٍ بِلا أَمَلِ
وَالهَجرُ أَقتَلُ لي مِمّا أُراقِبُهُ
أَنا الغَريقُ فَما خَوفي مِنَ البَلَلِ
————————————
زمهرير /

مروا يومين سيئات بشكل مو طبيعي ، يومين ما شايفة ابوي ولا امي هذول الي ساعتين اذا ما شفتهم يضل بالي عليهم ، بس همه اي همه السبب همه سوو بيه كلشييي

كعدت هذني اليومين عند تغاريد ، عمو اديب حچة وي ابوي و هو بعدة قافل اتزوج يعني اتزوج

ليش ؟؟ ليش مصر لهدرجة ؟؟؟ زين ليش هسه ! بعد ما لگيتة ؟ معقولة صارلي فوك العشر سنوات انتظر تيم و لگيتة يجي ابوي هسه بكل بساطة يكول اتزوجي ؟

اركان موافق و مهيب ما ابدة اي رأي كل الي توقعتهم وياي صاروا ضدي كلهم من اخوتي لابوي ، هذول الي گلت يوگفون بوجهة الكل لخاطري تاليها وگفوا بوجهي لخاطر الكل

عمو جبر من سمع الي صار تخبل على ابوي و رايح متعارك ، و صاير غلط و ضرب ، ابوي متخربط و واكع ، احس گلبي موجر نار علية بس شبيدي ؟؟

شنو اسوي هسه ما اريد اتزوج هيج ولا بهذا الشخص ليش ابوي يجبرني ليييش هاي الي ما جاي افهمة

سديت الدفتر و نزلت من غرفة تغاريد ، لگيت تغاريد و امها گاعدات و يسولفن ، شافتني خالة ابتسمت
-هلا حبيبتي زمهرير شلونج

-خالة لا تسألين سؤال تعرفين اجابته

-تفائلوا بالخير تجدوه

-يا خير ها وين الخير

-ليش هيج تحجين يمه ؟

گالت يمه و احس جروحي انفتحت ، كابرت و ما نزلت دموعي ، اشرتلي اتقرب يمها گعدت و مسحت على راسي

-استخيري يمه و وافقي لا تخلين ابوج و امج بهيج موقف انتي شايفة حالهم ؟ ولج ابوج ما يندل دربة هسه هذيا گاعد يخابر بعمج ، كل خمس دقايق و مخابر يريد يسمع حسج ليش هيج تسوين بي ؟

-خالة ما اكدر اجبر روحي ما اريد اتزوج دراستي و مستقبلي و وظيفتي ، اريد اتخرج و اشتغل و اكون نفسي شلون اتزوج ؟؟

-يمه اسالج شي و جاوبيني بصراحة

هزيت راسي

-اكو يوم ابوج اذاج ؟ سوة شي و چان مو لمصلحتج ؟ زين امج ؟ برأيج توافق على شي يأذج ، خو كلنا نعرف عطيات عندها انتو من الدنيا خاصة انتي ما تذكرين شلون جابتج ؟ بيا ظرف ؟ هسه تفرط بيج ؟