Marham e ishq

Chapter 6

Tapti hui dhoop jab halki hui to poore din ki garmi bhula dene jitna sakoon tha aur dhoop ke jaate hi Eyila ko jese poore din ki thakawat ne gher liya tha. Sab se pehle use Hamia ki chout ne pareshan kiya to uske baad sab ke na rukne wale sawalaat ne jo ke us naye shaks ke mutallik the. Woh sab ko samjha samjha ke thak chuki thi ke naa hi woh uska shohar tha na hi uska boyfriend.

Magar sab baar baar is baat ka hawala dete ke Hamia usse bohat attached lagti thi. Aur sach to yeh tha ke Eyila bhi ab tak heran thi. Sirf Hamia pe nahi us lambe kad ke sakht tassuraat wale shaks per bhi.

Woh aisa lagta tha jese use duniya kisi cheez se kuch farak na parta tha naa hi bacho se na unki khuwaishaat se lekin woh aaj use heran kar gaya tha. Tassuraat ab bhi uske sakht the magar Hamia ko dekhne wali nigahon me kahin narmi thi. Ek apnayiyat thi.

Gaari ki pichli seat pe Hamish ke saath bethe woh uske chehre per nazar dale bagair reh na payi jo ke us waqt uske saath aage wali seat pe bethi Hamia ki kisi baat pe dihaan diye hue tha.

Zindagi me use lagta tha woh bohat se mukhtalif logon se mil chuki thi, achey bure ya phir bas insaano jese.

Magar woh mukhtalif tha un sab me se bhi. Aisa insaan tha jo use samjh nahi aata tha.

Gari jab ruki to Eyila apne khayalon se bhak se wapis nikli thi. Woh uski building ke bahir khare the.

"Zalaan aap aayen ge naa?"

Hamia ki us awaaz pe Eyila ne us taraf dekha phir apne saath sar lagaye soye hue Hamish ko dekha jo najane kan so gaya tha.

"Main koshish karun ga Hamia lekin promise nahi kar sakta"

Woh pur sakoon awaaz me use dekh ke bola aur uski seat belt kholi to Hamia ne aage ho ke dubara kaha. 

"Lekin promise kyun nahi kar rahe aap?? Mera first play he jisme main princess banun gi!"

"Kabhi aisa wada nahi karna chahiye Hamia jo aap poora na kar saken lekin maine kaha ke main koshish karun ga haina? Aur aksar koshish karne wale wada karne walo se ziyada apne irado me kamiyab hote hain"

Hamia uski shakal dekhti rahi jese use aadhi baat samjh aayi thi aur aadhi upar se guzar gayi thi magar Zalaan ke tassuraat se woh yeh andaaza laga liya tha ke woh uska dil nahi tore ga. Woh aage hui aur uske bazu ko apne nanne haatho se thaam ke muskura di.

"Thank you Zalaan!"

Peeche bethi Eyila bas dekhti reh gayi thi. Zalaan gari se utar kar Hamia wala darwaza khol ke use neeche utara aur phir uske peeche wale darwaze ko khola to Eyila ne use dekha ba mushkil halak me atke saans ko andar khencha tha.

Zalaan ne sote hue Hamish ko goud me utha liya jise Eyila uthane lagi thi magar woh gehri neend me tha.
Woh khamoshi se kuch kahe bagair utar gayi aur aage jaate Zalaan ko dekhti rahi jo seeriyon ki taraf ek baazu me Hamish ko uthae aur dusre haath me Hamia ka haath pakre hue tha.

Eyila ke dil ne jese shor dala tha. Ek bechaini ne use gher liya tha. Yeh sab galat tha. Jo uski zindagi me tha hi nahi woh us cheez ki aadat khud ko dalne bhi kyun de rahi thi?

"Aap theek hain?"

Us mardana awaaz pe woh phir ek baar apne khayalon se nikli thi aur aage ko apne crutches ke sahare chalne lagi.

Upar jab tak woh ponche to Hamish ko Zalaan uske kamre me laita chuka tha aur ab Hamia ki baat sun raha tha jo thakawat se aadhi neend me lag rahi thi. Eyila kitchen ke samne pari choti dining table ki kursi pe dhey ai gayi thi.

Jab woh wahan aaya tha aur uske samne khara hua.

"Hamia bhi so gayi hai"

Woh bola tha.