تنثر نجدها بصدٍ عني وفراقي صاداً عنها

Part-1

هل تسمعين أشواقي عندما أكون صامتاً؟
إن الصمت يا سيدتي هو أقوى أسلحتي..
هل شعرت بروعة الأشياء
التي أقولها عندما لا أقول شيئاً؟
فاتنٌ وجهك لكن في الهوى ليس
تكفي فتنة الوجه الجميل.
- نزار قباني-

. . . . . . . . . . . . . . . . . . .

يناظر ولد عمه بمرتبة "صديقه" بسخرية قايل :
تبي تقنعني الحين ان عمي راجع هنا بكل وجهه؟ جرب تقول نكتة غير ذي يرحم لي امك..
ولد عمه : اقول لا يكثر بس تراني جيت اقولك ماجيت عشان تتمسخر علي دز يشيخ..
كان قايم ومتوجهه للباب متنرفز من ولد عمه اللي مهو ماخذ الوضع بجدية ، قام الاخر ولحقه لبرا ، بدر مسك ولد عمه
من كتفه وقال : سلطان اسمعني..
سلطان بعصبية : ليش تبيني اسمعك عطني سبب واحد ي بدر هذا ثالث يوم وانا اقولك ان عمنا راجع هنا وجاي ويمكن يسكن عندنا كمان وانت قاعد تناظرني بنظرات تحسبني اكذب عليك ولا انكت يالحبيب تراني عندي اشغال اهم من اني انكت لك..
بدر يناظر سلطان بتفاجئ من انفعاله وردة فعله ،
بدر : سلطان تعرف اني م اقصد بس خلها بالعقل تكفى عمي اللي ماهو داري عن هوى امه ولا ابوه ولا اخوانه يجي بعد كل ذي السنوات؟ اذا انت رخمه بتقول جاي لانه مشتاق..
سلطان يناظر بدر بهدوء وهو اساسا صادق بكل كلمة يقولها ،
سلطان : للأسف الحين مافي وقت ان نخلي الموضوع ذا بالعقل ولا بجهنم المهم الزبد وان عمي جاي جاي..
بدر : جاي هو و أهله ولا بس لحاله؟
سلطان ضحك بسخرية من غباء بدر وقال : الله يساعدني ويساعدك على غبائك..
بدر بجدية : سلطان ماني بمازح ولا اني مستغبي قاعد اسأل منجدي..
سلطان : اقولك يمكن بيجي يسكن عندنا اكيد بيجيب أهله معه..
بدر : ياخي الموضوع ذا ماهو راضي يدخل راسي!!كيف الشيبة بيتقبل وجوده وكيف اعمامي بيتقبلون؟
سلطان : ترا غصباً عننا كلنا نتقبل محد له اي حق انه مايقبل على قولتك..
بدر يمثل الصُداع : خلاص قفل ابو الموضوع ذا صدع راسي حسبي الله عالعدو..
سلطان : اي والله تعال نروح المقلط عند القبيلة لا يقومون القيامة علينا..
ضحك بدر على الحقيقة المُره..
—————————————
بنفس الوقت بس ب مكان ثاني "الرياض"
الوالد "صالح" : انا قاعد اقولكم اللي بيصير ومو قاعد اخذ رأيكم اذا بنروح ولا لا..
رسيل : يُبه يعيوننا كلنا فهمنا بس وش السبب..
صالح بنفاذ صبر : تجهزوا بعد بكرة احنا منطلقين وقفلوا الموضوع..
الريم : على اي اساس؟
صالح : وشو؟!
الوالدة "أُميمة" : ماقالت شي..
الريم مالت رأسها لوالدتها وقالت : الا قلت شي ، اعادت رأسها لوالدها وقالت : تبي تغير عيشتنا مره وحده وتغير الناس اللي حوالينا عشان ناس مانعرفهم يُبه ذا ظلم اقسم بالله..
تنَهدتّ أُميمة بضجر من ابنتها اللي لاتستطيع عدم قول شي..
ناظر صالح لبنته لثواني بعدها قال : الناس اللي قولتك اننا مانعرفهم هم اهل ابوك اذا منتي مستوعبه استوعبي لان قريب بتشوفين نفسك متجمعه حواليهم..
خرج صالح من الصالة بهدوء..
رسيل : يُممممممه تكفين وش في ؟
أميمة : مافي شي ي بنيتي ب..
الريم قاطعت كلام والدتها وقالت بأنفعال :
الا يُمه في شي لا تسوقينها علينا وبنعرف وش ورا الوالد..
أميمة : انكتمي انتِ..
أمالت الريم فمها بحزن وهي تبعد انظارها عن امها واختها..
—————————————
الصباح ، الساعة : 30 : 9
بدر : تصدق ي عبدالرحمن اني مثلي مثلك ماني مستوعب..
سلطان : ي الله ي بدر عبدالرحمن يرحم لي امكم سكروا على السالفة ذي خلاص تقبلوا تراه جاي بكرة مع اهله..
عبدالرحمن : العم ذا مهو بهين جاي بعد كل ذي السنوات..
فواز بخُبث : احس عنده بنات مزيونات عشان اخذ لي وحده تلبي لي طلباتي ..
سلطان بأندفاع : استح على وجهك هذا والشنب مرسوم رسم لكنك منت برجال تفكر ببنات عمك ب ذي الطريقة!!
فواز : محسسني انك انت الرجال الحين!
سلطان : رجال ومن فوق خشمك وخشم اللي امثالك..
عبدالرحمن : خلاص اعتقوا الشر..
سلطان بهمس : استغفر الله العظيم..
فواز بعدم اكتفاء : لا تسوي فيها الشريف مردك بتتزوج..
سلطان ناظر فواز بنظرة مضحكة بسبب غباءه بعدها قال :
يالسبك انت قلتها بنفسك بتزوج يعني بتكون زوجتي واقدر اسوي اللي ابيه لكن انت قاعد تتكلم عن بنات عمك بكل قلة ادب..
فواز بسخرية : اقول تعال ادخل نيتي مابقى الا هي..
سلطان بأشمئزاز من سخريته : لا تكثر حَكيّك واقلب وجهك..
بدر مسك كتف سلطان وقال بهمس :
خلنا نطلع برا لاني باقي شوي وبفصل عليه السلق..
سلطان : افضل شي قلته من بداية جلستك اتمنى تكثر من هالحكي..
ضحك بدر وقال : اقول خلنا ننقلع بسرعة..
—————————————
بنفس الوقت ب "الرياض"
قاعده هي واختها بالبلكونه اللي بغرفتهم..
رسيل وهي تكسر الصمت اللي بينهم :
تكفين ي الريم وش اسوي؟ تتوقعين بيجي نواف يخطبني؟من هناك؟
الريم شمقت لاختها وهي قايلة : مو انتِ قلتي انه يموت عليك ومايقدر يتركك؟ خلاص لو ان شاء الله انتِ بسابع مكان بيجي يخطبك ولا منتي واثقه فيه؟
عضت رسيل شفتها السفلية بقلق بعدها قالت :
واثقه واثقه بس لو قلته اننا بنسكن بالبر يمكن يكنسل!
الريم قربت من اختها تطبطب عليها وقالت : لا تستعبطين ي حياتي اذا هو منجد يبيك بيجيك وثاني شي السكن بالبر مافيه شي تراني انا رافضه الفكرة بسبب عدم معرفتنا بأهل ابوي واني م ابي اترك صحباتي هنا ولا تفكرين ب ذا الموضوع خلاص..
رسيل وهي تحضن اختها بقوة :
اي ان شاء الله..
الريم وبادلتها الحضن وهي تفكر ليه ابوها قرر القرار ذا بيوم وليلة..
—————————————
بالمجلس عند "القبيلة" :
الشيبة "نايف" : من اللي بيجيب الذبيحة بكرة لصالح واهله؟
فواز بكذب : كان ودي اني انا اللي اجيبها بس بكون مشغول يالطيّب..
نايف : انت انكتم الله اعلم ب وش انت مشغول كل يوم ي شين الرجال امثالك بس..
بدر وسلطان كتموا ضحكتهم..
سلطان : خلاص سمّ وابشر يالغالي انا وبدر بكرة ان شاء الله جايبينها..
نايف : كفو هذا وليدي..
بدر يمثل الخيانة : افا يالشيبة توه يقول انا وبدر جحفلتني بسهولة زي كذا؟ ماهقيتها منك..
نايف بضحكة : ولا يهمك انت وليدي الكفو..
بدر وسلطان ضحكوا : والله ماخذينا الشي الكفو الا منك..
ابتسم لهم جدهم نايف وعيونه تلمع ، ولا كلمة ممكن توصف حبه لهلاثنين افضل حفايده من هم صغار لين كبروا الحين..
خرج فواز من المجلس بعصبية ولحقه عبدالرحمن ،
فواز بعصبية: شفت كيف فشلني قدامهم!!
عبدالرحمن : شدعوه ي فواز تتحسس من الشبية!
فواز : اي اتحسس ليش م اتحسس؟ انت ماتشوف تعامله مع سلطان السبك وبدر؟؟؟
عبدالرحمن : شفيك انت؟ انهبلت؟ منت صاحي وربي! قاعد تقارن نفسك فيهم ترا كلنا سواسية محد افضل من احد والشبية يحبنا كلنا حط ذا بعقلك المدمغ!
فواز بهمس : اي اي واضح..
عبدالرحمن : راجع لك بعد ما يرجع عقلك لمكانه..
سلطان وهو طالع من المجلس :
هذا وجهي اذا رجع مكانه..
فواز لف راسه لسلطان وبدر وسلطان عطاه ابتسامه سخريه له بعدها مشى عنه هو وبدر..
بدر بضحك : اتفق معك عقله ماهو براجع..
سلطان : عقله هارب منه مايبيه..
بدر : م الومه وربي..
ضحكوا وهم ماشيين لسيارة سلطان..
—————————————
بالليل الساعة 40 : 8 "الرياض"
صالح : جهزتوا نفسكم؟ ترانا متحركين الصباح..
الريم لم تتمالك نفسها وضحكت وهي تقول : لاتخاف ترانا مجهزين بس محنا مستعدين..
أُميمة : ابوك ماهو مهتم اذا استعديتي ولا لا..
الريم نزلت راسها بسبب تجمع دموعها بمحجرهما على تعامل والدها ووالدتها لها على الرغم من حبهم الكبير لها..
رسيل ترقع لاختها : لا مو قصدها كذا قصدها ان...
والدتها قاطعتها بقولها :
لا تتفلسفين انتِ الثانية علينا اختك مستسخره على ابوك انها تقول له اي او لا بس تحب اللف والدوران!
الريم رفعت راسها لوالدتها وقالت :
شخصيتي كذا واسلوبي كذا مثل ما انه ابوي مايهتم اذا استعدينا او لا ف انا عن نفسي م اهتم اذا ماتقبلتوا شخصيتي واسلوبي..
صالح يرفع سبابته على الريم ويقول :
الريم محنا اصغر عيالك تكلمينا ب ذا الاسلوب تفهمين؟!
الريم قامت وكانت رايحه الغرفة بس قبل لا تروح قالت :
طيب وانتوا؟عاملتونا كأننا دمى عندكم ماعطيتونا اهمية ولا خذيتوا رأينا اننا رايحين نسكن بالبر على اساس من اول يوم بنتقبل وانت عارف ان اهلك غير عننا كلياً!!!
الريم طلعت غرفتها هي ورسيل وقفلت الباب بقوة..
—————————————
بنفس الوقت عند "سلطان وبدر"
بدر : يالاخ وش فيك من الظهر وانت مبرطم منت راضي تسولف!
سلطان بضيق : متضايق ي بدر وربي اني متضايق حيييييييل!!
بدر وهو يذكره بأغنيتهم : "تعال لبعضنا نشكي ونترك هالحنين يسود"
سلطان وهو مبتسم : "مادامه بالهوى وضعك يشابه حيل اوضاعي"
بدر : "تعبنا نخفي الدمعة عشان العيب والمنقول"
بدر : وش العلم وش صاير وش اللي مخليك متضايق لذي الدرجة اسلم؟!
سلطان : امي امي الا والا تبيني اتزوج بنت عمي وائل وانا ما ابي والمشكلة انها بتحكي لعمتي وبتخلي الفكرة براسها وانا حتى ماقلت كلمة عن الموضوع ذا ولا اني معطيه اهمية وامي ماهي ماخذه برأيي! كلمتها اليوم اني م ابغى وقالت الا بتتزوج بنت عمك يعني بتتزوج! وانا خلاص انهد حيلي م ابي اتكلم عن الموضوع ذا اكثر..
بدر وضع يده بظهر سلطان يطبطب عليه بعدها قال :
هي تبي تفرح فيك من كذا مستعجلة مرهه واذا انت منجد ماتبي خلاص سلك لها ولاتعطيها إجابة لين م امك تمل..
سلطان بمزح : اساسا انا قلت لها اني ماني بمتزوج الا وبدر معرس قبلي!
بدر بصدمة : نعم يالسخيف والله تخسي وتعقب ماني متزوج الا معك!
سلطان : وشو حتى بعرسي بتنشب لي؟
بدر : مو بس بعرسك الا طول حياتك..
سلطان : انكتم والله لو انك زوجتي ماخليتها تكون معي طول حياتي!
بدر : بس انا مو زوجتك..
سلطان ضحك : انطم شوي وخلنا نغير موضوع الزواج التافهه هذا..
—————————————
ب نفس الوقت عند "الحريم"
ام سلطان "عبير" : الا وشو من بيساعدني بطبخ الذبيحة؟
ام بدر "حصة" : ابشري انا اول وحده..
ابتسمت عبير لحصة..
ام فواز وعبدالرحمن "مريم" : من بيجيب الذبيحة؟
عبير : وليدي وبدر..
مريم : وليه فواز وعبدالرحمن مايجيبون معاهم؟!
حصة : ماهم عيالك روحي اسأليهم بنفسك..
تنهدت مريم بضيق من عيالها!
—————————————
الصباح الساعة 00 : 10 "الرياض"
رسيل : الريم البسي عبايتك ابوي قال يلا..
قامت الريم من سريرها ولبست العباية وحطت الطرحة على نص راسها وخذت شناطها وطلعت برا الغرفة ونزلت تحت..
شافتهم الريم مجتمعين بالصالة ابوها طالع وداخل لانه يحط الشنط بالسيارة..
الريم : من هنا لنجد مو وقت كثير صح؟
رسيل : اي
صالح ناداهم وطلعوا برا وركبوا السيارة..
الريم ورسيل يناظرون بيتهم ويودعونه بنظراتهم البريئة وهم عارفين ان بيتهم وكل شي فيه والرياض بكبرها بتوحشهم كثير!!!!!!!
—————————————
انتهى الفصل 1 !
البارت قصير لانه فقط البارت الاول❤️.
"1578" ✍🏼 : كلمة
ان شاء الله تكون بدايةً موفقة للرواية من كل النواحي..
اي نقد اي تعليق التعليقات مفتوحه لكم واقبل النقد مافي اي مشكلة لان يمكن النقد يحسن من مهارتي بالكتابة..
-
لا تنسون التصويت والتعليقات الحلوه🤎.