زهو عُمرك سجَّان وِجداني !

٢٩

مكتب المحامي معاذ ..

محد منهم كان مستوعب اللي صار لأنيس ومين خطفه وليه رجعه وستين سؤال في رأسهم لحظة مانطق معاذ : اظن ان أَسِيف يعرفهم واضح متعامل مع ناس مامنهم امان
ليردف راكان بعده : تدري بديت افهم ليه يبعدنا عنه بس اللي ما فهمته هو وش يشتغل !
اشار معاذ اكتافه بعدم معرفه وسرعان مانطق بتذكر : راكان تحس اني مريض نفسي ؟
عقد حجاجه راكان باستغراب نطق : هو انت نفسيه ما اختلفنا بس ماتوصل مريض نفسي !
ليردف مُعاذ باصرار : ما امزح معك ماتحس اني احتاج اتعالج ؟ عندك خبرة بأعراض المرض ؟
سكت راكان بريبه يفكر ونطق بتذكر : كان معي خويّ تعبان ومتشائم ويكره الدنيا والناس وقطع علاقاته كلها وبدأ يفكر حتى بالموت وطلع بعدها مريض نفسي وتعالج
اكمل بتساؤل : ليه تسأل ؟
حك جبينه بتفكير في اللي بباله رن جوال راكان ورد بلهفه يسمع علاء ينطق : تعال البيت انتظرك
وقفه يرد بعجله : مسافه طريق وانا عندك
واخذ اغراضه وطلع بسرعه ..

بيت ابو راكان ..

كان يحاول يجمعهم سوا يبيهم يتفاهمون قبل مايعلم اهله بقرار جوري ، ابتسم يشوفها تدخل معها قهوتين وبتساؤل : اكيد وراك شيء ليه تبينا نتقهوى ؟
ابتسم بهدوء وترقب رفع رأسه لرسالة راكان انه برا ووقف يطلع بعد مانطق : دقايق وايجيك
طلع وهو يشوفه قدامه ونطق : اسمع لاجل غلاتك عندي كذبت عليها انت ماتبي تقول لي وش صار بس دموع اختي يوضح ان اللي صار كبير
تنهد وهو يكمل : تلقاها بالمجلس بس اذا بكت وماتبي تسمع منك تطلع علطول فاهم ؟؟
اشار رأسه بالايجاب بتكرار واشار له علاء للمجلس ووقف يشوفه يمشي له ..

كانت ترسل للبنات ان لازم يلتقون تحتاج تتكلم وقفلت ساهيه بيدها كوب القهوة تحركه بهدوء ، رفعت نظرها وقت استشعرت وقوف شخص والتقت عيونه بعيونها وشدت على يدها بقوة تشتم علاء لانه وضعها في موقف تهرب منه من وقت ، تهرب لانها تحاول تقنع نفسها انها ماتحبه ولا صار بينهم مشاعر بس هاللحظة بذات سكن الموج عيونها وزاد نبضها وأدركت ان كل هالغضب من زود حبها ، ميّل رأسه بتعب وقت شاف صدها وهي تبعد نظرها ماوده يظهر ابوه بصوره سيئه وتصير تكره ابوه بس يبي يفهمها انه مايهمه احد بهالدنيا كثرها ..!

جلس بجنبها بهدوء يشوفها تناظر القهوة وهمس : ليه كل ما جيتك من باب قفلتيه بوجهي ؟
خرجت عن صمتها بنبرة تحاول فيها ماتبكي: لان مابيك تيجي
تنهد بضيق مكبوت ومغبون مو عارف وش يقول : جوري اسمعيني ..!
بكت وهي ترفع نظرها له بحرقه : وش اسمع ؟ سمعتكم انا سمعت كل شيء دخلت على طمع ..!
مقدر يستحمل كلمتها ووقف بغضب : سمعتي ابوي يتكلم بس ما سمعتيني انا !!
ضحكت باستهزاء توقف قباله وموج عيونها هائج : اذا هذا تفكير الاب كيف بيكون تفكير الولد ؟
بكت بشدة وهي تشوفه قدامها وهمست : تكفى راكان روح مابي اكرهك ..!
وقبل مايسمع كلمه احبك منها سمع كلمه اكرهك اللي هزت ضلوعه و دموعها اللي اهلكته وهي تردد : خليتني احس اني اتخذت اكبر غلط بحياتي وعيشتني في الهوى يومين و مشيت ؟ وش بقى اكثر من اللي سمعته ..!
تنهد يتقدم لها يوجعه منظرها قدامه : كثير ماسمعتيه وكثير اشياء تجهلينها ..!
تراجعت بخطواتها للخلف تهمس : مابقى مكان لوجع ثاني
وطلعت بعجله رغم محاولته انها تبقى ويمسكها سبقته بخروجها وهي تبكي ..
دخل علاء وقت شافها تمشي بعجلة طالعه فوق مقدر يوقفها رغم نداءه لها ، التفت لراكان اللي واقف بشرود يفكر حائر ماوده يظهر ابوه بصوره سيئة تأثر على علاقتهم ولا وده تشوفه بصورة سيئه كذا ولا عطته فرصه يتكلم و يبرر ، نطق علاء بعدها يناظر له : عليم الله ودي اكسر رأسك بس نجاتك اني مادري وش حصل بينكم
اقترب منه راكان ونطق : اكسره تكفى اكسره
تنهد علاء يجهل كل شيء وطلع راكان وهمس: وش صابهم ؟ عين ما صلت على النبي اي بالله