အမျိုးသားခုနစ်ယောက်ကို ချစ်ခွင့်ပန်ရမယ်တဲ့..! ဘယ်လိုလုပ်ရမလဲ..? [ 2 ]

242

Unicode

ဒီကောင်တွေ.. ပွဲမတိုင်ခင် လူကို ပြန်ပေးဆွဲမလို့ ကြိုရောက်လာကြတာလား..?

ခြူးမုယွင်တစ်ယောက် ဆွံ့အ,သွားရသည်။

ရှဲ့ချင်းလန်က ကျန်နှစ်ယောက်ကို လုံးဝဂရုမစိုက်ဘဲ ခြူးမုယွင်ကိုသာ မမှိတ်မသုန် စိုက်ကြည့်နေလေ၏။

“အား.. ယွင်…”

ခြူးမုယွင်က သူနှင့် စကားမပြောချင်ပေ။

ရှဲ့ချင်းလန်သည် ကိုယ့်ကိုယ်ကို သေကြောင်းကြံ(လူမုန်းခံ)ရာ၌ အတော်လေး ကျွမ်းကျင်ပေ၏။

“လွန်ခဲ့တဲ့ သုံးလလောက်က မင်းပဲမလား..?”

ထိုစကားကြောင့် ရှန်ရွှိန်ယန်းက ရှဲ့ချင်းလန်ကို ဆတ်ခနဲ လှည့်ကြည့်လာသည်။ ရန်ချန်းက အေးတိအေးစက် မျက်နှာထားဖြင့် တည်ငြိမ်နေသော်ငြား သေသေချာချာ အကဲခတ်ကြည့်လျှင် သူ၏ မျက်ခုံးတန်းများ မသိမသာ တွန့်ကွေးသွားသည်ကို မြင်နိုင်ပေလိမ့်မည်။

ရှဲ့ချင်းလန်၏ အသံက စကားချိုချိုလေးများနှင့် အထူးသင့်လျော်သည်။ စကားပြောလိုက်ရုံဖြင့် အချစ်ရိပ်များ လွှမ်းမိုးနေသယောင် ထင်မှတ်ရသည်။

“မင်း ကိုယ့်အတွက် ထပ်သေသွားတာကို အဲ့လိုမျိုး ထိုင်ကြည့်နေရမယ့်အစား ချီဖောက်ပြန်ပြီးသာ ရူးသွားချင်တယ်..”

ဤတစ်ခေါက်တော့ ရှန်ရွှိန်ယန်း ပေါက်ကွဲချေပြီ။

လွန်ခဲ့သော နှစ်လေးထောင်ခန့်က ခြူးမုယွင်သည် ရှဲ့ချင်းလန်၏ အသက်ကို ကယ်တင်ရန်အလို့ငှာ သူ့ကိုယ်သူ စတေးသွားခဲ့၏။ ထိုဖြစ်ရပ်က ရှန်ရွှိန်ယန်း၏ နှလုံးအိမ်ထဲတွင် အဖုအထစ်ဖြစ်နေပြီး ဘယ်သောအခါမှ မချေဖျက်နိုင်ခဲ့‌ချေ။ သို့သော် ယခုလည်း…

သူ မသိလိုက်ခင်မှာ ခြူးမုယွင်က ရှဲ့ချင်းလန်အတွက် ထပ်သေပေးခဲ့ပြန်တာလား..?

ခြူးမုယွင်လည်း ခေါင်းကိုက်လာရသည်။

ရှဲ့ချင်းလန်က စက္ကန့်ပိုင်းအတွင်း သူ့ကိုယ်သူ ပွဲကြည့်ပရိသတ်အဖြစ်ကနေ အဓိကဇာတ်ကောင်နေရာကို ပြောင်းပစ်လိုက်တာပဲ။ ဒါမှမဟုတ် နှစ်ယောက်တစ်ယောက် တိုက်ချင်နေတဲ့ Tank အရူးကောင်လို့ ပြောရမလား။ ရှဲ့ချင်းလန်.. မင်း ဒီကို မီးလောင်ရာ လေပင့်မလို့ ရောက်လာတာလား..? ဒါမှမဟုတ် မင်းရဲ့ခေါင်းကို မလိုချင်တော့လား..?