အမျိုးသားခုနစ်ယောက်ကို ချစ်ခွင့်ပန်ရမယ်တဲ့..! ဘယ်လိုလုပ်ရမလဲ..? [ 2 ]

272

Unicode

ကျင့်ကြံဆင့် အလွန်မြင့်မားတာလည်း တစ်မျိုးကောင်းပေ၏။ ပင်ကိုဗီဇ၊ ရုပ်ရည်နှင့် အဝတ်အစားအပြင်အဆင်ကို စက္ကန့်ပိုင်းအတွင်း ပြောင်းလဲပစ်နိုင်သည်။

သို့သော် မြင်ယောင်ကြည့်ကြပါစို့။ ဥပမာ ရှန်ရွှိန်ယန်းနှင့် မော့ကျိုးရှောင်၏ အလှရသပိုင်းဆိုင်ရာခံစားချက်က လုံးဝဆန့်ကျင်ဘက်ပင်။ တစ်ယောက်က တောက်ပထည်ဝါစွာ ဝတ်စားနေထိုင်တတ်ပြီး တစ်ယောက်က ပေါ့ပါးကြော့ရှင်းစွာ ဝတ်စားနေထိုင်သည်။ ခြူးမုယွင်၏ရင်ထဲ တစ်ချက်လှုပ်ရှားသွားပြီး ရှန်ရွှိန်ယန်း၏ ဝတ်ပုံစားပုံနဲ့ မော့ကျိုးရှောင်၏ မျက်နှာကို တွဲဖက်မြင်ယောင်ကြည့်လိုက်သောအခါ…

မရတော့ဘူး.. ရယ်ချင်လာပြီ..!

ခြူးမုယွင်က ချောင်းဟန့်ကာ သူ၏အရှေ့မှ အနက်ရောင်ဝတ်အမျိုးသားကို မော့ကြည့်လိုက်သည်။

မော့ကျိုးရှောင်သည် အရောင်ဖျော့ဖျော့အဝတ်အစားများသာ ဝတ်ဆင်တတ်၏။ သို့သော် ရန်ချန်းကတော့ အနက်ရောင်ထင်းထင်း ဝတ်ဆင်ပြီး အသားအရေ ဖြူဖျော့သည်။ ခရမ်းရောင်မျက်ဝန်းများကလည်း အလွန်လှပသည်။ ထိုသို့ ဖြူဖျော့လှပသော အသွင်အပြင်နှင့် ဆန့်ကျင်လျက် နက်မှောင်‌သော အဝတ်အစားကြောင့် သူ၏ပုံစံက အေးတိအေးစက်ဖြင့် ချဉ်းကပ်ရခက်ဟန် ထင်ရသည်။ အထူးသဖြင့် နှုတ်ခမ်းပါးများ မသိမသာ ကော့တက်သွားချိန် ထိုအပြုံးထဲတွင် သွေးအေးရက်စက်မှုတချို့ ထင်ဟပ်နေတော့သည်။

ခြူးမုယွင်က သူ့ကို မကြောက်ပေ။ ထိုအစား စိတ်မကောင်းဖြစ်မိသည်။

မော့ကျိုးရှောင်၏ လုပ်ရပ်ကြောင့် ရန်ချန်းသည် ပထမဦးဆုံး အေးစက်စိမ်းကားစွာ ဆက်ဆံခံခဲ့ရ၏။ လူတစ်ယောက်ကို နှစ်ပေါင်းများစွာ မျှော်လင့်စောင့်စားခဲ့ရသဖြင့် သူ၏ အတွင်းစိတ်ခံစားချက်တွင် စိတ်မချမှုများ၊ ယုံမှားသံသယများ ဖြစ်တည်လာရသည်။ မသိစိတ်ထဲတွင် မော့ကျိုးရှောင်၏ မှတ်ဉာဏ်များ စွဲထင်နေသဖြင့် ခြူးမုယွင်ဟူသည် ကြင်နာနွေးထွေးတတ်သူဖြစ်ကြောင်း ခပ်ရေးရေးလေး ခံစားသိနေသည်။ သို့ဖြစ်ရာ သူ့အလှည့်ကျမှ အဘယ်ကြောင့် ဤသို့ဆက်ဆံခံနေရသနည်း။