انتهى الشوط الاول بتعادل السلبي وبدا الشوط الثاني في الدقيقه ٦٠ لاعب الاتحاد كان بيسجل هدف لكن تصدى له متعب تصدي قوي واللي تسبب في سقوطه ب ارض الملعب فزوا اللاعبين له وحتى لاعبين الدكه دخلوا الطاقم حاولو يرفعونه ماقدروا كان ماسك ركبته من ورا ويضرب الارض بيده الثانيه من قوة الالم اعلنوا وقتها خروج اللاعب متعب المفرج من الملعب على الحماله توتروا لاعبين الهلال
في الدقيقه ٧٠ دخل المدرب صالح اللي قام بحماس وكل تفكيره انه يثبت نفسه ويسجل اليوم
في الدقيقه ٧٥ اطلقت صفارة الحكم معلنه الهدف الاول للهلال اللي كان من اللاعب صالح الشهري ركض صالح بكل قوته وسجد شكر وقام يسوي احتفاليته واللاعبين معه كملوا لعب
وفي الدقيقه٩٠ سجلوا الاتحاد هدف التعادل عصبوا الجمهور واللاعبين تنرفزوا كملوا لعبهم بشكل هجومي وصار فيه ١٠ دقائق اضافيه في الدقيقه ٩٩ سجل ميشيل الهدف الثاني وصفر الحكم معلن فوز الهلال احتفلوا اللاعبين وجاء وقت التكريم يصعدون لغرفة التكريم لمح صالح بوحمد ومحمد اللي فرحانين ويناقزون له اشر لهم بفرحه وصعد استلم ميدليته ونزل تحت يصور ويحتفل مع اللاعبين طلع بعدها معه شناطه وكانوا محمد وبوحمد ب استقباله برا اول ماطلعوا حضنه محمد بقوه وصرخ بكل صوته:مبببببرووكككك صلوح حققتهاا حققتت اخر بطوله لك مع الهلال وبهدف منك
صالح بضحك وهو يحضنه بكل يدينه : اه اي والله حققتها مابغت تجي الحمدلله
بوحمد : وخخرا انت خلني احضنه وابارك له
وخر محمد وبوحمد حضن صالح وطبطب على ظهر : الف مبروكك ياحبيب اخوك وعقبال النجاحات الجايه صالح : الله يبارك فيك ياحبيبي ان شاء الله
محمد: بهذي المناسبه انا عازمكم على العشاء وهم بطريقهم للعشاء ارسل صالح بالقروب
صالح : عيال عندكم اخبار عن متعب ؟
ارسل له مايرد ياسر :لا والله ماسمعت عنه شي حتى فهد ماقال لنا شي وكان موجود معنا
علي : احسها رباط واضح كان يتألم مره
صالح : لا ان شاء الله المهم اللي يعرف شي يبلغني راحوا تعشوا وهم جالسين
محمد : هيه لا تنسون ترا بكره طيارتنا لرياض بملك هناك وانتم لازم تكونون موجودين وشهود
صالح بلع لقمته بصعوبه وبوحمد ناظر فيه ولف ناظر محمد : وانت وش عندك مستعجل اهجد شوي محمد : ياحبيبي انا مضبط اموري ومتفق مع لمى واهلها على كل شي الملكه بكره والعرس بعد شهر كملوا عشاهم وقام محمد ولف عليه
بوحمد : روح بسيارتك محمد صالح بيروح معي
م اهتم محمد كثير يعرف بوحمد وصالح يحبون يجلسون لحالهم طلعوا وركب صالح مع بوحمد
بوحمد : بتتكلم وتقول شفيك ولا؟
صالح : وش ماعندي شي اقوله
بوحمد : لا تكذب علي وجههك مو عاجبني كم له اعترف
صالح تنهد وقال كل السالفه لبوحمد اللي من صدمة اللي سمعه وقف على جنب
بوحمد: اللي تقوله صادق فيه؟ تحببب زوجة اخوك صالح تنرفز ولف عليه : تسسستهبل وش تقول انت اقولك حبيتها قببببببله افهم بس هو اعترف قبلي بديت فرحته على فرحتي ماقدرت اكسره واقوله
بوحمد سكت شوي يستوعب اللي يسمعه : اسمع انساها خلاص البنت بتصير حرمة اخوك وعيب وحرام تفكر فيها
صالح : هذا اللي احاول اسويه بس ماني قادر عجزت عجزت اطلعها من راسي
بوحمد : بتقدر بتقدر اذا حاولت بتلقى غيرها تحبها بس محمد لا يحس بشي
تنهد صالح ولف راسه لدريشه وهو يعض اصابعه وصلت رساله واللي كانت رد من متعب
متعب : هلا ياحبيبي خفايف ان شاء الله يقول تمزق بس بكره بسوي اشعه
صالح : الف سلامه عليك تعدي ان شاء الله ماعليك خلاف
رجعوا لرياض وملك محمد وانشغلوا بتجهيزات العرس بالرياض حتى صالح بدا يشغل نفسه غصب معهم جاء يوم الزواج صالح مع محمد اللي يجهز بالغرفه والفرحه ماهي شايلته
محمد : ياعيال ماني مستوعب احسني احلم للحين بوحمد : يارجال ماهو وقت حلمك اخلص ابوك بيذبحنا وراك تصوير
صالح اللي قام يدافع عن اخوه : انت وش تبي فيه خله على راحته بس انت استعجل بعد المصور برا طلعوا للمصور وبدا يصور التفاصيل
المصور : انا احتاج واحد يجي من وراه وكأنه بيلبسه البشت
صالح : اكيد اخوه الكبير اللي بيلبسه لو احد يلبسه بشته بعرسه غيري ذبحتهم ضحكوا وبذات محمد اللي تذكر كلام صالح وهم صغار ويلعبون انهم معرسين "حمود ترا انا اللي بلبسك بشتك يوم عرسك مو ابوي"وصدق سواها صالح كان بوحمد يناظر فيهم وبذات صالح صديقه اللي حاس بكمية الحرب اللي داخله الحين
زفوا محمد واخذ لمى ومشى بعد مامشى محمد استوعب بوحمد ان الكل موجود الا صالح راح ودوره وحصله لكن ماتوقع المنظر اللي يشوفه صالح يدخن وبشراهه!!!!!! كأنه يبي يدخل النار لجوفه صالح اللي ترك التدخين من سنوات طويله وكرهه رجع يدخن اليوم!! وش النار اللي مولعه بقلبه؟؟ركض بوحمد وسحب السيجاره من بين اصابع صالح ورماها بعيد وبصراخ بوحمد : انهبلتتتت انت انهبلتتتت من متى رجعتتت تدخن؟؟؟ابوك لو شاف بيذبحككك يامجنون كل هذا علشانها تحرق نفسك علشان بنت مادرت عنك وفوقها صارت زوجة اخوك تجردت انت من الرجوله؟؟؟
صالح ناظر فيه ونزل نظره : خلصت؟
سكتوا كلهم ماينسمع غير اصوات نفسهم صالح لا ارادي فجاه ضرب التراب بيده ونثره بجنون حوالينه صالح : وشششش اسسسوي وششش اسووييي يعنييييي "وقام يفك ازارير ياقته بقوه ويتنفس بثقل وعيونه تصب دموع" لييييتنييي متتت ليتننننييي متت ولا اخذها رجال ثانييي اهون علي من ان اخوي ياخذه وقام يشهق بصوت عالي وكأن النفس انقطع عنده نزل بوحمد له بسرعه ولم راسه على صدره اول مره يشوف صالح بهذا المنظر استشعر قهر الرجال اللي تعوذ منه الرسول
بوحمد : تعوذ من الشيطان وانا اخوك استهدي بالله خلاص انساها البنت صارت زوجة اخوك وانت ربي بيعوضك ويرزقك غيرها
صالح : عجزت عجزت اول مره احسني ضعيف ماني قادر اسوي شي لا انا قادر انساها ولا انا قادر اخذها ياليتني ماشفتها ولا حبيتها ذنب وارتكبته بنفسي
سكت بوحمد ولا سوا غير انه قوم صالح معه واخذه معه لشقتهم وكلم ابوصالح وقاله ان صالح تعب من الوقفه مع محمد ورجعه معه بعد يومين رجعوا صالح واهله لجده لانه عنده شغل هناك مع نادي الاهلي والعقد اللي وصله منهم وهو جالس بالصاله مع امه
وابوه م استوعب الا اخوه محمد داخل مع الباب ويده بيد زوجته اللي هي لمى قامت امه تهلي وترحب بلمى وابوه كذالك ومحمد ولمى يسلمون عليهم
محمد : بوصلوح شفيك علامك متنح ياولد سلم م اشتقت لي صالح اللي اخيراً استوعب
ووخر عيونه عن لمى : هلا هلا بالعريس نورتوا وحضنه
اجلسوا ولمى من الاحترام سلمت بصوت واطي ومن بعيد على صالح اللي طنشها وجلس وهي راحت جلسة جنب محمد اللي ناظر فيها وابتسم ومسك يدها وكل ذا تحت انظار صالح
خالد: وش هالمفاجأه يامحمد ماعطيتونا خبر
محمد : والله حبينا نسويها لكم مفاجأة وحطينا طيارتنا من الرياض لجدة نجلس عندكم شوي ثم نطير من مطار جده للبوسنا باليل
نورة :والله انها احلى مفاجاة يامك اخبارك يالمى واخبار محمد معك
لمى : والله الحمدلله بخير ياعمه دامكم بخير اما محمد مايقصر معي
خالد : انتي الحين مثل بنتي ان زعلك ولا سوالك شي بس علميني وانا اوريه شغله
ضحكت لمى : لا ان شاء الله مايصير شي بس اذا صار بجيك
محمد : لا والله صارت فيه احزاب علي واتفاقات
نورة : مافيه دايم مرت الولد اغلى من الولد
صالح ماقدر يتحمل اكثر قام وطلع
ولحقه محمد : صالح
وقف صالح وهو قرب منه شفيك ليه طلعت؟
صالح ابتسم : مافيني شي بس قلت بطلع علشان مرتك تاخذ راحتها وتفتش
محمد : عادي ترا لمى متعوده على الجو هذا تجلس مع نايف واهلها من امها بنقابها
صالح : حتى ولو الحين جايه من سفر وانا بعد مواعد ناصر برا ينتظرني
محمد : زين براحتك المهم خلني اشوفك قبل اروح المطار
صالح : متى بتمشون
محمد : ٨ ان شاء الله لان طيارتنا ١٠:٣٠
صالح : على خير
طلع صالح اللي ماكان متواعد مع ناصر ولا شي بس ماهو متحمل يشوف لمى ومحمد طلع يفر بسيارته لما جات الساعه ٧:٥٠ وصل لبيتهم وكان على طلعت محمد ولمى من البيت محمد وهو معصب: بدري كان انتظرتنا نطير !!
صالح وهو يحاول يضحك ويلطف الجو : والله اسف بس تعرفني انا وناصر لتقابلنا خذلك سوالف وننسى الوقت وحضنه حظن قوي تروحون وترجعون بسلامه انتبه لك ولزوجتك
محمد : الله يسلمك وانت بعد ياويلك تسافر بدوني انتظرني ارجع
صالح : وش تبي فيني ياادمي اعتقني خلني اتنفس بدونك
وخر عنه وركب محمد ولمى وصالح دخل عند اهله خالد : زين لحقت على اخوك مدري متى تترك الرباده اخوك جاي هو ومرته وانت طالع ساحب عليه
صالح : يبه انا طلعت علشان زوجته تاخذ راحتها وحمود لاحق اسلم عليه
خالد : اقول وش صار على عرض الاهلي وقعت؟ صالح : لا لاني برفض
نوره : ليه !!!!
صالح بكذب :صراحه المفاوضين ماعجبني تعاملهم وكأنهم مقدمين العرض غصب عنهم
نورة : يامك ماعليك منهم طنشهم اهم شي النادي زين ومعروف وغير كذا عندنا قريب مننا ترجع تسكن معنا
صالح : حتى انا يمه كان نفسي ارجع واسكن معكم ذبحتني الوحده بس حتى م ابي اضيع تعبي كله
خالد: طيب الهلال قدموا لك شي؟
صالح : اي طلبوا مني استمر معهم والمدرب م اعترض على استمراري مع الفريق
خالد : أجل توكل على الله وارجع لناديك اللي معروف وتحقق معه بطولات واذا على الوحده انت رجال متعود عليها
هز راسه صالح : هذا اللي بيصير برفض عرض الاهلي وبستمر بنادي " صالح كان يسوي كل ذا لانه مو متحمل يشوف لمى طول اليوم قدامه اذا سكن بجده قرر يتنازل عن كل شي ولا يشوفها"
مرت الاحداث عاديه لمى ومحمد رجعوا لجدة وصالح رجع لرياض وكمل حياته هناك قبل بداية الترم بشهرين وصل الكل خبر حمل لمى وفرحوا كل العائلتين اتصل محمد بفرحه يبشر صالح اللي قلبه كان بصراع مابين فرحان لاخوه وزعلان على نفسه وزعلان على تفكيره اللي يقوله ان الولد ذا المفروض ولده بدت المعسكرات وسافر صالح لنمسا اما لمى تعبت من حملها وبما ان اوراق تحويلها لجامعة جدة ماخلصت حست ان هذي رساله من ربي انها تأجل الترم هذا لما تولد وترتاح
صالح انشغل بالمعسكر والمباريات وهو طالع من مباراه وديه جاه اتصال وكان محمد صالح : هلا والله حمود اخبا... محمد بصراخ : صرتتتت ابببو صرتتت ابو خالد جاء
صالح انصدم ووقف مكانه: كيفف؟لمى ماوصلت التاسع!!!
محمد : ولدت ولاده مبكره بسبب هزل جسمها لكن الحمدلله هي وخالد الصغير بخييير
صالح بفرحه : الحمدلله على سلامتهم والف مبروك ياحبيبي اخيراً نورنا خالد صوره لي تكفى طلبه محمد محمد : بدون لا تقول وصلتك صورته واتس شيك فتح صالح الواتس وشاف محمد اخوه وبحضنه ولده خالد وماسك اصبع ابوه الصغير نزلت دموعه كلهم الاثنين كانوا يستحقون انه يدعس قلبه علشانهم
صوته بحشرجه : حمود صغير مره
محمد : صدقني الواقع اصغر عجزت اتركه بس اناظر فيه ماني مصدق هذا ولدي ياجعلني اشوفه يكبر قدام عيني
صالح : اللهم امين ويرزقك بره ياحبيبي يالله حمود اكلمك بعدين المدرب بيجتمع فينا وقفل ورجع طلعت لمى لبيت عمتها لانها ولدت مبكر ماكان يمديها تروح الرياض بتجلس اسبوع وامها معها وبعدها بتروح لرياض عند محمد ولمى بغرفة لمى الخاصه تحت لمى بتأفف : محمد يوه منك خلاص ماتعبت وانت تبوسه؟؟ محمد : تغارين اعترفي خلاص بتركه وببوسك انتي وخر ولده وتقدم لها دفته
لمى : لا لا وخر جسمي تعبان ويعورني وفر بوساتك ولدك طلع عيني
محمد :ياليل ولدي المسكين اللي بتحطين كل شي فوق راسه
لمى : اتركه الحين وروح جيب الرضاعه اللي قلت لك عنها حقت الغازات برضعه تعبني
محمد : رغم ان الوقت متأخر بس الشكوى لله طلع ولمى حطت ولدها جنبها ونامت حاضنته صحت ٣ الفجر ولا لقت محمد جايب الاغراض تأففت : اكيد كالعاده نساهم اه بس حسابه بكره كملت نومتها وهي كل شوي تشيك على جوالها وتدق على محمد اللي مايرد نادت الخادمه وقالت لها تروح تصحيه فوق قالت لها انه اصلاً مارجع البيت
