طلع صالح وركب مع لمى وطلعوا لعزيمة اهله اللي وصلوا امس لبيتهم اللي بالرياض
مرت الايام عاديه ب استثناء ان لمى كملت دراستها بتشجيع من صالح اللي وفر له كل انواع الراحه حتى انه جاب لها خادمة تساعدها ب امور البيت ويصير عندها وقت لنفسها وله وحاولت تجمع بين اهتمامها بدراستها وعايلتها الصغيره اما الجوهره بدت مرحلة الوحام الصعبه جداً عليها وخصوصا انها كرهت متعب وكرهت ريحته وريحة بيتها ماقدرت تجلس وقالت لمتعب انها بتروح بيت ابوها لما يخف وحامها وترجع له طبعاً متعب م اعترض ابد لان هالشي في سبيل راحتها وخصوصاً انه هالفتره بينشغل بسبب سفراته مع النادي ماراح يقدر يجلس ويهتم فيها
في يوم كان متعب راجع من سفرته مع النادي استقبله خويه رائد من المطار وهم بطريق متعب كان يراسل الجوهره
الجوهره: وصلت متعب: اي تو اخذني خويي م انتي ناويه ترجعين البيت؟ تراي اشتقت ارحميني
الجوهره : لا تضغط علي وانت عارف وضعي لو اقدر جيتك
متعب بدون نفس : خلاص خلاص روحي نامي لا تسهرين
الجوهره: حست انه زعل بس وش بتسوي هي بنفسها تعبانه
متعب جات بباله فكره : رائد تبي سيارتك الحين ضروري؟
رائد : لا ليه؟ متعب: اجل ابي سيارتك بنزلك وباخذها رائد : وين؟ متعب : مشوار مستعجل نزل متعب رائد وراح لكوفي تحبه الجوهره مره خذا قهوتين وتوجهه لبيت الجوهره وارسل لها : انزلي تحت الجوهره: وش؟؟ متعب: انزلي انا تحت افتحي الحوش بدخل بشوفك ماني قادر اروح البيت وانام وانا ماشفتك
الجوهره: انت مستوعب تكفى متعب انا خلقه تعبانه متعب: ماني مقرب منك بجلس بعيد بس بشوفك واسولف معك اشبع شوقي شوي
الجوهره ماتحملت وضعفت حتى هي مشتاقه له ودها تركض وترتمي بحضنه تشبع نفسها منه مشتاقه تشمع ريحته وتنام على صدره
نزلت الجوهره وفتحت الباب الداخلي حصلت متعب واقف بنص الحوش ويمد لها قهوتها ضحكت وقربت : اوه قهوه وانا حامل واضح زوجي مهتم
متعب ضحك عليها : اكسترا حليب ونقطه قهوه عايفك انا
الجوهره ضحكت وجلسة على عتب الباب ومتعب جلس قدامها بعيد شوي على ارضيت الحوش بدت سواليف متعب اللي ماتخلص وهو يتكلم لها عن سفرتهم والجوهره جالسه ومفرقه بين رجلينها شوي بسبب بطنها الكبير وحاطه يدها تحت خدها تتسمع لسواليفه وتبتسم حست برفسات الجنين وكشرت ملامحها ومسكت بطنها ناظرها متعب بخوف : شفيك؟
الجوهره: ولا شي بس ولدك طايح بحركة الرفس كل شوي يرفس بطني حتى بالنوم
متعب: خليه يطلع لدنيا واربيه لك الجوهره: انت تربيه؟ انا بربيك انت وياه الله يعنني
جاء بيرد لكن جاهم صوت سعود اللي طلع عليهم من البلكونه : هذي اخرتك يابوعبدالله تدخل بيتي وتجلس بالحوش متعب ناظره وبتمثيل ملامح الحزن: شفت ياعم بنتك وش سوت فيني اخر شي ولدي بيجي يضحك على ابوه
كشرت الجوهره:احسن مو انت اللي ازعجتني تبي عيال تحمل
