كان من بكره عندهم مباراه طول اليوم لمى ماكلمت صالح وهو كان متشتت شايل همها والتغير المفاجئ اللي صاير وشايل هم المباراه المصيريه اللي راح يشيلها على اكتافه ولازم مايخذل الجمهور كمهاجم اساسي بهذي المباراه
اما متعب كان اريح من صالح بما انه دكه ف المسؤوليه عليه اقل كان يراسل سلطانه ام لمى علشان يتطمن على الجوهره لانه عارف ب الاوقات اللي هو يفضى فيها الجوهره تكون نايمه بسبب تلخبط نومها مع ولدها
في يوم التمرين الاخير اللي قبل المباراه صالح انصاب اصابه اعتبرها خفيفه خدوش على الفخذ وماعطاها اهميه
لبس شورته وخلا الاصابه مفتوحه بدون لا يغطي الخدوش خذا قهوته وطلع وهو عاقد حواجبه ويمشي مع الشله بدون اي تعابير مشى جنبه متعب متعب وطقه على كتفه : عاقد حواجبك كل ذا علشانها زعلانه عليك ارحم نفسك
لف عليه صالح وهو يقول : متعب قسم ان مافارقت لتندم الاخلاق واصله لخشمي رفع متعب يدينه وضحك :لا لا ابد استسلم عمرك لا تفكه مرتي وولدي يبوني صالح طنشه كان ماله خلق يجادل احد او يكلم احد ابدا
دخلت سلطانه الصبح وهي تتأفف وناظرت لمى المنسدحه جنب عبود وتمسح عليه والجوهره اللي جالسه على الطرف الثاني وتقرا على نفسها وعلى ولدها وعلى لمى معها اللي ماهي جايزها لها لعل الله يهدي روعتها شوي
سلطانه ضربت يدها بالكرسي بقوه والجوهره غطت اذاني عبود بسرعه بتنهبل لو قام وهي اللي طلعت روحها لما نام
الجوهره بنرفزه : خاله عبود ناييييييم
سلطانه اللي ردت بكل انواع الغضب : انتي وياها قسم ان ماكلمتوا رياجيلكم ورديتو عليهم وتركتو عنكم حركات الورعان لاكسرالجوالات فوق روسكم ورسهم نعبوكم صرت مرسال م اقوم الصبح الا يروح وقتي ارد على متعب اطمنه عليتس وعلى ورعتس وانتي يالمنسدحه صالح المسكين ترا مو كل يوم يبي يتطمن عليتس ترا يبي يتطمن على ولده بعد هبلتي قلبه المسكين
لمى ماجاز لها كلام امها وحز بخاطرها وش صالح يعني مايبي يسال عنها همه خالد بس؟؟
الجوهره : ياخاله هدي ومن قال لك ما ارد على متعب والله شوفي ارد عليه بس ماارسلي ولا ليه اطنشه اصلا
سلطانه : اجل ليه يرسل لي؟
الجوهره : مدري عنه م ارسل لي شي شوفي جوالي حتى
ردت لمى وهي تناظر الجوهره ومنسدحه على ظهرها : يراسل امي علشان مايقومك من نومك لان اوقات نومكم متضاربه
الجوهره وانتي وش عرفك من قالك؟
لمى : صالح كان يقولي ويطقطق عليه يقول متعب مشغل خالتي مرسال له علشان مايقوم حبيبة القلب من نومها
ناظرتها امها : وانتي بغيتي تردين حوبة طقطقته على متعب له ليه ماتردين على زوجتس هاه؟؟؟
لمى رفعت نفسها :بروح اشوف خالد مع رنا وطلعت و امها اللي ودها تسحبها مع شعرها على هالحركات
سلطانه ناظرت الجوهره : هذي وش فيها وراها منهبله كذا؟؟ رجعت مراهقه هي وذا التصرفات؟
