🍁بين الخطيئة والغفران 💜
💜سلمى سلومة وسميرة غد🍂
🍂الفصل 1💜
♡♡🍁 كنتي سبب رجوعي الى خالقي فصرتي جائزتي وشفيعتي يوم الحساب🍁 ♡♡
الجزء 120
محي الدين [ كيرشف من قهوتو وكيتفحص فدار] فاش ماكنكونش على مودي كنجي نرتاح شي نهار هنا
اومات براسها بإيجاب حطت شفايفها على لكاس كدوق لقهوة رشفت شغمة كبيرة غوتت مخرجة عينيها كتنش على لسانها
لجين [ شدتها لبكية ] اووف تحرقك
محيي الدين: ماكترصايش ابنتي .. متشوفي لبخار خارج من لكاس..
ماداتهاش فكلامو .. ضرها لسانها لي تشوط دقائق وهي كتنش عليه حتى هدات
محيي الدين [ عقد حواجبو بصوت رجولي نطق] شوية [ اومات براسها مكمل حديتو ] شنو وقع لك فالمدينة ؟
لجين [ حنات راسها كتشوف فالكاس نطقت بنبرة حزينة] فاش مشيت لقيت واليديا مشاو سافرو لكندا بلا خباري. وخلاوني بوحدي.. ماخلاو لا ساروت لا والو [ هزت راسها وعينيها عامرين دموع] ماكيفكروش فيا مافكروش عندمن مخلييني وفيدمن ...
محيي الدين [فيكسا عينو عليها سكت للحظة ونطق بنبرة هادئة] هادشي ماخاصكش تقلقي عليه ابنتي .. واليديك الى صيفطوك هنا ومن بعد سافرو بلاما يقولوها لك يعني راكي مقلقاهم [ هزت عينيها فيه كفاش حتى عرف اوما براسو بإيجاب ] عرفت بهضرتك لي قلتي ليا قبل ما تمشي .. ضروري غادي يكون سبب مقنع لي خلاهم يمشيو وهوما غاضبين علك وماسولوش فك.. [ ابتاسم ] لواليدين حنان على ولادهم.. ولكن فشي حوايج كيكونو قاصحين لمصلاحتهم.. هوما باغين يخليوك تراجعي راسك وترجعي لطريقك نهار ايشوفوك درتي عقلك فراه غادين هوما لي يعيطو علك ..راجعي افعالك وتصرفاتك معاهم وغادي تعرفي شكون لغالط واش نتي ولا هوما [ غمض عيونه بإطمئنان] ماتبكيش غادي تصلح علاقتكم
ابتاسمت ليه ابتسامة خجولة هو غادي يكون اول شخص غادي يهضر معاها بهدوء وينصحها.. عيونهم متبتين على بعضياتهم ارتاحت بهضرتو لي عندو فيها لحق .. هي عارفة بلي كانت مبرهشة ومعصبة واليديها.. ماكتلومهمش تربيتها كانت صعيبة من صغر وزادتها لمراهقة فغلبتهم وماقدوش عليها.. سمعت صوت شتا حبس حطت لقهوة لي بردات فيدها فوق طابلة وقفت ووقف حتى هو
لجين [ هزت لكويرة وطاگية نطقت بابتسامة] خاص نمشي تعطلت
اوما براسها هز لكيسان حطهم فوق لبوطاجي حتى يرجع يغسلهم هز تجاكيط ديالو حل ليها لباب خرجت طفا ضو وخرج معاها... وصلها حتى لدوار ودعو بعضياتهم وكل واحد مشا لدارو
*اصبحنا واصبح الملك لله
شادة فيد اسماء كيتمشاو فطريق من بعد ما ناضو وفطرو خرجو يتسخرو كيتمشاو فطريق بعض رجالة كيدوزو من حداهم ونضراتهم لحادة وتخنزيرة على ملامحهم تجاه لبنات.. وصلو لحانوت لي كان مابعيدش على دار بزاف كان عامر برجال والعيالات
اسماء [ بابتسامة ] سلام عليكم
وحدة من لي واقفين : [ طلعت ونزلت فلجين بتخنزيرة ] باقين عندكم لوجه لي تلوحو بيه سلام
اسماء [ عقدت حواجبها باستغراب] وعلاش بسلامة ؟ مال وجاهنا
فوزية( صاحبة لمرأة) [ عينيها متبتاهم في لجين بكره ] اوى الله يدينا فضو.. ولينا نديرو لفضايح ونخرجو بوجهنا حمر
لجين [ تمشات عندها شاداها من دراعها بقوة نطقت تحت سنانها ] مالك كتقولي هاد لهضرة وتشوفي فيا بهاد شوفات؟ ياكما رخاص علك عينيك؟
لمراة [ نترت يدها بصوت مرتفع نطقت ] ايواا لهلا يحييك ماشي انا لي نخرج من دار راجل غريب عليا فنص ليل
اسماء [ عقدت حواجبها بتساءل] شنو كتقولي نتي ؟ نطقي بلا الغاز
فوزية [ رفعت حاجبها ناطقة بخبث] على ماشي بنت عمك .. شافوها لبارح فليل خارجة من دار لباشا لي كاينة وسط لارض علم الله شنو كانو يديرو... يتبع
