كرونيك المصير المحتوم باللهجة الجزائرية

الفصل السابع "بيت العائلة"

حصريا على كرونيكات آوُبّـــــــآلَ ⚜️🍷
ممنوع النقل منعا باتا ❌❌
بقلمي #تيبانة / Mirouchine Imene
البارت 75🥀🥂🥀🥂🥀🥂🥀🥂🥀🥂

جام قبل مانبداو تيبانات❤و قراءة ممتعة🌹

هزيت كتافي : لااا ماشي لازم ... و نتي راح تعاونيني و تعلميني ...
سكتت شويا و قالت : اوكي بصح ماشي خطر عليك !!
شفت فيها وقلت : علاش خطر !؟
عوجت فمها و ردت : خلاص خليها عليا عشية نعيطلهم و نشوف اذا قبلوك نجي معاك غدوة نوريلك وين تحكمي الترونسبور و كيفاش ديري ...
صوطيت عليها و عنقتها : مرسي حبيبتي مرسي ...
بادلتني العناق و ردت : مابينتناش انا نخليك نروح نشوف جواد ...
هزيت راسي و حكيت : حتى انا نروح على روحي ندوش و نبدل حوايجي ... وصلتها للباب و جيت رايحة للحمام لكن قاطعني صوت الباب... كملت طريقي و صحت:ادخلي نجوى... عقدت حواجبي باستغراب وقت تحل الباب و مكاش صوت نجوى... كانت ام نوفل لي ردت:انا سامية نقدر ندخل... تبسمت بتوتر و قلت:نتي دخلتي اصلا... هزت راسها و حكات نقدرو نحكو!...
تنهدت برضوخ و شاورتلها على الفوتاي... خليتها قعدت و رحت قابلتها...  غير طاحت عيني في عينها قلت: تفضلي راني نسمع فيك...
شافت فيا لمدة بعدها نطقت بهدوء:  هاجر علبالي نتي شكون و علبالي بلي زواجك من نوفل على لورق برك...
عوجت فمي و حكيت بلا مبالاة: يعني!! 
حطت يدها فوق يدي و قالت: اولا عظم الله اجركم ربي يرحمو علبالي روطار و لكن هذا وين صحتلي فرصة...  ثانيا انا جيت نهدر معاك اليوم بكل وضوح و جييت نحط نقاط على حروف في هذا الموضوع بذات..
سكت نستنى فيها تكمل...  فاجئتني وقت ردت: ماشي غير نتي لي خسرتي خوك فالحادث... دق قلبي بعنف... بلعت ريقي و ضيقت عينيا فيها نحكي : وش قصدك...

حصريا على كرونيكات آوُبّـــــــآلَ ⚜️🍷
ممنوع النقل منعا باتا ❌❌
بقلمي #تيبانة / Mirouchine Imene
البارت 76🥀🥂🥀🥂🥀🥂🥀🥂🥀🥂

جام قبل مانبداو تيبانات❤و قراءة ممتعة🌹

تنهدت بحزن و ضافت: حتى انا خسرت وليدي في هذاك الحادث...  نوفل مولاش نوفل موراه...  ناهيك على الصدمة لي تعرضلها...  زاد خسر كلش ضربة وحدة...  بابا... لي هو جدو سحب منو كل الاملاك و تبرا منو...  و جبرني حتى انا نتخلى عليه...  خطيبتو فسخت الخطوبة و سافرت... كان باقي على عرسهم شهر بالتمام...  نوفل خسر كلش بين ليلة و ضحاها و خسر حتى نفسو...
حليت عينيا بتفاجئ...  بقيت لحظات نستوعب وش سمعت... بعدها قلت: تعرفي صح لي مات فالحادث خويا...  و نوفل لي دحسو...و هده الحقيقة لي مراحش تتغير... بصح نتوما كنتو عايلتو... نتي كنتي يماه... نتي لي جبتيه لهده الدنيا...  كيفاش اعطاك قلبك تسمحي في وليدك... و تتبراي منو... باي حق تسمي روحك امو باي حق تتسماو عايلتو و نتوما سمحتو فيه كأنو كأنو حاجة معندها حتى فايدة... رغم كل حقدي عليه  الا انو دوكا وليت نشفق عليه كي عندو عايلة كيما نتوما و ام كيما نتي...  الصراحة ما ستنيتهاش منك
تبسمت بحزن و ردت : انا غلطت مرة وقت وقفت في وجه بابا و تزوجت باباة نوفل... خسرت بابا مرة ماكنتش راح نخسرو مرة ثانية... صح ندمت اني تبريت من نوفل اما لو رجع الزمان كنت حنعمل نفس الشي... كيما نعرف بلي نوفل يستهل ام خير مني... اما الله غالب... سكتت شويا بعدها استرسلت: نوفل قطع كل علاقتو بينا مور الحادث... سواء من قريب او من بعيد و عاود بنا روحو من دارا و جديد...  حاول بابا انو يرجعو لهنا اما نوفل رفض و حلف لا يرجع لهدا القصر و رفض انو تربطو اي حاجة بينا مرة تانية
شافت في بخزرة قدرت نعرف معناها و استرسلت حديثها:  اما اليوم رجعلها... رجعلها باش يحميك... جا و هدر مع جدو و استأذن منو يبقا  ... نوفل...  لي قبل كان يمو_ت و لا يرجع في قرارو... كي نقول قبل...  معنتها قبلك هاجر ... هاجر نتي فرصة وليدي الوحيدة...
جوزت لساني على شفتي السفلى و قلت بتساؤل متجاهلة كلامها الاخير...: من واش يحميني...
عقدت حواحبها و حكات: علاش ما قالكش...
زيرت على قبضة يدي بقوة و رديت: وش يقولي...
تنهدت و قالت: هاجر...  نوفل...

حصريا على كرونيكات آوُبّـــــــآلَ ⚜️🍷
ممنوع النقل منعا باتا ❌❌
بقلمي #تيبانة / Mirouchine Imene
البارت 77🥀🥂🥀🥂🥀🥂🥀🥂🥀🥂

جام قبل مانبداو تيبانات❤و قراءة ممتعة🌹

شفت فيها بعدم صبر و قلت: وشبيه نوفل... زمت فمها و ناضت تحكي: نظن لو يقولك هو خير...  ماشي من صلاحياتي نتدخل في هدو الامور... ضحكت بعدم تصديق و رديت بتهكم: يعني نتي صلاحياتك يسمحولك تقوليلي نمد فرصة لنوفل و نحول زواجنا لحقيقي بصح مايسمحلكش تقوليلي من واش يحميني؟! هزت راسها خارجة من الجناح بلا ما ترد عليا... طلعت حواجبي بعدم تصديق لهده العايلة البيزار  و دخلت للحمام ... متبسمة ببلاهة ... خديت دوش بسرعة و قابلت المرايا نشف في شعري ... سمعت نوفل يناديلي ... حمارو خدودي و نمل جسمي ... حليت العين كاني مزالني فالدوش لكنو خلعني وقت طبطب بقوة و صاح : اخرجي نهدر معاك ... بلعت ريقي بخوف غلقت العين ...خديت شهيق و زفير نهدي في روحي و حليت الباب و خرجت ...
كان متكي على الحيط يسنى فيا ... ميزني من الفوق للتحت..
بلعت ريقي و هبطت عنييا عليه ...تنهد و حكى : اقعدي نهدر معاك ...بلا ماناقشو رحت قعدت على السرير ...لحقني و قعد ...ساد الصمت لمدة دقائق ... قطعو و هدر : سمحيلي على موقبيل ... كانت لحظة عابرة اعتبريها ماصراتش ... 
وجعني كلامو ... قبل مانشعل فيه ...كمل يحكي : علبالي انو لازم نتمهلو في علاقتنا و بلي راكي خايفة من هده السرعة ... علابيها ... مد يدو و استرسل حديثو :علابالي امر سخيف وش راح نحكي اما تقبلي نكونو اصدقاء ...  من جيهتي حاب نكمل حياتي معاك و فنفس الوقت  مانيش حاب نجبرك تبقاي معايا ... راح نتعارفو كاصدقاء  و بعدها انتي تقرري اذا نكملو ولا .... ولا نطلقو ...
تنهدت بارتياح و صافحتو... قام من جنبي و جاب وحد الملف مدهولي شديتو عليه باستغراب و قلت : وشنو هذا ...