كرونيك المصير المحتوم باللهجة الجزائرية

الفصل السابع "بيت العائلة"

حصريا على كرونيكات آوُبّـــــــآلَ ⚜️🍷
ممنوع النقل منعا باتا ❌❌
بقلمي #تيبانة / Mirouchine Imene

البارت 51 🥀🥂🥀🥂🥀🥂🥀🥂🥀🥂

جام قبل ما نبداو تيباناتي
حسيت بيد تهز فيا ... حليت عينيا بتثاقل ... كان الشوفة مضبة من العمش ... طلعت يديا حكيتهم ... وضاحت الرؤية كانت نجوى تنوض فيا ...تاوبت و حكيت : صباح الخير ...
ضحكت بخفة و ردت: وشمن صباح رانا فليل ... و جا وقت لعشا او كي ماهبطتيش ماخلاولكش حقك و زيد حلفو عليك و قالك غدوة لازم تهبطي للفطور صباح باش تتعرفي عليهم ... ايا راح نوفل شرالنا و جا ...
حليت عينيا بصدمة و قلت : هدا كامل صرا ...
هزت نجوى راسها ... وقفت نتجعد و نحكي : مالا نروح نغسل وجهي و نبدل حوايجي و نجي ..وقفت هي التانية : و انا نوجد الطابلة ...
دخلت للحمام لقيت وجهي حمر و اثار دموع مطبعين على خدي ... تنهدت و انا نغسل وجهي ... تفكرت محمد ...يادرا حالتو دوك زعما يكون فاق ... و اذا فاق و مالقانيش جنبو ... لازم نحكي مع نوفل ... بدلت حوايجي بالخف و لبست جبة سامبل ... و طميت شعري طوماطيشة مخلية بعض خصلات نازلين على جبهتي بتمرد ... سمعت صوت ضحك برا و حس ... عرفت بلي نوفل جا ... تجاهلت احساسي و خرجت ... حسيت نظراتو مصوبين عليا ..شفت فيه متبسمة و حكيت : على سلامتك...
ترسمو علامات الصدمة عليه... خديت بلاصة قدام نجوى و ديت مورصو بيتزا و قلت : درت في بالي قعدة نسا برك ...
طلع حاجب يهدر : راني في جناحي نظن ...
قلبت عينيا منو : تقعد تمنن علينا هكاا !؟
عمل يديه ورا راسو و تكا ظهرو : راهي ولات جعفر و انا نقول نوالتي وين راهي ...
وقفت و رحت عندو جابداتو من يدو : يالله يالله ... خلينا نحكو بنات في بنات و اصلا كاين موضوع لازم نحكي فيه معاها و دير في حسابك غدوة نروح نشوف محمد مانيش حابة وقت يفيق يلقى روحو وحدو ...
صاح بتذمر : اوووه شحال تهدري راني خارج اصلا كليتلي راسي بالهدرة ...
راقبتو حتى خرج و قعدت فوق الفوتاي مقابلتها ... نشوف فيها تاكل بشراهة ...بلاما نحس خرج الكلام من فمي : وش حكايتك نتي و جابر؟!

حصريا على كرونيكات آوُبّـــــــآلَ ⚜️🍷
ممنوع النقل منعا باتا ❌❌
بقلمي #تيبانة / Mirouchine Imene

البارت 52🥀🥂🥀🥂🥀🥂🥀🥂🥀🥂

جام قبل ما نبداو تيباناتي
حسيتها تفاجأت بسؤالي حمحمت و استرسلت : قصدي تزوجتو عن حب ... بلعت وش كان في فمها و حطت الماكلة من يدها ... تنهدت و حكات : لالا ... ج..جابر الله يرحمو ... تزوجني باش يحميني ... لكن مع الوقت مانعرف اذا يتسمى حب ... لكن ... عقدت حواجبها تحاول توصف علاقتهم بدقة ...شافت فيا و كملت بنوع من الهدوء : كان احتياج غريب ... وسط ضياع لي خلاتنا الغربة نعيشوه قدرنا نلقاو روحنا ... قدرنا نحسو بالانتماء لبعضانا بعدما تغربنا من بلادنا ... كان دفا و سكينة ... بصح بين ليلة و نهار ... كل...كلش تبدل ...مسحت دمعتها لي طاحت و شافت فالارض...
شهقت انا ببكا و حكيت : ع..علاش ماخبرناش .. بزواجو؟!!
تبسمت بحزن : مراحش نحكيلك على خوك ... اما تعرفي قداش حنين و يفكر في ابسط الاشياء .. و خاف يفتحلكم جروحكم و تحسو انكم مستبعدين ... بلعت ريقها و كملت : و كان حاب يعمللكم مفاجأة ... كان يخدم عندو شوفور كفلو و كانو قريب ... يخرجو كوارطو ..ل..لكن ماكتبش .. هبطت عينيها تحكي برجفة : ر..ربي... ماكتبش ...طلعت راسها تهدر : هاجر ... انا كنت وحدي ... من لي جيت هنا و جابر كان معايا ... عمرو ماخلاني ... وقف معايا وقفة رجال ... كاين يوصل وين يخدم زوج خدمات فالنهار ... نهار توفى نسيت كيفاش نعيش ... تلات شهور و انا في اكتئاب ... كنت حاسبة انو الحرقة اقسى تجربة ممكن تمر عليا اما كي فقدت جابر في حياتي اختبرت احاسيس عمري عشتهم ...
سالو دموعي بهدوء و استفسرت : علاش حرقتي؟! ...
تبسمت بحزن و دموعها يطيحو : بابا كان زطايلي كبير ... كنا نرقدو بالضر_ب و نوضو بيه ... يما وصلت للمو_ت شحال من مرة علجالو حتى جا نهار وين حب يزوجني بصاحبو باش يولي يمدلو الزطلة باطل ... قصدت القريب و الغريب و كلهم ردوني ... تحتمت عليا نحرق ... تقوليلي ماتوصلش للحرقة ... لكن صدقيني وقتها للزوج كانو يبانولي انتح•ار ... قلت ياكلني الحوت ولا يقت_لني هوا ... بصح... بصح ندمت ...
حصريا على كرونيكات آوُبّـــــــآلَ ⚜️🍷
ممنوع النقل منعا باتا ❌❌
بقلمي #تيبانة / Mirouchine Imene