كرونيك المصير المحتوم باللهجة الجزائرية

الفصل الرابع "الزواج"

حصريا على كرونيكات آوُبّـــــــآلَ ⚜️🍷
ممنوع النقل منعا باتا ❌❌
بقلمي #تيبانة / Mirouchine Imene

البارت الثامن عشر  🥀🥂🥀🥂🥀🥂🥀🥂🥀🥂
طلعنا للطيارة ...جرا محمد باش يقعد جيهة التاقة ... حكمت بلاصة قدامو و قعد قدامي نوفل ...مجرد ما سمعت صوت  المضيفة فالميكرو رجف داخلي من الخوف ... و كأنو قرا خوفي ...مدلي يدو و قال : تقدري تشدي يدي اذا راكي خايفة ... تجاهلتو و تكيت ظهري على الكرسي ...ثواني و نحس الطائرة تحركت ...غمضت عينيا بقوة و زيرت  بيديا على الكرسي ... حسيت بهمسو
نوفل  : خمي فالعفايس الملاح في حياتك ... سكت شويا و كمل مثلا اذا الحمامة تبول ولا نو ... تبسمت على كلامو ناسية شكون هو ... خوفي طغى على كل المشاعر لي داخلي ...لحظات و زاد هدر
نوفل : خلاص تقدري تحلي عينيك ...
بلعت ريقي و حليت عينيا بلعقل ... كان يشوف فيا بابتسامة هادية ... خلاتني نظطرب ...رجعت غمضت عينيا بقوة... نفكر في روحي هو شكون ... حليتهم مرة ثانية... قربت منو ... و همست : نكرهك ...
حسيتو جفل من كلمتي ... سرعان ما  دورت وجهي للناحية الثانية  ...تنهد و رخف روحو ...
بقيت على هداك الوضع حتى غفيت بلا مانحس ...
♤♤♤♤♤♤♤♤♤♤♤♤♤♤♤♤♤♤
يد صغيرة فوق خدي تتسارى عليه ... عقدت حواجبي و دورت راسي نتفادى فيها ... قفزت وقت سمعت عياط في وذني ... حليت عينيا بزربة.. صدري يطلع و يهبط كاني كنت في سباق ...
محمد : هههههههههههه خوافة ...
قلبت عينيا منو... مزيرة على يدي بقوة ... لوكان ماشي مريض نطيح عليه بالضرب ...
نطق نوفل : هايا نوضي كامل خرجو... كي ماتلقى حتى رد مني استرسل حديثو
نوفل : راني سابقكم ...
حليت الحزام و وقفت شادة محمد من يديه ....

حصريا على كرونيكات آوُبّـــــــآلَ ⚜️🍷
ممنوع النقل منعا باتا ❌❌
بقلمي #تيبانة / Mirouchine Imene

البارت التاسع عشر  🥀🥂🥀🥂🥀🥂🥀🥂🥀🥂
مرت النصف ساعة هديك مملة و حنا نسناو فيه يكمل الاجراءات ... اخيراا شرف سيادتو...
جا لينا تنهد و حكى : محمد معليش تخليني مع هاجر دقيقة ...
شاف محمد جيهتي تبسمت معاه كنوع من الموافقة  ... راح و خلاني معاه ... جازو خمس دقايق و هو يحاول يخرج الكلام من فمو حسيتو متردد ...
غير جيت نهدر قاطعني بسرعة : لازم نروحو نعقدو دوك فالبلدية ...ضيقت عينيا فيه و هزيت راسي بالنفي
هز كتافو و قال: لازم... 
رفعت حواجبي و رديت: هأه تؤ لالا ...
قلب عينيه و نطق: سي...
ربعت يديا بعناد و قلت: فالاحلام ماتصراش ... 
ميل راسو و زفر بقلة حيلة و ضاف:مراحش تصرا فالاحلام بسك راح تصرا فالواقع... ماتيبسيش راسك حاس روحي نتعامل مع طفلة!!...
حليت عينيا على وسعهم... و قلت بعدم رضا: خلاص فتحنا ... مرانيش ناوية نربط اسمي بيك و لا حتى عندي استعداد نتمرمد فالطلاق علاجالك ...
حك نيفو و هدر بهدوء مستفز : اولا راكي على اسمي ثانيا شكون قال بلي حنطلقو ... خيالك واسع فهمناها من الحمامة لي تبول و كيما هي كيما الحيوانات بصح عقلية لي فيلم تاع نطلقو و مانعقدوش قديمة شوية لالا؟!
استفزتني طريقة كلامو و كلامو بحد ذاتوو ... مافهمتش كيفاش يقدر يتعامل بهده البساطة ... و كيفاش يتناول كلشي ببرود تام ...ماقدرتش نتحكم في اعصابي كثر... حسيت وجهي يشعل من التقلاق ...زيرت على يدي و هدرت : كيفاش تقدر تكون بهدا البرود و تتصرف كلي حاجة ماصرات !؟ قتلك ماشي حابة بسيف ؟! ...
تنهد يحكي : للاسف وي ...بسيف ... صح خدمتلك باصبور و كدا بصح ...سكت شويا و كمل : لقاو بلي عندكم سوابق فالحرقة لذلك طلبو مني نخلص اقامتك و نعقد عليك خلال ربعة و عشرين ساعة ولا ...ولا يرجعوكك للبلاد ...
تبسمت باستهزاء على كلمة سوابق ... فالاخير جابر طلع عبارة عن مجرد سوابق ...عوجت فمي و رددت:سوابق؟! ضربتو بخفة بقبضة يدي على صدرو و حكيت:هداك لي ما_ت انسااان بنادم و خوياا لي دحستو نتا خوياا... لي تقول عليه نتا و غيرك سوابق ماتعالجش برك علجال ورقة... ورقة تتبت اقامتو... ما اسعفوهش برك لانو ماعندوش كوارط...هو انساان و نتوما قت_لتوه بصح على الاقل مافقدش انسانيتو ما_ت و هو انسان ماشي بحالكم... مديتلو ظهري و رحت خارجة برا المطار شفت محمد راكب في وحد الطونوبيل ... توجهت ليها و ركبت