كرونيك المصير المحتوم باللهجة الجزائرية

الفصل السادس "الفضيحة"

حصريا على كرونيكات آوُبّـــــــآلَ ⚜️🍷
ممنوع النقل منعا باتا ❌❌
بقلمي #تيبانة / Mirouchine Imene

البارت 35  🥀🥂🥀🥂🥀🥂🥀🥂🥀🥂

حليت عينيا بلعقل لقيت روحي فوق فراشي ... مانعرف شحال جاز وقت و انا راقدة ...معقول كل لي صرا منام !! ... تردد صدى صوتو وقت قالي :احلام سعيدة يامرتي ... وقفت بزربة من بلاصتي ... جريت نحو باب الزنقة حاولت نحلو ماقدرتش ... زفرت بقلق ...وش معنتها عملتو هده ... كيفاش يدير هكا ...بقيت رايحة جاية ... المكان هذا ولا يظغط عليا ... توجهت لغرفتو و حليت الخزانة ... جبدت كامل حوايجو وارميتهم فاللرض ... ماحسيتش غليلي شفى ... رحت للمكتب و طيحتو ... و عملت نفس الشي مع الفراش ..نوبة الغضب داخلي ثارت ... حكمت ملابسو كلها و توجهت للمطبخ ...شعلت الكوشة و رميتهم داخلها ... شفت للكيسان لي محطوطين على الرف و رميتهم هما ثاني و انا هكاك نسمع صوت الباب يتفتح ... غير دخل رميت عليه كاس ... طلع يدو كردة فعل باش يحمي وجهو ... بقيت نرمي فالكيسان و هو يتفادى فيهم و يصيح : وش راكي تعملي يالمهبولة ... صياحو زاد جهلني كثر و انتقلت للصحون ...  انتشرت ريحة غريبة فالمطبخ ... تفكرن حوايجو لي حطيتهم لداخل ... درت باش نطفيها دنيا دارت بيا ... سمعت وقع خطواتو كي دخل ... راح يجري طفا الكوشة و سندني : وش راكي تعملي هبلتي ... زيرت بيديا على قمجتو ... حط يديه تحت ركبتي و حملني ... وقت استنشقت عطرو ... هديت و استكنت ... جا داخل لبيتو لكنو تصدم من منظرو ...
هبط عينيه ليا و هدر بتوعد: هده كي تفطني نتفاهمو عليها ... غمضت عينيا و حطيت راسي على كتافو ... سمعت دقات قلبو يضربو بعنف ... تبسمت بانتصار ... على الاقل جريتو و تعبتو معايا ...
توجه لغرفتي و حطني فوق الفراش ... حسيت باانعاس يداهمني ... مافهمتش علاش وليت ننعس بزاف و انا لي كان الرقاد معاديني ولا عندو ااحق محمد راني نعوض فالايام لي فاتو ... غمضت عينيا باستسلام و رخفت يدي عليه ... و قلت بصوت ضعيف: نعست... حط يدو على وجهي يبعد فخصلات شعري لي طايحين و حكى بهمس : دوك انا وش نعمل فيك تاع صح ظهرتي كي النوالة ...