رواية من بين كل البنات اخترتش انتي

15

مسـاء الخـيــر
ورمـضـان كـريـم
بارت جديد ادري تأخرت فيه
بس تم ازالة حسابي منwattpad ويالله استرجعته ومت قهر لما تم حذف البارت هاذا وبعون الله رجعت كتبته وسترجعت الاحداث من مخي
ماعلينا من هاذا المشاكل والهرم
خلوكم مع البارت
.
.
.

حازم: يالله الله يوفقك
عمر شحر لا حازم برتباك: ايش اقول له
حازم ضحك على ارتباك عمر: اخطبها ساع ما الناس يخطبو
عمر: اففف يالله مع السلامه
حازم ببتسامه: الله معك
.
وبعد مأتصل لعمار وقاله وعمار مايرفض له طلب قال تم بس اسرع، دخل المكتب حق عمار وجلس مسنب للعسكري اللي سار يدعي هاشم شويه ودخل هاشم المفجوع وجنبه العسكري
وقف الضابط عمار وقال بحترام وحب وهو شاحر لعمر: يالله انا شخرج لاهنيه واجي وانتو تحاكو براحتكم
عمر ببتسامه بان منها توتره: تسلم
اول ماخرج الضابط والعسكري لف هاشم لعمر بخوف: ايش به ليه جيت؟!
عمر بهرر وقال برتباك: ليه جيت.. وقال بصراخ مصدوم: واااااي ايش ليه جيت؟؟ انا اجي اي حين مأشتي سنعت
هاشم تنهّد بطفش: ناهي جي فوق عيني وفوق راسي بس استغربت اول مره تجي بالعشي
عمر بصدمه: والعشاء ذي بيت اجي اديه لك كل يوم مغرب ايـ...
قاطعه هاشم وغطى لكف عمر بنزعاج: ناهي درينا انك بتدي لي العشاء والصبوح والكل، ماطلبتشي منك تدي!!
عمر بصدمة: ايش فيك انا بيت اضحك معك
هاشم تنهد وجلس في الكرسي اللي قدام عمر: عمر الله يرحم لي والديك تحاكى ايش به
عمر جلس قدام هاشم وقال بهدوء: قبل شويه سرت لابيتك و... . .. . وحكا لهاشم اللي وقع بينه هو وابو ناصر.... . . . .
وهاذا كل اللي وقع ايش قولك
هاشم تنهد بضيق: يالله الله يرضا عليه مادام قد بيدور من دخل ومن خرج
عمر بغضب: إنا لا رضي عليه جالس شاحر لابيتكم من خرج ومن دخل ايش دخله
هاشم مسح جبهته بتوتر: قد بعد غدوه بندخل قاعة المحكمه واقول اني ماقتلت وانت لازم تحضر..وبضحك: لانك المقتول، ادخل وقول عاد انا عايش
عمر هز راسه: ان شاءلله قد حاكاني عمار
هاشم تنهد:ماعليك شاتفرج بأذن الله
عمر شحر لا هاشم بجدية: اسمع ياهاشم انا كان نفسي احاكيك في ظروف احسن من هاذي لاكن قدو لزوم اتحاكى ذلحين واطلبك
هاشم عقد حواجبه بستغراب: الله المستعان اطلب والبيك بأذن الله
عمر تنهد بتوتر : انا جيتك.. زفر بتوتر وماهو عارف كيف يفتح الموضوع لان هاذا الشي جديد عليه قال بسرعه: انا طالب القرب منك وجيت خاطب اختك
هاشم بهرر بصدمة وماتكلم
عمر بجدية: لا تقول اني ماخطبتها الا ليج كلام النااس عليها لا انا خطبتها لاني اشتيها ولا ماكلام الناس ماهمني
هاشم قال بجدية: تشتيها وتحبها؟
عمر بصدق: ايوه
هاشم بتفحص: من اي حين تشتيها
عمر تنرفز: هاشم لا تنتر بي
هاشم هز راسه: خلاص انا شاحاكيها واتمنى مأنجبرتشي انك تخطبها علشان انك قلت لابو ناصـ..
قاطعه عمر بحده: انا عمر ياهاشم وحاجه مشتيهاش محد بايقدر يجبرني عليها
هاشم: ونعم بك، خلاص غدوه تعال وشتصل لها واحكيها
عمر مد لهاشم التلفون بستعجال: هيذا التلفون هانا اتصل لها ذلحين
هاشم بهدوء: غدوه تعال وشـ...
قاطعه عمر: ماعه اتصل ذلحين هيا
هاشم:والله مابعدى مأتصل لها الا بعد غدوه، على ايش مستعجل هاه؟؟؟
عمر قال بقهر وتسرع: مستعجل على امك
هاشم شحر ليه بحده: لا تذكر امي
عمر ضرب راسه بقهر وشحر لاهاشم: والله اني اسف والله ماكان قصدي! وانت لا عاد تقول مستعجل
هاشم اللي مازعل اصلا قال بروقان: مستعجل على امك أميش
عمر ضحك وبغصه: الله يرحمهن الثنتين
هاشم تنهد: امين، هيا هات تلفونك
عمر مد لهاشم التلفون وقال بهدوء: ارسل لها قبل ماتتصل علشان تجاوبك قـ..
قاطعه هاشم بقهر: اصه انا داري عادك باتجي تعلمني عن هي اختي انا اعرفها اكثر منك
عمر رجع ظهره لاوراء وقال بمزح وهو يرفع حواجبه وينزلهن: قريب شاتوقع مرتي ياروحي وبعدين ماعاد شاتراها الا اذا انا اشتي
هاشم انقهر وحس بالغيره قال وهو يمد التلفون لعمر وهز حواجبه زي عمر: يله كان قوم روح مابش نصيب والله يوفقك مع بنت الناس اللي شاتتزوجك اختي عادهي صغيره ماقديش حق زواجه
عمر ارتخى جسمه من الصدمه: هاه؟!!!
هاشم كان يحاول يبجم بس ماقدر لما اراء صدمه عمر ضحك بقوه وهو يسحب تلفون ويتصل: شوقي على كيمره اصورك واعنقلها في بـ...
قاطعه عمر وهو يزبطه بقهر: الله يلعنك ياحقير تفو عليك
هاشم ضحك وقال وهو يحاول يهنجم: اصه لا تلعن والله مابعدى مأتصل
عمر جلس قدام هاشم وقال بحده: اصه اص
هاشم ابتسم ورفع التلفون في اذنه بعد مأرسل لسلمى وجلس يرن وهاشم كل ما ذكر شكل عمر يضحك وعمر يضربه بقهر
.
عند سلمى
قريت الرساله اللي كان محتواها {جاوبي معش هاشم} وبعد ماقريتها صمتت التلفون وقلبته على وجهه ومدت البطانيه وغطت كامل جسمها ودخلت في نوبة بكاء
.
هاشم نزل التلفون لما ماجاه الرد وقال بقلق: ماجاوبتش
عمر قال بتوتر: يمكن قدي راقده
هاشم: عادو ماقدوش وقت رقدتها
عمر وقف: لا تقلقش ان شاءلله مابش حاجه
هاشم وقف: باتروح
عمر دخل ايداته في جيب بنطلونه: ايوه وانت لا تقلقش
هاشم: خلاص تعال غدوه الصبح
عمر ربت على كتف هاشم ببتسامه: ان شاءلله يالله مع السلامه تشتي حاجه ولا شي
هاشم: تسلم الله معك
عمر بز تلفونه وخرج متجه لابيته
.
.
.
.
.
.
نرجع للوقت الحالي1:20
كان الجو شبه مضلم والانوار خافته كانو جالسين في الحوش الخلفي ويتهامسو بضحك ومسنبين لاما تجي ساره علشان يفجعوها
وليد شحر لامعاذ بهمس: معاذ اجلها حرام باتفتجع
معاذ بطرف عين: ماشاءالله!! ماهي باتفتجع مأنا النقله الاوله نطلت قلبي
وليد قلب عيونه بضباح: الله يقلعك انت والمره الاوله عن قد لها من قبل ماتسير امريكا وعادك بتعيرني بها خلاص ودافه ماعاد شانفجعكش
معاذ سمع صوت ساره وهي بتداعيهم وشحر لاوليد واشر له بتهديد انه يسكت
وليد حرك راسه بلا ومشى بقهر يشتي يخرج من وراء الشجره اللي كانت عريضه قوييي
معاذ عض شفته بقهر وسحب وليد بهمس مقهور: تعال يايهودي
وليد تقدم من معاذ وقال بهمس غاضب: والله ماليهودي الا انت
معاذ بطرف عين: ارتزع احسن لك واسكت
وليد بهمس وهو يحاول يفك يد معاذ من فنيليته: والله اني باقول لها فكني
.
ساره طرحت ثلاجة الشاهي والقلاصات بهمس وخوف: معاذ وليد عيال بطلو خجاعه وأخرجو
وليد بغضب: فكني لأوجعك
معاذ ضحك بخبث: اص
وليد سحب يد معاذ اللي كان مسك بها فنيلية وليد وعض معاذ في معصمه بقوه
معاذ ماقدر يتحمل الوجع وصرخ: اااااااااااااااااح اوجعتني ياكلب فكنييييي
ساره اول ماسمعت صوت معاذ بكت بخوف وصرخت: يمااااااااه
وليد فك معاذ وسعي لعند ساره اللي قدي مقرننه في جدار البيت: سعليش ياخبلا هو احنا
معاذ خرج من وراء الشجره وهو شاحر لامعصمه بصدمه: اعوذ بالله منك ياكلب ياجروي
ساره دهفت وليد بغضب وصرخت: الله يلعنكم يكريهن ويلعن ذي يسمر معكم.. وفلتتهم ورجعت دخلت البيت
معاذ بهرر لما خرج دم من مكان العضه: وليد ياكلب خرج دم
وليد بستهزاء: ماشاءالله اثار ان معك دم كنت اضنه مرق.. ولحق ساره وهو يداعيها
معاذ بقهر: والله انها لك يامرق وقف يامرق.. ولحقه: انسلو اصواتكم لايقوم حسام
دخلو للمطبخ وساره بتغسل وجهها
وليد حك اذنه وهو شاحر لامعاذ اللي بيشب مكان العضه: ساره والله انه معاذ اللي كان يشتي يفجعش وانا ماخليته
ساره تقلده بستهزاء: اييييي ييييي
معاذ ضحك: هههههه تستاهل.. وشحر لاساره: اري ياساره كيف سوى يدي على عضه عضني قد شويه وتقتطم
ساره بقهر: شوقي انه قطمها
معاذ رفع سبابته وبهنجمه: اصه احترميني انا اخوش الكبير
وليد ببتسامه: العني شكله ياساره وانا وراش
ساره توجهت لاباب المطبخ بهدوء: تصبحو على خير
وليد سحبها: واااي واااي تعالي مسرع عاد احنا بدأنا السمره
ساره بزعل: ايش من سمره وانتو بتتخيجعو وتتخبو
وليد عقد حواجبه: ايش بش احنا بنضك معش تعالي نسمر شويه وبعدين نقوم نرقد قبل مايروح ابي
معاذ يحاول يلطف الجو: فين الصحن البيتزاء اللي سويتيها اليوم
ساره تنهد بهدوء: مرفوعه
معاذ بصدمه: لمن رافعينها هاتي ناكل ونسمر
ساره شحرت لاوليد:وانت ليه عضيته!!
وليد بضباح:اصااااااه بطلي كومنه وازعي قدامي
معاذ وهو يمثل الوجع: اااااح ياساره بيوجـ...
قاطعه وليد: اصه جني يشلك
ساره بضباح: اصاااه الجو حسين وحسام محدو في هنا
معاذ بستغراب: فينو كان؟؟
ساره بضحك: فرفر صنعاء مع جدي
وليد بصدمه: كيف لاما!!؟
ساره: بكاء رجعو بزوه، هم باينزلو سريع
وليد: ماعلينا منه هيا هتي البيتزاء وجي هيا معاذ
خرجو معاذ ووليد وساره بزت صحن البيتزاء وشلت من الثلاجه الببسي وخرجت
ام معاذ بخوف: ساره ليه بتصيحو
ساره نقزت: امه ليه مابتوحي بصوتش فجعتيني
ام معاذ بهررت: انا افتجعت قلت انه سارق
ساره: هو احنا انا ووليد ومعاذ
ام معاذ: الله يهديكم انسلو اصواتكم عيب تزعجو الجيران
ساره:ناهي هيا فين باتسيري يأمه تعالي اجلسي معنا
ام معاذ توجهت للدرج: شرقد لي تصبحي على خير ولا تكثروش السهر
ساره مشت: ناهي
ومشت للحوش الخلفي وجلست بين معاذ ووليد
.
.
.
.
.
قام لما حس بالبرد شحر للبطانيته اللي في الارض سحبها بكسل وتدفى ورجع مدد
جلس شاحر للسقف ماعاد بايصدق اي حين يجي الصبح علشان يخرج
خالد تنهد وهو يفكر: انا غلطان لما تدخلت بين احمد وساره؟؟ ألا اكيد غلطان!! ايش دخل امي انا! ااافف شعتذر لساره واحمد والله الا دعس
اذن الفجر وخالد مسنب لاما ينتم الاذان على شان يقوم يصلي
غمض عيونه وتجمد لما انفتح الباب وصوت احمد بيداعي فارس بهمس
خالد فتح عيونه بخفه وماكان بايركز عليه احمد لان النور مغلق
احمد بهمس وهو يهز فارس: فارس قوم هيا صلاه قد ابي وجدي سبقو باقي احنا هيا قوم بسرعه
فارس بهمس ناعس: هيا الان
احمد بهمس حاد: قوم ذلحين باسير اتوضا واجي ولو عادك نوم لأسحبك للمسجد سحب
فارس جلس ومسح عيونه بتنهيده
خالد غمض عيونه بخوف ان احمد يجي يقومه وهو ذاهن اصلا
احمد ماشحرش لاخالد ولا قرب لأصليه مشى بتجاه الباب وخرج
خالد انقهر وبقوه ولعن احمد في نفسه: عاد العنانه له هاذا وهو الغلطان انا بارويك يا أحمد تفو عليك ياملعون اااااف
فارس قام دخل الحمام توضا وخرج وغلق الباب
خالد قام ودرب البطانيه للقاع بقهر ودخل الحمام توضى وخرج مد السجاده وصلى السنتين والفجر
وقام لبس زي المدرسه والجاكيت الاسود اللي يوصل لتحت الركبتين وشل تلفونه ولبس الكوفيه(الكاب) كانت باللون الاسود لبسها وشل شنطته ولبس جزمته(عزكم الله) وخرج من الغرفه وسعي للدرج يشتي يخرج قبل محد يقوم
نزل براس اصابيعه وخرج للحوش فتح باب المخزن ودخل خرج المتر اللي عادو جديد(المتر حق خالد ومايستعمله الا قليل) خرجه وفتح الباب وخرج المتر بدون مايشغله وغلق الباب حق الحوش وركب المتر وفحط
، خرج وعاد الدنيا غدارى بس قد الناس كملو يصلو وقد بيخرجو من المسجد فحط بالمتر لاما خرج من حارتهم ووقفه وخرج تلفونه وتردد في انه بتصل لفراس يمكن عادو راقد لان الساعهـ5:23 غلق التلفون ودخله جيبه وهو يفكر فين يخبي التلفون
.
.
.
.
.
دخلو البيت واحمد ماسك يد الجد ويجزعه وابو فيصل بيزع جنب الجد ويحاكيه وفارس اللي مغمض عين ومفتح عين مشى بسرعه قبل مايدعيه الجد سعي للدرج طلع اول درج وقف وغمض بقهر لما سمع
صوت الجد
الجد: فين باتسير؟؟
فارس بصوت ناعس:برجع ارقد
الجد ضحك: اجل الرقده تعال اشرب معنا شاهي ماعادلا شويه ونصتبح
ابو فيصل دخل غرفة الجلوس: تعال يافارس تعال
فارس عقد حواجبه: ياجد اين صبوح واين الطلي عاو حين ماقد طلع الضاو سواء
الجد: تعال عن النومه بعد الفجر تدي الفقر تعال.. ودخل غرفه الجلوس: وانت يأحمد تعال
احمد طلع حواجبه لافوق ونزلهن بطريقه تقهر: هيا فارس تعال اشرب شاهي
فارس نزل وقال وهو يتأفف: ماعاد باسافرش اليوم
احمد رفع حواجبه: ليه؟؟
فارس: امي قالت لاقد اسافرش.. وبقلق: وانا الصدق قد انا قلق على المحل كم لي من يوم جيت خايف احد يسرقه او يوقع شي
احمد: ان شاءلله ماباتوقعش حاجه محد بيتفقد المحل او شي
فارس مسك رقبته: الا يوسف صاحبي قال انه بيتفقده وبيسير الصبح وبالعشي لما يغلقوه
بس قدو محل ذهب يعني شاينهبوه في اي بقعه
احمد مسك يد فارس: تعال ان شاءلله مابايوقعش حاجه، ادخل وانا شاخلي البنات يسوين شاهي.. ولف بتجاه الدرج
فارس لف له ببتسامه:وهات لي انا كوفي اشتي اصحصح
احمد: الان ابشر به
طلع احمد سار دق غرفة ريم وعلى طول فتحت ريم
احمد بستعجال:صباح الخير انزلي سوي شاهي وكوفي بسرررررعه
ريم بصدمة: ايش بك اهداء القط نفس
احمد ابتسم ولف للدرج: هيا انزلي سويهن قيام
ريم ببتسامه: الان
احمد لف لها ورجع لاعندها وقال بهمس: قام خالد صلى؟؟
رييم بستغراب: ممـدري ليه ماجاشي معاكم
احمد تنهد: للا هيا لاما قد باتنزلي وقوميه بس لا تقولي له اني بيت ادوره!!
ريم بحزن: ضربته ؟؟! .. وبحنيه:احمد حرام عليك لا تكون تضربه كن حاكيه حكا ماتعرفش خالد عدييم مايفهمش ويعاند وعادو مراهق لازم تصاحبه مش تشمت به جي له بالهداوه وفهمه مش تضربه !!
احمد لف وبجمود: امتشعي جدي يشتي الشاهي قيام
ريم تنهد بحزن من عدم اهتمام احمد: خلاص الان شاقومه وانزل فارس عندكم صح؟؟
احمد هز راسه بأيوه ومشى لا الدور الاول
.
.
.
.
.
نزلت ريم وجهزت الشاهي والكوفي وبدأت تقطع للصبوح
دخل لاحمد ومسك الثاجتين بيد والقلاصات باليد الثانيه: قد بتجهزي الصبوح
ريم هزت راسه بأيوه وقالت باهتمام: دورت خالد ومالقيته
احمد بستغراب: مالقيتيه؟؟؟ اصبري باشلهن واجي
وخرج شل لهم الثلاجات والاقلاص ورجع جلس فوق الكرسي وبستغراب: ايش اللي مالقيتيه فين سار؟؟؟؟
ريم شحرت ليه بحزم: احـمـد!! انت ضربته ولا لا
احمد رفع حواجبه بعصبيه: ايوه ضربته وايش يعني لاضربته
ريم تنرفزت:: قد كنت داريه ليه تضربه هاه؟؟؟ ابي ماقد ماتشي علشان تمد يدك عليه
احمد وقف بحده حتى هو قد الندم لاعب به بس مازل يحاول يقنع نفسه ان خالد يستاهل الكف: وذلحين ايش دخل هاذا الحكا؟؟؟ انتي داريه فين سار
ريم ضحكت بستهزاء: لا هو روح اصلا
احمد كان بايقول لها انه جاء امس بس قال بتفحص وبستغراب من اسلوبها: ايش فيش ليه بتعامليني هكذا
ريم سارت بتجاه المغسره وبدأت تغسل الطماطم وقالت بهدوء وصوتها يتحجرج: ولا فيني حاجه
احمد غمض عيونه وتنهد وهو يستغفر بصوت مسموع وبهدوء: باين ان مافيش حاجه.. مشى لاعندها ولفها له بقهر: ريم ايش بش تحاكي
ريم دهفته وهي تبكي
احمد بهرر بصدمه: ريم!!!!!
ريم غطت وجهها بأداتها وهي تحاول تكتم شهقاتها
احمد مسك اكتافها وريقه نشف قال بهدوء: ريم ايش بش ياينت تحاكي
ريم ساكته ومواصله البكاء
احمد تنهد وبعد ايداتها من وجهها بهدوء: ايش بش تحاكي
ريم وهي تشهق: ولا حاجه
احمد بصدمه: كل هذولا الدموع ومابش حاجه
ريم ببكاء:طفحت قد انا مفقده لقيس وانت قلت لي شاحاكيه ولاحاكيته وطفـ.....
ماعاد قدرت تكمل ورجعت تبكي وبحرقه
احمد سحبها وحضنها وهو يمسح على راسها وقال بهدوء: انا اتصلت له وارسلت بس ماردشي ارى الرساله ولا رد.. وبعدم تصديق: على غيري لاهاذا سبب البكاء!!!
ريم دهفته: اصه ياسعم عاد انا فكهه اجي اتخيجع
احمد ابتسم وهو يراها بتغسل وجهها هي الوحيده اللي يقدر يمزح معها ويكون بطبيعته
ريم بضباح: والقرد خالد فين سار!!!
احمد جلس فوق الكرسي: فين بايسير يعني مامعه الا عند فراس
دخلت ام فيصل: صباح الخير
: صباح النور
ام فيصل شحرت لاريم: بسرعه اقطعي العجين ليج نخبز
ريم هزت راسه بطيب وبدأ تقطع العجين
ام فيصل جلست قدام احمد وتنهد بقهر: حرام ان خالد خوك يشتي له رزعه لاما يضحك الكلب
احمد بجمود: ليه
ام فيصل بقهر: ماسمعت ايش قال لساره حرام ان قد ابوك بيشفر له شفر
احمد تنهد بضيق
ام فيصل ضربت كفوفها ببعض: ووووب خليه يقوم والله لو يضربه ابوك مأفرع والله لأخليه يضربه حرام ان قد لسانه ساع الشبطه وقد عليه عناد ياغارة الله
ريم عقدت حواجبها وبخوف وهي تقطع العجين: امه حرام عليش
احمد ببرود: لا يشفر له ولا يضربه قد انا حاكيته وتفاهمت معه
ريم طرحت اقلاص كوفي وشحرت لا احمد بنص عين:حاكيته وللاااااا ضـ...
احمد قاطعها: ريم سليط سيري اقطعي العجين وانتي ساكته
ام فيصل رفعت قلص الكوفي وقالت بحده: والله لو ماتسكتي اني لأديش بالقلص مالش دخل
ريم شحرت لأحمد برجاء
احمد غمز لهاببتسامه وهو عارف قلب امه وقال ببرود:لا يضربهشي قد انا ضربته
ام فيصل وقفت بعصبيه: ولييييه تضربه!! عن قد سويت الدمار وانت ساعه (ساعه زي زيه) ولا احد عسك.. وبحنيه: وانا بس كلام ولا والله ماخليه يضربه.. وبحرص: هاو لا تقولو لخالد بعدى يشطح كما انا اعرفه
احمد هز راسه: ولا عليش
ريم:امه عني خالد محدو في البيت
ام فيصل بهررت: ماروحش
احمد بجمود: الا الا بس خرج ذلحين
ام فيصل وهي تمثل عدم الاهتمام لانها ناويه تزعل على خالد: فجني شلكم وشله
ريم شحرت لأحمد ببلجمه وهو يأشر لها لا تضحكيش
ام فيصل مشت بتجاه الغاز ومسكت الموطفه وطفت تحت الفاير ورجعته للثلاجه وبعصبيه وهي تلعنتحتانفاسها: اعوذ بالله منكم ولا واحد يرد العنا كل واحد اخس من الثاني نتفكم كلكم
ريم شحرت لأحمد بقهر وهي تأشر له بأيش دخلنا وهو يأشر لها تسكت
ام فيصل شحرت لاريم بحده: وانتي امتشعي ياسامجه كم باتجلسي تقطعيها
ريم شحرت لأحمد بصدمه واحمد يأشر لها تسكت وهو عارف ان امه اذا هي ضابحه شاتجلس تصيح فوقهم ولو يراددوها شاتصيح زياده وتلعنهم كلهم
ام فيصل قالت بحده وأيداتها على خصرها: احمد!! وانت ايش ذي بيجلسك عندنا في المطبخ!!!!!؟
احمد شرب اخر بغم من الكوفي ووقف واشر لها ببتسامه: هيذا شخرج يافندم
وخرج من المطبخ وتوجه لاغرفة الجلوس وقبل مايدخل رن تلفونه واول مأرى منو المتصل تنهد بضيق وصمت التلفون ودخل
.
.
.
عند خالد
رفع تلفونه وبملل: الوو .
فراس بصوت ناعس: يالله قوم قد تأخرنا
خالد ابتسم على جنب: صح النوم
فراس بتركيز وهو يسمع صوت البوريات: خالد!!!! قدك في الشارع
خالد بطفش: من زمان من الساعه 5:30
فراس: ياجناااه ليه مأتصلت لي
خالد بختصار: مدري المهم قد باتخرج
فراس: تعال شانصتبح ونخرج
خالد تأفف: خلاص اصتبح سريع مأجي الا وقدك في الباب
فراس بنزعاج: ناهي جي نصتبح ونخرج جمعه
خالد تنهد: قد اصتبحت
فراس: ياخي تعال اصتبح ولا والله لأغثاء منك
خالد: يافراس هو بيتنا بس والله مالي نفس شابع امتشع نسرح
فراس: هيا تعال اليوم على شاني وغدوه على راني
ابتسم خالد لما سمع صوت مروان اخو فراس وهو يدعيه: هيا خالد تعال صبوح والله مأصتبح الا لاما تجي
فراس ببتسامه: هيا تعال
خالد بحرج: الله يسامحك من اي حين بيسمعنا مروان احرجتني معه يافراس
مروان بضحك: من بداية المكالمه حرام وطلاق لو ماتجي ياخالد لاتوقع البوره
فراس: تعال شايطلق مرته في ذمتك
خالد بحرج: خلاص يالله دقايق وانا عندك
وغلق التلفون وفحط متجه لاحارة فراس
.
.
.
في بيت ابو معاذ وتحديداً في الصاله
كانت ساره معكوته وراقده في الكنبه المنفرده ومتدفيه بجاكت معاذ
وفي الكنبه اللي توسع ثلاثه اشخاص كان معاذ راقد وهو جالس ومرجع راسه لاوراء ووليد ممدد جنب معاذ وراسه في فخذ معاذ
نزلت ام معاذ وشحرت ليهم بصدمه وتقدمت من ساره بعصبيه: ساره بنيه قومي قيام
ساره تنهدت وهي تغطي وجهها بجاكت معاذ
ام معاذ تقدمت من وليد وسحبته من كوفيه الفنيليته حقه: وليد معاذ قومو يامرافيس عدمين الغرف راقدين في الصاله
معاذ بعد الشال من عيونه: يامه ايش بش انسلي صوتش
ام معاذ سحبت الجاكت من فوق ساره: بنيه قومي نسوي الصبوح قبل مايقوم ابوش
ساره فتحت بكسل: يأمه عادو حين
ام معاذ مشت بتجاه المطبخ وقالت بحده: عادي فذت لا #####*
وليد شحر لاساره وضحك: قومي
ساره بأحراج: يامه حرام عليش اشحري كيف بيضحك عليا
ام معاذ صرخت بحده: قوووومي
معاذ ببتسامه: قومي قبل ماتنثرها ام معاذ
ساره بصوت شويه عالي: شاغسول وجهي واجي
.
.
.
.
طبعا معاذ خرج طيران لاعند فارس ورجع ضابح لما قاله فارس انهم ماقد بايسافروش اليوم
.
.
.
اما احمد قرر يرجع يحاكي ساره طبيعي بعض الاحيان يقول ساره تربية عمي مستحيل تسوي هاذي الحركات اتصل له صقر وقاله ان حميد امس ضرب باب الغرفه بقوه وجلس يصرخ بأسم ساره ويقول قولو لأحمد يطلقها ولا والله لاقتله هو وياها،
قرر احمد انه يبعد هاذي اليومتين عن ساره ومايحاكيها لاما يهداء لانه لو يحاكيها مابيقدر يمسك نفسه وبيسألها ويحقق معها
.
.
.
.
وياسر اندمج مع عيال خاله وتناسى انه يروح بس يكره بيت خاله والجلسه عندهم لاما يرى تعز وبنتها يكرهها ومايطيقها ولا هي تطيقه اما جدته ام رائد فارحه به فرح الدنيا وكل ماشحرت ليه ذكرت امه
.
.
.
.
.
قامت على صوت دقه في باب البيت لبست مقرمتها بسرعه ونزلت سلمى: مان
سلوى: افتحي هو انا
سلمى فتحت ببتسامه: ياحيا
سلوى سلمت عليها: جيت اول ودقيت وماجاوبتينيش
سلمى غلقتباب البيت بحرج: عاد انا قمت
سلوى ابتسمت من تحت برقعها: سهل يأمي ارقدي ايش وراش
سلمى ببتسامه: ادخلي ادخلي وافتشي ليه عادش ملثمه
سلوى بعدت الصحن من تحت خمارها ومدته لسلمى: اطعمي من صبوحي عني انا اللي سويت المقشط
سلمى مسكت الصحن بحرج: الله يسامحش لـ
قاطعتها سلوى بنزعاج: اصه وعلى اساس انتي ماتديليش.. ومسكت يد سلمى ببتسامه: وبعدين احنا خوات الا اذا مابتعتبرينيش اختش بايوقع كلام ثاني
سلمى ببتسامه: الا قدش اختي وتوأم روحي هيا ادخل
ودخلت سلوى غرفة الجلوس وسلمى سارت سوت شاهي وبزت اقلاص وسارت لاغرفة الجلوس
سلمى جلست وهي تصب الشاهي ببتسامه: شاتصتبحي معي
سلوى حفحفت وبتكييد: اكيييييد شاصتبح.. وبتوتر: سلمى
سلمى شحرت ليها: همممه
سلوى بحرج: لا تكني تغثي من امي عنيها بعض الاحيان تتحاكى وماتدري ايش بتقول بس بعدين تندم..وبكذب:اصلا كانت تشتي تجي معي بس ماقدرت تجي وقالت اني استسمحش
سلمى حست ان كلام سلوى كذب بس قالت ببتسامه: سهل ياسلوى سهل مابش بيننا
سلوى بصدق: ابي قال اني اقولش اي شي تحتاجيه دقي علينا ولا اتصلي ونلبيش ان شاءلله
سلمى بهدوء: تسلمي انتي وابوش.. ومدت لها الشاهي: امسكي
سلوى بزته وبتساؤل: ومتى عقدتو انتي وعمر!!؟ ماهو اسمه عمر صح؟؟؟؟ بس والله انه ضخم بس شكله مغرور!!
سلمى مادرت ايش ترد وانقذها صدوت دق باب البيت قالت بتوتر: اصبري شفتح الباب
سلوى وقفت: اذا هو زوجش شاروح وخليه يشل راحته
سلمى اشرت لها تجلس وهي تخلف:والله ماتخرجي اجلسي اصبري هيذا باجي
وخرجت وهي مستغربه من دق الباب كان الباب ينتق بقوه سعيت لاعند الباب وقالت بصوت مرتجف: مااان
ام ناصر بحده: افتحي
سلمى تنهدت بخوف وفتحت الباب
ام ناصر دهفت الباب ودخلت وشحرت لاسلمى بعصبيه:فيني؟؟
سلمى بخوف:مني!!؟
ام ناصر بصراخ: فيني بنتي
سلوى خرجت وبحزن: اماااااه
ام ناصر تقدمت منها والشرار يتطاير من عيونها: انا ايش قلت مأنا قلت ممنوع الجيه هانا.. وبصراخ: تحاكي
سلوى بصدق: ابي ذي قالي اجي هانا
ام ناصر بصراخ: وتكسري كلمتي وتصدقي ابوش وسحبت سلوى من معصمها وشحرت لاسلمى اللي تبكي بصمت: لازيد اراش تقربي من بنتي او من
بيتي قليلة الحيا
سلوى وهي تحاول تفك يد امها من معصمها وشحرت لاسلمى ورجعت شحرت لأمها: اماااااه فكيني خلاص
ام ناصر شحرت لاسلمى بكره: مانا داري ايش ذي عجب ناصر ولدي فيش وانتي ماقدرتي تحافضي على سمعتش جمال على الفاضي
سلوى سحبت يدها من كبضة امها وبقهر وصوته شويه مرتفع: اماااه خلاص اسكتي
ام ناصر شحرت لاسلوى وهي مبهرره: ترفعي صوتش عليا علشان بنت ال#####*
سلمى بعررت بعصبيه: احترمي نفسش ويالله اخرجي
ام ناصر شحرت ليها بكره وحقد: لا رحم لا امش ولا ابوش اللي ماعرفو يربو
سلمى صرخت بحده: بااااااااس اسكتي غلطتي عليا وتحاكيتي في شرفي وسكت لش لاكن تذكري امي وابي وتربيتهم لي ماشسكتش وبزي بنتش وانقلعي يالله
ام ناصر مسكت سلوى ومشت بت اه الباب: انا بارويش انا تطرديني ناهي يابنت الحرام انا برويش
سلوى بقهر: امه فلتيني
.
.
.
.
.
.
في غرفه زينب
كانت حماس تعض اظافيرها بتوتر وهي تقراء تهديدات امجد بأنه باينشر صورها لو ماتدي له المبلغ الي حدده وتهديدات كثيره ارسلت له وهي ترتجف: شتصل وجاوب انا مش في صنعاء
رد عليها: انا مالي دخل دبري عمرش اذا مانفذتي اللي مطلوب منش اعرفي اني شارسل لاخوش كل صورش
حماس اول ماقريت الرساله دربت التلفون وبكت بقهر وهي تلطم وجهها بخوف وفزت لما جاها اشعار رسايل مسكت التلفون بيداتها اللي يرجفين وقريت المكتوب بخوف: اذا طلعتي صنعاء بلغيني وانا شدي لش المكانةذي نلتقي فيه وياويلش لو تغدري بي وتدي معش احد اوووووه نسيت ماقولش الصورتين اللي جبتيهم لي مليت منهن فخترقت تلفونش وسحبت كل الصور اللي عندش وسويت لهن تعديلات ولبستش على كيفي فلا تعصبيني خليش مطيعه وتحركي على مشتي انا ولا عتلقي صورش في مواقع الـ*******
حماس صرخت وهي تضرب راسها بحافة السرير كانت تضربه بقوه واوزت للجدار وهي تلطم نفسها وتصيح وتبكي وبداخلها صوت يقولها انتهيتييي ياحماس
فتحت زينب الباب وسعيت لاعندها بخوف وهي تمسها: حماس ايش فيش.. وشهقت لما ارت جبهة حماس اللي ملانها دم وشحرت لاحافة السرير:يوووه سقطتي
دخلت العمه تهاني وصرخت بخوف لما ارت جبهة حماس وسعيت لاعندها بخوف: حماس ايش بش فين ارتزعتي يابنتي
دخلت ام فيصل بخوف: ايش به
حماس حضنت امها وهي تبكي: يامه باموت يامه
العمه تهاني بكت وهي تحضنها: تعوذبي من الشيطان اجل هاذا الحكا
زينب سحبت من علبة الفاين(المناديل) وبعدت حماس من حضن العمه تهاني وطرحت الفاينات فوق الجرح: اهدي اهدي ان شاءلله مابش حاجه
ريم دخلت وشهقت وطرحت يدها على لكفها
ام فيصل شحرت لاريم بحده: ريم اتصلي لاخوش خليه يجي نسير نسعفها مش وقت الشهوقه ذلحينه
ريم هزت راسها بطيب وسعيت لخارج الغرفه
ام فيصل سحبت البالطون المعنقل: زينب بعدي خليني البسها
قامت زينب: شنزل ادي لها ماء.. وخرجت من الغرفه
العمه تهاني بصوت مرتفع: زينب هاتي بالطوني
زينب من خارج الغرفه: هيا الان
.
.
في الحوش كانت الجده بتتقهوى ولا هي داريه ايش بيوقع داخل البيت
دخلو احمد وفارس ورمو عليها السلام ودخلو دخلو وارو ريم بتسير وتجي وبأذنها التلفون
رن تلفون احمد وخرجه من جيبه وشحر لاريم بهدوء: ريم
ريم دربت التلفون لافوق الكنبه وسعيت لاعند احمد: احمد بسرعه اسعفو حماس
فارس بخوف: ايش فيها
ريم بسرعه: ارتزع راسها وذلحين بتنزف
فارس سعي للدرج وطلع من غير مايقول شي والخوف بعيونه
احمد بغضب: فارس وقف.. وشحر لاريم بحده: فين زينب لايراها اطلعي ادعيها
زينب خرجت من المطبخ وفييدهاقلص ماء بهدوء:هيذا انا
ريم بهدوء: هاتي الماء شاطلعه انا
زينب: وادي لعمتي البالطو حقها
ريم هزت راسها وسعيت للدرج
احمد مسك رقبته وبتحجج: لا تقولي اني بيت اتحكم بش ولا من هاذا الكلام بس انتي تعرفي ان عندنا اذا قد العرس قريب ماعاد يصلح يراش ولا يحاكيش
زينب ببتسامه: انا داريه لا تبررش
احمد بهرر بستنكار: واي حين بيت ابرر
زينب ضربت راسها بأسف
احمد بجمود: كيف ارتزعت
.
.
.
.
.
.
.
.
.
.
انتهت الرواية

هع امزح

بحمسكم للبارت القادم
لفته عن البارت القادم

دخل فارس للغرفه بخوف: فييييين حماس

.
.
.
نزل معاذ من فوق السياره وعقد حواجبه لما مشى متر بسرعة البرق ومشى بتجاه بنت ماشيه في الرصيف وسحب شنطتها وانسحب مع الشنطه خمار البنت معاذ غلق باب السياره بقوه وسعي بتجاههم بغضب وهو يسمع البنت تصرخ بضعف
.
.
.
.
.
ياسر بغضب: مالش دخل هم ماتو من نفسهم ماشو هو اللي قتلهم
تعز بحده: الا هو اللي قتلهم لا ترفع صوتك على اكبر منك
.
.
.
.
.
نلتقي في البارت القادم ان شاءلله