رواية من بين كل البنات اخترتش انتي

22

نرجع لاوقت صلاة الفجر بصنعاء
كان الاتفاق ان كل اثنين يرقدو في غرفه ولاكن رقدو كلها بغرفه واحده كان حجمها شويه كبير!
يوسف ومعاذ ممددين بطرف وفارس وفهد وذيب بجنبهم وسطام ومحمد وفايز تحتهم، كانت النيه انهم يسهرو مع بعض ويرجعو يرقدو بغرافهم بس تغير
هَدو كلهم ماعدا فايز اللي نومه اثقل من الثقل، هَدو(فزو) من رنين تلفون فارس اللي كان مرتفع ومزقوع
فارس فتح التلفون وهو يرد بربشه: هااا!
ام فارس: فارس عادك نوم قومو صلو الفجر وامتشعو ليج نسافر ومانتأخر!
فارس مسح على عيونه:خلاص ناهي الان شانقوم
ام فارس: ودور معاذ انه شايجي معنا وان ماشي امتشع
فارس تنهّد بضيق: يله تمام تمام مع السلامه.. وغلق وهو يرجع يمدد بكسل
يوسف واللي كان مولع الكشاف حق تلفونه ومبهرر بقهر: منو هاذا
فارس وهو يغمض عيونه: امي قالت نقوم نصلي الفجر
سطام رجع مدد ببتسامه وهو يسمع فهد اللي قال بضحك: كثر الله خيرها
محمد بقهر: اذني اختزقت من الصوت حقك انت وتلفونك كن نسله
يوسف رجع مدد وهو يتدفى: اصلا ماعلاه الا ليج نقوم كلنا ماتعرفهش ياسعم هاذا اخبث انسان في الحياه!.. وشحر لامعاذ اللي رجع ينعس: هيا وانت قوم توضا نصلي
فارس جلس وبكسل: معاذ شاتسافر معانا ولا مع ذيب
معاذ بكسل: منو اللي شايسير الاول
فارس: انا
معاذ وهو يالله يرفع لسانه من النوم: مع ذيب انا
فارس وقف وهو يسحب بطانياتهم بكسل: هيا قومو صلااه
ذيب رجع البطانيه عليه: سير توضا اول انت
فارس بضيق: خلاص قومو لا ترقدوش
سطام صرخ بعصبيه وهو اللي يكره ان احد يتكلم عنده وهو راقد يكره الازعاج وهو راقد بختصار!:اصه انت والهرم اخرج توضا لا تنتر بي
فارس اشر بيده:واااي لا تصيح وانخمد
وخرج فارس وهو يغلق الغرفه ورجع لهم بعد ماتوضا
فارس صرخ بقهر:هيا امشعونا قومو صلااه
الكل تأفف وهم يقومو ويتوضو على واحد واحد
سطام اللي كان جالس في بقعته وهو شاحر لامعاذ اللي يتنشف ورجع توجه لعند يوسف اللي عاده رقد
معاذ وهو يهز يوسف:هيه قوم صلااه
يوسف دهف يد معاذ وهو يتغطى:مشأصلي
بعد!
سطام بضحك: ليه او بغير صلاه
يوسف جلس وهو يبتسم ويحرك حواجبه بنذاله: ايوه كيف عرفت
سطام بز الوساد ورجمها على يوسف بقهر: مع لم انت مره!
يوسف بعد الوساده وهو يقوم لافوق سطام بضحك: انا بارويك منو المره!
فتتح الباب فارس: صلاااااااه قومو صلاه..وشحر لامعاذ اللي يضحك بقوه: وانت بدل الضحوكه افرع بينهم!
معاذ خرج من الغرفه وبمزح: وانا اش دخلني يسيرو قراط
وبعد ماصلو كلهم دخلو للمطبخ ماعدا فارس اللي كان يبدل ثيابه وجلسو كلهم اللي جلس على الكراسي واللي جلس على الطاوله واللي حفحف في الارض واللي جلس على دولاب المطبخ
فهد تنحنح: في نفسي كبتشينو!
معاذ رفع حواجبه وهو يأشر للكيس اللي فوق دولاب المطبخ:هيذا هو في الكيسـس سوي لك ولنا جمعه!
فهد طرح يده على جبهته: اماااااانه؟
سطام بستعجال: ايوه اسرع
محمد بضحك: على ايش مستعجل ياسطام
ذيب رفع حواجبه ونزلهن لسطام اللي تنحنح بربشه وهو اللي يشتي يوصل رهف للمدرسه
هو: إنا قلت لا نتأخر علـ.....
قاطعه فهد وهو يتقدم ويمسك كتف سطام لما حس ان سطام تورط: سطام مستعجل يشتي يسير يبسر امه هي فيها الضغط وامس تعبتـ....
قاطعه ذيب اللي مبهرر بقهر: سطام ياعايب ليه ماقلت لي انها تاعبه.. وبضيق: كان قد انا غريب تقول لفهد وانا ماعه
سطام تورط وهو يقول بداخله«اكبر عليك يفهد الملعون قد شايدي لأمي الضغط، كحلى»(زي تشتي تكحلها عميتها ولاكن بالصنعاني يقولو كحلى):الله المستعان يذيب  ماغريب الا الشيطان!
ذيب بقهر: جرب مره ثانيه اخفي عليا وانت شاترا ايش شايوقع لك
يوسف مسك رقبته وشحر لامعاذ اللي قال بهدوء: سلاماتها ياسطام الله يشفيها ويكتب لها الاجر
سطام ابتسف: تسلم، امين
دخل فارس وهو يرتب الكوت حقه وقال ببتسامه: بالله كيف الاستيل يناسب لعريس
صرخو كلهم بصوت واحد وهم يصفقو: ايييييييييييييييييا
فارس اللي كان لابس معوز بيييج وعليه خطوط بني والشميز بيج والكوت بني وسط(يعني لا غامق ولا فاتح) والشال(شماغ) اللي كان على اكتافه كان بيج والخطوط بنيه ضحك وهو يرويهم الساعه اللي كانت جلد بني: وعاد الساعه
معاذ وقف وهو يصفق: امانه انك فنان امانه لو تراك اللي انت عارفها لاتدوخ
فارس ابتسم وهو يتخيل زينب وبهرر لما استوعب: اصه يامعاذ جدتي عزز بس لا تتجراء وتذكر اللي قدك داري عن انا اغير
فهد اشر ليوسف وهو يمسك احد الطيسان البلاستيك ويطبل (يدق) عليها: حيووووو عريسنا حيوووووه
قامو كلهم وهم يصفقو وفايز وسطام تقدمو وهم يرفعو فارس اللي صرخ وهو يقولهم ينزلوه
يوسف غمز لذيب وهو يأشر له بيده بمعنا صفرر
ذيب رفع يده وهو يأشر ليوسف برعب: لا لا لا
يوسف رفع يده وهو يصفر ويلحق فهد اللي يلحق سطام وفايز وهو يدق على الطاسه
معاذ كان يراقب ببتسامه
فارس شحر لاساعته: خلاص ياعيال نزلوني شتأخر
سطام اشر لفايز يوقف وهم يفلتو فارس اللي ابتسم لهم وهو يشحر للكل: تسلمو يانظري انت وهو امانه ان امس من احسن الايام اللي عشتها في حياتي
فهد ببتسامه: الله المستعان عاد كل اللي سويناه ماشو من قدرك
الكل: اي واللهه
فارس حط يده على صدره: الله يحفظكم يله كان دعواتكم ادعو ان احنا نوصل بالسلامه
الكل: الله يوصلكم بالسلامه
سطام اشر لذيب ببتسامه: اشتريت الطمش(الالعاب الناريه) صح؟
ذيب بغمزه: ايوه اكييد
سطام اشر بيده: كان يله قومو نوصل عريسنا
فارس بصدمه: فين توصلوني مالك وايش من طمش؟
يوسف ضحك بحماس: يله قيام خلوني ابدل.. وتركهم وهو يتوجه للغرفه وخرج وهو يبخبخ عطر على ثيابه وعلى الجو
فهد بملل: هيا جدي
وخرجو وكل واحد توجه لاسيارته(محمد وفايز بسياره وذيب وسطام بسياره وفهد وفارس بسياره ومعاذ ويوسف بسياره وخرجت اول سياره فارس وبعدين معاذ وبعدين الباقي صارو زي الشواعه
وبعد اصرار من فهد قام فارس وخرج نص جسمه من الشباك اللي بسطح السياره
وذيب يقرح البازوقات(نوع من انواع الطمش)
ويوسف يصور لسنابه بفرح والباقي يصرخ بحماس: وحقك ياعريس..... حقك...... وحقك يافارس.....حقك
حرفيا نص الناس خرجو من بيوتهم وهم يتبسمو لفارس اللي يحس بأحراج وهو يتخيل ايش شايقولو الناس عاد الناس بعد الفجر وهاذا فارح لي مع ان قد الوقت مضى وقد الساعه 6:22م
بهرر فارس بقهر لما دخل فهد الخط العام ودخل وهو يلعن فهد: ياحيوان ليه دخلتنا هانا بسرعه اخرج
فهد: ارجع يافارس وخلنا نفرح شويه ابسر الجو
فارس اوزى بقهر: حرام مأقوم الا لاما نخرج من الخط الـ...
فهد قاطعه بملل: حلفتك براس اغلا البشر على قلبك انك تقوم
فارس رجع يوقف وهو يسمع الطماش من وراه واصواتهن يتعالين.. وتوسعت ابتسامة فارس لما صارين السيارات من الخط العام يمشين خلف سيارات معاذ والباقي(يعني كملو والشواعه) وبدأ صوت البوريات يعلا بنغمه واحد وكذالك طمش ذيب، بهرر معاذ بخوف على فارس وذيب اول ماسمع طلقات النار وصرخ يوسف بخوف وهو يخرج راسه من شباك السياره: فااارس ادخل يافاااااارس
معاذ شحر بخوف لاوراء وهو يتأكد اذا ذيب دخل او لا وماشاف الا البازوقه مركوزه وهي تتطلق الالعاب الناريه ورفع تلفونه وهو يتصل لذيب ونفس الشي يوسف اللي اتصل لفارس
معاذ بستعجال اول ماوصله صوت ذيب: ذيب انت بخير
ذيب بضحك: ايوه بخير مالك
معاذ تنهّد براحه: يله كان مع السلامه
يوسف بنفس خوف معاذ: فارس ايش وقع منو اللي رمى
فارس تنهّد بضيق: هاذا واحد ماعرفه ماعد دريت الا لو قد بيقرح
طبعا هاذا واحد من احد المحلات كانت نيته يشاركهم الفرحه واطلق طلقات عشوائيه للجو!
هذولا هم اليمنيين يحبو يشاركو في فرح اي انسان ان كان غريب عليهم او من معارفهم
ورجعو للشاليه وانرمو كل واحد في زوه ورقدو بعد ماوصلو فارس وودعوه...
.
.