رواية من بين كل البنات اخترتش انتي

35

أحمد وقف لما ماقدر يتحمل شحر لا صقر ونطق بستعجال وهو يشل تلفونه من الطاوله اللي قدامه: انا بخرج.. ولف بايمشي لكن وقفه صوت صقر: فييين باتسييير يأحمد او شاتسير لاعند رعد!!!!
احمد شحر لاصقر وبمكابر وبكذب: وايش معي عند امه بخرج الف شويه وارجع
صقر وهو اللي ماصدق احمد نطق بحده: احمد لاتسيييرش وتدور لك مشاكل ارتزع...
احمد تأفف: صقر ممكن تسكت وماتتدخل فيني ماشأسرش افهم.. ومشى وهو يلعن تحت انفاسه بعصبيه(يتحلطم بعصبيه)
صقر جلس بضيق وهو يشحر لازول احمد اللي اختفى في ثواني خارج من البيت
صقر نطق بضيق من غرور وكبر احمد: مستحيل يتنازل ويسير.. وتأفف وهو يتوجه للشباك اللي يطل على شارع الحاره اللي كان فاضي وخالي من سكانه اللي بعد اذان العشاء يبدأ يفضى يوم اهل الحاره يتوجهو لابيوتهم
:

:

:
نزل من الدرج بستعجال وهو يلبس جاكته مشى من قدام الصاله ونطق بستعجال: يمه انا بتأخر شأغلق الباب من خارج واشل المفتاح وانتي ارقدي ولاتقلقي عليا معي عمل وشأتأخر
وقفت ونطقت بأمر: حااازم تعالل لاعندي
حازم فتح باب البيت: يمه الله يرحم والديش انا مستعجل
ام حازم بألحاح: حازم تعال احاكيك
حازم تنهد وهو يمشي متجه لاعند امه: ايش يامه
ام حازم نطقت بضيق وعينها على حازم اللي جلس قدامها وهو مستعجل وبنفسه يطير: او شي بينك انت وشهد حاجه؟!
حازم نطق بسرعه: للاا!؟
ام حازم عقدت حواجبها بضيق: كان ليه داربها بيت اخوها كل هذي الفتره
حازم نطق بنزعاج: يمه ايش من فتره مالها الا اسبوع وبعدين هي مده وتروح
ام حازم وقفت ونطقت بحزم: مده!!!!! والله ماتجلس مده انك شاتروحها غدوه
حازم وقف ونطق بقهر: امممه!!!!
ام حازم بحده: البنيه ماشي احسن منها مربييه وطيبه وبنت نااس مافكرت ايش شايقول اخوها يوم شليتها عنده ولاعاد بزيتها
حازم نطق بعصبيه وهو يمشي بتجاه باب البيت؛ الله يرحم والديش لا تتدخلي بيننا خلييني اتصرف كيف مأشتي انا رجال وعارف ايش بين اسوي!!
.. وخرج وهو يغلق الباب
ام حازم ضربت كفوفها ببعضي وهي تجلس وتقول بتنهيده: الله يهدييك ياولدي
:

:

:
قدام المستشفى

كان مركي على سيارته وهو شاحر لبوابة المستشفى بتردد
وازن وقفته اول ماخرج رعد من باب المستشفى وشحر لأحمد ونزل راسه وهو يمشي بتجاه التكسي اللي كانت بنتظاره
 
أمن سيارته وسرع خطواته وهو يتوجه لنفس التكسي اللي رعد  ركب فيها فتح الباب ونطق بهدوء: انزل
رعد تأفف وهو يسحب باب السياره اللي فتحه احمد
احمد شد قبضته على الباب مانع رعد يغلقه: انزل خلنا نتكلم
رعد بنزعاج: توكل ماشي بيننا كلام
احمد تنهّد وهو يحاول يمسك اعصابه ومايتمشكل مع رعد:رعد لاتستفزني وتخلني اسوي حاجه تندمك
ضحك في نفسه هذاا هو احمد!!
دايما يهدد!
كان متأكد ان احمد جاء علشان موضوع الحوش والمتـ..ـحرش ويشتي يفهم ايش اللي وقع كان متأكد ان احمد هذي المره ماجاء يتمشكل، تأفف وهو يقول بهدوء نرفز احمد: ايش شاتفعل؟! شاتطتني مثلاً
احمد نطق وهو يشد على اسنانه: انزل دامني بين احاكيك حكا
نطق صاحب التكس بضجر: هييااا اخي شاتغلق الباب اوصلك ولا كييف؟؟ انا مستعجل
رعد شحر لأحمد: توكل يامشاكل(ويقصد "مشاكل" ان احمد مايقدر يعيش بدون مشاكل كل فتره ونو متمشكل مع احد فبدال ماينادبه احمد يماديع مشاكل!) ماشي بيننا حكا
احمد اركى على باب التكس بعناد: خلاص نجلس هكذا لا الصبح
رعد تأفف وهو يكرر: لا حول ولاقوة الابالله العلي العظيم.. دهف احمد بقهر ونزل وهو يقول بهدوء لصاحب التكس: انتظر بس شوييه وانا شأدبل لك الحساب (بيعطييه الحساب مثنئ)
صاحب التكس بضيق: اسرع ياخي
جلس على احد الكراسي اللي على واجهة المستشفى: تكلم بسرعه ماشنا فاضي لك
احمد تمنى ان رعد ماتدخل ولا قرب من بيتهم،نطق بضيق : انت ليييش دخلت لاحوشنا؟! لييش جيت
رعد ضحك ونطق بنفس السخريه: ايش اللي غير رأيك وجيييت تسأل.. وشحر لأحمد ببرود: حكمت وركبت الامور من عندك وخليتني واحد #&&#&** وقطعت من عندك اني دخلت اتحرش بالبنت وانا ماعرفت انها اختك الا بعد ماطعنتني.. وشد على كلامه الاخير
احمد نطق بضيق وهو يرفع راسه للسماء اللي كانت الغيوم مغطيتها والواضح من تجمع الغيوم ان المطر بينزل في اي لحظه...:  : الشيطان شاطر لعب بعقلي وانا يوم اريتك ماتحملت!!!.. ونطق بتبرير: انت لو كنت مكاني شاتفعل ساع مأنا فعلت
رعد نطق بضيق مع ان تبرير وكلام احمد ماعجبه ولا اقنعه: انا جيت لاعندك ويوم جيت بدق الباب سمعت صياااح مره(حرمه) دعيتك ولا جاوبت فتحت الباب ودخلت ولقيت واحد يتحرش بالبنت اللي هي.........  ، وشحر لأحمد بصمت
احمد احتدت نظرته وهو يحس بقلبه يحترق من الغبنه والغيره: بدون التفاصيل
رعد شحر لاقدامه  ببرود متجاهل كلام احمد: تضاربت انا وياااه وهرب بعد ماحاول يطعني سحبت خنجره وغزيته في كتفه  وانت نزلت وانا احاول استر اختك وفهمت غلط
احمد: ومنو الولد
رعد ضحك بسخرية على سؤال احمد: مأعرفه مدري منو اللي اعرفه انك ظلمت اختك وشككت في شرفك وعرضك واعرف انه لازم انك تعتذر  منها وتجبر خاطرها احسن ماتخسرها.. ويوقف بعد ماينهي كلامه.. وقبل مايمشي  شحر لأحمد بكره: وعلى فكره انا مابين ابرر لك علشان تصدق ولا علشان شي انا بين ابرر لك علشان لاتظلم المستوره اختك
احمد وقف وهو اللي ذلحين حس بغلطه: خلني بوصلك؟
رعد بهدوء وبنبره ساخره:كثر خيرك! التكس مسنب.. ولف وهو يقول بهدوء: على العموم لو ارى الولد (المتحرش) بعرفه انا اريته.. ومشى بتجاه التكسي وركب وصاحب التكسي على طول حرك متجه للموقع اللي دله عليه رعد
اما احمد رفع يده وهو يرجع شعره اللي يوصل لأذنه للخلف ويشه بقوه
توجه لسيارته وهو يتنهد بضيق
كييييفـف يتصرفف ذلحين؟!؟
كيييف يعتذر؟!
اييش يقول اصلا لاما يعتذر!!!
وهل ريم باتسااامحه؟؟؟؟؟؟؟!
هذي كانت اسألة احمد اللي شغل السياره ومشى وهو يحس بضيق  فتح علبه السجاير(السقاير)
اخذ سجاره وشغلها وحطها على لقفه(فمه) وهو يشربها بشغف وزفر كل انفاسه مع الدخان
وهو يلوم نفسه! كييف انه ربط الامور ببعضها وخلا مشكلة جنات تأثر علييه وتغيره وتخليه يشك بقرب الناس له
كان منضغط ويحاول يلقى حل يخلييه يطلق جنات بدون مشاكل واول ماشاف اللي شافه يوم الحادثه ماعاد قدر يسيطر على نفسه وسواء اللي سوااه
ادرك ذلحيين انه غلط واللي سواهه غلط لكن ايش الفاييده بعد ماكسر ريم وزاد قهرها وهمها بدال مايكون سندها وعون لها...!