رواية من بين كل البنات اخترتش انتي

1

   ...........البارت الاول..............

اخيرا دخل البيضاء «رداع»
كان بعده راجع من امريكا وصل بيتهم ودق الباب فتح له وليد وصرخ بصوت عالي: مــــعـــــاذ
حضنه معاذ وهو يضحك: بالله كيف المفاجأه،
وليد وهو يبكي من الفرح: احلا مفاجأة بس ليش ماقلت لنا علشان نستقبلك ادخل ادخل
ابتسم معاذ وهو يسحب الشنطة
وليد: هاتها هاتها انا شأدخلها
ام معاذ من الدرج: وليد وليد مالك ياولدي ايش حصل ليش  بتصيح معاذ وهو ياشر لوليد يسكت تقدم من الدرج وهو مبتسم: ماشي حاجه بس معاذ رجع
ام معاذ نزلت وهي تبكي: حيا حيا وانا اقول مدري اليوم مال الدنيا منوره
حضنها معاذ وهو يقبل راسها ويدها: منوره بش ياغاليه
ساره وحسام  نزلو من الدرج ساره وهي تبكي وتضحك بنفس الوقت، حضنها معاذ وهو يضحك: يوووووه جاء مطر شاتغرق
الحاره، يقصد دموع ساره ابتسمت ساره وهي تمسح دموعها
حسام: معاذ وانا ارفعني واناوانا
معاذ حضنه وهو يبوس خدوده ويطيره بالجو بعدين نزله وقال: ماشاءالله قدك ثقيل كبرت قدك رجال
حسام وهو يأشر بصبعه: ايوه شوف حتى قد طلع لي شنب
الكل: هههههههههههههـ
معاذ رجع يحضن حسام ويبزه(يعني يشيله) لحضنه
وليد: امه
ام معاذ: امي
وليد: الدنيا منوره بس اليوم وانا كل يوم عندش ولا قلتي لي هكذا
الكل: ههههههههههههههه
معاذ: وانت مالك او بتغار
وليد: من ايش اغار وهم ماخلوك تدخل البيت قال اغار
ام معاذ وهي تسحب وليد من اذنه بخفه:بسم آلَلَهّ بدأنا المناقره
ادخلو ادخلو
معاذ: وين ابي هو بالبيت او لا
وليد وهو يبتسم لمعاذ: هو في بيت جدي عند عمي ابو ريم
ام معاذ بصدمه: ومن متى قد اسمه ابو ريم
وليد بضحكه: قصدي ابو فيصل 
معاذ ابتسم وهو ينزل حسام من حضنه : يله اناشأدخل ارتاح لوما يرجع وصحوني
ساره: شوف شوف شأفلتك  لانك تاعب بس خليك تقوم والله لاتجلس معي انا ووليد  وتهدر معنا
ابتسم وليد
معاذ قبل جبين ساره وهو يبتسم: من عيوني اهدر لش للصباح لو تشتي
وكان بايمشي لوما اليد الصغيره اللي مسكت يده حسام: وانا برقد معك
معاذ مسك يده:تعال يروحي   
وراح لغرفته
.

.

.
بعد العصر
وصل ابو معاذ البيت
ابومعاذ: ياساره ياساره
ام معاذ خرجت من المطبخ: هاه ياخالد ايش أشتيك
ابو معاذ: فيني ساره ليش مابتجاوب وين حسام ووليد في البيت
ام معاذ ابتسمت: حسام راقد وساره ووليد في غرفة معاذ
ابو معاذ بضحك: ايش بيسوو
ام معاذ: جالسين عند معاذ
ابو معاذ بصدمه: قولي والله
معاذ وهو نازل من الدرج وبضحك: والله
ابو معاذ تقدم وهو يحضن معاذ وبغصه تدل على الفرح: حيابك يامال ابوك نورت البلاد
معاذ قبل راس ابوه ويدينه وانحنى عشان يقبل رجوله بس ابوه وقفه وهو يرجع يضمه: الله يرضا عليك ياحيد ابوك
معاذ: الله يحفظك يأبه
وسارو جلسو في المجلس
ابو معاذ:ليش ماقلت لنا حتى على الاقل نجي لك لامطار صنعاء
معاذ ابتسم: الله يحفظك لنا يابه كنت اشتي اسوي لكم مفاجأة وانا جيت لا عدن وجيت البيضاء بسرعه تعرفني احب رداع
ابو معاذ ببتسامه: والله احلا مفاجأة سويتها، ووجه نظره لام معاذ: وغدوه شأضيف بمناسبت رجعت معاذ خليش جاهزه
ام معاذ: ولا عليك ادي المصاريف واسوي احلا غداء
معاذ ابتسم: الله يحفظكم لي
الكل: امين
وليد بمرح: كلنا كلنا حتى انا
معاذ سحب وليد وحضنه: ايوه انت اولهم
ساره بمزح: انا بحنق (زي بزعل) ليش ماتحضني
معاذ سحبها: تعالي تعالي الا حنقش مانشتهش
الكل: هههههههههههههه
حسام من الباب: وانا
معاذ: حيا حيا تعال انت يا.. وهو يقلد حسام.. برقد معك
وليد بضحك: قد كنت داري انه ما شيرقدش
معاذ: جلس يتكلم عن البطولات والنثرات اللي سواها
الكل ابتسم شويه الا وباب البيت يدق وليد قام يشوف من يدق
معاذ ابتسم لما سمع سوت احمد وقام
.
.
.
عند الباب وليد فتح الباب وسلم على احمد
احمد وهو ماسك يد ياسر(ولد فيصل):ياخي فينك لي من اول مراعي لك (يعني انتظرك)
وليد كان بيتكلم بس قاطعه معاذ وهو يقرب لهم:ياخي مالك مستعجل ادخل خذ نفس
احمد شاحر لامعاذ بصدمه بس صحاه صوت ياسر الضاحك: معاذ
احمد فك يد ياسر وراح وحضن معاذ: نورت البيضاء ياغالي
ابتسم معاذ وهو يحضنه: البيضاء بس
احمد دهف(يعني دف) معاذ بضحكه: جدة امك
معاذ راح وحضن ياسر: كيف حالك يابطل
ابتسم ياسر وهو يصافحه:بخير ياغالي  (يقلد احمد) وانت كيف حالك
ابتسم احمد
كان معاذ بيرد بس قاطعه حسام،
حسام من وراهم: فكه فكه يامعاذ
احمد بضحكة تقدم وسحب ياسر وقبل خده: ايوه فك ولدي يامعاذ قد فلان بيهدد يامعاذ
وليد وهو فاطس ضحك على ملامح حسام: فكه فكه
.

.

.
الكل عرف برجعت معاذ وعمل جد معاذ عشاء بمناسبة رجعت معاذ كان المعزومين في العشاء الاهل والجيران وبكره العزيمة الكبيره
.
.
.
بعد صلاة العشاء
الكل كان في بيت الجد النسوان في المطبخ  وساره وريم بيرتبين الديوان (الديوان يعني مجلس) اللي بايجلسين فيه النساء

والرجال في المجلس الكبير

في المطبخ....

هلاله ووضحى(هاذول نسوان يجين يساعدين ام فيصل وام معاذ اذا كانت عندهم عزيمه او تنضيف او عرس وهكذا)

هلاله وهي تنادي ام معاذ: رحمه كلميهم يجو ينزلو العشاء للرجال
وضحى: ايوه قبل يبردين الخبز
فاطمه وهي خارجه من المطبخ : ويني رحمه يارحمه
ساره وريم نازلات من الدرج وهن عادن خلصين التنضيف وبدلين ملابسهن  على شان يستقبلين الضيوف  ساره بأبتسامه: امي طالع بتدور تلفونها
ام فيصل: قولين لها تتصل لوليد يجو يشلو العشاء وانا تلفوني ماعاد فيه شحن
ريم: ساره روحي قولي لها انا بسير الحمام واجي لش
ساره: يله ناهي
ام فيصل ابتسامه:ماشاءالله عليكن حصنين انفسكن
ابتسمين الثنتين وهن منحرجات: تمام
طلعت ساره للدور اللي فوق
ساره وهي ماشيه لعند امها: يمه قالت عمتي فاطمه تكلمي وليد
يجو يشلو العشاء حق الرجال ان قد خلصينه
ام معاذ وهي متجهه للدرج: يله انزلي شلي الخبز وانا بكلمه يجي يشلهن
ساره وهي تلحقها: هيا
ونزلين المطبخ
ساره اخذت الخبز واتجهت لقريب من مجلس الرجال

.

.

.
في المطبخ
ام معاذ: اخرج شل الخبز وبعدين اجي انت وواحد من العيال شلو المقالي حق الدبيخ (المقالي الحجر ابحثو في قوقل)
وليد: ناهي ناهي وسكر وشحر لاعند احمد: قالت امك سير شل الخبز
احمد: ناهي سير بزهن انته
وليد: هي اختك اللي ادتهن
احمد: اااااوف خلاص انتبه لياسر لا يخرج لما ارجع
وليد ضحك: طيب طيب سير ياياسر تعال اقولك
.

.

.
مابين باب الفله وباب الصاله حق مجلس الرجال
قريب من المجلس كانت ساره تنتظر وليد يجي
ساره: اااوف وينو هاذا ااااح ايداتي ولفت تطرح الخبز في الطاوله
احمد شاف ساره وظنها ريم لان شعرها هي وساره لاخر ظهورهن واسود يعني زي بعض وجاء في باله انه يخوفها
ساره رجعت شلت الخبز وكانت بتلف بس في يد انحطت على ظهرها وصوت عند اذنها
احمد دنا (يعني نزل لمستواها) وقرب من اذنها: بووووووو
ساره وهي الثانيه ظنته وليد: الله يلعنك ياوليـ..  ولفت واول ماشافت احمد بهررت(وسعت عيونها) وهو الثاني بهرر
...... لحظة صمتـ... بين الاثنين

انتهئ البارت

نجمه حاليه من اياديكم الجميله

توقعاتكم ايش بتسوي ساره