" رِحــلَـة الـعُــمر "
Vote+ Comment فضلاً ولـيس أمراً
_____________
* الناظور
صبحات مغوبشة كتحل عينيها بشوية كتسمع لتقرقيب ديالو فوق الكوافوز حكات شعرها وناضت كالسة كتشوف فيه هضرات بصوت مبحبح : صباح الخير
جاوب بلا مايشوف فيها كان كيقلب فحوايجو: صباح الخير
رمشات كتحك عينيها كتحس براسها مدقدقة مورا الليلة دالبارح مانعسو تالشي وقت شعرها تكمش مع كان فازك تخربق ليها، جمعات لجنب كضفر فيه قبل ماتنوض.
طه: نوضي غسلي وجهك فطري غانخرجو.
ومشات فيها بقا كتفوه: فيين !!
طه: غاتمشي تصوري باش نخرجليك الباسبور.
رمشات بفرحة وتقلبو عويناتها بحماس: داااباا !!!
حركليها راسها جامع حجبانو: شي فلوس كانو هنا ماشفتيهومش !!؟
شاف فيها شوفة حادة متسائل حيت متأكد خلا الفلوس فسروال عارف راسو كيخلي الفلوس فالحوايج وفينما تجي رحمة تديهوم اتصبنو كتقلبهوم حيت كينساهوم ديما، عليها كيرجع يجمعهوم باش اخليهوم فالكوفر فور.
رمشات بزربة وسرطات ريقها بخوف يديها تبورشو تحت الفراش كتشوف فعينيه حناكها حمارو هضرات بزربة: لا ماشفتهومش.
علا حاجب ونزل ثاني رجع دار هز الجاكيت، ضربو الشك كيفاش فلوس يخليهوم فبلاصتهوم مايلقاهومش اذن حاجتو كتهز من قلب بيتو.
عضات شفايفها ودارت كالسة حاطة رجليها للارض لبسات البانطوفة وناضت بشوية دازت من قدامو هو كيقلب تادخلات للحمام وسدات الباب شافت فالمرايا، ماقدراتش تقوليه أنا لي هزيتهوم، حشمات يعرف بلي دات الفلوس لختها مزال التيليفون تقوليه مشاليا ولا تلف، ولكن الفلوس عارفة كانت هزات بزاف فغادي يسولها شنو دارت بيهوم.
قضات حاجتها وغسلات وجها: صافي اصلا غاينسا.
ماكملاتهاش كتسمع الهضرة درحمة فالبيت خرجات عينيها بزربة جرات فوطة كتمسح وجها وكتقرب لعند الباب تحط وذنيها.
رحمة: هادي ربعيام مادخلتش للبيت اولدي وميمونة راه لاماقلاش ليها هاد الحوايج هزيهوم ماتقيسش، شكون لي غايدخل للبيت!
غمض على عينو وعاود حلهوم بهدوء كيعض فمو من لداخل ماكيحملش بحال هاد الفعايل يطراو معاه حاجتو تبقا محفوضة البلاصة لي تحطات فيها، تنهدات مو كتشوف فيه عارفاه مزيان نطقات بشوية: تقدر تكون سميرة هزات وحشمات تقوليك!
أنت تقرأ
عودة الشفق
Romanceبين الحياة والموت، الحق والباطل، الابيض والاسود، الاستقامة والاعوجاج، الخير والشر، القسوة واللين، خيط رفيع اسمه طــه الوريـــاغلي. ATTENTION : THE NOVEL IS BOLD +18
