امي: امشي امشي يا بت استحمي و غيري شكلك دا خلي الفصاحه...قلت ليها اسي انا جعانه خليني اكل اول ...قالت لي الاكل ملحووق... انا طوالي جوطته فيها من غير ما اشعر بقيت ارفع في صوتي واقول ليها كيييييف تقولي لي الاكل ملحوق كان عندي طاقه كبيره ما عارفه افرغها وين فبقيت بفرغ فيها بالكواريك والكلام.. قلت لي امي كلام كتيييير و جزو منو ما عندو علاقه بالموضوع اصلااااا...وحرفيا ما كنت عارفه انا بقول في شنو المهم انا بتكلم وخلاص... بي صوت كواريكي نوسه جات جاريه من الغرفه و اسيل كان في الحمام لبست هدومها سرعه سرعه و طلعت.. وجو جارين الاتنين مخلوعين وهم بقولو لي في شنووو!!.. انا فجأه روقت ورجعت هاديه و قلت ليهم بكل بساطه انا جعانه خليتهم كلهم بعاينو لي بعض بصدمه و مشيت المطبخ ردمت كميه من الاكل جبتو و قعدت...
نوسه : يعني هسي انتي جايطه الجوطه دي كلها عشان جعانه!! قلت ليها انا! جايطه ابدا انا ما جايطه ولا شي بالعكس...
امي بزعل : دا كلو وما جايطه! يا بت انتي شويه و كنتي حتديني كف..انتي ناسيه انو انا امك و بتخشي بي النار؟...اسيل قالت لي صوت كواريكك وصلني في الحمام برا... قلت ليهم بكل روقان هسي خليكم من الكواريك....ما شفتو الليله حصل شنو و بديت احكي ليهم انو ريل كانت حتضربها عربيه... و قبل اتم ليهم قصه ريل دخلت ليهم في انو انا رجعت لي عزيز قروشو و فجاه قطعت القصه بقيت احكي ليهم بي مواقف قديمه وادخل الحكاوي جوا بعض.. الا اسيل مسكتني و قالت يا بت براءه دا شنو البتقولي فيهو دا!!
انا : الله!! بحكي ليكم في الحصل لي ريل!...
نوسه بتوتر: براءه علييييك الله لو بتهظري... البتعملي فيهو دا ما بضحكك...
امي : دي وحده قليله ادب ساي.. دي كلها حركات منها عشان محمد جاي دايره تعمل لي فيها مجنونه... لكن انا هسي بضرب ليها لي ابوها...و شالت التلفون عايزه تضرب ليهو... الا اسيل شالتو منها و قالت ليها م تكبري الموضوع يا امي خلاص نحن بنتكلم معاها...
نوسه طبطبت علي و قالت لي قومي يا برو استحمي عليك الله و عدي اليوم دا على خير...يعني كلمه ابوك في الخمسه سنه الاخيره دي بقت بالنسبه لينا تهديد و مصدر رعب بدل امان...
استحميت ولبست لي عبايه وطرحه سوداء... نوسه واسيل كانو بس بعاينو لي وما بي يدهم حاجه يعملوها... ولانهم مارين بنفس الموقف اكتفو بي انهم يسكتو لانو عارفين انو ماف اي كلام في الدنيا حيواسي بت ابوها بتعامل معاها كسلعه واقرب زول بجيهوو بديها ليهو من دون اي مقدمات... بعد شويه سمعت صوت نسيبه وهي بتسلم على امي برااا معاها صوت خشن بقول ليها خالتي حليمه كيف صحتك ان شاء الله بخير..وامي بتقول ليهو نحمد الله يا ولدي انت كيفك وابوك و عمك احمد خليتهم كيف.. قال ليها كويسين والله بسلمو عليكم
امي : اتفضلو يا نسيبه اقعدوووو ارتاحو...اسيل مشت سلمت عليهم ونوسه ودت ليهم المويه... نسيبه قالت ليهم عروستنا مالا مدسيه جواااا خجلانه ولا شنو... امي قالت لي نوسه امشي نادي براءه تجي تسلم... نوسه جاتني و قالت لي امشي سلمي و قصري لسانك يا برو عليك الله.. ضحكت و قلت ليها بحاول..طلعت لقيت محمد قاعد في الكنبه ماسك تلفونو و مركز معاهو جنبو امووو الاول ما شافتني جات علي وغَمتَتْني عليها شدييييد لمن عضامي طقطقو حتى فكتني ما عرفتها عايزه تسلم علي ولا تقتلني بي كتمت نفس... ساقتني من يدي عشان اسلم على محمد وهو حضرت سياتو ما كلف نفسو يرفع راسو من تلفونو يعاين لي.. و بقيت واقفه زي الهبله منتظراهو يعبرني الا امو قالت ليهو سلم يا ولد...حتي وقف مد لي طرف يدو وقال لي كيفك... مديت ليهو يدي بنفس طريقتو وما رديت عليهو اكتفيت بي ااني ابتسم ليهو بعدم نفس و لفيت عشان ارجع الغرفه.. نسيبه قال لي ماشه وين تعالي اقعدي.. امي زحت لي نظام اقعدي هنا... قعدت جنبها وانت يا محمد زي القاعد براك وماف ناس حولينك وزي الكأنو ما جاي بيت ناس.. ماسك تلفونو و قاعد بكل استفزاز.. نسيبه خلت حركات ولدها المستفزه ديك كلها وقالت لي انا: لابسه اسود في اسود كدا مالك يا برو زي الحاده المات ليكم منو! وقعدت تضحك كالعاده زي الكأنها قالت نكته...قلت ليها بكل برووود و انا مثبته نظري على محمد:المات لينا ضميييير ابوي..
محمد لمن قلت كدا رفع راسو بسرعه عاين لي بصدمه لقاني بعاين ليهو جوا عيونو... حصل توتر والناس دي كلها سكتت و بقت تعاين لي مستنيه مني اي رد فعل او تبرير لي الكلام القلتو.. و انا بس بعاين لي محمد وابيت اكسر عيني كلو كلو... و حرفيا حاسه بي متعه كدا وانا شايفهم بالحاله دي لدرجه اني فجأه قعدت اضحك لمن دموعي جرت... نوسه ما عرفت تعمل شنو ساقت اسيل و قالت ليها ارح نعمل الشاي وامي ضحكت بتوتر و عشان تنقذ الموقف قالت ليهم طبعا برو زعلانه شديد من ابوها عشان م حيجي و يححضر خطوبتها... نسيبه قعدت تضحك وقالت لي بجي يحضر الكبيره ان شاء الله م تزعلي و محمد بس كان بعاين لي بعدم استيعاب.. بعد شويه نسيبه استأذنت وقالت ماشه الحمام و طلعت... امي قالت لي امشي افتحي ليها الموتور المويه ضعيفه... قلت ليها حاضر.. لمن طلعت الحوش شفتها في الركن زي البتحفر في الارض و اول ما شافتني قامت بسرعه و بقت تملس في التراب بي شبشبها و تمشي خطوتين وتاني تنزل ترفع ليها حجر و تملس بي رجلها و هكذا... و قالت لي شفتي الدخله و المرقه بتحفر الواطه انا اليوم كلو شاغله كدا في بيتي.. اشيل و املس في الحوش بعد محمد جا ما عارفه بمشي في الارض دي كيف و بقت تضحك... انا اصلا ما كنت واعيه هي بتقول في شنو ولا مركزه معاهاااا ونسيت زاتو انو امي قالت لي افتحي ليها الموتور... قلت ليهاا ااااااااا اي والله ودخلت وتاني ما طلعت لحدي ما طلعووو... جوني امي و اسيل ونووووسه دي تشيل و دي تخت... ولا اشتغلت بيهم كتييير بالعكس ضحكت و قلت ليهم كان خلصتو افتحي لي نت يا نوسه من امبارح انا ما منشطه... امي قالت ليهم شفتو اختكم دي كان ما كتلتني ما بترتاح شايفنها بتعمل في شنو صح .. انا بضرب لي احمد بس يشوف ليها حل واوعك يا اسيل تقولي لي نحن بتنتفاهم معاها...ومشت اتصلت على ابوي... وانا ولا كأنو دا كلو كان حاصل...بيني و بين نفسي كنت حاسه وواثقه انو الطاقه الحاسه بيها دي ما طبيعيه لكن ما حاولت اركز كتييير لانو شعور الراحه والانبساط كان مسيطر علي اكتر..شلت تلفون نوسه فتحت النت نزلت لي الرسايل ورا بعض... من بينهم رساله محذوفه من عزيز... جاني فضول اعرف كان مرسل لي شنو والصراحه فرحت لمن لقيتو مرسل لي فتحت دردشتو لقيتو اون لاين رسلت ليهو "حذفت شنو؟ولي "
رد لي طوالي "مساء الخير ".. عملت رِبليي لي رسالتي وختيت عليها استفهامات و رسلتها ليهو تاني.. عشان يعرف اني ما حتنازل الا يوريني حزف شنو...
رد لي "بالنسبه لي حذفت شنو؟ حذفت كلام كتير كتبتو وانا بسمع لقلبي لاول مره في حياتي ... وحذفتو لي؟ عشان خفت من رد فعلك"
انعدلت في قعدتي و قلت معقوله عزيز يكون بحبني... مجرد الفكره خلتني مبسوطه و طايره في السماء و بسرعه رسلت ليهو "اسمع قلبك للمره التانيه في حياتك و اكتب كل الكلام الحذفتو تاني " قرا رسالتي بمجرد ما رسلتها..و اداني يكتب الان... و بعد قريب خمسه دقايق رسل لي" انا لي خمسه دقايق بكتب و برجع احذف الكلام تاني و ما لاقي كلام يوصف ليك شعوري.. المهم يا بت الناس انا من يوم شفتك ما قادر اطلعك من تفكيري... ما عارف الحاسي بيهو دا شنو بس انا حاسي بي حاجه حلوه شديد اتجاهك... لمن لقيت القروش في الكبايه زعلت بس اختي قالت لي دي حركه بت ناس عندها عزه نفس وفعلا كبرتي شديد في نظريييي " انا حرفيا بعد قريت رسالتو دي ما قدرت اوصف انا مالي و الحاسه بيهو دا شنو..ولاني بالجد كنت فاقده احساس الحنيه و الطبطبه و الكلام الحلو و في بيتنا ما بسمع غير الانتقاد بي استمرار لقيت نفسي برسل ليهو" انا حاليا حاسه انو كل الناس سامعه دقات قلبي وحاسه اني طايره.. بس برضو ما عارفه الحاسه بيهو دا شنو"...
رسل لي اموشنات ضحك وكتب لي اتصل!.. اتوترت و كتبت ليهو "ما عارفه اقول ليك شنو" طرالي دخل لي بي مكالمه...طلعت بسرعه مشيت الزقاق ورديت ليهووو قال لي اول شي ابدا ليك من وينن!! من الكبابي ولا من حلاوه الرسم.. ولا من حلاوتك انتي؟ ... سكتتت و نا رفت اقول ليهو شنو ... قعد يضحك قال لي انا حاليا حاسي اني اسعد انسان و بقا يحكي و يعد لي في المواقف الحصلت بيناتنا.. و شويه يتغزل فيني و تاني يرجع يحكي لي عن نفوسو وانا بس حاسه بفراشات حوليني...ومستمتعه من كل كلمه بقول فيها... اتكلم معاي قريب ساعه وقفل بعداك واصلنا كلامنا واتس... لحدي ما نمت وانا ماسكه التلفون في يدي
_________
مشاكل عملت القلت ليك عليهوووو؟
مشاكل: زي ما قلت لي يا ريّييس كلمتهم وقلت ليهم عندكم تسليم بضاعه قريب..
العدناني وهو بنفخ في الدخان : صلاح صدام كلم الرشيد و قال ليهو لحدي. الاسبوع الجاي بتكون استلمت... في حاجه حاصله و انا ما عارفها؟!
صلاح بتوتر : حاجه زي شنو يا ابوي...
العدناني وهو مركز مع صلاح وتوترو الواضح : انا ما سألتك عشان توجهه لي السؤال .. اخوك قبل كم يوم كان رافض الفكره... وهسي فجأه استعجل انا لو اكتشفت انكم عاملين حاجه من وراي م حيحصل خير و طفا السجاره وولع التانيه و وواصل كلامو وقال ليهو كلم رحيق تظبط امورها وبعد تلاته يوم تجيب البنات كلهم بي اي طريقه كافي النجوم زي الساعه 4ضهر ... وقبل على مشاكل قال ليهو وانت طلعتك من هنا توصل للحكومه معلومه انو نحن عندنا تسليم بضاعه الساعه 4في كافي النجوم...
قاطعو صلاح وهو بكورك وقال ليهو انت عاايز تسلمنا للحكومه بيدك ولا شنووووو!؟
______________
امي بعد اتصلت لي ابوي واشتكت ليهو مني.. اتفق مع عمو ناصر انو حيعملو خطوبه رسميه يوم الجمعه... فكان قدام ناس بيتنا اربعه يوم عشان يجهزووو ليها و يكلمو خالتي و اعمامي و عماتي.. كوركت و جوطته و قلت ليهم الولد ما طايق يعاين حتى في وشي وواضح انو مجبور علي لي ابوي بحسسني اني رخيسه وما مرغوب فيني بالطريقه دي.. بس كنت زي الكأني ما بتكلم زول شغال بي ماف...وفي نفس الوقت كنت عايشه حياه ورديه مع عزيز و ما وريت ولا زول من ناس الجامعه انو خطوبتي الجمعه عشان عزيز ما يعرف... كنت معتبراهو الحاجه الوحيده الحلوه في حياتي وفي يومين بس اتعلقت بيهو و بقيت بحكي ليهو كل كبيره و صغيره بتحصل معاي بس وهو نبنفس الطريقه كان بوريني كل تفاصيل يومو... يعني تقريبا كنا في مرحله الاهتمام الزياده عن اللزوم البكون في بدايه كل علاقه... كان في صوت جواي بقول لي انتي ما حاسه انو الحاجه دي حصلت بسرعه... و صوت تاني بقول لي ما حصلت بسرعه انتي من البدايه كنتي حاسه بحاجه تجاهو بس كنتي بتكابري..
صلاح كان مواصل في انو بخت لي الحبه في مويه كل ما امشي الصيدليه و تقريبا خلاص جسمي اتعود عليها و الاحساس بي الراحه والنشاط بقا ملازمني و طبيعي بالنسبه لي... ريل كان بتمشي معاي و تجي بس بعد اخر نقاش لي اسيل و نوسه مع امي في موضوع خطوبتي من محمد... اسيل ساقت ريل ومشت بيتها زعلانه.. وحلفت ما تحضر الخطوبه...عشان كدا مشيت الليله الصيدليه براي..اول ما دخلت لقيت رحيق قاعده سلمت عليها بشوووووق لاني طولت منها و سألتها من حبوبتها قالت لي كويسه شديد والحمد لله بقت احسن ...سألتها من ليلى ولؤي والجامعه..قالت لي انا زاتي بسبب مرض حبوبه ما كنت بمشي الاسبوع دا...
انا : الحمد لله انها بقت بخير... و بقيت اتلفت قلت ليها صلاح وين...قالت لي هسي بجي جاهو تلفون طلع برا... المهم هسي انا استأذنت منو وسايقاك معاي عازماك ارح.. قلت ليها بي استغغراب ارح وين يا بت؟!.. قالت لي كافي قريب من هنا خطوتين بس ارح يااااخ كلها ساعه و بنجي راجعين وجرتني و قالت لي دي اقل حاجه ممكن اعملها... بعد وقفتك معاي دي انا حسيت بالجد انو عندي اخت... ضحكت و قلت ليها يا بت انتي جنيتي ولا شنو ما بيناتنا كلام زي دا.. قالت لي يا زوله انا دايره اعزمك انتي مالك ووقفت ركشه ركبنا ونزلنا قدام الكافي... لمن دخلت حسيت بي قبضه كدا المكان ما كان مريح خالص.. والاشكال غريبه... والبنات والاولاد بشربو في شيشه.. قلت لي رحيق.. رحيق ارح نرجع دا شنو المكان دا!...
رحيق : تعالي تعالي ما تركزي مع ديل.. و ساقتني من يدي ومشينا تربيزه كدا مزينه و فيها تورته و حولينها زي سبعه بنات كدا رحيق قالت لي ديل صحباتي وبقت تعرفني عليهم وتعرفهم علي... و بعد شويه الويتر نزل لينا عصيررر... شربنا كلنا الا رحيق ومعاها تلاته بنات ابو يشربو خالص... و خلو عصييرهم في مكانو...
_____________
زياد :مروان خليكم لافين حولين الكافي.... عادل جوه بي مجرد ما ناخد اشاره منو داهم المكان..
مروان وهو بكورك : داهم يا زياد داهم... عادل رسل لي اشاره....
_________
قلت لي رحيق ماشه الحمام اشرت لي عليهووو من بعيد...وانا ماشه وقف لي واحد في وشي في ممر كدا فاضي وبقا ماشي علي وبقول لي اسمك منو يا عسل وانا راجعه لي ورا وبقول ليهو احسن ليك تبعد وهو لسه مواصل وجاي علي لحدي ما اتلصقت علي الحيطه..و بقا بيناتنا سنتمترات من غير ما اشعر فتحت الشنطه و طلعت فتيل الريحه كسرتو في راسو.. الولد بقا يكورك و يقول لي والله ما بخليك ومسك يدي لواها لي ودمو بنقط..وهو ماسكني كدا جا واحد جاري و بكورك بي اعلا صوت الشرطه... الشرطه داهمت المكان... طوالي الولد فكاني و جرا... وانا بقيت مخلوعه واقفه مكاني بعاين للدم وللناس الفجأه جات نازله من سلم في نهايه الممر بي مناظر خليعه و جارين يمين و شمال واخر حاجه شفتها قبل يغمى علي زيااااااد و معاهووو كم نفر ماسكين سلاح وبكوركووو ثاااابت اي زول يقيف مكانو ما عايزين اي حركه او صوووووت..
