اسوار بضحك :اتفضل طيب... و ما تقول مستعجل او ماشي طوالي لانو امي جوا ووصتني قالت لي لو دا يحي ما تخليهو يتعزر اي اعزار... فشنو اعزارك كلها مرفوضه..يحي ضحك و قال ليها مره تانيه ان شاء الله... امال جات طالعه وهي بتقول دا منو يا اساور الفي الباب..قالت ليها صاحب زياد ودخلت جواااا.. ويحي بقا متابعها بي عيونو لحدي ما اختفت ...
امال: اجي يا يحي مالك واقف في الباب ما تتفضل.. قال ليها مره تانيه يا خالتي امال والله عندي شغل ودخل ليها الحاجات ومشى رغم اصراها انو يدخل...وهو راجع على البيت اتصل عليهو مروان قال ليهو وديت الحاجات.. يحي قال ليهو اي وديتها و طلعت طوالي..
مروان بضحك: طلعت طوالي!! مالك عيان ولا شنو من متين بتمشي لي زياد ولا بتجيني و بتطلع من غير ما تاكل...ما بتقعد تنق.. تنق لحدي ما نجيب ليك الصينيه ولا عشان زياد ماف...
يحي : والله كنت مشرك للغدا هناك عديييل طولت من طبيخ خالتي امال... لكن اختو فتحت لي الباب لبشتني يا مروان اقسم بالله لقيت نفسي من غير ما اشعر بقول مره تانيه وعلقت عليقه وحده قدر ما حنسوني شابكهم ليك مره تانيه.. مره تانيه ...
مروان بحده : يحي انت واعي لي روحك بتقول في شنو.. دي لا مزن لانوع البنات البتعرفهم..اقسم بالله اقطع رقبتك انا قبل زياد... اوعك يا يحي تغلط غلطه زي دي اوعك وانا كدا حزرتك للمره التانيه ..
يحي : مزن شنو يا ود الناس انا شكلي وقعت في شر اعمالي يشهد الله من يوم العرس ما قادر اطلعها من راسي...
مروان بكواريك : ما دا الطبيعي عندك يا يحي... اي بت تشوفها ما بتقدر تطلعها من راسك الجديد شنو.. يحي لا اله الا الله محمد الرسول الله... اخر مره اقول ليك اقفل السيره دي..و قفل في وشو الخط... يحي زفر بضيق وهو بقول مروان كلامو صح وين الجديد.. يمكن دي حاجه عابره ساي و انا براي المكبر الموضوع...
_____________
منير زي العشاء كدا قال لي ناس اسيل اتلمووو كلكم في مكان واحد انا جايب شيخ يعمل رقيه شرعيه في البيت...و فعلا بعد العشاء طوالي اتوضو و صلو العشاء.. وقعدو كلهم في الصاله والشيخ بدا القرايه بي سوره الفاتحه... وخواتيم سوره البقره... بعدين قرا ايه الكرسي والمعوذتين... وبمجرد ما دخل في ايات السحر و الدعاء على السحره...ابوي انفقع بالبكاااا..ولحدي ما الشيخ خلص قرايه هو ما وقف بكا خالص..
ومنير حكى ليهو بكل الكلام القالتو نسيبه وهددت بيهو...الشيخ قال ليهو بحسره لاحول ولا قوه الا بالله.. الاعظم من المعصيه.. المجاهره بالمعصيه والتفاخر بيها ربنا يهديها...وقال لينا نقرا سوره البقره كلنا يوميا في مويه و نشربها.. و نحافظ علي اذكار الصباح و المساء و نكثر من الصلاه على النبي.. ووندعي بي الدعاء دا " اللهم احفظني من اعين الناظرين.. وقلوب الحاسدين كما حفظت الروح في الجسد.. انك على كل شي قدير" و ان شاء الله ربنا حيحفظنا... وابوي حيواصل في جلسات الرقيه مع قرايه البقره بي نيه خالصه و يقين تام بي انو ربنا حيشفيهو ويبطل مفعول السحر بإذنه تعالى..
وبمجرد ما الشيخ طلع اسيل اتصلت بي زياد قالت ليهو لو براءه جنبك امشي بعيد منها..وبدت تحكي ليهو انو نسيبه ختتنا انا وهو في راسها وورتو بكل الحاصل..ووصتو وقالت ليهو ما تكلم براءه كفايه الهي فيهو... بس خليك حريص على انكم تقرو البقره يوميا و تحافظو علي اذكار الصباح و المساء والتحصين... والله يكفينا شرها..
___________
ختيت ادواتي قدامي و بقيت بحاول ابدا ارسم..بس شويه تركيزي كان مشتت.. وما عارفه ابدا من وين..وكل شويه بعاين لي زياد الملامحو جامده من وقت ما حكيت ليهو بالرشيد...وهو ماسك تلفونو بعمل في مكالمات.. مره يكورك و مره يهدد ويقول ما ابقا اسمي زياد عبد الناصر لو ما خليتو يتمنى الموت وما يلقاهو... قلت ليهو بتوتر زياد عليك الله ما تكورك بالطريقه دي...رد لي و هو بضغط على اسنانو وضرب الطربيزه القدامي لحدي ما الاقلام وقعت وقال لي :ما اكورك!! اقعد اضحك وامشي الموضوع عادي يعني ولا كيف.. الراجل اتجرأ و مد يدوووو عليك... وانا هنا قاعد مكتف وما قادر حتى اعرف اسمو الحقيقي... وشال الدفتر الوقع في الارض ختاهو قدامي وهو بقول لي لحدي اسي ما رسمتي ولا خط! من قبيل قاعده بتعملي في شنوو.. وخت لي القلم في يدي و قال لي ارسمي الحيوان دا خلصينا...رجعت لي ورا وانا بعاين ليهو وما عارفه انبسط من غيرتو... ولا اخاف عيونو البتطلع شرار ... بعد شويه جاتو مكالمه.. وخت التلفون في اضانو قال الووو.. وعاين لي و طلع برا... وانا استعدلت في قعدتي ورتبت الحاجات في التربيزه..وبديت اخطط في خرطه الوش و احدد مكان الملامح الاساسيه من عيون و انف و غيرها..بس ما قدرت اعمل ولا شي زياده.. لحدي ما بعد ربع ساعه زياد دخل بشكل غير الطلع بيهو..و بدون اي مقدمات.. وزي الكأنو ما كان قبل شويه واقف لي في حلقي وبقول لي ارسمي قال لي:خلي اي حاجه في ايدك و تعالي نقرا سوره البقره.. عاينت ليهو بي استفهام... قال لي تعالي و حأفهمك بعدين... فعلا اتوضينا.. ووقفت وراهو وصلينا العشاء جماعه..وبدينا نقرا البقره وبمجرد ما وصلنا 112 وتحديدا جزئيه "فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ ۚ وَمَا هُم بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ ۚ" و خلصنا الايه... قال لي نسيبه قالت كدا.. كدا.. وانا عايزك تخليك واثقه انو كان طقت السماء دا ما حتقدر تعمل اي شي ما كاتبو لينا ربنا...
عاينت ليهو بصدمه و قلت ليهو انا كل مره بتفاجئ بحاجه جديده!! الناس دي بقت كعبه كدا متين؟ ...ولا انا الكنت ما بشوف... المرااه دي نحن فتحنا ليها بيتنا!! واكلنا و شربنا في نفس الصحن... انت قادر تتخيل؟!..
خت يدو في خدي وقال لي..ربنا يجعل كيدها في نحرهاااا يا رب...وربنا عشان بحبكم كشفها ليكم... ولا تزعلي نفسك عشان وحده جاهله ومريضه بتمشي لي دجالين و سحره عشان تأذي الناس..اسيل ما كان عايزاني احكي ليك...بس انا كان لازم احكي ليك عشان تخلي بالك من التحصين وايه الكرسي بعد كل صلاه...انا فقدتك مره و ما عايز افقدك للمره التانيه يا براءه...
بعد قال كلامو دا انا حارفيا اتلخبطت جواي حاجات كتيييره و بقيت بس بعاين ليهو...يعني انا يادوب قعدت معاهو يوم واحد بسسس...و بحنيتو قدر يخت بصمتو جواي..ولقيت نفسي من غير ما اشعررر بقول ليهو انا بديت احس انو ربنا شال كل الناس الكعبه دي من حياتي و عوضني بيك...زياد قعد يضحك و قال لي نسيبه دي خزعبلاتها بتشتغل بالمقلوب ولا شنو!!.... الكلام دا ما كان متوفر السِستم حقك...شكلو في فايروس اخترق النظام ولا حاجه...ضحكت وقلت ليهو خلل في النظام صح... عايزه اقوم كدا مسكني وقال لي وهو بضحك وين وين..تعالي نواصل تلاوه...بعداك عايزك تعيدي لي نفس الجمله دي تاني مرتين تلاته كدا عشان اعرف الخلل وين...وأوزن الاعدادات علي كدا فهمتيني! ...قلت ليهو انت عارف شكلو الخلل دا اثر على فيوزات السمع عندي و بقيت ما سامعه انت بتقول في شنو... زياد قعد يضحك ولحدي ما نمنا هو مبسوط و بشاغل فيني
________
عدت الايام وزياد ما كلمني بي ابوي عشان ما اقول راجعه البيت واشوف ابوي بالحاله ديك و الموضوع يأثر على نفسيتي...
علاقتنا مع بعض كانت مستقره شديد و اتعودت على وجودو في حياتي بكل حالاتو.. وهو في نفس الوقت كان مستحمل كل التقلبات الكانت بتحصل لي فجأه بدون اي سبب.. و مرات كتيره كنت بتفشاهو فيهووو وهو ما عندو ذنب بس خالص ما كان بحسسني انو اضايق مني بالعكس كان بتقبل تصرفاتي بكل صدر رحب...
مره مره كدا كنت بمر بي فتره انتكاسه.. و ارجع انكمش على نفسي واوقف كل حاجه كنت بعمل فيها و من ضمنها اللوحه... بس زياد دايما كان بشجعني.. وبقول لي الانطباع الاخدتو عنك من قبل ما اعرفك انك قويه يابرو .. انت قادره تتجاوزي.. وفعلا شويه بديني دفعه معنويه..والحمد لله اتقربت من ربنا شديد الفتره دي... ومع الجلسات بتاعت الدعم النفسي الكان مسجل لي فيها زياد اون لاين شبه رجعت... صح ما زي اول...لكن على قول زياد كونو وصلت المرحله دي في حد زاتها نعمه و العافيه درجات... حسناء شبه انقطعت بسبب الامتحانات و بقت تجيني امها... و جوني نسوان الحله الفي نفس الوقت هم قرايب زياد كلهم يوم بشاي المغرب و اتعرفت عليهم... وزي كل مجتمع فيهم الكويس.. و فيهم الما قدرت اتأقلم معاهو... بس كنت بحاول على قدر الامكان ما اركز و الحمد لله اصلا انفال كانت قربت تجي من ناس امها لانو راجلها جاي من السفر و شويه حتتقلني...
زياد كان بضغط علي شديد في موضوع اللوحه.. و مرات بصل بيهو الحد لي انو يكورك فيني... بس تاني كان برجع يعتزر... في يوم وانا نايمه بليل حلمت انو ملامح الرشيد اتلاشت من راسي و بقيت ما قدره ارسمها...صحيت مخلوعه و نفسي قايم و بالخوف فتحت النور ووطلعت الادوات... وبقيت احاول استحضر ملاموحو على قدر الامكان و اجسدها قدامي...وفعلا لحدي اذان الصبح الاول كدا قدرت اخلصها رغم اني وقفت في النص كم مره بس عافرت على قدر ما اقدر بسبب خوفي من انوو الملامح بالجد تتشوش علي كل ما الفتره تطول وما اقدر اخلص اللوحه...
زياد فتح عيونو عاين بالشباك لقا الدنيا لسه ما فتحت وانا قاعده في التربيزه ومركزه بكل حواسي مع الرسمه القدامي وبعاين ليها وانا حاسه بالانتصار...لدرجه اني ما حسيت بيهو لمن نزل من السرير و جا علي وهو بقول لي بتعملي في شنوو..واتخلعت لمن ختته يدو في كتفي وقلت ليهو وانا بكورك زياااد ميه مره قلت ليك ما تجيني من ورا وانت بتتسحب يوم حتوقف لي قلبي بسبب الحركه دي... اتفاجأت بيهو وهو بشيل اللوحه من قدامي بحركه سريعه و بقول لي بخلعه دا الرشيد!! و بقا بعاين للوحه القدامو من دون اي حركه...زي الكأنو بحاول يستوعب..وبعد قريب عشرين ثانيه طلع تلفونوبسرعه وطلع براااا اتصل على يحي وقال ليهو من دون اي مقدمات الليله تقفلو ملف قضيه الرشيد في الرئاسه.. و تبدو اجراءات محاكه العدناني و المعاهو...
يحي بصوت نعسان : زياد انت شايلك حمار النوم ولا شنو!!!
زياد بنبره حاده : براءه الليله كملت اللوحه يا يحيي...
________
صليت الصبح و قريت اذكار الصباح.. و زياد لسه بتكلم في التلفون..وبعد انتهى من مكالماتو و صلى... جرا الكرسي و قعد قدامي..
انا : من تقعد العقده دي بعرفك عايز تقول لي حاجه مهمه... في شنو يا زياد انا اتوترت
زياد ضحك رغم اني كنت شايفه في عيونو انو جواهو بغلي بس حاول ما يحسسني بحاجه وقال لي : يعني افهم انك بقيتي حافظاني..
ضحكت و قلت ليهو دا ما وقت هظارك يا زياد انجز في شنو ... مسك يدي و باس باطنها مسافه وقال لي انا كلمت انفال تجيب معاها اساور وامي..قلت ليهو طيب والمشكله وين بالعكس دي حاجه حلوه...
زياد اتنحنح وقال لي ما عايزك تفهميني غلط... و عارف انو الضغط حيكون عالي عليك..وواصل وهو بقول لي بتوتر هي حاجه حلوه واي حاجه بس امي حتاخد فتره لحدي ما تتعود عليك فهمتيني!...عارفك ما بستحملي زول يغلط عليك...بس على قدر ما تعمل ليك عشان خاطري بس استحملي... وتعالي اشكي لي انا بحاول اعوضك واعتذر ليك بالنيابه عنها.. وعليك الله ما تاخدي تصرفاتها بجديه انا متأكد انها بمجرد ما تتعامل معاك حتلين...انا حأقد معاكم فتره هنا وراجع عشان عندي شغل مهم.. وعايزكم تكونو الفتره دي في حته بعيده وكلكم مع بعض لانو ما حأقدر اخلي بالي منكم...
ما بكضب خفت للحظه... وشلت هم انا حتعامل مع امووو كيف.. بس ما حبيت احسسو ..وقلت ليهو بتوتر ما تشيل هم امك في مقام امي..ضماني عليهو لمن حسه بي نبره التوتر في صوتي وقال لي فتره و حتعدي ..قلت ليهو ان شاء الله بس انت راجع لي يا زياد؟ .. قال لي عندي شغل كدا بقضيهو و بجيكم راجع...
انا بخوف: شغل بخص موضوع الرشيد...
زياد بحزم : قلنا شغل يا برو.. ما تخافي كلها يومين وراجع.. وبعدين انا ما ما شي هسي طوالي ما تشيلي هم... عاينت ليهو بشك وما حاولت اطول معاهو في الكلام...
_______________
مروان :جايبني المكتب من 6 صباحا في شنو يا يحي ان شاء الله خير...يحي قال ليهو انتظر عادل يجي ما بقد احكي مرتين.. وبمجرد ما عادل جا بدا يحكي ليهم بالكلام القالو ليهو زياد...وملامح الصدمه كانت باينه في وشهم وهم بسمعو فيهو... واصل كلامو و قال ليهم زياد قال بمجرد ما نقفل ملف القضيه في الرئاسه الرشيد حيبدا يجهز لي عمليه جديده..لانو حاليا هو متوقف عشان عارف انو تحت الانظار و حاسي بالخطر...عشان كدا لازم نديهو مساحه امان..
______
