ان شاء الله لو باع ليهو حبايه وحده بس فيها نسبه مخدر بالغلط بدون رشته ارفعووو لي طوالي...
____________
لمن دخلت الجامعه لقيت نفسي تلقائيا بفتش بعيوني عن ولد امبارح بتاع الكافتريا وبتلفت يمين و شمال ما عارفه لي اتمنيت اشوفو...فعلا لمحتو واقف تحت وحده من اشجار الجامعه بتكلم وحولينو نااااس كتااار جزو واقف و جزو قاعد في الارض و جزو قاعدين في بينشات ومندمجين معاهو بكل حواسهم.... لَفتت رحيق واشرت عليهو قلت ليها رحيق هداك الولد بتاع السندوتشات الحكيت ليكم بيهووو امبارح...
بس رحيق اتلفتت كدا عشان تشوفو قبضني وانا رافعه يدي بأشر عليهو وانا ورحيق الاتنين مبحلقين فيهو ... ضحك ورفع لي يدو من بعيد سلم علي...اتمنيت الارض تنشقه وتبلعني ورفعت يدي يالله رديت ليهو السلام وجريت رحيق ومشيت اتجاه البوابه من التوتر كنت حأطلع برا الجامعه...وهو تقريبا بعاين لينا لحدي ما اختفينا من انظارو...
رحيق وهي بتجر يدها مني : يا بت الناس كاراني وين انتي براحه دايره ترميني على وشي...قلت ليها وااااي يا رحيق اسي الولد يقول علي شنو ...
رحيق : ومن متين انتي بفرق معاك ...انتي جيتي مدردقه عديل في السلّم الناس دي كلها اتفرجت.. ما فرق معاك بالله قمتي اتنفضتي و ميته من الضحك.. دي لو انا اسبوع ما بجي الجامعه...دايره تعملي لي فيها فرق معاك انو عزيز شافك بتأشري عليهو...
رديت ليها بخلعه بتعرفيهو؟!... قالت لي بعرفو لكن ما معرفه شخصيه... دفعتنا الولد دا لكن زيك كدا ما بجي كتير ونادر ما يخش محاضرات... يا بت عزيز دا ناشط سياسي كبير ومعروف بتلقيهو في اي ركن نقاش حتى في الجامعات التانيه ... قبل كدا مشيت لي وحده صحبتي في جامعه الخرطوم شفتو هناك وهي بتتكلم كدا وبتحكي لي بي عزيز.. دخلو الجامعه بتين سلمو عليها تاني دخلو بت وولد واستمر موال السلام...ماف زول شافتو او شافها ما سلمت عليهو... نحن يادوب لينا شهرين ونص في الجامعه وهي تقريبا بتعرف الجامعه كلها...وانا في دفعتنا كلها بعرفها هي وليلي بس.. و لؤي اتعرفت عليهو عن طريق ليلي ... باقي الدفعه لاطايقني لا طايقاهم.... قلت لي رحيق اسمعيني بعد تخلصي سلامك دا بتلقيني عند عم حامد ومشيت ...صح انا بدخل في الناس سرعه و ممكن اتونس مع اي زول حتى لو ما بعرفو.. لكن ملامح وشي الجديه بتدي الناس انطباع عكس شخصيتي عشان كدا اغلبهم تقريبا بعملو لي حساب...خليت رحيق بتتونس مع شله كدا تقريبا سنايرنا و مشيت لي عم حامد اكتر مكان مريح نفسيا في الجامعه رغم بساطتو... عباره عن ممر واسع مشجر... فيهو بينشات مرصوصه علي الحيط مع كم تربيزه بلاستيك مربعه كبيره و عشان الممر بين مبنا جامعتنا و المبنى الجنبها الشمس محجوبه عن المكان ..ضل وبارد حتى في عز النهار...وزياده على كدا عم حامد برش الارض كل ما تجف... يعني ريحه الطين مع ريحه الشجر والجو كفيله انها تخليك تحب المكان... سلمت على عم حامد و قلت ليهو عايزه لي كبايه شاي بلبن زابططه كدا... كان عندي عاده بقعد اتونس معاهو لحدي ما يخلص لي طلبي واشيلو وامشي.. او بقعد وبقول ليهو لمن تخلص ياعمو بس اشر لي انا بجي اشيلووو.. بتحسس شديد من حركه اقعد و يجيب لي طلبي لحدي عندي دي... بحسها عدم احترام..في النهايه هو زول كبير في السن.. و صحتو ما على قدر كدا... شلت كبايه الشاي وانا بفكر كيف ارجع لي عزيز قروشو بنفس اسلوبو ومن غير ما احرجووو...
فقلت انا اصلا بعمل كبابي مَكْ و برسم عليها بالطلب..لي ما اعمل ليهو و لي اختو كهديه تخرج و اخت القروش جوا الكبايه من غير ما يعرف و بكدا اكون رديت الدين ... انبسط من نفسي وضربت لي ليلي قالت لي في محاضره .. قلت ليها تعالي عليك الله عربي شنو البتحضري ليهو محاضره انا عند عم حامد جيبي لي معاك بسكويت... و فعلا خلال دقيقه جات معاها لؤي...ومن على بعد مترين هي بتكورك فيني شغاله لي تجي الجامعه بمزاجك و كمان تضربي تطلعينا من المحاضره و فاتحه نفسك دايره بسكويت... انت يا بت الجامعه دي حقت ابوك ونحن ما عارفين ..ضحكت وقلت ليها والله الجامعه لو حقت ابوي كان عرس ليكم كلكم من طرف و قلب الجامعه صاله مناسبات...هي ولؤي الاتنين قعدو يضحكوووو لانهم الاتنين حاضرين درامات نوسه لمن تجي تبكي لي في الجامعه وتقول ما عايزه محمود... لؤي قال لي رحيق وين؟ ... قلت ليهو رحيق بالله من دخلنا الجامعه حسستني اني داخله مع امي بيت عرس وقعت في الناس سلام ما خلت زول م سلمت عليهو...
لؤي : رحيق دي زوله اصليه ياخ... اجتماعيه مش زيك بالله انتي بتجي داخله القاعه تقول داخله حلبه مصارعه... صاره للناس وشك الدفعه كلها بتخاف منك... ليلي قعدت تضحك قالت ليهو تتزكر يا لؤي قبل تتعرف عليها كنت بتقول لي صحبتك دي مالها كل ما تسلم علي بتحمر لي كدا...لؤي قال ليها والله كنت بخاف منها عديل... انا مت بالضحك قلت ليهو ما قلت ليك يا لؤي ماكنت بحمر ليك كنت بحاول اشوفك كويسسس الايام ديك نظارتي كانت مكسوره...لؤي قال لي ما تشوفيني كويس يااااااخ شوفيني طشاش انا راضييي انا كنت بحلم بيك عديييييل لمن بصحى مخلوع.. معقوله ياخ تطيري لي عيونك وعشان تشوفيني كويس تقطعي قلبي بالطريقه دي... انا وليلى قعدنا نضحك... لؤي كان جادي كل الجديه انو كان بخاف مني... قلت ليهو والله يا لؤي طلعت قلبك خفيف لكن... قال لي قلبي خفيف شنو انتي عيونك اصلا خلقه منططات تجي تنططيهم لي زياده... بالله بعد عيونك الكبار ديل م بتشوفي..قلت ليهو قل هو الله احد...
ليلي: والله عينو حاره سجمك علق على قميصي كدا...تاني يوم اتشال بالمكوه..
لؤي : اسمها دعواتي مستجابه.. قلت ليك اديني ليهو لمن ابيتي قلت ليك ان شاء الله يتشال بالمكوه... انا زول طيبان و على نياتي عشان كدا دعوتي بتصيب طوالي ... ليلي قالت ليهو اها يا شيخ الطريقه...قلت ليهو لؤي متقدمين لي نفرين عليك الله ادعي لي... الله يطفشهم...و يكفيني شر كل عريس عاجب ابوي....دعوه كدا تكون من جوا قلبك
لؤي بهظار :انتي بس اول مايجي البيت طلعي نضارتك و سلمي عليهو زي ما كنتي بتسلمي علي.. وقدر ما الله يديك نططي عيونك .. صدقيني الخلعه الحتخش فيهو تاني ما بتمرق... انتي مطفشه الدفعه كلها منك يا بت بغلبوك نفرين...ليلي قالت لي ومع نطيط العيون اديها حِويصه كدا في نص الكلام وقولي ليهو نضارتي انكسرت وعندي حَوَل ...انا اتخيلت المنظر و ضحكت لمن دموعي جرت... بعد شويه رحيق جات...قلت ليهم يلا يلا رحيق جات الفطور...
ليلى: اصبري شويه يا بت اخدي نفس... هسي انتي شاربه الشاي بي بسكويتين...ضحكت وقلت ليها انا حاسه عندي مساحه فاضيه عايزه اكل انتي مالك زعلانه...رحيق قالت لي انا زاتي جعانه ارح نفطر سرعه سرعه عشان نلحق المحاضره... لؤي قال لينا انا بفطر مع الشاب افطرو و نتلاقى في القاعه... قلنا ليهو تمام... فطرنا سرعه ودخلنا القاعه ... بعد عشره دقايق الدكتوره دخلت درست محاضرتها وقالت دي اخر محاضره... والاسبوع الجاي في تست في الماده كلها بي 40 درجه والما بحضر التست بنحرم من الفاينل .. وطلعت خلت ليك الناس دي كلها جايطه...وانا اصلا بجي الجامعه مره في الاسبوع عشان احضر اللآب و أحول من رحيق المحاضرات البتسجلها ...وأصور من ليلى التلخيصات...و بقرا في البيت... لانو اصلا ما حابه المجال و ابوي دايرني اقرا هندسه غصب عني لاني بعيده شديد في الرسم من انا صغيره ...وانا كان نفسي اقرا لغات... فكنت كاسره حنك الجامعه و داخله كورسات اون لاين بتاعت فرنسي وانجليزي ... حولت من ليلي و رحيق باقي المحاضرات.. و مشينا المكتبه عشان انا و لؤي نشتري الشيتات...بتاع المكتبه قال لينا دكتوره الماده جات شالت باقي شيتاتها و قالت اي زول ما اشترى من بدري يتحمل مسؤليه نفسو... الدفعه كلها بقت راسها ضارب وكلهم بفتشو في الناس العندها شيتات عشان يصورو منهم ... لؤي سأل رحيق و ليلي انتو مش اشتريتو الشيتات الاسبوع الفات ؟ ...قالو ليهو اشترينا لكن م جبناهم الليله... الا بكره نجيبهم ليكم عشان تصورو ... قلت ليهم انا بكره ما جايه... لؤي قال لي هم شيتين انا اشتريت واحد وهسي معاي هاك صوريهو ...وانا بكره بشيل من ليلي او رحيق الشيت التاني و بصور ليك ولي.. قلت ليهو تمام و نحن بنتكلم كدا جو اربعه اولاد واحد منهم قال لي لؤي ادينا الشيت بتاعك نصورو ... لؤي اشر علي و قال ليهو الشيت مع براءه.. وقبل يتم كلامو و يقول ليهو بتصور ليكم معاها كم نسخه بالمره.. الولد قاطعو و قال ليهو بي استفزاز يعني نلبس طرحه ولا كيف.. لؤي مسكو من لياقه قميصو داير يضربو كدا... ليلي مسكتو وقالت ليهو الحرس يا لؤي فكووو ما تعمل مشكله جوا الجامعه... انا م قدرت امسك لساني طوالي قلت للولد ما تستعجل على لبس الطرحه انت لسه شافع... بعد تكبر لو حسيت نفسك لسه م بقيت راجل اتحجب وطرحتك هديه مني ...الولد بقا يكورك واصحابو ديل مسكوهو بالعافيه و ساقوهو...
رحيق و ليلي وهم بضحكو :والله بردتي لينا بطنا يا برو....
لؤي بتحزير : برو الاولاد لسانهم ما تمام انتي فاهماني... ما تردي لي ولد بي استفزاز ... عشان م يسمعوك حاجه ما برضيني ولا برضيك تسمعيها انتي بت في النهايه...والكلام دا ليكم التلاته قصرو لسانكم مع الاولاد... وبالزات الشله دي ... احترمت لؤي شديد ..و خلاني اتمنيت يكون عندي اخو عشان يقيف معاي و ينصحني زيو ... صورت الشيت خمسه نسخ...شلت نسخه و قلت لي رحيق الاربعه نسخ ديل وديهم لي بتاع الطرحه واصحابو انتي بتعرفيهم صح...قالت لي اي بعرفهم..لؤي قال لي بعد قله ادبهم دي الشيتات دي شفتي كان اشرطها ما بتديها ليهم ...
ليلى: والله انتي زوله غريبه انا ما قادره افهمك... لؤي قال ليها والله ولا انا ما قادر افهمها !!
انا : الحصل حصل و نحن عندنا تست عملا لي الله بس ادوها ليهم عسى ولعل ننجح ... لؤي قال لي خير ومشى .. رحيق شالت الشيات ودتهم للاولاد و جات قلت ليها ارح نطلع بعد دا... قالت لي انا قاعده شويه ... و ليلي اصلا بتمشي مع لؤي لانو طريقهم واحد...سلمت عليهم و طلعت علي البيت
_____________
صلاح طلع الزناد ولع سجارتو ومد علبه السجاير لي ابوهووو...اخد ليهو نفس طووويل من سجارتو و قال لي ابوهو رحيق قالت بتجازف خمسه بس.. وانا ضربت لي صدام كلمتو قال الشغل دا ما من اساسو ما واقع ليهو ... كلم الناس ديل قول ليهم نحن ما عندنا شغل في البنات... الشغل دا حيجيب لينا هوا..
العدناني نفخ دخان سجارتو فوق وقال ليهو اسمع يا صلاح الناس ديل بدفعو ونحن شغلنا مع البدفع ...اضرب لي اخوك دا وافتح الاسبيكر...صلاح قال ليهو حاضر وفعلا ضرب... صدام رد وقال ليهو يا صلاح في شنو بتضرب لي في اليوم ميه مره... رد ليهو العدناني بصوتو الخشن وقال ليهو بصيغه امر اسمع رحيق حتظبط خمسه... الخمسه الباقين انت الحتشوف ليك زول يجازفهم
صدام بإحتجاج: ابووووي الشغل دا م شغلنا... خلينا في شغلنا عليك الله .. البنات ديل مصيرهم بعد يختفو اهلهم يفتشو عليهم... حتلفت علينا نظر الحكومه...
العدناني : الحكومه حتجيب لينا البنات لحدي عندنا... و بالنسبه لي اهلهم نحن اهلهم...
صدام وصلاح في نفس الوقت قالو ليهو كيييييف يعني؟؟ رد ليهم العدناني و هو بطفي في سجارتو كيف يعني دي شغلي انا... اسمع يا صدام زي ما قلت ليك شوف موضوع الخمسه الباقين.. وانت يا صلاح ارمي مصطفي مشاكل للحكومه.. اصلا الايام دي هم شغالين و بِنبُشو و يفتِشو ورانا... وكلم مشاكل يجيني عشان اوريهو يعمل شنو... صلاح قام وجدع السجاره تحت رجلو وعفصها و قال ليهو اعتبر موضوع مشاكل خلصان داير يطلع كدا ابوهو وقفو و قال ليهو اسمع حنوقف الشغل الايام دي ما تعمل اي حركه قبل ما ترجع لي سااامع... ما دايرين اي حاجه تعمل لينا شوشره...
______________
اول ما فتحت الباب ريل جاتني جاريه قالت لي اجلي حالتو مصيبه جات (اجري خالتو نسيبه جات) قعدت اضحك قلت ليها انتي عارفه يا ريل الكلمه الوحيده البتقوليها صح مصيبه دي..قالت لي ااااااا... قلت ليها ولا شي ارح ارح و شلتها دخلت بيها جوه لقيت خالتو مصيبه على قول ريل مكوعه في السرير جنبها امي ...اول ما شافتني وقبل السلام عليكم زاتو قالت لي هيييي يااا برو محمد جاي السودان... قلت ليها بدون نفس يصل بالسلامه...وبي قلبي قلت تجيهو الكشه بركه الله و قبل تفتح معاي موضوع قلت ليهم الاسبوع الجاي عندي امتحان دايره ارتاح حبه عشان اقرا... دايره امشي كدا قالت لي وريل دي لابّاها في صفحتك كدا شايلاها تشرح ليك ولا شنو و قعدت ضحك زي الكأنها قالت نكته... قبلت ضحكت ليها غايتو حسنه و اجر حسستها انها ظريفه ...ريل عاينت لينا ونحن بنضحك هي زاتها بقت تضحك و تصفق وتقول لي امي يا حبوبه اضحكي يا حبوبه اضحكي... امي زاتها بقت تضحك... وانا بقيت اضحك في ضحك امي وريل ... اسيل جات لقتنا بنضحك زي المتخلفين هي زاتها بقت تضحك قالت لينا مالكم...قلت ليها خالتو نسيبه دي نكته غايتو ضحكتنا ضحك...اسيل من الهجمه ضحكت بس ما عرفت تقول لي شنو... وخالتو نسيبه طبعا حست نفسها ظريفه جدجد وبقت تحكي ليهم حاجات كدا بتضحكها براهاااااا ... و هم بجاملو فيها و يضحكو... زغت براحه خليتها عايشه دور الظريفه مع امي وريل ما صدقت الله فكاني.. اسيل جات لاحقاني الغرفه.. قالت لي انتي كويسه يا بت؟
انا: كويسه مالي؟ ..
اسيل: برو انتي حتستهبلي... امبارح كنتي حالتك بالبلاء... الليله عايزه تعملي فيها زي الكأنو ما حصل شي..
انا: اها يعني اقعد ابكي على ابوي الما عارفه بعمل كدا لي؟ ولا اتحسر على نفسي؟وريني..
اسيل : اها طيب حتعملي شنو وريني... ايناس جات داخله من الجامعه قالت لينا حتعمل شنو في شنو... وديل مالهم بضحكو كدا برا!! ... اسيل قالت ليها اسكتي نسيبه الليله ماسكاها ام فريحانه شكلو عشان ولدها جاي... نوسه غمزت لي وقالت محمد صباح خير برو..
انا : تصبحي جِقر يا نوسه ظرافه محمود دي م تعمليها لي عليك الله...المهم اسي اطفو النور وراكم..
اسيل : بس دي فلاحتك.. كل ما الزول يفتح خشمو معاك تقولي اطفو النور ... يا زوله نومي بعد تصحي بنتفاهم و طلعت... نوسه مشت تاكل و انا غيرت هدومي و نمت
_________
زياد : امي يحي دا عازم روحو شاي عندنا... بعدين حيجو هو ومروان ..تعملو كيكه ولا امشي اجيب كيك و بسكويت من الدكان.. امال قعدت تضحك قالت ليهو اساور عندها امتحانات كدي شوفها لو بتقدر تعمل ليك كيكه... قال ليها تمام و مشى لي اساور لقاها لسه بنفس نكوشها بتاع امبارح... قال ليها لا يعني فلم الرعب دا حينتهي متييين.. ارحمي شعرك دا ياخ... كل سبيبه واقفه انتباه في زاويه...
اساور بضحك : واقفين انتباه لي حضره سعادتك يا جنابو زياد ...
زياد وهو بضحك : سرحي شعرك دا عليك الله ... الله يعين البعرسك بعدين شلت همو حيصبح و يمسي بالمنظر دا...
اساور : الله يورينا مرتك نشوف شعرها بعدين حيكون كيف...زياد غمز ليها مرتي في البكااا كانت سمحه بشاهدتك انتي و امي... اساور قعدت تضحك قالت ليهو كدي خليها توافق بعدين تعال اتبوبر لينا...البسمعك بتقول كدا يقول شفتها..
زياد بضحك : ما عندك ليها صوره والله جاني فضول اشوفها... اساور قالت ليهو هالله هالله ما كنا منقنقين و ماعايزين نعرس هسي و قلنا شافعه... زياد قال ليها انتي عارفه انا زاتي ما عندي موضوع الواقف و بتكلم معاك... امشي امشي سرحي قفتك دي و اقري قرايتك ومن بعد المغرب م تجي تاني على الصالون جاين يحي و مروان خليك بجاي بس قالت ليهو سمح ...مشا الدكان جاب ليهو كيك و بسكويت... و زي الساعه ٧ كدا جوهو مروان و يحي...
امال وهي بتسلم عليهم : طولتو مننا انا زعلانه منكم والله...قالو ليها والله يا خالتي مدروشين الايام دي ... امال قالت ليهم الله يقويكم يا اولادي و جابت ليهم الشاي وسألت مروان من مرتو قالت ليهو لي ما جبت اسراء معاك قال ليها مره تانيه انا جاي من الشغل والله...قالت ليهو منتظرنكم و اتونست معاهم حبه و مشت ...
زياد بعد امو مشت انعدل في قعدتو و قال لي مروان ماف حاجه جديده...
مروان : والله يا زياد في واحد اسمو مصطفى بقولو ليهو مشاكل شغال في مصنع الحديد مع العدناني...شكلو كان حيستلم حبوب تقريبا ...بس لمن حسه انو مراقب جرااااا هو والزول المفترض يستلم منو... مسكنا مصطفى لكن الحيستلم منو ما قدرنا نحصلو ...ولمن فتشنا مصطفي ما لقينا معاهو حاجه...وابا يعترف بي اي شي...
زياد قام كفكف اكمام قميصو بترتيب ولبس جزمتو و قال ليهو ارح ارح طيب انا عندي كلمتين داير اقولهم ليهو...
يحي : والشاي؟...اجل كلامك لي بكره عليك الله خلينا نشرب الشاي دا بي مزاج..
زياد :يا يحي شاي شنو
يحي : انتو امشو لو ما دايرين انا بشرب شايي و شايكم ... و بنضف الصاحنه دي من الكيك و البسكويت و بلحقكم...مروان قعد يضحك قال ليهو كائن بطيني خلاص...يحي قال ليهو اخير اكون كائن بطيني من كلب شغل... اما زياد دا حمار عديل...
زياد بضحك :حمار صاح؟.. و شال الصينيه بي شايها و كيكها و بسكويتها... قال ليهو يلا شاي ماف ووداهم المطبخ... مروان قعد يضحك
يحي : ياااااا خالتي امال... خالتيييي تعالي عليك الله... امال جات قالت ليهو نعم يا يحي... يحي قال ليها زياد شال الشاي والله انا جاي من هناك خرمان عديل لي شاييك دا...
امال :اجيييي يا زياد عاد بالغت... يحي قال ليها وهو بضحك بالغ والله احترام للضيف كلو كلو ماف...
زياد بضحك : شافع بس ح اقول عليك شنو يعني ...
مروان وهو بضحك : خساره الشنب والدقن... طووول ساي بسس...
امال قعدت تضحك و قالت ليهم يحي دا انا ما برضى فيهو...و جابت صينيه الشاي راجعه...يحي قال ليهم يلا طقو راسكم بالحيط خالتي امال دي حقو اسوقها معاي اي حته عشان تاخد لي حقي منكم ...مروان وزياد خلو امال تمشي بي جاي... مسكو يحي الاتنين كل واحد من يد كتفوهو و ركبوهو العربيه رجاله ويحي بقول ليهم والله ارفع عليكم قضيه اختطاف و تعدي.. وهم ولا شغالين بيهو اتحركو على القسم... لمن وصلو الضابط عادل رفع ليهم التحيه و جاب ليهم مصطفى..
زياد بثقه : اقعد يا مصطفي... وجيب ليهو كبايه شاي عليك الله يا عادل...
مصطفى : اكيد ما جايب لي الشاي كرم ضيافه...تعال من الاخر يا سعادتك
زياد كان متكل على الكرسي لي ورا.. لمن قال ليهو كدااااا انعدل في قعدتو و قرب وشو من مصطفى و قال ليهو بصيغه اقرب للتهديد ما هدا انت حلو و جيت معاي في الكلام عدييييل لي بقولو عليك مشاكل.. اسمعني كويس لانو انا كلامي ما بعيدو.. انت حتطلع من هنا زي الكأنو ما حصل شي لانو ماف زول برا عارف انك اتقبضت واي خطوه يعملها العدناني حتكلمنا بيها.. دا طبعا لو داير تطلع من الورطه الانت فيها و الحكم يتخفف عليك... وكمان لو داير تعفن في السجن طبعا اذا العدناني ما رسل ليهو زول يوديك لي الله...نحن ما عندنا مشكله بيك و بدونك نحن العدناني حنعرف نجيبو...بس دي مساعده مننا في النهايه انت زول عندك شفع صغار ما برضينا تاخد مأبد و عيالك يتربو من غير ابوهم...
مصطفي رجع ورا حبه بسبب نظرات زياد الحاده الحسستو انو بقرا في افكارو و خلتو يتوتر وقال ليهو وانا اضمن كيف انو انت ما بتكذب علي.. عايز ضمان
يحي ضرب ليهو الطربيزه وقال ليهو ضمان شنو انت جاي تشتري تلاجه 15 قدم... انت قاعد في قسم اشرب كبايه شايك دي وانت بتفكر حتساعد روحك وتعمل الاتقال ليك ولا تترمي في السجن دا زيك زي اي حيوان...
مصطفي بخوف : حاضر يا سعاتك انا تحت امرك... بس الحكم حيتخفف ولاااا....مروان قاطعو قال ليهو حيتخفف يا مشاكل حيتخفف بس اعمل حسابك حتكون تتحت المراقبه لو عملت اي حركه في حركتين حأدفنك حي...
زياد رجع اتكل على الكرسي تاني و قال ليهو فشنو ما تعمل فيها مفتح وواقعه ليك...و قال لي الظابط عادل اعمل ليهو اخلاء سبيل خليهو يتخارج...
يحي قعد مكان مشاكل و قال لي زياد يعني تشرّب بتاع الخرشات دا شاي.. وتشيل الشاي من قدام صحبك... تعال تعال يا عادل انا داير افتح بلاغ..عادل قال ليهو بضحك اتفضل يا رييس
مروان : اها عايز تقول شنو...زياد خطفني من بيتهم جابني القسم بمساعده مروان! ....يحي قال ليهم واتعدا على خصوصتي وغدرني قبل اشرب الشاي
زياد بضحك: اتعديت علي خصوصتك في بيتنا؟..عادل و مروان قعدو يضحكو...
يحي : عادل بتضحك؟.. بعت القضيه ؟..اشتروووك بي كمممم ؟.. انا جادي والله حركتكم جبانه
مروان وهو بضحك : يحي عليك الله قوم قوم امشي بيتكم... الواحد يتفكا من درامات مرتو في البيت.. يجي لي حركاتك هنا امشي البيت نوم يا اتونس ليك مع وحده من بناتك الكتار ديل ...
زياد : ارح ارح اوصلك في طريقي قبل الزمن يتأخر و حبيباتك ينومو كلهم وما تلم في ولا وحده صاحيه تتونس معاها ...يحي قال ليهو حبيباتي م تجيبو سيرتهم على لسانكم انا راجل غيور و بعدين توصلني وين؟ .. زياد ضحك و قال ليهو بيتكم يعني حيكون وين ..
يحي : بيتنا شنو من هنا انا ماشي بيتكم...اتعشا و اشرب الشاي الخليتو وراي داك.. انا زول عزابي عشان انت قاعد في بيتكم.. ودا معرس ما عارفين معاناتي ...وشال المفتاح قال ليهو الحقني في العربيه ...فالح بس تشرب بتاع الخرشات والله نلقا ناس البيت نايمين تعمل لي الشاي انت دا..
________
رحيق كانت قاعده مع صلاح في الصيدليه.. قالت ليهو يعني خالي مصر انو يخش في تجاره البنات دي... انا اتفاقي معاكم اوزع حبوب بس...
صلاح :والله يا رحيق اتكلمنا معاهو انا و صدام لكن انتي عارفه خالك..
رحيق: من هسي كلمو ووريهو بنات الجامعه خط احمر عشان يختها حلقه في اضانو .. انا بجازف ليهو من اي مكان الا الجامعه...مجتمع الجامعه دا ضيق ولو جازفت حأروح في ستين دهيه... ولو انا وقعت ما بقع براي خليكم عارفين بس...
صلاح : كدي خليك من الكلام الفارغ دا.. بي مناسبه الجامعه براءه دي حنكها شنو...رحيق رفعت ليهو حاجبها وقالت ليهو حنكها شنو في شنو صلاح العب بعيد عليك الله ما تعمل لي مشاكل... صلاح قال ليها ما داير العب انا جادي والله المره دي..رحيق ضحكت ليهو بي استفزاز و قالت ليهو جادي شنو انت ناسي انتو شنو و ابوك شنو؟ في رايك االبت حتعاين ليك!!... ورفعت ليهو صباعها وقالت ليهو ابعد من طريق البت يا صلاح..
صلاح نزل ليها صباعها و قرب وشو منها لمن بقت حاسه بنفسو حار في وشها و قال ليها بتهديد ابوي العدناني بتاع مصانع الحديد والصلب... وانا صيدلي محترم... بتعرفي عننا شنو غير كدا..
رحيق رجعت لي ورا و قالت ليهو بغييظ والله!! .. كدي فالنفترض لا انا لا هي ما بنعرف عنكم حاجه... البت دي بالزات ما بهمها لا قروشك ولا شكلك خليك عارف وما عشان اتكلمت معاك قبيل معناها ميته فيك... هي اصلا كدا زوله تلقائيه وبتقول الكلام الفي قلبها و خلاص وهسي لو لاقتك في اي مكان تاني ما حترفعك من ارضك ولا حتعبرك ...فشنو ما تحاول معاها عشان ما تسمع وسخ اضانك...بعدين ما تقول ما وريتك انت حررر...صلاح عاين ليها بثقه وخلف رجلو و قال ليها بنشوف... قفلو الصيدليه و طلعووو.. صلاح لمن عاين لليافطه تلقائيا قعد يضحك وقال لي رحيق اسمعيني تعالي اشتغلي معاي في الصيدليه في قسم التجميل وحاجات البنات دي..و بعد كم يوم طلعي ليك اي عزر... وبي اي طريقه خلي براءه تجي تسد ليك نظام الصيديله قريبه من بيتهم...
