يحي اخد نفس و قال ليهو انا عايز اساور اختك على سنه الله ورسوله..وبقا بعاين لي زياد و متوقع منو كف ولا بنيه وما خد وضعيه الدفاع عن النفس..
زيااااد قعد يضحكككك وقال ليهوووو جيب اهلك وتعال.. اساور زاتها موافقه.. نحن منتظرنك لينا اسبوعين تشد حيلك و تجي تكلمي معقوله بس يا يحي دا كلو خوف ..
يحي دا نطط عيونو ومن الخلعه لمن هبط وقعد في الكنبه و قال ليهو قلت شنو؟
زياد بضحك : مروان حكى لي بكل حاجه من البدايه...لكن كان لازم تتأدب يا كلب...و بعدين دقيقه انت داير تطلب اختي بتجيني في بيتنا ولا بتناديني بيتكم.. شافع جاهل خلاص...
يحي قعد يضحك وقال ليهو مروان خلي يصبر لي.. الاتنين حركتكم ما حركه رجال لكن دفنتها ليكم بنتلاقى قدام ... و دايرني اجيك في بيتكم عشان تخبتني قدام البت... اخير انجلد في بيتنا بعيد عن الانظار لامن شاف لامن عِرف...
زياد ضحك و قال ليهو ابقا راجل يا يحي اساور تجي و تشتكي لي منك جلد شنو..اخرك معاي رصاصه بس بوديك لي الله طوالي... يحي ضحك و قال ليهو وانا بدقس معاك يا زياد عيب عليك..هو لو ربنا ما غضبان علي من دون البنات ما بقع الا في اختك انت الحمد لله بس.. وبعدين اقسم بالله انا اكتر من خوفي من الجلده كنت خايف تكفتني بي يدك المكسوره دي تحصل ليك حاجه مرتك تبقى لي في رقبتي... اقسم بالله يا زياد انا مرو علي اسبوعين ما يعلم بيهم الا الله..ربنا اخد حق البنات اللعبت بيهم كلهم.. نوم ماقادر انوم و خايفك ترفضني.. بعد العمايل العمالتها دي كلها...
زياد طبطب على كتفو و ضحك و قال ليهو انا لو ما اتأكدت انك خليت البتعمل فيهو دا بالجد ما كان اديتك اختي... ابقي عشره عليها.. اساور دي بالزات وصيه ابوي.. وزي ما ابوي وصاني عليها هسي انا بوصيك يا يحي..
يحي قال ليهو ما تشيل هم اختك على راسي من فوق يا زياد
_______________
مرت الايام وابوي الحمد لله سافر ورجع شغلو... وزياد برضو رجع الشغل بس اخد ليهو فتره اجازه علاجيه لحدي ما يدو تتعافى.. وانا فكيت التحميد ونزلت الجامعه وليلي دي اول ما لاقيتها بكت بكا الجن و الجنبو وقالت لي بضرب ليك و لي اخواتك ماف زول برد علي قلت خلاص قاطعتيني..قلت ليها يا بت انتي عويره ولا شنو و حكيت ليها كل الظروف المريت بيها... ولؤي قال لي انا قلت ليها براءه اخرها تزعل منك يومين... لكن هي ما بتفهم كل يوم تقعد تتبكى لي كرهتني الجامعه والبيت و الله يا برو... يعني اتفكا منها في الجامعه تضرب لي تلفون تتنفسن لي في البيت... الحمد لله الرجعتي تاني شفتي يا ليلي كان لاقيتيني في الشارع ما تسلمي علي سامعه... قعد اضحك و قلت ليهم والله اشتقت ليكم شوووووق يخوانااااا ما بتصدقوووو...كنت عايزه اسألهم من عزيز كنوع من الشمار لكن اتزكرت تهديد زياد لمن قال لي ما تنسي انتي متزوجه ضابط مباحث لو اتنفستي ساي بي اسم عزيز بجيب خبرك تقطعي علاقتك بيهو سامعه..قلت ليهو خاتي لي جهاز تصنت ولا شنو... قال لي ما تستبعدي المهم اعملي حسابك وريتك بس ظرافه ولطافه مع الشباب ما داير...قلت ليهو حاضر من سكات عشان اتقي شروو...
يحي اهلو جو من السعوديه عشان الخطوبه ...و نحن بقينا جارين في التجهيزات سوووق... و نضافه بيت و خبيز و حنه ...وفي نفس الوقت كنت بقرا و بحاول الحق الفاتني عشان حأمتحن مواد السمستر الفات بدايل...قبل الخطوبه بيوم قلت لي نوسه امشي انتي مع اساور انا والله ماقادره حاسه روحي تعبانه شديد من امبارح... و اسيل و انفال استلمو شغل البيت براهم... و انا كل ما اقوم من السرير عشان اساعدهم راسي بلف و برجع اقعد تاني...خالتو امال قالت لي مالك يا برو ليك يومين حاسه بيك ما طبيعيه... قلت ليها ما عارفه حاسه بفتور و طمام شديد شكلو من الارهاق وتعب الايام الفاتت... ضحكت بفرح لمن انا استغربت هي بتضحك مالا وقالت لي بعدين خلي زياد يوديك يفحص ليك... قلت ليها ما بحتاج يا خالتو برتاح الليله و ان شاء الله لحدي بكره بكون تمام... بس هي ما اشتغلت بي واول ما زياد جااا قالت ليهو سوق مرتك دي تعبانه شديد اعمل ليها فحوصات...قال ليها انا قلت ليها لكن البسمع الكلام منووو... وجاني وهو شايل العبايه في يدو و قال لي قومي يا برو البسي العبايه دي..
انا بتعب :في شنو يا زياد؟ البس العبايه لي شنو؟
زياد : حنمشي الدكتور...قلت ليهوو بلهفه مالك انت حاسي نفسك تعبان... طوالي استغل الفرصه و قال لي حاسي الورم زاد داير امشي اشوف الحاصل شنو...وبمجرد ما قمت عشان البس العيايه حسيت نفسي دايخه و مسكت راسي بتعب..زياد تكلني لحدي مالبست العبايه وقال لي قوه الراس تخليها لي منو؟ .. انتي دايره تموتي في سريرك دا ولا شنو...قلت ليهو زياد فكني ما تضغط علي يدك..طوالي كورك لي انفال واساور عشان يوصلوني العربيه.. و فعلا ركبوني العربيه وركبو واتحركنا على المستشفى... و عملو لي الفحوصات و بقينا قاعدين منتظرين النتيجه...كنت قاعده جنب اساور وتاكله راسي في كتفها وبقول لي زياد الكضب لزومو شنو قال ورم قال وهو طبعا ولا شغال بي..وماشي و جاي قدامي بتوتر جنبو انفال بتضحك... قلت ليهو بتعب : زياد ورتني ما تتحرك يمين و شمال كدا اثبت في مكان واحد واقعدو انت وانفال الاتنين ما تقيفو لي كدا في راسي ...
قعدو جنبي وهو بقا وهو بقا يهز في رجلينو ...
انا بزهج: يا الله يا زياد اثبت حبه...
زياد بنفس نبرتي :براءه انا براي قاعد على اعصابي ما تخليني افقدها بالمره و اكورك امرضي مرضك دا وانتي ساكته... اساور وانفال قعدو يعاينو لي بعض و يضحكووووو... وانفال قالت ليهو زياد دا مجرد هبوط انت مالك متوتر كدا..زياد قال ليها بحده انفاااااال... طوالي سكتتت...
بعد شويه ندهو اسمي في شباك نتائج الفحص... زياد مشا استلم النتيجه و رجعنا دخلنا للدكتوره تاني..شافت الفحوصات وقالت لي مبروك انتي حامل في الشهر التاني محتاجه ترتاحي شويه الفتره دي ...زياد دا قرب يطير بالفرح و بالحماس قال ليها ولد ولا بت يادكتوره... قعدت تضحك و قالت ليهو ما بظهر معانا هسي لسه شويه...وانا دي بس دموعي مشت شلالات وشغاله ليهو زياد انا حامل يا زياد...و الدكتوره بتضحك فينا الاتنين وقالت لينا ان شاء الله ربنا يديكم الخلقه التامه يا رب وربنا يحلك بالسلامه...و كتبت لي حبوب وورتني دكتوره شاطره اتابع معاهاااا...
لمن طلعنا اساور وانفال اول ما شافوني ببكي و بضحك في نفس الوقت و زياد ملامح وشو مفرهده... و شغال لي تاني جامعه ماف... وانا بقول ليهو اصلا من متين انا قاعده امشي الجامعه انت كمان ياها المره الفي الاسبوع دي... وهو يقول لي مره في الاسبوع زاتو تاني ماف... طوالي قالووو لينااااااا مبرووك و انفال قعدت تزغرت في نص العياده... واساور قالت لينا نحن كنا عارفين اصلا امي كانت شاكله لكن قالت ما يكلموكم..زياد قعد يضحك و حضن اخواتو الاتنين في نفس الوقت... و باسني في راسي وقال لي ربنا يخليكم لي الاتنين يا رب...
لمن رجعنا البيت لقينا خالتو امال منتظرانا في الحوش ومعاها حسناء و امها و عبد الله راجل انفال الجو لي خطوبه اساور... و اول ما دخلنا زياد قال ليها كدا يا امي تدسي من ولدك الوحيد خبر زي دا... قعدت تضحك و بقت تزغرت و قال لي بقيتو لي الفرحه فرحتين.. اجري فرحي امك يا بتي سلمت على حسناء بطرف يدي و سلمت على امها و عبد الله ...وحاولت ما اخرب فرحتي و فعلا شلت التلفون و كلمت امي ونوسه واسيل الكانو عايزين يجوني في الليل داك لو ما قلت ليهم استهدو بالله اصلا بكره الخطوبه تعالو بالمره.. وضربت لي ابوي المن الفرح قال لي بجي احضر الولاده ان شاء الله.. خلي بالك على نفسك و ما تتعبيها و اديني زياد دا اوصيهو عليك... اديت التلفون لي زياد وانا بضحك ساعه كامله هو بوصي فيهوووو..زياد لمن قال ليهو يا عمو احمد الجاي دا ولدي انا برضو والله ما ولد براءه براها... ابوي قعد يضحك وقال ليهو الحفيد اعززز من الولد بعدين بتعرف كلامي دا كويس..زياد قعد يضحك وقال ليهو ربنا يديك لينا الصحه و العافيه عشان بعدين تزكرني بالكلام دا.. ابوي ضحك و قال ليهو اللهم امين يا ولدي ...وبعد قفل طوالي زياد استعدل و قعد لي قعدتو المعتاده لمن يكون عايز يقول كلام مهم... جرا الكرسي و قعد قدامي و مسك يديني الاتنين و بقا يطقطق لي في اصابعي..
انا بضحك : اهاااااا يا زياد احكي.. سامعاك...ضحك وقال لي... من هسي خلينا نتفق.. قلت ليهو من هسي اتفقنا من قبل ما تبدا كلامك زاتو...
زياد وهو بضحك : يا سلام!! ومن متين نحن بنتقف سرعه كدا؟؟ قلت ليهو من الليله لانو حسناء جات و في حاجات كتيره لازم نتفق عليها... زياد دا فكاها ضحكه لمن ناس اساور برا سمعوهوووو.. و اساور قالت ليهم و هي قاصده تغيز حسناء زياد تاني الله يمرقو من جنب براءه.. حيخلي الوراهو والقدامو ويقعد يحرسها... انفال قالت ليها والله انا مبسوطه ليهو اكتر من ما بتتخيلو براءه قدرت تتطلع الشخصيه الحلوه من زياد...حسناء كانت بتسمع فيهم والنار مطلوقه فيها وعملت فيها ماشه الحمام ...عبد الله همس لي انفال عقبالنا.. انفال عاينت ليهو بحب و قالت ليهو امين ياااااارب. امييين يا عبدالله ربنا يسمع منك ان شاء الله..
_______
قلت ليهو بزعل:كملت ضحك؟...
رد لي وهو لسه بضحك :خلاص خلاص..والله سكتت انا ما عارف انتي البت دي خاتاها في راسك مالك...قلت ليهو زياد ما تتعامل لي مع الموضوع بي استهتار انا جاده والله ما قاعده اضحك معاك... المره الفاتت سكتت عشان خاطرك وانت استهترت وشبكتني شافعه و اتشاكلناااا ... المره دي ما بسكت ولا انا متعوده اسكت اصلااا.. والله تتخافف قدامك و تعاملني بي اسلوبها المستفزر دا لابعرفك لا بعرفها لا بعرف امهااا وريتك بس من هسي انا ما حمل توتر... عشان نتفق بالجد بالجد...لمن حس اني زعلانه وشاف الدموع في عيوني و انا بتكلم... قال لي هسي بتبكي مالك خلاص مش حسناء دي حأخت حدود بيناتنا في الكلام...قاطعتو و قلت ليهو مش قلت ليك ما تجيب سيره اسمها في لسانك... و ما تقول بيناتنا دي لانو بيناتكم اصلا ماف حاجه.... قعد يضحك و قال لي اقول هنايه طيب؟..ضحكت وقلت ليهو اتصرف...قالي المهم لو شفتها قاعده في حته زاتو ما حأقعد فيها كدا تمام؟... قلت ليهو تمام اها انت عايز تقول شنو.. قال لي نسيتيني زاتووو كنت داير اقول كلام مهم والله...بعداك قال لي ااااااااا اتزكرت.. اسمعيني كويس قصه تقعدي عند اهلك الشهور الاولى دي ماف.. امي واساور برضو اهلك و حيخلو بالهم منك..وحتمشي بيتكم قبل الولاده بي كم يوم...و تجي راجعه بعد اسبوع...
قلت ليهو وانا ميته بالضحك: دا شنو دا شنو.. دا الكلام المهم هسي! محسسني اني مسافره احضر لي مناسبه.. استهدى بالله كدي لمن يجي وقتو بنتفق لسه قدامنا سبعه شهور...قالي سبعه شهور ما كتيره! .. قعد اضحك و قلت ليهو اجي يا زياد كدي قول بسم الله... ضحك و قال لي والله انا زاتي بقيت ما عارف نفسي بقول في شنو...
_________
تاني يوم من الصباح جوووو ناس امي سلمو علي مبسوطين و امي وخالتو امال بكو عديل مع بعض بالفرح... واسيل جابت معاها ريل اللصقت في زياد من جات...ومنير و محمود و مروان و اولاد اهل زياد كلهم كانو شغالين في الكراسي و الصحانه و الحاجات الناقصه... يعني البشوفهم بجهزو كدا ما بقول دي خطوبه و بقول دا عرس عديل... كل الناس كانت شغاله و بتساعد في بعض الا انتي يا حسناء خاته كرسيك و قاعده بتتفرجي...نوسه قالت لي دي شنو القاعده دي تقول هي الحامل ما انتي.. قلت ليهااااا وااااي يا نوووسه جيتيني في جرح صحي الاخت بتحس بوجع اختها... دي اسكتي بس لمن احكي ليك بعدين... ضحكت و قالت لي ارح معانا الليله طولنا من الشمارات.. قلت ليها امشي اتفاهمي مع زياد لو قلتي ليهو انتي بتحرج و بخليني امشي...قعدت تضحك و قالت لي زياد خليهو علي...
بنات عم زياد و خالتو وامهاتهم...زي الضهر كدا جووو كلهم...والبيت بقا مليان و البجي كلو بجي يسلم علي و يبارك لي لانو في ناس ما حضرو العرس...ولمن يسمعو بي اني حامل يرجعو تاني ويقولو لي وهم مبسوطين ربنا يحلك بالسلامه ان شاء الله... ودا كل تحت انظار حسناء الحسيتها حتقتلني...قمت اخش الحمام.. وقلت ارتاح حبه في غرفتي لحدي بعدين.. وانا في عتبه الحمام سمعت صوت زياد بقول: حسناء!! انتي بتعملي في شنو؟!... اتلفتت لقيت حسناء وراي بتتلفت ووشها بقا بنفسجي من الخوف... زياد قال لي ريل اجري يا عمووو لي بابا انا هسي بجيك...وقال لي انا خشي الحمام سرعه انا منتظرك هناااا... حسناء عايزه تمشي كدا قال ليها بحده وين وين.. انتي زاتك حتنتظري هنا لحدي ما براءه تطلع ونتفاهم ... و انا دا كلو بعاين ليهم وانا ما فاهمه شي...واخر شي اتوقعتو انها ممكن تكون كان عايزه تلزني في الحمام....
بعد طلعت من الحمام قال لي جيبيها و تعالي غرفتنااا..عشان ما افرج عليها خلق الله هنااااا... حسناء مشت وراي من سكات... وبمجرد ما دخلنا الغرفه زياد قال ليها احمدي ربنا اني ما بمد يدي على مراااااا...عملت ليك شنو! ممكن افهم عملت ليك شنو يخليك حاقده عليها لي درجه انك عايزه تأذيها و تلزيها في الحمام وانتي عارفه انو في روح جواهاااا... عاينت ليها بصدمه ومسكت يدي بالعافيه عشان م اديها كف...
وهي بكل بجاحه قالت ليهو عملت لي شنو؟ .. خطفتك مني انا الهسي كان مفترض اكون مكانها .. بعد رفضتك امك عشمتني اناااااا دي ورشحتني ليك..وانا بقيت عايشه على اني حأعرسك يا زياد... وكلمت الناس دي كلهااا اني حأكون مرت زياد عبد الناصر. وهسي بقيتني مضحكه... و بعد العرس سمعت انك عرستها عشان حاسي بالذنب ما اكتر... و كنت ملاحظه انو انتو اصلا ما قريبين لي بعض...و معامله خالتي امال ليها خلتني اتأكد انها ما عايزاها ليك...واتعشمت اكتر وحسيت انو اذا قربت ليك ممكن تشوف حبي ليك..زياد انا حبيتك والله اكتر منها..هيي اصلا ما عايزاك يا زياد رفضتك..ولو ما كان بقت مدمنه و عرفت انو ماف زول تاني حيقبل بيها اصلا ما كانت عاينت ليك..
انا طوالي رفعت يدي اديتها كف و عدلتها بالتاني و قلت ليهاااا عشان كلام فارغ زي دا عايزه تقتلي روح وتخشي النار؟ انتي طبيعيه يا بت!! انتي عارفه انا ما حأتعب نفسي و اتكلم مع وحده مريضه زيك...امشي ربنا يهدينا و يهديك..
وزياد قال ليهااا قال ليها بكل برود ولا حاول يبرر ليها : انا عايزها كدا و هي مدمنه و حتي لو هي ما دايراني وقبلت عشان السبب دا زي ما انتي بتقولي..انا راضي و على قلبي زي العسل... وما شاايف غيرها ولا في وحده حتقدر تسد مكانها في قلبي خليك عارفه... امشي يا حسناء الله يهديك انتي لسه صغيره ...وما تركزي مع حياه الناس وركزي مع حياااتك احسن ليك...والعرس دا قسمه و نصيب... خليك زوله كويسه عشان ربنا يقسم ليك زول بشبهك.. ربنا قال الطيبون للطيبات.. انتي ما زوله كعبه ما تخلي الشيطان يعميك..حسناء طلعت و هي خجلانه من كلام زياد..
وانا يادوب فهمت لي انفال و اساور كانو بعاينو لي بعض لمن حكيت ليهم..يعني كان عارفين انو امو رشحتها ليهو عشان كدا سكتو وما كلموني... قبلت على زياد و قلت ليهو والعبره خانقاني صحي انت عرستني عشان حاسي بالذنب؟
زياد ضحك و قال لي كنت متوقع انك حتسأليني السؤال دا...ومسكني من يدي وقعدني في السرير وقعد قصادي في الواطه وقاال لي : بتزكر ايام بكا خالتي بدريه الله يرحمها ..كنت بجي اسوق امي و اساور...وبمحرد ما يركبو ببدو يحكو عنك.. براءه عملت براءه فعلت و بتونسو بيك في العربيه... وهم قاصدين يسمعوني بس لسه ما كانو قالو لي انهم دايرنك لي... كنت بستمتع لمن يقولو فلانه عملت كدا و انتي وقفتيها في حدهااا...لحدي ما في يوم امي قالت لي يا زياد نحن البت دي دايرنها ليك... ما بكضب عليك رفضت و قلت ليهم شافعه في البدايه وفرق العمر بيناتنا كبير..اصلا فكره العرس ما كانت في راسي و كنت مركز مع العدناني و اساور العايز اسلمها لي راجل اول شي بعدين اشوف نفسي... قاطعتو وقلت ليهو يعني رفضتني في البدايه !
زياد بضحك: الله!! ما انتي برضو رفضتيني زعلانه مالك كدا نحن متعادلين.. قعدت اضحك وقلت ليهووو واصل واصل... قال لي المهم يا زوله اتخيلي انو يومي يكونو بحكو قدامك عن نفس الشخصيه على مدار الساعه... تلقائيا لقيت نفسي اتعلقت بسيرتك و بقيت بتحمس لمن امشي اجيبهم من بيت البكا عشان اعرف انتي عملتي شنو الليله... وحتى مرات بمشي لي اساور واشاغلها و اجرجرها بالكلام عشان تحكي لي بيك...يعني انا اتعلقت بيك من قبل ما اشوفك...ولمن سألت منك و من اهلك سيرتكم الطيبه.. و كلام الناس عنك بالزات حببني فيك اكتر.. ورسمت ليك صوره في خيالي.. و قلت خلاص دي البت الحأكمل معاها حياتي...و استخرت كتير و ارتحت للموضوع شدييييد...وكانت الصدمه بالنسبه لي انك ترفضيني..حسيت كدا بي احساس ما حلو لكن اتيقنت وقلت لي خير ان شاء الله.. لحدي ما لف الزمن ودار و جيت عرفت بالصدفه من ناس امك لمن فتحو البلاغ بي اسمك.. انو انتي البت الكنت قايلها رحيق...وانو انتي البت الكوركت لي بي اسمي عشان الحقهاااا وانا كزبتهاااا وما اشتغلت بيها كتير... ما شفتي الدنيا دي ضلمت في وشي كيف يا برو...حسيت زي الكأنو انا سلمت قطعه من روحي للعدناني بيدي... والحمد لله و لحدي يوم الليله انا بحمد ربنا صباح و مساء انو قواني و سهل لي الطريق لحدي ما وصلت ليك كويسه من غير ما يحصل ليك حاجه...
قلت ليهو وانا بعاين ليهو بحب و امتنان يعني ما عرستني عشان حاسي بالذنب صح... ضحك وضماني عليهو و قال لي يعني القصه الطويبه العريضه دي ما وصلت ليك معلومه اني حبيتك من قبل ما اشوفك اصلا.. ذنب شنو تاني امسحي لي كلام هنايه دا كلو من راسك بالله...انا قعدت اضحك وهو واصل وقال لي و بعدين انتي اي زول بشوفك بعرفك مرت زياد عبد الناصر... امي و اساور لمن شافوك قالو بسسس دي مرت زياد.... ويوم كنتي تعبانه في صيدليه صلاح وسألتي من ريل... المره طلعت لي برا و قالت لي مرتك بتسأل من بتهاااا...وفجأه زحاني وقال لي وهو بضحك لووو جات بتتتتت حنسميها ريل.. قعد اضحك وقلت ليهو دا الطلع معاك خلاص تمام ولو جا ولد نسميهووو عبدالناصررر ... ابتسم لي بحب ورجع ضماني تاني...
__________
المساء اهل العريس جوووو..واساور دي كانت بتترجف زي القصبه... و شغاله لينا واي يخوانا ما قادره اصدق اني خلاص حأعرس.. واسراء مرت مروان شغاله ليها انا الماقادره اصدق انك حتعرسي يحي ما لقيتي غيرو يا اساور؟... زياد قعد يضحك و قال ليها امرقينا عليك الله انتي و يحي ديل زاتو ما عارفكم حتربو اولادكم كيف انتو زاتكم محتاجين اليربيكم ...وانفال بتقول ليها غايتو البايره لمن تقوم صعبه ... بعداك زياد ساقها و طلع بيهااا لي يحي الكل مره بهمس ليها انا ما قدر اصدق انو زياد وافق وخايفو يغير رايو في اي لحظه .. وهي ميته من االضحك و لحدي ما لبسو الدبل يحي ما سكت كلو كلو مره يقول ليها لقيتي شبط مقاسك وين مشيتي المصنع ولا شنو! ... ومره يقول ليها زياد دا مالو بحمر لي كدا..
بعد شويه زياد مشا ليهم عشان يبارك ليهم و همس لي اساور وقال ليها خففي ضحك احسن ليك... وهمس لي يحي و قال ليهو اعمل حسابك نحن لسه ما عقدنا ليك.. وانت ولسه تحت الراقبه خفف اللطافه ... يحي قعد يضحك و قال ليهو خليني بس اعقد يا زياد وبعد داك بأدبك... زياد قال ليهو انت بتهددني... يحي قال ليهو معقوله بس العفو ياخ انا تحت امرك يا سعادك.. زياد قعد يضحك و بارك ليهم و مشي...جا بعداك مروان و امها و انفال و اتوالت التبريكات لحدي ما الناس طلعوووو
________
مرت الشهور بين جلسات المحكمه ومره مره بعد تحانيس زياد بخليني امشي احضر المحاضرات المهمه..ويرحعني البيت..
دخلت في الشهر السادس وعزبت زياد عذاب كل يوم عايزه حاجه و كل يوم نفسي في حاجه... ومرات اتشاكل معاهو من غير سبب... وفجأه احبووو و اتلصق فيهووو...وهو زاتو بقا ما فاهمني...وبحاول يمشيني و يتعامل معاي في كل حالالتي... ولمن اكترها وتوصل معاهو الحد بطلع بخلي لي البيت عشان ما نتشاكل.. وبجي راجع بعد ما اروق واساور تضرب ليهو...
في يوم ناس امي قالو لي نسيبه بين الموت و الحياه مرضانه شديد وعايزه تشيل منك العفو... زياد قال لي نمشي ليها المسامح كريم... وفعلا مشينا ليها.. لقيناهااااا بقت عباره عن دُلقان و شكلها بشع شديد و العياذ بالله..الزول ما بقدر يعاين ليها مرتين من شده ما عضام وشها ظاهره بسبب المرض... وجلدها مكرمش...وماف دكتور قدر يشخص ليها هي عندها شنو بالضبط...قالت لينا اعفو لي عملت ليكم سحر بي انو يجيكم مرض ما يعرفو ليهو اسم..والسحر رجع فيني.. انا دايره عفوكم ودعواتكم انو ربنا يشفيني.. كلنا قلنا ليها العفو والعافيه وان شاء ربنا يشفيك.. وبالجد حنيت علي حالتها لانو حتى ولدها مشا خلى ليها البيت و بقت قاعده براهااااا... وما عندها حتى زول يخدمهااا...
وبعد اسبوع من يوم مشيتنا ليها امي ضربت لي و قالت لي نسيبه لقوها ميته ليها كم يوم في بيتها وماف زول جايب ليها خبر الا شمو ريحه الفطيسه و العياذ بالله... بكيت عليها رغم العملتو ودعيت ليها ربنا يغفر ليها ويخفف عنها العذاب و يرزقنا حسن الخاتمه
__________
بعد سنه :
.. بناءاً علي ما تقدم به الشهود... من وثائق ذات صله بقضيه ترويح المخدرات والاختطاف والمتاجره بالنساء و تهريب سلاح الدوله.. بعد النظر و التدقيق و التحقق حيث تبين لنا ان ليس هناك دليل للبراءه.. حكمت المحكمهُ حضوريا على المتهم يعقوووب محمد حضره اللواء سابقا..والمتهم عدنان سعد بالاعدام شنقااااا...
وحكمت المحكمه علي المتهم صلاح عدنان.. والمتهم صدام عدنان.. والمتهم رحيق ازهري بالسجن مدي الحياه مع الاعمال الشاقه.. رفعت الجلسه...
بمجرد ما قال كدا انا والبنات المعاي انفقعنا بالبكاااااا..وبقينا نحضن في بعض حرفيا حساس انو حقك يرجع ليك دا ما حاجه ساهله...بكيت لمن الله غفر لي..وبقيت ما حاسه اصلا بي امي الحضنتي وبكت معاي ولا بي ناس نوسه واسيل واساور... ولا بي اي زول حرفيا كل الناس دي بكت بي بكاناااا... كنت حاسه زي الكأنوا في حاجه زي الحاجز ما كنت قادره اتخطاهاااا... و الليله الحاجز دا اتلاشاااا و بقيت حره..بعد كملت بكاي كلوووو يادوب حسيت وقلت ليهم بخلعه ولدي وين؟.. قالو لي بسم الله يا بت عبودي مع زياد برا... طلعت لقيتو شايلووو وبحاول يهدي فيهووو لانو ببكي شديد و شكلو اتخلع من صوت البكا..وزياد زاتو دموعو في عينووو...شلت عبودي منو و بمجرد ما ضميتو علي هدا شويه.. لحدي ما تدريجيا سكت... وبمجرد ما سكت زياد اخد نفس و حضنا الاتنين عليهو... و قال لي الحمد لله ربنا نصرنا و كل ظالم اخد جزاهووو.. رفت راسي و قلت ليهو وفي شي ابتسامه عريضه الفضل بعد ربنا برجع ليك انت ويحي و مروان وعادل ❤️
___________
الحمد لله زياد يدو رجعت احسن من اول بعد العلاج الطبيعي والرياضه... ومحمود ونوسه اتزوجو بعد نوسه اتخرجت من الجامعه طوالي اما امي سافرت لي ابوي عشان م تقعد في البيت براهااا ... واساور و انفال الاتنين حوامل ماشاء الله.. و خالتو منال شايله هم يلدو ليها الاتنين في نفس الزمن..ريل كبرت و دخلت المدرسه و ثابت كل شهر بتحي تبيت معانا كم يوووم ومتعلقه بي وبي زياد و عبد الناصر شديد..وانا وزياد حياتنا الحمد لله كانت مليانه حب و متفاهمين ...ما بقول انو ما بنتشاكل لكن بنعرف نحل مشاكلنا قبل ما تكبر ❤️..
زياد كان متعلق بي ولدو شديد لدرجه انو بقول ليهووو ابوي...وما برضى فيهو الهبشه و من هسي بقول ليهووو ليهو نحن سند امك و ضهرها... انت راجل البيت وانت وانت مافاضل الا يقطع فيهو شعر ولو عليهو من هسي يضرب سلاح و انا بس بقعد اتفرج فيهم واضحك...
________
مرت الايام بسرعه وساور جابت ليها ولد... و انفال بعدها بي اسبوع جابت ليها بنوته... مروان بعد يحي جاب ولد قعد يضحك وقال ليهم كدا التلاته الحمد لله جبنا اولاد يخلفونا بعدين... يحي قال ليهو انا غايتو ولدي من هسي حجزت ليهو بت خالتو..ززياد قال ليهو دا شكلو دايرو يخلفو في كل شي حتى اللف مع البنات... يحي و مروان قعدو يضحكو وزياد قال لي اساور الولد دا ما تخلي يحي دا يربيهو.
بعد عبد الناصر تم التلاته سنه وانا وصلت اخر سنه لي في الجامعه زياد نقلوهو وحده من الولايات بسبب قضيه مهمه... انا حلفت الا اجمد السنه و امشي معاهووو بس هو رفض... وقال لي حيكون في خطر عليك انتي و ابوي وانا ما بقدر اجازف بيكم...حرفيا مسخت علي الدنيا و مرضت عديل بعد سفرو وما كنت قادره اتحمل بعدووو عني... مع انو زي القاعد معانا في البيت طوالي بتكلم معانا مكالمات فيديو بس انا كنت فاقداهو شديد... وكل يوم بشتكي ليهو اني ما قادره ومضغوطه شديد مع التحضير للمناقشه و تسليم البحث القرب... و في نفس الوقت عبودي داير رعايه...وهو بقول لي هانت يا برو فتره و حتعدي .. وابوي خليهو مع امي وركزي لي مع قرايتك... قلت ليهوو خالتو امال ما مقصره والله بس برضو يا زياد ونحن بنتكلم كدا عبودي جا قعد لي قدام الكاميرا وشال التلفون وقال ليهو بابا...
زياد بضحك : ايوا يا بابا... نحن مش قلنا انت راجل البيت و حتريح ماما ما حتتعبها... عبودي قعد يضحك زياد قال ليهو يلا يا ابوي ادي ماما بوسه في راسها ... وهو طوالي سمع كلام ابوهو وباسني في راسي.. قال ليهو تاني وحده بدل بابا..رجع باسني تاني وقال لي ابوهووو تاني!.. زياد قعد يضحك وقال ليهو ايوا تاني..وبقو شغالين كدا عبودي يميل و يطبع بوسه في راسي و يقول لي ابوهو تاني! وابوهو يقول ليهو ايوا تاني ... وانا ميته من الضحك..
__________
سلمنا البحث و ناقشنا الحمد لله... وحدوو مواعيد التخريج..ضربت لي زياد قال ما عندو طريقه يجي مشغوول شديد... قلت ليهو وانا زعلانه يعني يا زياد السنه دي كلها انت شغال و بعيد عننا ما قادر تاخد اجازه يوم واحد تحضر تخريجي و ترجع قال لي والله يا برو مضغوط شديد انتي عارفه لو كان عندي طريقه كنت جيت صح... قلت ليهو بتفهم رغم اني زعلانه خلاص ما مشكله حصل خير.. وحلفت ما اعمل تخريج الا امي و ابوي ضربو لي و قالو لي نحن جاين نحضر التخريج و ما حبيت ازعلهم... واكسر بخاطرهم..
________
يوم التخريج ناس نوسه و اسيل و اساور جهزو كل الحاجات.. وظبطوني وفصّلو لي عبودي روب..وعملوها لي مفاجئه...شويه فرحت وقعدت اضحك بعد شفتو لابس الروب و الطاقيه و جاي علي وهو بقول لي ماما عااااان حلووو... قعد اضحك وجضمتو و بقيت اعضعض فيهو واقول ليهو انت كدا كلك على بعضك حلوووو زي ابوك وهو بس بضحك و مبسوط ...سبحان الله عبد الناصر كان شايل ملامح زياد و نسخه منوووو...وشايل منو طباع كتير وحتى نومتهم زي بعض ..وانا بعاين لي عبودي وشايفه فيهو ابوهو البوري بتاع العربيه ضرب... ولحدي اسي زياد ما اتصل علي تلفون... شلت عبودي و انا زعلانه وركبت العربيه...وحتى في التصوير ابتسمت غصب عني...ولحدي ما خلاص قربو يزيعو اسمي انا صاره وشي وحالفه ما اخليهو يعني حتي لو ما قدر يجي على الاقل يعبرني بتلفون .. او ياخ رسل لي رساله
بعد شويه المنظمه جاتني وقالت لي اجهزي اسمك الجاي ومعليش حنسوق منك العسولي دا عشان ممنوع تطلعي المنصه ومعاك زوول..قلت ليهااا كيف؟ قالت لي الموضوع ما بيدي وانا بنفذ البتقال لي بس ياريت من غير زعل تديني ليهو بس اوصلو لي امك و ابوك و هو حينتظرك معاهم هناك.. اشرت لي نوسه جات شالتو لي امي وابوي وانا بجد قدر الاخلاق الفيني بعد ساقت مني عبودي خلاص كملت و قفلت معاي عشره صفر... وطلعت المنصه وانا صاره وشييي وغضب الدنياا دا كلو فيني..
الميلاد الخرطوم.. المراحل الدراسيه الاساس مدرسه (...)بنات...الثانوي مدرسه (...) للتعليم العالي... جامعه (...) الهندسه قسم المعمار..اسم الوالده حليمه عثمان.. الخرييييج براءه احمد...وواصل وهو بقول حينما يتعلق الامر بتقديم الزوج احد اببيات الشعر لزوجته كتهنئه بمناسبه تخرجها... نقف احتراما لهذا الزوج المحب.. الناس كلها وقفت و بقت تصفق وتصفرررر و ناس اساور و نوسه من هناك بصرخو واسيل بتزغرت.. انا هنا يادووووب ملامح وشي فرهدت وبقيت بضحك و بسمع في كلام المزيع بكل حبب وهو بقول
"صَبراً لَعل الذي بالبُعد امرضني.. بالقُرب يوماً يُداويني فَيشفيني... انّ المُّحبين لا يَشفي سِقَامُهُما الاّ التَلاقِي.. فَدَاوِي القَلب و اقْتربي💙"
ونزل زياد من المسرح و هو بضحك و شايل عبوودي.. بقت بضحك و ببكي و تاني ارجع اضحك ونزلت من المنصه على الغنيه الكنت اصلا عاملاها ليهو في البدايه (لابس الكاكي بين اصحابو في الرئاسه اسمووو جنااابو) وبمجرد ما اتلاقينا اشتغل المقطع بتاع (الله لي قليبي الرّادو جاناااا و ما خلف ميعادوووو) زياد قعد يضحك وقال لي لو عاملنها قاصدين ما كان ظبطط كدا... وباسني في راسي وبقا يبشر لي هو عبودي وانا برقص ليهم ونحن ماشين على اتجاه ناس امي والغنيه لسه شغاله(نجومو الفي الدهب مغموووره...جنابووو وعندو كم دبووووره).. وبعد قربت على المسرح اشتغلت غنيه (امي يا زينه يا طيبه و حنينه.. و يا الساكنه عينيا و يا اغلى من الماااااس)... ولمن طلعت المسرح اشتغلت اغنيه (ابوووووووي وينو الايدو العطايااااا... ابوي وينو البحضن جنايااااا... وينو رُكازه العمايااااا وينووو الساند العمايااااا.. اهااااا لينا سيدي بعبي كيلاااا.. الكنداكه سيدي سيدي اراكاااا)...بعداك سلمت على امي وابوي في راسهم و حضنتهم.. وزياد برضو سلم عليهم و استلمنا شهادتي و اتصورونا ونزلنا من المسرح و انا طااااااايره من الفرح... لقيت ناس اسيل اساور وخالتو وامال ونوسه ومحمود و منير و كلهم بضحكو و كانو متفقين مع زياد.. باركو لي وانتظرنا لحدي ما زاعو لؤي و ليلي و طلعنا معاهم انا زياد وعبودي مع باقي الدفعه رقصنا معاهم... وبعد حضرنا الحفله واتفشيت تعب و سهر اليالي الفاتت دا كلووو...رجعت البيت هلكانه...
_______
في البيت قبل اغير هدومي ومجرد ما دخلنا غرفتنا ضميت زياددد مسافه و قلت ليهو انا ما مصدقه انك جيت...وتاني ماف سفر رجلي على رجلك.. قعد يضحك و حاوطني بي يدينووو الاتنين وقال لي انا خلصت شغل لي اسبوع.. بس كان في شويه حاجات لازم اخصها وراي بعدين اجي...قاطعو صوت عبودي الببكي و بكورك بابا.. بابااا.. قلت ليهو ما براي المشتاقه ليك قعد يضحك ومشا جابو من السرير وبقا ضاميهو بيد و ضاميني بيد وقال لي وانا برضو مشتاق ليكم والله وما حتصدقو مشتاق ليكم وفاقدكم قدر شنو... قلت ليهو عارف انا كنت ناويه ليك نيه بس ربنا ستر عليك... قال لي و انا معقوله بس اخليك في يوم زي دا براك بس وريني... قلت ليهوو وانا بضحك انا قلت يمكن زياد اتغير خلال السنه دي البعد بقاهو جافي... قال لي بحب انا عمري ما بتغير ولا ابقى جافي عليكم...انا عايش في الدنيا دي عشانكم انتو الاتنين يا برو... ربنا يخليكم لي و يخليني ليكم...قلت ليهو و يديم علينا المحبه و المحنه..ويسترنا دنيا واخره يا رب العالمين 💙
________
