واصل كلامو و قال ليهم زياد قال بمجرد ما نقفل ملف القضيه في الرئاسه الرشيد حيبدا يجهز لي عمليه جديده..لانو حاليا هو متوقف عشان عارف انو تحت الانظار و حاسي بالخطر...عشان كدا لازم نديهو مساحه امان..وفعلا بمجرد ما عملو زي ما زياد قال ليهم حسو بحركه الموردين و ضباط الجمارك التحت المراقبه زادت... وبقا في شويه حذر في دخلتهم و مرقتهم...
__________
يوم جاين ناس انفال.. كان يوم جمعه.. صحيت من الاذان التاني بسبب التوتر من جيه امووو صليت وقريت اذكاري و بديت طوالي النضافه اول حاجه رشيت الحوش وقشيتو عشان المويه بتكون قويه فتره الصباح... و قشيت البرنده و نفضت الكراسي و مسحت العفش كلو.. وبس بقيت منتظره زياد يصحا عشان انضف الصالون...ووصلت مبخر الكهربا وولعت بخور...مع الاقامه كدا زياد صحاااا طوالي شلت مقشاشتي ودخلت بديت اقشقش وهو لسه قاعد في سريرو و بعاين لي مستغرب...
زياد : الليله العيد ولا شنو!!.. قلت ليهو قوم لي يا زياد من الملايه دي عايزه اغيرها من قبيل منتظراك تصحااا... قال لي بي استغراب قبيل اكتر من كدا!!انتي صحيتي متين!
انا: زياد قوم صلي عليك الله ما تأخرني خليني اخلص عشان عايزه استحمي... نزل من السرير شال فرشتو وطلع...كوركت ليهو اعمل حسابك م تقلع لي الواطه برجلينك الحوش دا هسي نضفتو انا.. و امسح شبشبك دا في الدّعاسه من التراب قبل تخش جوا...قال لي وهو بضحك كويس اي اوامر تانيه ودخل الحمام... لحدي ما طلع انا كنت انتهيت و دخلت المبخر الصالون و نزلت الستاير و قفلت المروحه و جريت الباب عشان البخور يمسك... و شلت غياري دخلت الحمام ولمن مرقت الشمس كان طلعت...دخلت الصالون لقيت زياد قاعد في السرير واول ما شافني قام و عمل فيها بفتش حولينو و قال لي جلابيتي ختيتيها وين... جهزيها لي سرعه عليك الله عشان الحق صلاه العيد..
قلت ليهو وانا مستغربه : عيد شنو يا زياد!!...
زياد: انا عارف شايفك ملبوشه زي الزول الشالتو نومه يوم الوقفه وما خلص نضافتو .. قلت يمكن العيد جا و انا نايم لي سته شهور..
قعدت اضحكككك قلت ليهو اصلو شنو نايم ولا دخلت في غيبوبه..
ضحك وقال لي اسألي روحك.. في شنو مالك البيت دا نضيف مالك متعبه نفسك وقايمه و قاعده.. بعد شويه اتزكر انو ناس امو جايين الليله.. وقعد يضحك و قال لي اااااااااا بالله... انا كدا يادوب القصه وقعت لي...وقبل يخلص كلامو سمعنا صوت حسناء اللزت باب النص وهي بتقوووول صباح الخير يخوانا صاحين ولا نايمين... اتأففت ومزاجي اتعكر يعني انا بقيت بتمنى يوم الجمعه ما يجي عشان ما اشوف خلقه المخلوقه اللصقه دي..طلعت ليها برا عشان عارفاها عادي ممكن توووش تخش لينا جوه و ما بهمها كتير وقلت لي زياد دقيقه بس اشوفها عايزه شنو واجي...لقيتها شايله صينيه الشاي... قلت ليها ما كان تتعبك نفسك يا حسناء نحن بقينا ماضيوف.. والبيت بيتنا وبقينا بنشتغل في مطبخ انفال بهناك عادي اصلا ماف زول...
حسناء: لالا عادي ياهنايه ما تقولي كدا الحاله وحده انا قلت اجي اشرب معاكم الشاي عشان طولت منكم ...وبقت تتلفت يمين وشمال وتفتش بعيونها عن زياد... استغفرت و ابتسمت ليها بالغصب وقلت ليها ما بتقصري.. وختيت ليها التربيزه.. وهي ختت الشاي... وحصلت لحظه صمت كدا هي ساكته و انا ساكته و ما عارفين نقول لي بعض شنو ...لحدي ما زياد جا طالع وهو بضحك و بقول لي بروو ارح نمشي نظبط لينا كبايتين شاي بهناك ان شاء الله بس مع تجهيزات العيد دي تكوني خبزتي...و اتفاجئ بي انو حسناء قاعده وما مشت طوالي...وهي اول ما شافتو قامت بي فرحه وسلمت عليهو وقالت ليهو زياد كيفك
زياد: تمام الحمد لله.. امتحنتي كيف... قالت ليهو كويس الحمد لله و بقت تحكي ليهو الامتحان الفلاني جا صعب و الامتحان الفرتكاني جا ساهل..وانا بس ماسكه اعصابي بالعافيه و بعاين للتوب البقع كل ثانيتين..وهي بتعمل فيها بترفع فيهو..والمشكله انو زياد بتعامل معاها كطفله... و هي مستغله الحته دي...بعد شويه قالت ليهو انت بتشرب معلقتين سكر صح.. زياد قال ليها اي اتنين...قبلت علي وقالت لي وانتي يا هنايه بتشربي كم معلقه؟.. قلت ليها بغيز زي زياد..كبت الشاي وشربو الاتنين..وانا كبايتي ما هبشتها ومركزه بس مع تصرفات هذه الحسناء المستفزه... زياد رفع الكبايه مداها لي وهو بقول الشاي حيبرد.. وانتي ما بتشري الشاي بارد.. شلت منو الكبايه وشربتو باااارد سرعه سرعه عشان اقطع ليها حِجّتها و تشيل عدتها وتمشي بيتهم..بس هي اللياقه تخليها لي منو قالت لي زياد ناس خالتي امال حيحو الساعه كم؟ قال ليها ان شاء الله بلحقو الفطور هنا..قالت ليهو يوصلو بالسلامه ان شاء الله وشالت الصينيه و قالت لي يلا ياااا.. وقبل تقول لي يا هنايه قلت ليها براءه اسمى براءه ..ضحكت و قالت يا براءه لي بعدين ومشت..وانا كنت حاسه نفسي حأطرشق.. رجعت التربيزه مكانها بزهج.. وقعدت في الكرسي البرا...
زياد : حتقعدي هنا!! قلت ليهو اي.. قعد في الكرسي الجنبي وهو ماسك تلفونو وبطبز فيهو وما شغال بي...قلت ليهو بغيززز ما حتسألني مالي؟
زياد قعد يضحك وقال لي ما عشان انا عارفك ما حتقدري تسكتي... قعدت جنبك عشان تخشي في الموضوع طوالي..
قلت ليهو يعني عامل فيها ما ملاحظ لي حركات البت دي؟ زياد البت معتبراني شفافه.. وبتتعامل معاك بكل وقاحه... والتوب دا لو ملصق بي بزاغ ما بقع بالطريقه دي...
زياد انعدل في قعدتو وقال لي قصدك حسناء... اتغزت زياده وقلت ليهو ما تجيب سيرتها في لسانك يا زياد..وبقيت بحاكي فيها بغيز انت بتشرب معلقتين سكر صح؟ وانتي بتشربي كم يا هنايه... يعني قادره تحفظ المعلقتين سكر حقتك.. وماقادره تحفظ اسمي...شابكاني هنايه هنايه..
زياد انفقع بالضحك و قال لي بتعرفي تحاكي والله كدي كدي قالتها كيف... قلت ليهو بحده زياد ما تهظر انا جاده...كتم ضحكتو و قال لي حسناء دي قاطعتو و قلت ليهو قلت ليك ما تجيب لي سيره اسمها...
زياد: اذا ما دايرني اجيب ليك سيره اسمها.. طيب دايراني اقول ليك شنو يا براءه حيرتيني معاك..
انا :اتصرف بسس ان شاء الله تقول ليها هنايه شفت المهم متجيب سيره اسمها دا قدامي ...فكاهاااا ضحكه لمن دموعو جرت وقال لي معقوله بس يعني بعد الطول والعرض و الشنب و الدقن دا كلو اقول ليك هنايه.. ما امشي جمعيه نسوان الحله بعد دا... البت دي شافعه ما تختي راسك بي راسها يا براءه.. انا بتعامل معاها كطفله.. قلت ليهو زياد انت قايلني بهظر لكن والله والله انا جاده انت شايفها شافعه... بس هي ما شايفه كدا ولا بتتعامل على الاساس دا..و انا بحاول بقدر الامكان اهدي اعصابي عشان هي ما قصرت معانا و ما عايزه امشي من هنا وفي زول زعلان مني...وبعدين البتقول عنها شافعه دي فرقها مني سنتين بس يا زياد وهندا انا زوله واعيه وفاهمه بدليل اني متزوجاك.. لو كنت طفله اكيد كنت حأكون هسي في بيتنا ولا شنو!...
زياد وهو بضحك و بجضم فيني : صح كلامك وعشان انتي مرتي الواعيه الفاهمه... انسيها و ما تركزي معاها كتير...واعتبريها طفله مراهقه وتصرفاتها دي عفويه ... زحيت ليهو يدو و قلت ليهو :طفله تانيييييي... يا زول خير انت ادرى ودخلت جوا وانا ممغوسه لانو ما خد الموضوع ببساطه و لسه بهظر..وهو اتصل بي مروان
_________
يحي كورك لي مروان و قال ليهو تلفونك دا بدق يا رد يا صمتوووو عليك الله...مروان قال ليهو دا زياد..وشال التلفون فتح الخط...زياد قال ليهو اها عملتو شنو...
مروان : والله يا زياد مراقبين كل تحركاتو لكن ما قادرين نحدد هو حيعمل شنو ومتين... الزول دا بحسب حساب اي خطوه قبل يتحرك.. و عارف نفسو بعمل في شنو...يحي قال ليهم والرسمه دليل ضعيف ضد زول عندو كل السلطه دي... لازم نقبض عليهو وهو بعمل في حاجه غير قانونيه بالثابته...
زياد : انا حاسي نفسي قاعد في النار وما حنتظر لحدي ما نمسكو بالثابته يا يحي... انا حأمشي ليهو لحدي عندو وأستفزو واوريهو اني عرفت حقيقتو لحدي ما يعترف و اسجل كل كلمه حتطلع منو...
مروان : حيكون متوقع منك حركه زي دي... و اذا مشيت ما بقول ليك ما حيعترف ليك... هو 90 في الميه حيعترف ليك مخصوص عشان يستفزك لانو طلعك برا الخدمه بيدو عشان عارفك خطر عليهو...لكن فايده التسجيل شنو مدام هو بمجرد ما يعترف حيكون راس مالك رصاصه وماحتطلع من هناك حي يا زياد..زياد قال ليهو هو حيكون متوقع حركه زيي دي مني و منتظرها عديل... لكن الماحيكون متوقعو انو انتو تكونو برا و تداهمو المكان بمجرد ما يعترف...لانو مفتكر اني خلاص قنعت و خليت الشغل بعد اجرت دكان ابوي الله يرحمو دي واحد... اتنين لانو مفتكر انو قضيتو اتقفلت و انتو وقفتو التحقيق
____________
زي الساعه 11 ضهر كدا...ناس انفال جووو.. وهي و اساور سلمو علي ببشاشه و حب.. بعكس خالتو امال... الكان واضح في ملامح وشها انها ما طايقاني.. زياد اول ما شافهم عاين لي و قعد يضحك و قال ليهم كل عام وانتو بخير ياخ.. تعود الايام...
اساور ضحكت و قالت ليهو انت في زول مفهمك انو الليله عيد ولا شنو...حمرت ليهو نظام اسكت قعد يضحك و قال ليها والله شبه كدا... انفال قالت ليها عيد بجيتنا يا بت..وامهم كانت مبسوطه بيهم و بتضحك...لمن شفت زياد بسلم عليهم بشووووق و بالزات امو فهمت انو قدر شنو هي غاليه عليهو و متعلق بيها..وفرحت لي فرحتو و حسيت نفسي مشتاقه لي ناس بيتنا و عايزه اشوفهم برضو... خليتهم مع بعض عشان ياخدو راحتهم...و مشيت جهزت الفطور مع ام حسناء...
زياد قال لي امو : امي انتي عارفه براءه الليله صاحيه من الاذان التاني بتنضف.. ومشت عملت الفطور...ودا كلو عشانك انتي..
انفال قالت ليها والبت عروس يا امي وما مفترض اصلا تدخل يدها في مويه اصلا... و دا معناها انها بتعز ولدك و بتحترم اهلو...قالت ليهم انتو مكبرين الموضوع مالكم... اي مرت ولد جاياها نسيبتها دي ابسط حاجه ممكن تعملها.. مالنا ما عرسنا ولا شنو...سكتو و ما عرفو يقولو ليها شنو.. و لمن جيت داخله سمعتها بتقول لي انفال سوقيها معاك الحنانه عليك الله تتحنن بعدين الناس لمن تجي تسلم علينا و يشوفوها غبشاء كدا وهي لسه عروس يقولو علي شنو... زياد قال ليها بحده استغفر الله العظيم و اتوب اليه يا امي الله يهديك ياخ... و طلع لقاني واقفه جنب الباب متصمغه وماسكه الصينيه في يدي...دخلت قبل ما يفتح خشمو معاي ختيت ليهم الفطور زي الكأني ما سمعت حاجه...وزياد لمن غسل يدينو و جا قعد في الصينيه لقاني بحاول اضحك و اشارك معاهم في الونسه...
بعد الفطور حسناء جابت القهوه... و قدر كميه الصبر العندي استنفدتها بخفتها قدام زياد..بعد شويه زياد قال لي ناس امو أنا كنت منتظركم تجو واقعد معاكم كم يوم لكن حصل لي شغل فجأه...و هسي حأجهز شنطتي و راجع طوالي... العصر لازم اكون في الخرطوم...امو قالت ليهو شغل شنو يا ولدي انا لسه ما شبعت من شوفتك... قال ليها بخلص شغلي في الليل دا و بكره الصباح بركب و اجي عليكم.. كلها 3 ساعات المسافه ما بعيده... وطلع وهو بقول لي كملي قهوتك و تعالي عشان تساعديني يا برووو.. قلت ليهو حاضر...وبمجرد ما طلع طوالي حسناء شالت عده القهوه و طلعت... ما عارفه بس في حاجه كدا قالت لي ختي القهوه دي و امشي ليهو هسي..فعلا ختيت الفنجان و اعزرت منهم و طلعت...
