يلا قومي عشان تغسلي وشك و تصلي الصبح.. مدام صحيتي بدري عشان دايرك في موضوع...بيني و بين نفسي كنت بقول يا ربي دايرني في شنو!.. و قلت ليهو بفضول موضوع!!... قعد يضحك و قال لي والله يحي طلع خبره ياااخ قال من خلال دارستو الطويله في المجال دا اكتشف انو مستوى الشمار عندكم عالي ولو داير بت تركز معاك بكل حواسها بس قول ليها دايرك في موضوع واستمتع بملامح الفضول الفي الوشها...
قلت ليهو بغيز لاني اتزكرت محمد : دراستو !!.. هو اتخرج من كليه نساء من حولنا ولا شنو...
زياد قعد يضحك وغمز عشان يغيزني زياده وقال لي: اعترفي بينك و بين نفسك هسي بتقولي يا ربي زياد عايز يقول لي شنو.... نزلت من السرير وانا بقول ليهو الصبح فات وطلعت خليتو بضحك..
كنت عارفه انو زياد بحاول يخلق جو مريح بيناتنا ...احترمت فيهو الحاجه دي بس انا عشان الثقه شبه انعدمت عندي وبقيت ما واثقه حتي في روحي ما كنت قادره اتعامل بي اريحيه.. بقيت خاته الابريق قدامي و قاعده في المسطبه بتاعت برنده الصالون وسرحانه وكالعاده حاسه بالضياع زياد قال لي انو قدامي حياه حلوه... بس انا ماشايفاهااا شايفه وحده مكروهه ما قادره تكمل حياتها... قال لي اتحرمتي ابسط شي من انو تنبسطي بيوم عرسك كبت... بس دي ما ابسط حاجه انا اتحرمت حتى من انو اقدر امارس حياتي كانسانه طبيعيه...ما قادره اكل ما قادره اشرب مقلقه حاسه بتوتر و نص اليوم نايمه.. و حاسه انو حياتي واقفه وما قادره انجز ولا حاجه... وانا سرحانه كدا حسيت بيد بتتختا في كتفي... اتخلعت وبقيت بصرخ
زياد بخلعه :قولي بسم الله دا أنا... لمن حسيت بيك طولتي جيت اشوفك مالك..اخدت نفس وقلت ليهو براحه زياد! .. ضحك و قال لي في منو غيرنا الاتنين هنا ونزل خطوه من العتبه ورفع الابريق لقاهو فاضي و الحته قدامي ناشفه عرف اني ما اتوضيت و قاعده نفس القعده من قبيل... شال الابريق ملاهو من البرميل ووقف قدامي بقا يكب لي في المويه و انا بتوضا..وبعد غسلت وشي تلاته مرات وبديت اغسل يدي اليمن وقفت.. و شكيت انا مضمضت خشمي ولالا..وبديت اتوضأ من جديد...تاتي شكيت.. تاني بديت من البدايه.. ودا كلو وهو مراقبني..في المره التالته شلت من يدو الابريق جدعتو و بقيت اكورك فيهو وابكي قلت ليهو بتقول لي قدامك حياه حلوه... انا وضوء ما قادره اتوضا..ما قادره اركز في اي حاجه.. انااا.. انااا تاني ما حأقدر اواصل حياتي من غير الحبوب دي..من يوم وقفتها ما قادره اركع ولا اكل ولا اشرب.. ولا حتى اخدم نفسي..و عايشه عاله على ناس بيتنا و هسي عاله عليك..بتقول لي عايني للجانب الايجابي والحمد لله انك عايشه... ياخ يارتني متت وارتحت... انا بموت في اليوم ميه مره بسبب التشنجات و الم العضلات...خلاني كوركت و قلت كل الكلام الفي قلبي لحدي ما هبطت و قعد في المسطبه راجعه و ختيت يدي في وشي...قعد على رجلينو قصادي في الارض وزح لي يديني من وشي...وقال لي لو صليتي وشكيتي همك لي ربنا و دعيتي يخففو عليك حترتاحي...واتوضي عادي انا حضرت فيديو لي شيخ قال انو الزول الربنا ابتلاهو بي كثره الشك في الوضوء يبْنِي على ما هو عليه...عارفه يعني شنو الكلام دا؟ يعني مثلا لو بعد ما بديتي تغسلي في يدك اليمين.. شكيتي انك مضمضتي او لا؟ ..حتعملى كالاتي.. تبني وتستندي على انك مضمضتي خشمك و تواصلي وضوئك عادي فهمتيني..
قلت ليهو وانا بشهق يعني ما اعيد وضوئي.. ابتسم لي بتشجيع و قال لي: لاااا م حتقعدي تعيدي في وضوئك كل مره الدين دا يسر يا براءه وربنا سهلها على عبادو من كل النواحي بس نحن كيف نخلي ايمانا قوي و نتمسك بيهو...وضحك وواصل وهو بقول لي مليت ليك الابريق المره الاولى خلصتي المويه كلها و طمبجتي الدنيا ..المره دي قومي امليهو براك...ابتسمت ليهو بي امتنان و شلت الابريق مليتو اتوضيت ولمن دخلت لقيتو مفرش المصلايه و طلع لي توب الهزاز من الشنطه مداهو لي و قعد في السرير و بقا يعاين لي..قلت ليهو اطلع برا لحدي ما اصلي وترتني وانت بتعاين لي كدا.. قعد يضحك و طلع و قفل الباب وراهو...وانا بصلي دموعي ما كانت راضيه تقيف لحدي ما سلمت...دعيت ربنا يسهل علي الايام دي و اقدر اتخطاها..ودعيت على كل زول كان عندو يد في اني اصل للحاله دي...والحمد لله حسيت بي سكينه كدا وراحه...طبقت المصلايه والتوب وانا سامعه صوت ضحك براااا...فتحت الباب سِنه بس شفتو قاعد في الكرسي و حسناء واقفه قصادو شايله صينيه الشاي.. وبتضحك بي اعلى صوت لدرجه انو جاني الفضول اعرف هو قال ليها شنو بضحك للدرجه دي...بعد شويه قعدت في الكرسي وهو سألها من القرايه ماشه كيف وهي كانت بتجاوب بفرحه كدا...لقيت نفسي بعاين ليها وبتأمل في ملامحها البت حرفيا جميله من كل النواحي وقاعده قدام زياد بثقه وحده عارفه مقدار الجمال و الانوثه العندها...بعد خلاص كملت كل كلامها وضحكها يادوب اتزكزت وسألت مني وياريتها ما سألت... قالت ليهوو بكل نياصه: اااا منوو!! والله اسمها راح لي كلو كلو وضحكت كدا و قالت ليهو نايمه ولا شنو..
زياد قال ليها بحب : براءه... اسمها براءه.. وقبل اتجاه الباب لمحني وانا بزح من ورا الباب بسرعه اول ما جابو سيرتي..قعد يضحك وعرف اني ما عايزها تشوفني بالحاله دي وقال ليها شكرا ليك يا حسناء عزبناك معانا الايام دي.. قالت ليهو ما تقول كدا يا زياد ياخ تعبك راحه... قال ليها ربنا يكرمك وقام على اساس يشيل صينيه الشاي يدخلها لي الصالون وهي تمشي بعد دا... بس هي بمجرد ما قام قامت وراهو وهي بتقول النخش اشيل عده امبارح عشان اجيب ليكم فيها الفطور... زياد سبقها و قال ليها انا بجيبها ليك ارتاحي...وبمجرد ما دخل كدا جات داخله وراهو شايله صينيه الشاي وهي بتقول خلاص الندخل ليكم الشاي جواااا... لقتني قاعده في السرير .. عاينت لي مسافه من راسي لحدي رجليني و بعد داك قالت لي وهي بتخت الصينيه في التربيزه كيف اصبحتي هسي سألت منك زياد ونحن بنتونس برا...قلت ليها بطرف نخرتي الحمد لله...زياد مد ليها الصينيه شالتها و مشت وهي متعمده التوب يقع من راسها...
زياد خت التربيزه قدامي وشال صينيه الشاي عشان يختها كدا فاجئتو و انا بقول ليهو مش مفترض نحن عرسان جداد! ..كان حيكسر الكبابي بس اتوازن في اخر لحظه و ختاها في التربيزه وهو بقول لي قلتي شنو!! كأنو ما مصدق الجمله دي طلعت مني
انا بتلقائيه : حتى لو ما عرسان الواحد بستأذن ما بخش على الزول توش كدا بالطريقه دي..
زياد : كنتي ماشه كويس.. خلينا في نحن عرسان جداد دي ...حتى لو ما عرسان دي م عجبتني.. المهم كلامك صح مفترض نحن عرسان جداد وتستأذن لكن البت دي شافعه يا برو عشان كدا عذرها معاها...
انا : شافعه!! البت البشوفها بقول اكبر مني... وبعدين هي لي بتعاين لي بالطريقه دي...
زياد قال لي وهو مستغرب في رد فعلي و بحاول يهدي الوضع : في زول بقدر يشوف الجمال دا كلو قدامو وما يعاين ليهو..هاجمتو و قلت ليهو جمال! جمال اثر الحبال... و لا جمال الهلات و الشحوب الفي الوشي... ولا جمال الخدوش و الحروج... وريني جمال شنو بالضبط و بالعكس هي لو عايزه تشوف جمال كان اكتفت بي انها تعاين لي روحها في المرايه...
زفر بقله حيله و قال لي انتي لازم يكون عندك ثقه في نفسك... انتي جميله بكل حالاتك... دي واحد اتنين تاني ما عايز اسمع منك قصه انو ما حتقدري تكملي حياتك من دون حبوب دي خالص...دي كلها اعراض انسحاب المخدر من جسمك والحمد لله انتي عديتي الاسبوع الاول من العلاج وتاني الاعراض حتخف تتدريجيا...و الدكتور قال عشان فتره التعاطي ما كانت طويله حتقدرو تتجاوزو في اسبوعين لو ساعدتو نفسكم...ساعديني يا برو عشان اقدر اساعدك خليك قريبه من ربنا و اشربي مويه كتيييير... انتي عديتي المرحله الصعبه من العلاج...وخليك عارفه وختي الكلام دا حلقه في اضانك عمرك ما حتكوني عاله علي بالعكس انتي اضافه حلوه لي حياتي... وضحك و قال لي بعدين انتي خطبوك لي عشان في البكا كنتي سمحه تاني في شنو تقولي لي جمال شنو ...ضحكت غصبن عني وقلت ليهو بكى شنو.. قعد يضحك و بقا يحكي لي بي كلام اساور وامو.. وتاني يقول لي مدام عارفه انو نحن عرسان جداد طيب في داعي للنكد و البكا دا كلو...و بعدين من جينا انتي ساكته ما لقيتي تقولي لي نحن عرسان جداد الا وانا شايل قزاز...الله ستر بس لو كان اتكسرت كبايه بس انفال كان حتجينا من هناك ... قعدت اضحك ونسيت للحظه كل حاجه سيئه حصلت معاي
______________
يا سعادتك قدرت اصل من خلال تلفوناتهم لي كميه من الموردين و ضباط الجمارك..المتورطين معاهم في الشغل دا... اما بالنسبه لي الرقم الكان متواصل ييهو العدناني مع الرشيد.. للاسف الرقم مقفول وما قدرت احدد موقع ولا وحده من الكالمات. غير المكالمه الاخيره..
يحي : والاخيره نحن اصلا عارفين انو كان متصل من المصنع ماف فايده...قاطعو عادل وقال ليهم لكن في حاجه غريبه.. مروان و يحي الاتنين استعدلو في قعدتهم و بقو يستمعو لي عادل بي اهتمام..
عادل : لمن رجعت البيانات المحذوفه لي سجل المكالمات بتاع مشاكل... لقيت كميه من الارقام المامسجله... ورقم متواصل مع مشاكل ليهو سنه لي ورا مسجل بس اسم الرشيد...يعني دي ما اول عمليه للرشيد مع مشاكل.. و عندهم شغل قديم مع بعض و شكلو العدناني ما عارف الحاجه دي..
مروان : يعني مشاكل شغال مع العدناني و شغال مع الرشيد الاتنين في نفس الوقت..وبما انو بي مجرد ما اعتقلنا مشاكل الرشيد قتلو معناها مشاكل عارف كتييير...
يحي بإستفسار: ارقام الموردين و ضباط الضرايب وصلت ليها من تلفون منو يا عادل!!
عادل : تلفون مشاكل يا سعادك... يحي قال ليهم معناها مشاكل هو العارف المداخل و المخارج وعلاقاتو واسعه في الشغل..عشان كدا بتعاملو معاهو الاتنين...
مروان : واكيد رقم الرشيد الفي تلفون مشاكل مقفول..
عادل :اكيد حيكون عمل حسابو و قفل اي حاجه ممكن تخلينا نصل ليهو..يحي قال ليهو طيب ما لقيت اي ارقام تانيه بعد عملت استرجاع غير رقم الرشيد؟ عادل قال ليهو لقيت كميه من الارقام المامسجله... ولمن فتشت طلعت ارقام سواقين عربات نفل و شحن...
يحي و مروان الاتنين قالو ليهو عربات نقل و شحن!!! و عاينو لي بعض الاتنين بخلعه... عادل انو عرف انو يحي و مروان فهمو هو قاصد شنو... و قال ليهم ماف تفسير غير انو الزول دا غير شغلو في البنات و المخدرات شغال تجاره سلاح.. لانو ماف زول بستخدم كميه قدر دي من الشاخنات غير في تجاره السلاح...
يحي قال ليهم ونحن منتظرين شنو طيب !!مدام عارفين السواقين م الموردين وبتاعين الضرايب ما نرسل ليهم دوريات..
مروان : دقيقه نضرب لي زياد حذرنا وقال ما نعمل اي حاجه من غير ما نرجع ليهو..فعلا قعدو التلاته و ضربو لي زياد.. وحكو ليهو بكل الحاصل...بقا يكورك سلاح! وقال ليهم ما ترسلو اي دوريات ولا ترفعو اي تقريري للرئاسه... بمجرد ما تعملو حركه زي دي حيعرف انو انتو قربتو عليهو خطوه وحيحس بالخطر.. وحتتلفق عليكم تهمه توقفكم من الشغل زي ما عملو معاي.. الزول دا يدو واصله الرئاسه...اسمعوني كويس اول حاجه الكلام العرفتوهو دا ما يطلع من بيناتكم التلاته..تاني حاجه اعملو لسته بي اسماء كل الناس اللقيتو ارقامهم و متورطين في الشغل دا... وشددو عليهم الرقابه...
مروان :وانت عملت شنو مع براءه؟ زياد زفر و قال ليهو حأحاول افتح معاها الموضوع الليله براحه..وان شاء الله نقدر نصل لي حاجه من خلالها...
يحي قال ليهو بتفرج ان شاء الله...
زياد : قبل ما اقفل يا يحي عايزك تودي لي ناس البيت ديل شويه حاجات.. و تشوف الناقصهم شنو لحدي ما اجي... يحي قال ليهو تمام و قفلو الخط
________________
كنت قاعده في الصابون و كل شويه بطلع راسي و بعاين لي زياد الواقف في نهايه الحوش و بتكلم في التلفون وهو منفعل و بأشر بي يدينو..بعد خلص من مكالمتو مشيت عليهوووو... قعد يضخك ووقال لي مالك بتطلعي في راسك و تدخلي فيهو زي ابو القدح... ضحكت و قلت ليهو بتوتر مش كنت عايزني في موضوع...
زياد ضحك ومسكني من يدي وساقني على اتجاه الصالو وهو بقول لي : هسي كنت جايك لي نفس السبب... في دراسه بتقول انو اي اتنين متفاهمين.. بحسو بكل حاجه مع بعض.. يعني مثلا لو انتي اشتقتي لي انا بكون مشتاق ليك في نفس اللحظه... و لو انتي عايزه تتكلمي معاي.. انا بكون عايزز اتكلم معاك في نفس اللحظه... وغمز وقال لي يعني نحن مبدئيا كدا ماشين كويس
قعدت اضحك و قلت ليهو : ودي برضو وحده من دراسات يحي.. قعد يضحك و قال لي لالا دي اجتهاد شخصي..قلت ليهو ايواااا يعني انت برضو خريج نساء من حولنا...
زياد بضحك :انتي سمعتيني غلط شكلك... انا قلت اجتهاد يحي الشخصي... قعد اضحك و قلت ليهو ايوا معليش الغلط في اضاني يحي دي ما سمعتها..ضحك و قال لي تعالي اقعدي عشان اوريك انا عايزك في شنو.. و جرا الكرسي قعد قدامي كالعاده
زياد: انتي الوحيده الما اتفاعلتي معانا في التحقيق... عارفك ما قادره تحكي و الموضوع صعب بالنسبه ليك لكن لازم توريني بكل حاجه عشان اقدر اجيب ليك حقك...لانو محاكمه رحيق والمعاها واقفه بسبب الحاجه دي... بلعت ريقي وهو هز لي راسو بتشجيع.. بديت احكي ليهو من البدايه ودموعي في عيوني...ولمن وصلت لليوم الجا فيهو الرشيد عشان يسوقنا زياد وقفني وقال لي عايزك تحكي لي الحته دي بالزات بالتفصيل الممل حتى لو شايفه انو في حاجه تافهه وما مهمه قوليها لي و انا بقيم تمام.. قلت ليههو تمام وحكيت ليهو من لحظه دخل و حسبنا ولقانا خمسه... لحدي لحظه ما اتصل لي صدام و فتح الاسبيكر و كان قاصد انو يسمعنا...
زياد : معناها كان قاصد يسمعكم اسم الرشيد عشان تحفظوهو وتركزو مع الاسم بي اعتبارهو حاجه مهمه..وما تدققو في وصفووو و ملامحو كتير ...
انا : كلامك صح لانو انا ما كنت مركزه مع شكلو ابدا... كنت بحاول احفر الاسم في راسي عشان ما انساهو..وهو اصلا كان واقف بعيد شويه مننا و انا نظري شويه ضعيف...شفت ملامح اليأس في وشو... وواصلت و انا بقول ليهو بسسس.
زياد بسرعه : بس شنووو يا براءه؟ ما تخافي قولي .... قلت ليهو بتوتر و دموعي مرغرغه بس هو من دون البنات قرب علي انا شديد ... ومسك وشي بين يدينو الاتنين وهو بعاين لي بنظرات مقرفه قال لي الرجال المعاهو دي بعدين خلوها لي ما تتصرفو فيها... عشان كدا قدرت احفظ ملامحو...
زياد ضغط على اسنانو بقوه..وكور قبضه يدو وبقا ماشي و جاي قدامي و غضب النيا دا كلو في وشو لمن خفت منووو.. و حسيت انو دا ما زياد الكان بتعامل معاي بلطف قبل شويه.. وقال لي بنبره حاده بتقدري ترسميهووو؟. هزيت ليهو راسي بخوف بمعني ايواااا
_______
يحي اشترى كل الحاجات الزياد وصاهو عليها و اتجه على بيت ناس زياد... و بمجرد ما دق الباب فتحت ليهو اساور... اتخلع لانو كان متوقع تفتح ليهو امال ام زياد... و بقا واقف متنح فيهاا.. لحدي ما جاهو صوتها وهي بتقول ليهو انت يحي صحح؟
يحي بتوتر : ايوا زياد موصيني على شويه حاجات..
اساور بضحك :اتفضل طيب.. و ما تقول مستعجل او ماشي طوالي لانو امي جوا وصتني و قالت لي لو دا يحي ما تخليهو يتعزر اي اعزار...فشنو كل اعزارك مرفوضه
____
