زياد بحماس : ملامح!! انا لي ما فكرت في الفكره دي..براءه بتعرف ترسم.. ورسمها فوق الممتاز...و طوالي كورك لي نوسه الواقفه مع محمود وقال ليها ايناس حأعزبك معاي بس معليش تلمي لي كل ادوات الرسم والدفاتر بتاعت براءه في شنطه كدا عشان حنشيلها معانا...نوسه مشت و هي بتقول ليهو دقيقتين بس و بتكون عندك..وفعلا جابتهم بسرعه مدتهم ليهو شالهم و طلع.. محمود ضحك و قال لي نوسه زياد دا برو سلمتو الرايه ولا شنو يعني ما ممكن الواحد ما يتكلم ليهو كلمتين كدا مع خطيبتو...نوسه قعدت تضحك و قالت ليهو بفرحه ان شاء ربنا يسعدهم ياخ... اتعلم اتعلم من زياد حتى ادوات برو ما نساها.. وانت يالله بتتزكر عيدميلادي... محمود قال ليهاااا زي السامع منير بناديني دقيقه بس اشوفو واجيك وزاغ خلاها بتضحك...
_________
زياد ركب العربيه و قال لي الطريق حيكون شويه طويل حنسافر البلد... ونزل الكرسي لي وراااا وقال لي اخدي ليك نومه لحدي ما نصل...هزيت ليهو راسي بتمام وغمضت عيوني...وهو رفع القزاز و شغل لي المكيف و اتحرك و بعد اقل من ربعه ساعه غفيييت... و ما صحيت تاني الا بصوتو وحركه يدو وهو بملس في راسي وبقول لي وصلنا.. فتحت عيوني وانا مخلوعه وانكمشت على روحي وانا بتزكر لحظه خدروني في العربيه و جاني احساس اني مخطوفه... كنت حأصرخ..بس وقفني صوتو وهو بقرا في المعوذتين وايه الكرسي.. شلت نفسي وختيتوووو برراااااحه وانا بقووول الحمد لله بصوت عالي وخاته يدي في صدري من الخلعه...وهو بس كان بعاين لي من سكات...
دخلنا البيت الكان مكون من صالووون قدامو برنده طويله... والبرنده فاتحه في حوش كبيررررر ماشاء الله وتقريبا نصو شجر و زراعه بس ما قدرت اميز نوع الشجر لانو الدنيا كانت ليل..والانوار مقفوله..
زياد وهو بفتح في باب الصالون : تعالي اقعدي جواا و ارتاحي... لحدي ما انزل الشنط واشوف انفال مجهزه لينا شنو ناكلو...دخلت قعدت في السرير واول ما طلع... حسيت بي قبضه كدا و خوفه كوركت ليهو زياد انا ماشه معاك... قعد يضحك و قال لي ارح طيب.. وفعلا نزلت معاهو الشنط... و اتجهنا على نفاج (باب نص) كدا في نهايه الحوش.. دق الباب وهو بقول لي دا النص التاني من بيت انفال اختي ضربت لي تلفون قالت لي اول ما تصلو دق باب النفاج و حسناء حتمد ليكم صينيه الاكل..وهو بتكلم كدا حسناء فتحت الباب وهي لابسه ليها جلباب قصير ولاصق في جسمها... زياد اول ما شافها اتخلع و اتحرك من قصاد الباب وهو بعتذر وبقيت انا مقاصداها وهي بتعاين لي وانا بعاين ليها.. لحدي ما قالت لي انا والله قلت انفال بتجي معاكم تدق لي الباب ما قايله زياد هو الحيدق الباب عشان كدا ما لبست لي توب دقيقه النلبس لي توب و اجي ودخلت راجعه...زياد قال لي تعالي ننتظرها جواااا عشان تاخد راحتها...وفعلا دخلنا الصالون وهو بقا برتب في الحاجات و طلع لي نفسو غيار...و طلع لي معاهو بجامه طويله وتقريبا كان قاصد عشان يوصل لي معلومه انو حيخليني على راحتي...بعد شويه كدا جات داخله حسناااااء تووووش من غير ما تدق الباب شايله ليها صينيه في يدها و توبها الجزو الواقع و كاري في الارض اكتر من اللابساهووو...ختتها في التربيزه و هي بتعاين للهدوم المشروره في السرير .. عملت فيها بتصلح في توبها و جاتني وهي بتقول لي مبروووووك ليكم ان شاء الله ربنا يسعدكم و سلمت علي بالاحضان... بعداك مشت سلمت على زياد و قالت ليهو ان شاء الله ربنا يهنيكم يا زياد... زياد قال ليها امين يا رب وعقبالك.. و قبل علي قال لي انا حأخش الحمام اخد لي دش و عشان ما تقعدي براك خأخليك مع حسناء لحدي ما اجي تمام...هزيت ليههو راسي و قلت ليهو تمام.. ابتسم لي و قال لي حسناء بس عشره دقايق... ضحكت و قالت ليهو اخد راحتك في المسافه دي نحن بنتعرف على بعض...
بعد زياد طلع بقت تحكي لي بروحها ما سكتت كلو كلو حكت لي بي انها ممتحنه السنه الجايه... و انها اخت راجلها لي انفال.. وبيتهم في نفس الحوش النحن قاعدين فيهو دا.. و تشيل و تحكي و تتكلم... وما سألتني من اسمي زاتو.. الا لمن زياد جا ضحكت و قبلت عليهو و قالت ليهو مرتك ظريفه شديديا زياد والونسه جرّت...لدرجه اني نسيت اسألها من اسمها..
زياد ضحك و قال ليها اسمها براءه.. وهي قامت و قالت لي اتشرفنا انا اخليكم ترتاحو بعد دا و طلعت...انا لقيت نفسي بعاين للباب الطلعت منو و بقول بتلقائيه و من غير ما احس :ظرييفه!! عرفتني ظريفه كيف وهي اصلا ما ادتني فرقه افتح خشمي واتكلم معاها!!... زياد انفقع بالضحك و قال لي نحن نجيب حسناء تقعد معانا... دي اطول جمله سمعتها منك لحدي الان... سكتت.. وهو جرا الكرسي و قعد قدامي و مسك يديني الاتنين و قال لي قبيل قلتي لي لو كلمه ياريت بتنفع انا اكتر وحده حاليا بقول ياريت... صححح لا كلمه ياريت بتنفع... ولا كلمه لووو بتنفع...عارفه النافعه شنوووو يا براءه..
قلت ليهو و دموعي في عيني : شنو... قال لي حسبي الله و نعم الوكيل..وكل مره بدل تقولي ياريت قولي حسبي الله و نعم الوكيل و صدقيني حترتاحي...بقيت اتحسبن واقول حسبي الله و نعم الوكييل و لي اول مره ابكي... بكيييييت بحرقه على رحيق الاستأمنتها و كنت فاكراها صحبتي... و على عزيز البجد كنت بفكر في كل ثانيه انا كنت محبوسه فيها هل حيكون فقدني ولالا... و على امي و ابووي الادوني لي زياد زي الحاجه الكعبه... زياد ضماني عليهووو وهو يطبطب علي ضهري بحنيه و قال لي انا ما نمت لحدي هسي زي الناس..الاحساس بي الندم و تأنيب الضمير متملكني وخجلان زاتو اقول ليك اعفي لي..يمكن اكون سبب اساسي في الحصل معاك دا ... وابسط شي انحرمتي من انك تنبسطي بيوم عرسك زي اي بت...كان بتكلم و بحاول يداري دموعو بس انا كنت حاسه بيها حاره فكتفي...بعد مسافه رفع راسو و شرب مويه و جا قعد نفس القعده وانا لسه بشهق و قال لي.. ربنا كبير وكل الحصل دا لي خييير...ما توقفي حياتك عشان حاجه حصلت و انتهت..انتي لسه صغيره و قادمك حياه حلوه.. و احمدي ربنا انو طلعتي سليمه وفكري في الحجات الاجابيه مثلا انو ربنا قدر و لطف و لقيناكم قبل يبيعوكم او يسلموكم لي جهه تانيه وما نقدر نصل ليكم... احمدي ربك انك عايشه يا برو في وحده فقدت روحها بسبب الحصل دا... وهسي قبل تخشي الحمام و تغسلي و شك و تغيري هدومك و ناكل والكلام دا كلو ... عايزك بي دموعك الفي الوشك دي تقولي لي انك عافيه لي من قلبك عشان بالي يرتاح واقدر انوووم...ابتسمت ليهو برضا وقلت ليهو ريح بالك ونوم مرتاح..
____________
ناس امي بعد رتبو البيت وقعدو وهم بياخدو و يدو في الكلام عن يوم الليله ... سمعو صوت الباب بدق بطريقه توقع القلب..بي صوت الباب حتى ريل النايمه صحت... يعني البدق في الباب بدق زي الكأنو جايب ليهو خبر وفااا.... جرو كلهم على الباب وقلبهم في يدهم و بسبب الحصل معاي اصلا بقو اعصابهم تالفه وواقفين على الهبشه ... منير فتح الباب ويدو بترجف وهو بقول اللهم اجعلو خير... اما محمود اصلا بقا يحسب في الناس رغم انو عارف انهم كلهم قاعدين وماف زول ناقص...
بمجرد ما منير فتح الباب دخلت نسيبه ووقف ليهم في نص الحوش و قالت ليهم... انااااااا بتكم تشرد يوم خطوبتها من ولدي عشان تعرس المابتسمى دااااك.... يا يمه ولدي بصرف بالدينار الكويتي تفضل عليهووو الساقها شهر العسل بلدهم! ...وبقت تكورك و تعلي في صوتهاااا...اسيل قالت ليهااااا ما كفتك الفضايح العملتيها لينا في الحله!.. تاني دايره مننا شنووو قلنا ليك البت انخطفت... انتي بتفهمي بي ياتو لغه ياخ عشان نفهمك... نسيبه قالت ليها لمن تكذبووو كذبو ليكم كذبه بتخش الرااااس سبحااااااان الله يعني من دون الايام ما انخطفت الا يوم خطوبتهااااا .. نوسه قالت ليها وطي صوتك وانت بتتكلمي و احترمي سنك... نحن لحدي اسي محترمنك... ابوي كورك فيهم الاتنين وقال ليهم سوقو ريل و خشوووو جواااااا.... وهي جات وقفت قدام امي و ابوي و قالت ليهم و عيونها كلها حقددددد.... زي ما خليتك تشووووف العما و ما تشوووف بناتك عشان حرشت ناصر يسوق مني ولدي و يسافر معاااااك.... حأخلي بتك تتمنى الراحه في حياتها وما تَطولهااااا لاهي لا راجلهاااا... والطلاق الخايفه منو دا ياحليمه بخليك تشوفيهو في بناتك ... و بكره بجيبو ليك بناتك مطلقات و بتقولي نسيبه قالت...ومشت خلتهم ما مستوعبين هول الصدمه الادتها ليهم مره وحده من دون اي مقدمات...
____________
صحيت الصباح بصوت زياد البصلي في الصبح وبقرا في سوره يوسف... بقيت قاعده في نص السرير بعاين ليهو ومستمتعه بجمال صوتو لحدي ما سلَّم... و بمجرد ما استغفر تلاته مرات و قال "اللهم انت السلام ومنك السلام تباركت يا ذو الجلال والاكرام" اتلفت علي وضحك و قال لي صباح الخير... يلا قومي عشان تغسلي وشك و تصلي الصبح.. مدام صحيتي بدري عشان دايرك في موضوع...
