قلت ليها وانا محتاره حاجه زي شنو طيب يا نوسه ؟!
نوسه : ما عارفه يا برو لكن والله من نبره صوتها المره دي في شي عارفاهو و نحن ما عارفنو...
قلت ليها يا بت نسيبه دي غير الاسئله و الاستفسارات عندها شنو... بتكون عايزه تتشمشر و السلام... م تركزي معاها..
اسيل قالت لي وكمان ابوي عايز يرميك في ولدها دا عشان تتبلي بيها ...دموعي رغرغت غصب عني..بس حاولت م احسسهم قلت ليها عليك الله م تفتحو الموضوع دا...انا لحدي اسي ما قادره اصدق ولا استوعب ..طبقت المصلايه و قعدت في السرير.. نوسه طلعت وهي بتقول لينا بعدين حتشوفو كلامي دا وحتقولو ايناس قالت... اسيل قالت لي غايتو نوسه دي لمن تعلق اكعب من تلفوني... قلت ليها اسيل عليك الله اطفي وراك النور صدعتو بي زياده..
بعد اسيل طلعت فتحت تلفوني و عملت سيرش لي صفحت محمد ولي صفحه زياد في الفيس بوك كنوع من الفضول..ما قدرت أَميز صفحه زياد من بين الصفحات الكتيره الظهرت لي بي نفس الاسم ... لكن محمد ظهر لي صديق مشترك مع ابوي... دخلت لقيت صفحتو عباره عن داخليه بتاعت بنات دي تقوم.. ودي تقع .. ونادر ما يكون في ولد معلق ليهو..يعني ابوي دا جادي عايز يرميني الرميه دي!!...دا حالتو محمد اليعتبر بِعْرفو .. زياد دا اصلا م بنعرف ليهو حاجه على ياتو اساس دايرني احدد مصيري مع واحد فيهم...انا تقريبا شفت محمد مرات بالعدد في حياتي لمن سكنو جنبنا قبل سته سنه... بعد داك امو و ابوهو اطلقو وهو سافر مع ابوهو الاشتغل مع ابوي في الكويت ... شلت الليل كلو بكا متحسره علي ابوي و الحال الوصلنا ليهو...
_____________
الصباح صحيت بي صوت تلفون ايناس بضرب... عاينت لقيت محمود متصل... لمن رديت قال لي ننو كيف اصبحتي ... قلت ليهو انا براءه يا حوته... قال لي مستغرب براءه كيفك!!... قلت ليهو تمام الحمد لله انت كيف و خالتي كيف ايناس دي شكلها مشت الحمام لمن تطلع بكلمها ترجع ليك ... قال لي كويسين كلنا الحمد لله.. لا دقيقه انتي مالك؟ قلت ليهو مالي؟ قال لي كدي لي بعدين بنتفاهم... لو ماشه الجامعه الساعه سبعه خليكم جاهزين ...قلت ليهو تمام و قفلت الخط... راسي كان عايز يتفجر من الصداع بسبب البكا... غسلت وشي اتوضيت و صليت والحمد لله حسيت بي سكينه كدا ...ايناس جات داخله قالت لي اصبحتي كيف كويسه؟ قلت ليها الحمد لله بس مصدعه.. ناس اسيل مشو امبارح الساعه كم؟ قالت لي منير جا زي الساعه 11 ساقهم ... في مسكن في شنطتي ابلعي ليك حبه ...قلت ليها انتي عارفه انو صداعي م بروح بي مسكن خليهو بياخد زمنو وبروح... المهم محمود قال ليك سبعه نكون جاهزين... قالت لي انتي الليله ماشه؟ قلت ليها بزهج ما نفسي امشي لكن ما عايزه اقعد مع امي في البيت براي عشان ما تفتح معاي موضوع امبارح
نوسه : خلاص اجهزي سرعه انا ما عندي شي مسافه البس بس....فعلا جهزنا وزي الساعه سبعه الا عشره محمود ضرب قال لينا اطلعو انا جنب الباب..ايناس صحت امي من النوم قالت ليها نحن طلعنا اقفلي الباب ورانا.. امي سلمت على محمود وسألتو من خالتي وتربست الباب ... الشارع كلو نوسه و محمود بتونسو و يضحكو وانا ما مركزه معاهم.. بفكر بعد اسبوع انا ح اقول لي ابوي شنو؟ ..و مصيري حيكون مع منو؟ وابوي جاب القسوه دي كلها من وين؟ قطع تفكيري محمود وهو بقول لي يا بت هووووي هااااا كوركت ليك مرتين انتي ما معاي سرحانه وين؟.. مالك؟
انا : شنو يا محمود شابكني مالك. مالك ما عندي شي قلت ليك..
محمود : ما هو ما ممكن في الطبيعي يعني لمن اضرب الصباح و تردي علي بتكوركي و تسمعيني ستين كلمه فارغه... حميتوني النوووم...ياااخ ما ممكن معاكم انا لو دايره اصحى بدري كان مشيت جامعتي ... هسي في زول بضرب زي المواعيد دي... من الردحي بتاعك بعرف انو دي انتي و قبل افتح خشمي اصلا بتكوني قفلتي الخط في وشي... اسي الليله لمن ضربت اتخيلي يا نوسه قالت لي انا براءه زي الناس الطبيعين! ...ولاحظي سألتني خالتي كيف... والقويه اصلا قالت لي يا حوووووته و سألتني انت كيف انا لمن شكيت انو البتتكلم معاي دي برووو احترت والله .... نوسه بقت تضحك ...محمود قال ليها وهسي نحن بنتونس و هي ولا على بالها.. من متين بتخلينا في حالنا... ما بتشبكنا م تقعدو تحبو بعض في راسي و انتظروني لمن انزل..و تقعد تنقنق لينا... في شنوووووو مالك يا بت الناس ...
ضحكت في انفعال محمود رغم زهجي... قلت ليهو قررت اتغير... يعني الزول يكورك و ينقنق ما عاجبكم...يهدا و يقعد في حالو ما عاجبكم برضو
نوسه بضحك : انتي و يهدا و يقعد في حالو ودايره يصدقوك.. كدي استهدي بالله وركزي في الجمله دي..
محمود : دي اصلا ما جمله... دي استخرج الكلمه الشاذه لانو انتي و يهدا و يقعد في حالو ما بتركبو في جمله وحده .. انجزي في شنو عشان تنزلي.. عامله لينا ضيق ما قادرين ناخد راحتنا في الونسه...
نوسه : عاين بي اختصار ...اتقدم ليها واحد و عرفنا من نسيبه جارتنا مش بتعرفها... محمود قال ليها اي بعرفها ... بس شكلو ابوي كان داير يختها امام الامر الواقع و يكلمها بعد اهل الولد يجو ناس خطوبه عديل و تلبيس دبل و تكون ادبست... زي الحركه العملها معاي و مع اسيل... محمود عاين ليهاااا مسااااافه... نوسه اداركت الموقف و قالت ليهو بسرعه لكن طبعا انا اتعودت عليك و بحبك والله يا محمود و ما حاسه اني مجبوره عليك ما تعاين لي كدا ياااخ ...محمود قعد يضحك وقال ليها كان تبقي مره و تقولي كلام غير كدا وبعدين يا ننو حتى لو مجبورهْ علي انا والله على قلبي زي العسل...الواحد زاتو اشتاق لي الايام الكنتي بتحمري لي فيها زي الماكلك في قروش صندوق...ايام بتقولي لي يا حوته يا اخوووووي ... والله كنت بقرب افلقك يعني انا دافع دم قلبي في دبله و محبس ... وجايب 3 علب شوكلاته ماكنتوووش و بارد ووو نوسه قاطعتو قالت ليهو انت حتزلني ولا شنو...
محمود كعوج ليها خشمو و حاكاها : انت حتزلني ولا شنو ..اقسم بالله اول مره قلتي لي محمود اخوي قلت اريتني كان جبت الحلاوه القويييه ديك شفتي اللمن تفتحيها بتلقي ورقتها ملصقه فيهااا ديك بدل الماكنتوش و كل ما تقولي لي محمود اخوي اديك بيها فلقه في نص جبهتك دي لمن تفهمي حاجه... قال اخوي قال يخلخل ضروسك..
نوسه ماتت بالضحك و قالت ليهو دا كدا حالتو على قلبك زي العسل!!!صح... ضحك و قال ليها مش لابسه دبلتي في يدك كان قلتي محمود جدييي زاتو على قلبي زي العسل 😂 انا طوالي مديت ليهم راسي بالفرقه البين الكرسين القدام وقلت ليهم عاينو انا والله بنزل.. براي اخلاقي نخرتي ما ناقصه والله عوارتكم من الصباح...محمود حمر لي بالمرايه .. و نوسه قالت لي خلاص خلاص وواصلت لي محمود و قالت ليهو المهم يا زول هي قالت لي امي انا عرس بالطريقه دي م بعرس... قامت امي كلمت ليها ابوي... ابوي قال ليها لحدي الاسبوع الجاي تكوني اخدتي قرار يا محمد ود نسيبه... يا الولد الاصلا كان متقدم ليها اسمو منو كان يا برو ... قلت ليها بي اخر نفس زياد...
محمود : و انتي زعلانه لي ...ما هسي انا و نوسه سمن علي عسل... مع انها عملت نفس حركاتك دي و ما كانت طايقاني في البدايه... و اسيل و منير احلا اتنين... و انتي برضو حتتعودي
انا : محمود في فرق انت و منير... شفتو نوسه و اسيل و انتو الاخترتوهم واصلا كنتو بتحبوهم... يعني على الاقل في طرف اختار التاني وفي طرف حابي التاني .. صح هم ما كانو متقبلنكم لكن انتو بحبكم حببتوهم فيكم ... لكن انا الاتنين اختاروني امهاتهم فاهم... يعني لا انا عايزاهم لا هم اختاروني او شافوني اصلا... ولو شافوني كونو انا خيار امهاتهم ما حيشوفو فيني غير الخصال الكعبه وانا طبعي وانت عارفو ما اي زول بستحملني... واحتمال القبول بيناتنا لو ما تلاته في الميه بس حيكون صفررررر... دي الاولى التانيه انا امووووت ولا اعرس ولد نسيبه دا..هو انا كدا ما مستحملاها امووو الحشريه دي..وزياده على كدا طلع بتاع بنات لدرجه مقرفه... ونوع البنبسط بي لمه البنات حولينو
نوسه : كدي ود نسيبه دا خليهو بالجنبه.. خلينا في زياد منو القال ليك عشان اختارتك امو ما حيشوف فيك غير الخصال الكعبه ؟ احتمال يتقبلك انتي لوو ما جربتي ما حتعرفي..
انا : كدي. خلينا من زياد انتي القدامي دي يا نوسه الليله لو رسلتيني لي بلوزه سااااي... و جبتها ليك بتشوفي العيوب قبل المميزات...ولمن تلبسيها حتقولي لي فيها و فيها و لمن غسلتها كشت ... اما لو مشيتي السوق براك و جبتي نفس البلوزه دي حتى لو كشت حتتقبليها لانو في النهايه دا اختيارك انتي... فهمتيني... و انا ما مستعده اجازف مجازفه زي دي...
محمود : انا كراجل معاك في النقطه دي.. يعني انا شخصيا كمحمود لو امي اختارت لي وحده و بعد العرس حسيت انو فيها صفات ما بتنفع معاي...ماف شي بجبرني استحمل وانا زول عندي تلاته خانات فاضيه ...ابسط شي ممكن اعملو بعرس فيها وحده شايف فيها النقص الانا فاقدو ... اما لو مثلا انا بحب البت دي واخترتها و متعلق بيها...صدقيني ما بهمني اي عيب تاني فيها و حشوف فيها الحاجات الحلوه بس... عشان كدا لو الراجل هو الطرف المحب ممكن حبو يكفي الطرفين و المرا تميل ليهو و تحبو لانو بطبعها لينه و بتحب الاهتمام .. اما لو المرااا هي الطرف المحب نادر ما حبها يكفي الطرفين و الراجل يحبها... عشان كدا دايما البت امها بتقول ليها خليك مع البريدك ما البتريديهو ..
نوسه قالت ليهو بحب : محمووووود🥺 ... قاطعتها قلت ليها هي هي بلا محمود معاك حركاتكم دي اعملوها بعيدا عني.. اسي انا عندي مشكله عايزه حل..
محمود بزعل : يااااخ خربتي ام الزفتتتت انزلي.. انزلي عشان ما اقلب بيك العربيه دي...نوسه دي ماتت بالضحك....قلت ليهو ما نازله كان م لقيتو لي حل ...قال لي الحل محمد.. انتي و أمو حتتفقو لانها حشريه زيك.. اسي هي قالت محموود انتي الحشرك شنو.. دي شنو دي يااااخ.. و فتح لي باب العربيه قال لي وصلنا هديك مواصلاتك يلا درب السلامه وربنا يتم ليك علي خير... قعدت اضحك نزلت ورزعت ليهو الباب خليتو بكورك و بقول لي والله الباب دا تحصل ليهو حاجه تاني تتمرمرطي بالمواصلات بس اصلا شبهك..
محمود ولدد خالتي الوحيده ... و من زمان بتكيف لمن ارفع ليهو كثافتو.. وانا وهو الشحمه و النار...اخر حاجه كنا متوقعنها انو محمود و نوسه يكونو لي بعض...لانها كانت تشوف العما و ما تشوفو و شايفاهو واحد هزلي وما بقدر يشيل ليهو مسؤليه بعكس شخصيتها الجديه ... ولمن ابوي غصبها عليهو دخلت في حاله نفسيه عديل لكن ابوي كان الاهم عندو من حاله بتو النفسيه انو كلمتو تمشي ... بقيت بقارن بين نوسه و محمود زمان كانو كيف.. و هسي هم كيف لقيت نفسي تلقائيا بضحك ... ركبت المواصلات؛ محمود بنزلني في نص المسافه عشان انا و نوسه جامعاتنا ما في نفس الطريق.. فأنا بواصل بالمواصلات عشان ما يتأخر ...وهو بوصل نوسه لحدي باب الجامعه بعد داك بمشي شغلو... الكمساري طقطق اديتو قروشو وانا بفكر هل انا ممكن اكون مع محمد او زياد.. زي محمود و نوسه هسي؟..اتزكرت كلام محمود و قلت مستحيييل... وانا اصلا عناد ساي ما بعرس بالطريقه دي... و ابوي كان قايلني نوسه ولا اسيل بكضب على روحووو...نزلت من المواصلات و فجأه وانا سرحانه كدا شفت رحيق من بعيد معاها واحد واقفين جنب باب الجامعه بتكلمو... مشيت عليها سمعتها بتقول ليهو عشره كتار انا بجازف ليهو خمسه... قلت ليها يا بت يا رحيق قبلت علي قالت لي بي استغراب وتوتر بروووو!! جايه الجامعه يومين ورا بعض!! مالك عيانه؟ ...ضحكت و سلمت عليها.. لمن مديت يدي للولد قالت ليهو دي براءه صحبتي... وقالت لي دا صلاح ود خالي يا برو...انا لقيت نفسي بتلقائيه بقول ليها وانا مكشره وشي دا ياهو صلاح عدنان؟
صلاح : ومالك قايلاها بزعل كدا..
طوالي خشيت فيهو شمال و قلت ليهو ياخ حرام عليك انت و بت عمتك.. قالت لي صيديله ود خالي قريبه من بيتكم اسمها صلاح عدنان بتلقي عندها حبوب امك..اسألي اي زول في الشارع الرئيسي بوصفها ليك ...ان شاء الله اي زول في الشارع اسألو بتعرف صيدليه صلاح عدنان بقول لي قدام شويه... اسأل تاني يقولو لي قدام شويه... شابكني قدام شويه قدام شويه .. لحدي ما سألت لي راجل كبير اتخيل بس قال لي شنووووو؟ رحيق ضحكت في نظرات صلاح المستغرب في طريقه كلامي لمن دموعها جرت...وفي نفس الوقت انا حكيت ليها القصه قبل كدا... صلاح قال لي قال ليك شنو؟ ...وتقريبا كان بقول بينو و بين نفسو دي شنو الاسطوانه الاشتغلت لي فجأه بدون مقدمات دي! ....
انا بغيز : قال لي انتي فوتيها الصيدليه دي وراااااا شوووويه...قالو ليك ما قعدت ليهو في الارض الراجل زاتو خاف مني لمن قلت ليهو انا تعبت عديييييل يا حاج انا ماشه لي ساعه.. بقولو لي قدام شويه اسي تجي تقول لي ورا شويه انا الليله رجلي على رجلك مش ورا شويه ارح نمشي سوااااا بسس و حكيت ليهو قصه حبوب امي المالاقياها ...شكلو قايلني فاطه سطر حنه على حالتي التراب حدووو بطني ياخ بالمشي.... وصلني لحدي الصيدليه بالله لقيت اليافطه قدر يدي دي ... عشان اشوف صلاح عدنان دي دايره لي عدسههه مكبره لانها ما بتتشاف بالعين المجرده... وانا اصلا نظري كعب...
صلاح وهو ميت بالضحك : والله ما عارف اقول ليك شنو زاتوووو....
انا : ما تقول لي اي شي كبر اليافطه بس عليك الله تكون ما قصرت... رحيق و صلاح الاتنين قعدو يضحكو... قال لي الغريبه وشك ما مألوف انتي دخلتي الصيدليه ولا زعله ساي رجعتي... قلت ليهو ما دي المغسه هنا بعد الكداري دا كلو لقيتها مقفله الراجل يحليلو ركبني ركشه وقال لي اضربي لي ناس بيتكم يوصفو ليهو البيت وحلف الا يدفع من شده ما حالتي كانت اسفه.. الا حلفت ليهو اني نصيحه وما طاشه شبكه وطلعت القروش وريتها ليهو وقلت ليهو معاي قروش يا حاج ...
صلاح بضحك : خلاص تعالي بعدين شغالين وحبوبك و ادويتك كلها علينا اعتبريهو تعويض...ضحكت و قلت ليهوووو والله تاني لو كتبت صلاح في يافطه برها و عدنان في يافطه براها شفت ما جايه ... قال لي رحيق وهو بضحك هي اصلا تلقائيه كدا ولا عشان زعلانه...
رحيق بضحك : لالا دي خلقه كدا شفت النوع الكان دقست و فتحت معاهو موضوع بحكي ليك قصه حياتو كلها!؟ بس دي برو...ضحك وعاين لي عين كدا ما فهمتها و قال لي عليييك الله كان في زول دقس و فتح معاك موضوع بالغلط و حكيتي ليهو قصه حياتك قصه الصيدليه دي ما تحكيها ليهو عشان سمعتي حتبقا في الحضيض و ليك علي لمن اكبر اليافطه نكلمك قبل اعلقها زاتو...
قلت ليهو ما بوعدك والله ... رحيق قالت ليهو احسن ليك والله دي دعايه و اعلان ببلاش...قعد يضحك و سلم علينا و قال لي رحيق انا ماشي بعد دا لي بعدين وركب عربيتو و مشى...
بعد مشى قبلت على رحيق وقلت ليها ما عايزه ادّخل لكن سمعتك بتقولي ليهو بجازف ليك خمسه.. انا ممكن اسلفك الباقي ووقت ما عايزه ترجعيها رجعيها ... عاينت لي بي استفهام مسااااافه!! حسيت بيها ما فاهماني! .. بعدين قالت لي بتوتر ا.. ااا..ااا ..لالا يا بت حلينا الموضوع م بحتاج..
____________
زياد دخل المكتب لقا يحي راقد في الكنبه بطبز في تلفونو و مروان بقلب ليهو في ملفات... سلم عليهم وقعد قصاد مروان... وقال ليهم اها عملتو شنو في موضوع العدناني...مروان مد ليهو واحد من الملفات الفي يدو ...ويحي قال ليهو انا زول بحب الشقاوه زيك ما لاقاني الجابك شنو مش مفروض ترتاح ليك يومين بعد قضيتك الاخيره دي... رد ليهو زياد وهو بقلب في ملف القضيه القدامو والله مفترض اكون اسي منبطح زيك كدا في سريري ... لكن لو ما جدعت العدناني دا ورا الحديد... وخليتو اخد مأبد ما برتاح...وقبل علي مروان قال ليهو دا كل الجديد؟
مروان : والله يا زياد كل العرفتو عندو ولدين.. صلاح دا عندو صيديله شغال فيها براهو وتقريبا هو الصغير...وصدام برا السودان عندو شركه بتاعت استيراد و تصدير وشكلو هو الممشي الشغل البرا ... قدر ما فتشنا وراهم ما قدرنا نمسك عليهم حاجه..
زياد :والحل؟؟
مروان : ما عارف اقول ليك شنو والله حاولت بكل الطرق عشان القا لي فيهم فرقه م قدرت الشغل كلو نضيف.... يحي انعدل في قعدتو و قال ليهم الشغل كلو نضيف كيف يعني!! ... لو ما ميه في الميه..تسعين في الميه شركاتهم و مصانعهم دي حتكون غسيل اموال...
زياد : عارفين يا يحي لكن نثبت الكلام دا كيف؟ دي المشكله هنا.. وقبل على مروان قال ليهو اسمعني خلينا من العدناني هسي .. كدي شوف الناس الحولينو...وشدد لي الرقابه على صلاح دا و صيدليتو... واعرف لي مخزون الادويه بنزل متين و البجيبها ليهو منو... و شوف الداخل والمارق... ولو حسيت بي انو بعمل اي حاجه غير قانونيه... ان شاء الله باع ليهو حبايه وحده بس فيها نسبه مخدر بالغلط بدون رشته ارفعووو لي طوالي...
__________
