امال قالت ليهو سوق معاك اساور دي خليها تجيب سفنجه ليها و لي براءه...الاتنين جو حفيانات.. وطلعت شبشها ادتو لي اساور و قالت ليها امشي سرعه و تعالي..يحي ما فضل ليهو الا يطير بالفرح..وقال ليها بتوتر نمشي؟... قالت ليهو تمام ونزلو الاتنين سوااا... هووو ماشي قدااااام و هي ماشه وراهو بي مسافه... وبمجرد ما طلعو من بوابه المستشفى وقفها بتاع العربيه الوصلنا زي الكأنو ما مصدق انو لقاها...وقال ليها انا واقف هنا من قبيل منتظر وحده فيكم تطلع امسكي دبله اختك دي.. انا ما بشيل زياده من حقي... مريضكم كيف ان شاء لقيتوهو بخير؟ ... في اللحظه دي يحي حسه انو ماف حركه وراهو.. اتلفت عشان يشوفها لقاها واقفه بتتكلم مع بتاع العربيه..اتجه عليهم و سمعو بقول ليها الحمد لله انو اطمنتو عليهو ان شاء الله ربنا يتم ليهو الشفاء وهو بعاين ليها بكل اعجاب... اساور قال ليهو امين.. وشالت تلفونو عشان تسجل ليهو رقمها وقالت ليهو مسكل لي عشان نحول ليك القروش..
يحي طوالي شال التلفون من يدها مسح الرقم... وقال للراجل حسابك كم يا الحبيب...الراجل عايز يقول ليهو خليها كدا... يحي قاطعو بحزم و قال ليهو شكرا ليك وما قصرته بس الحق حق.. حسابك كم عشان نحن مستعجلين...الراجل وراهو الحساب وهو بسرعه طلع جزلانو حاسب...عايزين يمشو كدا قاطعهم و قال ليهو انت اخوها؟.. يحي حدر ليهو و قال لي اساور امشي قدامي..وقبل على الراجل و قال ليهووو ارفع عينك عاين ليها تاني عشان اقدها ليك..انت قايلني ما فاهمك؟ نحن لو ما متنا شقينا المقابر...حسابك و شلتو يلا اتوكل...طوالي الراجل شال رجلينو ومشى.. ويحي قبل على اساور اللسه واقفه وما اتحركت من مكانها وقال ليها بحده : انا مش قلت ليك امشي قدامي؟ .. ردت ليها وهي مستغربه في تصرفاتو : ما انا لو عارفه امشي على وين ما كان نزلت معاك من البدايه.. يحي قال ليها حصل خير.. وقطعو الظلط دخلو مول كبير وتحديدا قسم الشباشب...جربت اي شبشب ما طلع قدرها...يحي قعد يضحك و قال ليها لاحولااااااا رجل دي ولا بطاح معقوله بس
اساور بضحك : قل هو الله احد...قعد يضحك و بقا يفتش معاها عن شبشب يكون مقاسها... لحدي ما في النهايه قالت ليهو يا زول ارح قسم الرجال انا والله اخلاقي جات في نخرتي..يحي بقا يعاين ليها شويه و يعاين لي رجلها شويه ويقول دا حق البنات اللعبت بيهم يا يحي تستاهل هسي بعدين تجيب ليها شباشب الشيله من وين..
اساور قالت ليهو نعممم قلت حاجه؟ ...
يحي :لالا ما قلت شي.. اها قلتي لي نمشي قسم الرجال...
اساور :اسمعني كدي اشوف مقاس رجلك..يحي رفع ليها رجلو وهو مستغرب فيها وقال ليها 43...
صفقت بي حماس و قالت ليهوووو بسسسس حتقوم تعمل كلاتي.. زياد اخوي بجرب الشبشب على مقاس رجلو وبجيبو لي... اسي انت امشي اختار لي شبشب ظابط كدا على مقاسك جيبو لي مسافه اشوف لي برو شبشب.. و اديني تلفونك اضرب لي انفال عشان اشوفها بتلبس مقاس كم...
يحي اداها التلفون ومشى وهو ميت من الضحك و في نفس الوقت مستغرب هي كيف قادره تكون طبيعيه من غير ما تتصنع قدامو بعكس البنات الكان بعرفهم
_______________
خالتو امال بالتعب نامت من غير ما تشعر في السرير القصاد سرير زياد..وانا بقيت قاعده في الكرسي جنبو.. وانفال قاعده جنب رجلين امها
زياد : انتو اساور وين؟ انفال قالت ليهو مشت مع يحي يجيبو شباشب ليها و لي برو..بالخلعه جرو حفيانات و الحمد لله البقينا جاين من الحنانه ولابسين عباياتنا... زياد قال ليها و ما تمشي معاها انتي يمشي معاها يحي لي؟... انفال قالت ليهو اجي يازياد دايرنا نطلع في الليل دا برانا..قال ليها انا نسيت انو الدنيا ليل.. كان برضو تطلعي معاهم لكن يا زوله خير...وهم بتكلمو كدا تلفونها ضرب شالتو وطلعت بيهو برا...
وانا طوالي قبلت على زياد و قلت ليهو بهمس عشان امو نايمه زياد نحن ما حنرجع البلد صح؟ ...
رد لي بنفس نبره الهمس : انتي عايزه شنو؟نرجع ولا نقعد؟.. قلت ليهو نقعد... قعد يضحك و قال لي خلاص معناها حنرجع...قلت ليهو خلاص عايزه نرجع... قال لي تمام مدام انتي عايزه نرجع بنرجع...
كرضمت و شي و قلت ليهو بغيززز : زياااااااد ياااااااخ.... قال لي وهو كاتم ضحكتو :عيوووون زياد ياااااخ...طوالي فصلت و بقيت بتبسم وبعاين فوق و تحت واتلفت زي العويره... قعد يضحك وقال لي وهووو بكرفس لي في وشي بيدو عملتي لي شنو انتي يا بت الناس..عايني عايني كف يدي قدر وشك يعني كان عملت ليك كدا بس بلخبط ملامحك اعملي حسابك...
مسكت يدو بي يديني الاتنين وزحيتها من وشي و انا بضحك وبقول ليهو لخبطها ساي انا عرس و عرست...ملامحي دي حيتبلي بيها راجلي القاعده في وشو صباح و مساء
زياد بضحك : بالله انتي معرسه يعني.. راحت علي اسي انا كنت جاي البيت...و بتلقايئه رفع يدي الفيها الدبله لمن لقاها ماف.. قال لي بي استغراب دبلتك وين يا برو... قلت ليهو بتوترر بعد ركبنا العربيه ووصلنا اتزكرنا اننا ما جبنا معانا قروش اضطريت اطلع دبلتي اديها لي بتاع العربيه..
زياد: كان تكلمو يحي او مروان يحاسب...ولا كان تدفعو ليهو بنكك.. قلت ليهو زياد نحن في اللحظه ديك ما كنا قادرين نفكر اصلا لقيت نفسي بطلع دبلتي دا القدرت عليهو...
زياد:فداك يا زوله المهم الراجل اخد حقو.. قلت ليهو بضحك انا المفروض اقول ليك فداك لكن ما انت... قاطعتنا انفال الفتحت الباب وسألتني بتبسي مقاس كم يا برو؟..بعد وريتها اتلفتت على زيااد قالت ليهو اساور قالت ليك بتاع العربيه رجع الدبله... بعدين حاسب يحي على قروش الشباشب و العربيه الاتنين ... انا وزياد الاتنين عاينا لي بعض و قعدنا نضحك وقال لي شفتي قروشي حلال..وواصل وهو بقول لي صحي انتو عرفتو كيف اصلا جيتو مخلوعين كدا..قلت ليهو بالصدفه و بديت احكي ليهو انو اصلا مروان كان ضارب لي عادل في رقمو.. و ضرب لي انا بالغلط..
____________
بمجرد ما يحي حاسب على الشباشب.. اساور طلعت شبشبها من الكيس و لبستو قبل بتاع الكاشير يرجع ليهو الباقي زاتو ... يحي قعد يضحك و قال ليها الشراط شركه اقسم بالله.. اساور قالت ليهو وهي بتضحك ما بنكر زوقك حلو لكن الشماعه برضو عندها اثر...يحي قال ليها وهو ميت بالضحك بعد ال 43 دي تاني فضل فيها شماعه انتي تسكتي بس..وما اسمع صوتك معقوله بس رجلك قدر عمي في العمر...اساور بقت تقوم و تقع بالضحك...و بعد قربو يصلو المستشفى يحي اتنحنح ووقفها و قال ليها بتوتر..اساور انا عايزك في كلمتين لكن ما تفهميني غلط..
اساور وقفت وقالت ليهو وهي مستغربه اتفضل..
يحي : انا واحد كنت بتاع بنات.. و كل يوم نازل مع دي و طالع مع دي... لكن والله وربنا شاهد من يوم شفتك مسخو علي كل البنات..و من يوم شفتك تاني ما رفعت سماعه تلفون اتكلمت لي مع بت.. و حتى رقمي غيرتو.. وعمري ما فكرت في بت لي قدام ولا فكرت في العرس...المهم عشان اختصر عليك الكلام الكتير دا انا دايرك لي قدام يا بت الناس...اخدي وقتك و فكري براحتك وانا ما حأضايقك او اتعرض ليك تاني....كدا كدا حأفتح مع زياد الموضوع خلال الاسبوع دا..وهو اكيد حيجي يسألك وردك حيصلني من خلالو...
اساور دي زي الكشحو فيها مويه تلج اتصمغت في مكانها و بقت ماعارفه تقول ليهو شنو...في النهايه اكتفت بي انها تدخل المستشفى بسرعه وتخليهو واقف وهو بضحك و مبسوط من انها ما اخدت و ادت معاهو في الكلام..ووقف برا مسافه عشان يديها مساحتها لحدي ما تصل الغرفه وما تتوتر لمن تحس بيهو ماشي وراها...اول ما وصلت اشرت لينا انا و انفال من بعيد طلعنا ليها برا... قلنا ليها مالك عامله كدا..قالت لينا الحنه طلعت فاتحه خير بالجد يخوانا...يحي اتقدم لي قبل راجلك يجي من السفر يا انفال.. انا و انفال قلنا ليها بصوت واحد يحي شنووووووو؟.. قالت لينا هووووس هووسسس وطووو صوتكم زياد لو سمع بقتلني المهم تعالو نحكي ليكم..وقعدتنا في الكراسي القصاد الغرفه وبدت تحكي لينا وهي ما مصدقه...
____________
تاني يوم الدكتور كشف على زياد وقال لينا عادي ممكن يطلع من المستشفي.. بس تجو كل يومين عشان ننضف الجرح... و بعد اسبوعين ان شاء الله تجو عشان نعمل صوره للكسر و نشوفو ماشي كيف...عملنا اجراءات الخروج.. وقلت لي زياد انت امشو البيت انا عايزه امشي بيتنا اطمن علي ابوي...واشتقت لي ناس بيتنا شديد بسلم عليهم و بجي ما بتأخر...قال لي امشي معانا البيت استحمي و البسي ليك اي حاجه من اساور.. لانو لو مشيتي ليهم بالحاله دي حتخلعيهم...عاينت لي روحي و قعدت اضحك يعني من شده ما بالي بقا ما معاي حتى ما ركزت مع عبايتي الكلها تراب و حالتها بالبلاء..فعلا مشيت معاهم البيت استحميت و لبست لي عبايه من اساور... و زياد كلم يحي يوصلني.. وواصني اني ما اجي من هناك براي..و اضرب ليهو تلفون لمن اكون راجعه عشان يرسل لي زول يرجعني..
_____________
يعني يا يحي حتوصلني و تمشي طوالي اتفضل خش اشرب ليك حاجه..
يحي : لو ما اتأخرت كان نزلت والله.. لكن لاحق مروان في القسم... و انتي زاتك جهزي نفسك عشان اول جلسه محكمه حتكون قريب..قلت ليهو ان شاء الله... ونزلت و انا بشكر فيهوووو..
دقيت الباب فتحت لي ريييل و طوالي اتشعبطت فيني و هي بتقول حااااااااااالتو بلوووو(بروو) جااااااااااات... شلتها و انا بضحك قلت ليها ناس البيت ديل وين قالت لي مسوووو تلهم لي السيخ(مشو كلهم لي الشيخ) وسالو معاهم ولق تتتيييييييير (وشالو معاهم ورق كتييير)...
اتخلعت وقلت ريل دي عرفت الكلام دا كيف وجابتو من وين ولي اصلا ناس اسيل يقولو قدامها كلام زي دا .. وقلت ليها وانتي هسي قاعده مع منو
ريل: مع حالتو نوسه...وسألتني عموووو زياد وين؟.. ضحكت ودخلت بيها جوا و انا بقول ليها عمو زياد بسلم عليك ورسل ليك معاي حلاوه...وعشان هو عيان شويه قال ليك بجي المره الجايه وحيسوقك الحديقه...
شالت الحلاوه و نزلت مني وهي مبسوطه و بتضحك وتشيل و تسأل فيني متين و حنمشي وين و عيان عندو شنو...لحدي ما نوسه طلعت من الحمام وهي بتقول ليها ريل انتي جنيتي بتتكلمي وتضحكي كدا مع منوووو لقتني في وشها...قعدت تضحك و جات علي حضنتني بعد شويه قلبتووو بكاااا و بقت تقول لي ابوي تعب شديد يا برو انا وريتكم انو نسيبه دي كلامها داك اصلو ما كان ساي...قلت ليها و انا ببكي ياريت يا نوسه لو سمعنا كلامك....لكن حسبي الله و نعم الوكيل...وبعد مسافه فكينا بعض لقينا ريل قاعده في الكنبه بتعاين لينا و دموعها في عيونا...مشيت عليها ضميتها علي وقلت ليها نحن بنبكي عشان مشتاقين لي بعض يا ريل... ما تبكي..وانا ونوسه بقينا نحاول نغير في الموضوع و نلعب فيها...
بعد شويه الباب. دقه نوسه قالت لي بلهفه ديل بكونو ناس ابوي جو... قلت ليها براحه شيلي ريل خشي بيها جوا.. البت دي واعيه بكل الحاصل حولينها وعايشاهو معاكم... حرام عليكم البت لسه صغيره...نوسه شالتها دخلت بيها جوا... و انا مشيت فتحت الباب لقيتهم فعلا ناس ابوي... و ابوي دا انقسم النص و بقااااا ضعيييييف ووشو شاحب...اول ما شافني دموعو جرررت وقال لي اعفو لي يا بتي العملتو فيكم.. انا حاسي زي الكأنو كنت معمي و ما شايف و في ستار اسود حاجب عني الروئيه وما قادر اميز الصح من الغلط...وما كنت واعي زاتو انا بعمل في شنو... حضنتو و بكييييت و قلت ليهو الحمد لله البقيت كويس حسبي الله و نعم الوكيل في الكان السبب ما تبررر يا ابوي كفايه انك بخيير و صحه و عافيه... بعد داك سلمت علي اسيل و امي و محمود و منير... و حرفيا ما عرفه البكا و السلام داك كلو كان دموع فرح ولا زعل على المرينا بيهو ولا شوق ولا شنو بالضبط...دخلنا جوا و التلاته بقينا لاصقين في ابوي زي الما مصدقين...محمود قال لينا وهو بضحك دي شنو حركات الشفع دي يا بنات..منير قال ليهو خليهم يا محمود على الاقل نرتاح حبه.. و عمو احمد يتقاسم معانا نقه بناتو دي شويه...
ابوي ضحك و قال لينا يا بنات ما يكونو الرجال دي مزعلنكم بس..
محمود قال ليهو اسألنا نحن السؤال دا يا عمي...علي القسم بناتك ديل غيرنا ماف زول كان بستحملهم ليك...نوسه قالت ليهو والله نحن الماف زول غيرنا بستحملكم ما تخليني هسي اشر غسيلك قدام ابوي ...محمود قعد يضحك و قال لي ابوي شفت شفت يا عمي بتك ملااااك ماشاء الله... شفت الاسلوب الرقيق الانثوي دا انا بحمد الله عليهو صباح و مسا...نحن قعدنا نضحك... ومحمود ونوسه لسه بتناقرو...ابوي سأل من ريل نوسه قالت ليهو نامت..بعداك اتلفت علي و قال لي زياد وين يا بتي.. سكتت مسافه بعد داك حكيت ليهم بالحاصل...منير شاكلني وقال لي كيييييف ما تورينا من امبارح.. لمن ضربتي ما كان تقولي يا برو.. امي قالت ليهو ارح هسي يا منير ومحمود ودونا ليهو.. فعلا جهزو و مشينا كلنا بي عربيه منير و محمود..وابوي رغم تعبو اصر انو يمشي يطمن عليهو..
________
كنت قاعده جنب زياد و بعاين مبسوطه للمه حوليني..نوسه و اساور وانفال واسيل البهظروووو مع بعض... و محمود البقاطع نوسه دايما في الكلام ويقعدو يتشاكلو ...وريل الاتبرت من ابوها وامها... وقالت عايزانا انا وزياد نبقا امها و ابوها...و منير الشغال لي زياد انا ما قادر اصدق انو بتي اتبرت مني عشانك.. وزياد بقول ليهو بكره حنكلم المحامي يجهز ليك ورق التنازل عشان توقع عليهو... واسيل شغاله لينا هي هي ما تتعاملو مع بتي كأنها قطعه ارض ورق تنازل شنو... وانا بقول ليها يا استاذه بقت بتنا نحن ولا شنو يا ريل ... وريل تقول لي ايييييييييي بتكم بصوت عالي... و اسيل تأشر ليها اصبري لي بي يدها... وامي و خالتو امال و ابوي ميتين بالضحك..في نص الونسه و الجوطه الحاصله دي لقيت نفسي بتلقائيه همست لي زياد القاعد جنبي بصوت واطي لو ما انت ما اظن كنت حأكون واصله المرحله دي من السعاده في زول قال ليك اني بريدك يا ود الناس...زياد اتلفت وبقا يعاين لي وهو بضحك و مخلوع في نفس اللحظه و همس لي هسي دا وقتو الكلام دا... يعني انا نشفت بالصبر وانا منتظر منك منك كلمه حلوه... تجي تقوليها لي في الوقت الغلط... اسمعيني احفظي الكلام القلتيهو لي دا كويس عشان حتعيديهو لي بعدين... بس في تعديل بسيط بدل ود الناس دي ختي بدلها اسمي لو في طريقه... راجعي النص و اعملي تعديلاتك ولو في اضافات ضيفي على قدر ما تقدري سامعه... انا انفقعت بالضحككككك لمن دموعي جرت... و كلهم بقو يعاينو لينا... محمود قال لي بصوت واطي عشان ناس امي ما يسمعو انتي يا بت اللزينه اصبري لي وافقه لينا انا نوسه في حلقنا حاميانا النفس.. نوسه قومي شوفي شغلك... اساور قالت ليها ارح انا بساعدك... و جو قعدو الاتنين في نصنا و انفال و اسيل و منير قعدو يضحكوووو... زياد قال لي ريل تعالي اجرييييي يا ريل الحقي ابوك وامك عضي البنات ديل خليهم يزحو من هنا... منير كورك ليها ابووك وامك هنا يا ريل ما هناك..ريل بقت واقفه في النص ما عارفه تمشي على وين.... محمود قعد يضحك و قال لينا جهجهتو البت يا جماعه بقت ما عارفه ترضي منو... واستمر الضحك والونسه لحدي ما ناس بيتنا طلعو... و امي قبل ما تطلع اخدني على جنب و قالت لي ربنا يسعدك يا بتي و وصتني على بيتي و بعداك طلعت...
وبمجرد ما طلعو زياد بقا كل مره بناديني و انا بتهرب منو واتحجج بي حاجه...وابيت امشي ليهو كلو كلووو.. لحدي ما سمعناهو بصرخ بي المم و جرينا كلنا على الغرفه... قلت ليهو بخوف زياد مااالك في شنو حاسي بوجع نرجع المستشفى و دموعي طوالي رغرغت... واساور و انفال شغالين ليهو نضرب لي يحي ومروان .. و امهم بتقول ليهم يحي و مروان شنو نوقف عربيه من الشارع ما بننتظرهم لمن يجيو...
زياد : المسكن بس..مدي لي حبه المسكن يا برو..بلع حبتين مسكن و غمض عيونو بألم و قال ليهم داير انوم شويه ... خالتو امال قال لي خليك جنبو.. و طلعو كلهم و قفلو الباب وراهم...بعد نص ساعه كدا شويه ملامحو رخت... قلت ليهو زياد انت كويس الوجع خفه...
استعدل في قعدتو وضحك وقال لي قبضتك حتتعزي بي شنو تاني يعني الا اموت حتى تجيني... شفتي عشان تعرفي انو تفكيرك شمال انا كنت عايزك تديني حبه المسكن لاني مارعارفها وين... وانت فهمك مشى البعيد...
انا بقيت بقطع في الكلام بتوتر : ما.. ما.. فهمي.. شنو..زياااد....ياااخ..
زياد قعد يضحك و قال لي اتكلمي عربي .. المهم نرجع لي موضوعنا اها واصلي كنتي بتقولي لي في شنو قبيل؟..قلت ليهو شنو يا زياد قاعد لي كدا زي المفترض اسمع ليك قصيده...الكلام دا بحسو فهمت
زياد : انجزي حِسيهو طيب ...قلت ليهو احسو كيف انت قايلو زر بتغط عليهو و خلاص... قال لي خلاص انا بساعدك ومسك يدي و قال لي زي الكنتي بتقولي بريدك ولا حاجه زي دي!! المهم نحن عايزين نركز على الكلمه دي بالزات...
انا بتوتر : زياد.. قلبي...حيقيف اقسم... بالله.. جسمي.. برجف.. يا زياد..خليني.. قعد يضحك و قال لي انتي خجلانه مني لي انا راجلك ما زول غريب يا برو..يعني كونو تعبري لي عن مشاعرك او انا اعبر ليك عن مشاعري دي ما حاجه عيب... الرسول صلى ليهو عليه وسلم ما كان بخجل من حبو لي السيده عائشه و كان بقول انها احب الناس لي قلبو..وضحك و باس يدي و قال لي انا ما حأضغط عليك..خلاص خليتك م تقعدي تترجفي لي..
قمت شربت لي مويه و تاني جيتو راجعه... قعد يضحك و قال ليها اهاااا جيتي راجعه مالك... قلت ليهو اسكت خليني اركز... ضحك و قال لي اهممم سكت...
جريت يدو مسكتها بين يديني الاتنين.. و بقيت اتنحنح وشغاله احم احم لحدي ما اتشجعت وقلت ليهو زياد
قال لي عيون زياد وهو بضحك و قاصد يوترني...
انا : زياد انا براي متوتره قلت ليك اسكت حتى لو قلت ليك زياد ما ترد.. وما تعاين لي كدا...
زياد اتلفت وهو ميت من الضحك و بقا يعاين علي الباب و قال لي اها كدا كيف... سكت خلاص تاني ما حأتكلم اها واصلي..
اخدت نفس و قلت ليهو انا ما عارفه ابدا ليك من وين بالضبط...تتزكر لمن قلت لي انو امك شافتني في بكا؟.. انا اتفاجئت بي انو انت ياهو زياد الكنت كارهاهو اكتر من نفسي عشان ابوي جابرني عليهو... يمكن انت ومحمد اكتر اتنين كرهتكم في حياتي... وواصلت وانا بضحك و قلت ليهو لانو كنت مفتكره انو امهاتكم اختاروني عشان شخصيتي قويه وقالو انا مره قادره...وانتو مساكين وعايزيني اخد لكم حقكم من الناس... زياد قعد يضحك... وانا واصلت وقلت ليهو وما كنت متوقعه انو تتقبلوني لانو في النهايه انا اختيار امهاتكم...قاطعني و قال لي طيب مدام بتكرهينا الاتنين لي رفضيني و قبلتي بي محمد يا برو... قلت ليهو دا سر ما قلتو لي زول انت عارف انا لو كان ابوي ضغطني شديد كنت حأختارك انت رغم اني ما بعرف عنك حاجه... وعمري ما كنت حأختار ولد نسيبه.. بس ابوي بسبب موقف حصل هو القال لي امي ترفضك... و قرر اني حأعرس محمد...ابتسم لي برضا و حب و قال لي كملي... قلت ليهو المهم مررر الزمن واتلاقينا صدفه في الصيدليه انت عارف ماحتصدق كميه الامان الحسيت بيها و انت جنبي يا زياد... انا كنت فاقده الاحساس دا و عمري ماف زول قدم لي مساعده غيرك انت و عزيز..
هنا ملامح وشو اتقلبت و قال لي بس بس بس عزيز انا كيف نسيت اسألك منو ... بالله يعني الكبابي الاديتيها ليهو كرد جمييييل كانت عشان ساعدك.. يعني انا و عزيز الاتنين في نفس الكفه الاتنين ساعدناك و الاتنين اخدنا كبابي كرد جميل صح..
قلت ليهو زياد انت عوير عزيز شنو الانت معاهو في نفس الكفه...عزيز دا انا كنت فاكره اني حبيتو..بس طلعت بتوهم وزعلانه على اليومين الاتكلمت فيهم معاهو ولو علي امحيهم من حياتي اصلا... زياد انا عمري في حياتي ما حسيت اني بنتمي لي زول.. او حسيت بي انو في زول قطعه مني ولو حصلت ليهو حاجه انا ممكن أموت... ما حسيت بالاحساس دا الا معاك.. انت قادر تفهم انو حياتي خلاص كدا بقت مربوطه بيك..ومتنه اني انخطفت و ادمنت مخدرات وعلى قدر ما كنت زعلانه من رحيق... هسي بقيت شايفاها سبب في انو نحن اتعرفنا على بعض ومتقبله اي حاجه حصلت معاي ولا نفسي انسى كل المريت بيهو دا خالص... لانو لو نسيت اي تفصيله حأنسى لحظه عشناها مع بعض .. زياد انا قدر ما اقول ليك انا بحبك قدر ما حاقدر اعبر ليك... بس عايزه اطلب منك حاجه وحده بس...
قعد يضحك و ضماني عليهو وهو مبسوط و قال لي حاجه وحده شنو... بعد كلامك دا لو قلتي لي طرشميه حاجه انا معاك فيها من غير ما تطلبي...قعدت اضحك و قلت ليهو خليك حافظ كلامك دا لانو ما حأطلب هسي... ضحك و قال لي انا تحت الخدمه في اي وقت نرجع لي موضوعنا...
انا : موضوع شنو تاني يا زياد.. قعد يضحك و قال لي كدا خلاص...ارح نبدا من البدايه طيب...بس فطي لينا الفقره بتاعت عزيز دي تمام مسيخه كدا و ماعجبتني... تاني استعدل في قعدتو و قال لي صحي هو ساعدك في شنو لمن اديتيهوو هو كبايتين و انا كبايه وحده....انا متتتت من الضحك وقلت ليهو زياد انت متأكد انك ضابط مباحث؟ دي شنو حركات الشفع دي... قال لي انتي خليتي فيها مباحث انجزي عمل شنو لمن مدياهو كبايتين ارح ارح قولي انتي حاليا تحت التحقيق.. بقيت احكي ليهو وهو ماخد الموضوع بكل جديه و كل ما اجاوب على سؤال يخش لي في سؤال تاني
____________
عدت الايام و مشينا اول جلسه محكمه... و حددو مواعيد الجلسه التانيه بعد اسبوعين... وزياد الحمد لله طلعو ليهو حامل اليد و قالو الكسر ماشي كويس بس لازم يحافظ عليهو و ما يضغط على يدو شديد...
يحي كان بحاول يفتح مع زياد موضوع اساور.. بس كل مره بخاف من رده فعلو و بتراجع... لحدي ما في يوم قال ليهو تعال لي في البيت عايزك في موضوع مهم... ولمن جاهو قال ليهو اسمع يا زياد انا حأقول ليك و اليحصل يحصل... تقتلني ترفضني تدفني المهم اكون عملت العلي..
زياد قال ليهو في شنو يا يحي ما تتكلم.. بتلف و تدور مالك... يحي اخد نفس و قال ليهو انا عايز اساور اختك على سنه الله ورسوله...
_______
