حتمشي انت يا زياد شيل ليك اي روشته قديمه او اتصرف المهم تخش الصيدليه تتأكد..بعدين صلاح دا ليهو كم سنه شغال براهووو..كونو يشّغل معاهو زول حاليا تسعين في الميه حيكون تبع ابوهو.. او حيكون زول معرفه وبثقو فيهو.. الناس ديل ما بشغلو اي زول معاهم ساي
يحي:المشكله زياد دا لو مشى بخرب الحكايه كلها ... ما بعرف نهائي يتعامل مع الجنس اللطيف... لو البت دي ما اتفاعلت معاهو عادي بنفعل ويرفعها يجيبا لينا هي و صلاح الاتنين هنا .. مالك م بتعرفو..احسن ليكم استفيدو من مواهبي.. بي كلمتين بس بخليها ليكم تحكي لي قصه حياتها...
زياد : انا زاتي ما بالحيل على المشيه دي يعني لو مشيت انت تكون ريحتني والله ...
مروان بهظار : دا كان مشى بجيني مرتبط ... و انت لو مشيت كان حصلت حاجه ما متوقعه حتجوطها وتجيني بي مشكله ... الاتنين ما عندكم ضمان ...يحي قال ليهو وهو بضحك انت خارب سمعتي لكن الله في..
زيات بضحك :خلاص نمشي سوا بس هو يحرسني و انا بحرسو ...يحي قال ليهو يا بمشي براي يا ماداير...
مروان : اخجلو عليك الله.. هي بت وصلاح زاتو بت زيها دايرين تمشو نفرين... زياد عليك الله امشي انا بخلي ياسر اخو اسراء يكتب لي روشته وبجيبها ليك معاي بكره...بس انت حاول طول بالك و اتعامل عادي الامور براها بتمشي..
__________
لمن رجعت البيت لقيت منير راجل اسيل و محمود معاهم ريل خاتين كراسيهم و قاعدين قدام الباب..ريل جاتني جاريه و هي بتقول لي "دِبتي معاك حادَه حِوّهْ(جبتي معاك حاجه حلوه) ..شلتها و قلت ليها ارح الحاجه الحلوه جوه...وقبل اسلم على ناس محمود استلموني ليك
محمود : اووووو برو... و قبل على منير قال ليهو كان مكتوب والله العظيم بعد عشمت اختي فيك شنوووو؟
منير قال ليهو وهو ميت بالضحك لالا ما كدا يا حوته يااااخ...اهم شي البدايه دي.. كانت جاده كدا والله العظيم و الله على ما اقول شهيد بعد عشمت اختي فيك...عرفت كيف لازم تقول الجمله كامله...
محمود وهو بضحك: الواحد زاتو ما عرفها بتهدد ولا جايه تشهد في محكمه... كان ناقص بس تقول والله العظيم والله على ما اقول شهيد أَن اقول الحق ولا شي غير الحق... انا قعدت اضحكككك لمن دموعي جرت وحكيت ليهم قصه التسجيل السمعتو وبي سببو رسلت الرسايل... محمود قال لي منير ما قلت ليك بتكون قرت ليها قصه ولا حضرت مسلسل اهااااكلامي مشا و جااا طلعت سمعت ليها تسجيل ...ضحكت وقلت ليهم الليله مزاجي رااايق ما حأتناقر معاكم بالزات انت يا محمود...
قالو لي واضح شكلك اشتغلتي كويس في الامتحان... قلت ليهم تصدقو ما عارفه اشتغلت كيف...منير قال لي في زول ما بعرف نفسو اشتغل كيف
قاطعتنا ريل: يا حالتوووو أَلح سُلعه (يا خالتو ارح سرعه )ياخ الزمن...قلت ليها ارح طيب و دخلت البيت وانا بقول ليها سرعه ياخ الزمن!! دي سمعتيها وين كمان يا لفحووو... قالت لي بابا بِدول تِدا (بقول كدا) قلت ليها و انتي بتلفحي ساي مش قلنا ما صح اي كلام يقولوهو الكبار نقولو... قالت لي اسفه... ضحكت و اديتها الحلاوه قلت ليها دي عشان بتسمعي الكلام.. شالتها وهي بتضحك و جرت لي ابوها في الشارع.. وانا سلمت على ناس امي وريل و نوسه الكان في توتر ظاهر في وشهم... سألوني اشتغلتي كيف قلت ليهم تمام اتغديتو بي شنو؟ و مالكم متمحنين كدا؟... امي قالت لي محمد جا الليله ... قلت ليها ببساطه و نبره رايقه حمد الله على السلامتو والله خالتو نسيبه حتكون فرحانه بي جيتو ...
كلهم عاينو لي بعض و عاينو لي مستغربين!!! في الروقان الانا فيهو دا... حرفيا انا كنت حاسه انو الدنيا تمام وماف ايّي مشاكل و اعصابي كلها مرخيه .. بس حاسه بجوووووع شديد و شهيتي مفتوحه رغم اني اكلت تلاته سندوتشات في الجامعه وكنت حأطلب الرابع لو ما لؤي قال لي نضبح ليك ليلي بعد دا عشان تشبعي رايك شنو...وليلي قالت لي بشك في تصرفاتي الماطبيعيه براءه انتي كويسه؟...
دخلت المطبخ ختيت كميه من الرز في الصحن... اسيل قالت لي قولي بسم الله يا بت حتاكلي دا كلو!!... قلت ليها انا جعانه والله و ختيت صحن خدره و عيش في صينيه وشلت الصينيه طلعت بيها برا عشان اكل ...
نوسه : نحن كلنا اتغدينا ماف زول حياكل معاك! ... قلت ليها عارفه.. قالت لي مستغربه ومالك رادمه الاكل قدر دا ؟!..
انا : يخوانا جعانه في شنو... وقعدت اكل
نوسه مشت لي اسيل في المطبخ و قالت ليها اختك دي مالا! اسيل قالت ليها بري.. كدي نشوف نهايتها... بعد اكلت امي قالت لي تعالي. اقعدي هنا دا...قعدت في السرير القصادها و نوسه و اسيل كانو واقفين في باب المطبخ...
امي: محمد قال جاي بكره يسلم علي... وفي امانات ابوك مرسلها معاهو حيجيبها يسلمني ليها ...
انا : مرحبتين يشرف... انا المطلوب مني شنو؟!
امي بقت تكورك كيف يعني المطلوب منك شنو!..
انا : كدا عديل في شنو يعني ما فاهمه... هو جاي يسلم عليك انتي و يسلمك انتي امانات... انا مالي!
امي : يا بت الناس الا اقول ليك قصه يسلم علي والامانات دي حجه بس عشان يشوفك... قلت ليها جاي يشوفني يعني؟ جداااااا...
امي قالت لي بدهشه انتي جاده ولا دي شنو الحركات البتعملي فيها دي!! قلت ليها انتو ماف شي عاجببكم؟! سكتت وبقت متنحه فيني
اسيل قالت لي نوسه لالالا اختك جنت صدقيني البت دي يا ما طبيعيه بالجد.. يا بتستهبل علينا وقاصده توترنا...
منير دق الباب و جا داخل شايل ريل نايمه وقال لي اسيل اطلعي نمشي بعد دا..جا داخل وراهو محمود عاين لينا كدا ورفع حاجبو لي نوسه بي استفهام نظام في شنو مالو الجو متوتر كدا...
اسيل ساقت منير بالجنبه وقالت ليهو تعال يا منير دايراك... و طلعو الحوش... بعد شويه جو داخلين..ومنير قال لي محمود ارح و سلمو علينا و طلعووو..
نوسه : اسيل بايتين؟...
اسيل بهمس: انتي ما شايفه اختك بتعمل في شنو دايراني امشي كيف...خليتهم بتوسوسو و مشيت لانو تلفوني ضرب...عاينت لقيتها رحيق..لمن رديت سلمت علي و قال لي كيف بقيتي من الصداع... قلت ليها يا بت المسكن مفعولو لحدي اسي... انا اول مره يفارقني الصداع واستكين للدرجه دي...
رحيق : الحمد لله طيب اها كلمتي ناس البيت عشان صلاح اسي اتصل عشان يعرفني جايه ولا ما جايه...
ضربت راسي بي يدي اخخخخخخ نسيييت اقسم بالله هسي بكلمها و بديك تلفون... قالت لي انا قلت ليهو انك بتعملي كبابي مك حلوه شديد... ولو ما عندو مشكله تختي زي كبايتين عندو كعينه عشان لو في زول شافها و عجبتو يطلب منك وقال ما عندو مشكله... قلت ليها بفررررررح واااي ما قصرتي اقسم بالله يا رحيق ان شاء الله بس امي توافق... خلاص اقفلي بكلمها و برجع ليك قالت لي تمام و قفلت...
مشيت لي امي قعدت جنبها و كلمتها براحه... طوالي جاطط و قامت و قعدت و قالت لي انتي دايره ابوك يطلقني... قلت ليها كلها كم يوم يا امي و الصيديله قريبه من البيت و قبل العِشاء بكون هنا ما بتأخر...لو انا الكنت محتاجه ليها ما كان قصرت معاي يا امي م تكسري عيني مع البت عليك الله...
نوسه : انا ما شايفه فيها حاجه.. يا امي خليها تمشي البت يحليلها واضح من كلام برو انها محتاجه القروش شديد..
امي : انا ما مرتاحه للموضوع دا..وحاسه في حاجه.. و اصلا لي كم يوم قلبي مقبوض
اسيل بضحك : بسم الله يا امي دي شنو حركات نوسه دي خلاص خليها تسوق معاها ريل انا اصلا بايته كم يوم...وانت عارفه ريل كان في زول تفهه بتجي تحكي لينا... واكيد لو في حاجه حتجي تكلمك... براءه قالت البت امها و ابوها متوفين و هي ماسكه حبوبتها عندها سكري و شغاله و متكفله بيها وبتقرا في نفس الوقت... دا اجررر يا امي.
امي سكتتت مسافه...بعدين قالت لي خلاص امشي بس لو حصلت اي حاجه المسؤلين انتي واخواتك... وسوقي معاك ريل... و بكره تعالي بدري عشان محمد جاي بعد المغرب طوالي ولو عملتي حركات واتأخرتي قاصده عشان ما تلاقيهو ما تقولي لي تاني ماشه وريتك... قلت ليها حااااضر.. و جريت شلت التلفون ضربت لي رحيق كلمتها...
____________
تاني يوم صحيت بي نفس النشااااط وراحه البال... والاحساس بالجوع والشراهه للاكل... بس الاهم من دا كلو اني صحيت من غير صداع... ولسه مفعول الحبه ما راح لحدي ما سوقت ريل و ركبنا واتحركنا على الصيدليه انا حاسه انو الدنيا حلوه واني اسعد انسانه في الكون... وعندي طاقه تخليني اشتغل من غير ما ارتاح ولا ثانيه... لدرجه اني قلت يا ربي رحيق دي ادتني مسكن ولا منشط..
وصلنا الصيدليه لقيت صلاح واقف لينا جنب الباب... و اول ما شافني ضحك برضا كدااا و قال لي نورتينا رغم انو اليافطه ياها اليافطه لكن عرفتي المكان طوالي شفتي روحه المره الفاتت كان بي فايده ...ابتسمت ليهو بعدم نفس لاني شاماهوووو بسبب حركتو العملها مع رحيق و قلت ليهو بنورك... مد يدو سلم علي و شال ريل ادّاها حلاوه و قعدها في الكرسي و بقا يشاغل فيها شويه و يشرح لي انا حأعمل شنو شويه..و دا كلو وهو بعاين لي بطريقه غريبه... قال لي وين الكبابي؟ رحيق حكت لي عنهم و الصراحه اتشوقت اشوفهم..
فتحت الكيس ووريتهم ليهووو قال لي يعني معقوووله حلاوه و خفه دم و فن كدا ما كتير علي !!
قلت ليهو نعممممم؟؟ سكت ما رد علي و اكتفى بي انو يرص الكبابي في القزاز الفي الواجهه طوالي بحيث انو اي زول يخش الصيدليه يشوفو ...
ما عاوفه الخلاني اسألو من دون اي مقدمات و اقول ليهو الحبوب المسكنه البتستوردها من برا اسمها شنو؟! سؤالي فاجئو لدرجه انو فك الكبايه من يدووو...وكان حتنكسر لو ما مسكها في اخر لحظه وقال لي تقريبا كل الادويه الفي الصيدليه دي من برااا... وسألني وهو مركز معاي بكل حواسووو انتي قصدك اي مسكن بالضبط؟...قلت ليهو كنت مصدعه شديد و رحيق ادتني مسكن قوي كدا... رَوّح لي الصداع في ثواني... ولي اول مره صداعي يروح بي مسكن...وطلعت تلفوني قلت ليهو دقيقه اسألها لاني عايزه لي شريط وما عارفه اسمو... قام قال لي خليها انا بسألها وطلع لي كرتونه بتاعت بيبي اويل قال لي هاك انتي رصي ديل هناك وشال تلفونو و طلع...
وهو طالع مفتاحو وقع وريل انتبهت للمفتاح... نزلت شالت المفتاح وطلعت وراهو من غير ما انا اشوفها لاني كنت برص وما منتبهه معاها.. بس في حاجه كدا قالت لي اتلفتي شوفي ريل دي صانه كدا مالها... اتلفتت لقيتها ماف... بقيت اكورك ليها رييييل... يا رييلللل...فتحت باب الصيدليه شفتها ليك ماشه على الظلت... جسمي دا كلو برد و مشا مويه... ما عارفه زاتو اتحركت كيف وبقيت ماشه يالله و بكورك ليهااااااا يااااااااااا رييييييل الظلت ياااااااااريل اقيفي حتضربببك عربيه..
وبس قولت حتضربك عربيه دي من هناك شفت لي عربيه ماشه برااااا الظلت بسررررررررعه و جايه عليها وهي اتخلعت لمن شافتها ووقفت وبقت تبكي و انا اتخيلتها بسسسسس ضربتهاااا... قعدت في الارض في نص الشارع و بقيت بكوووووورك ...لحدي ما في اخر لحظه بتاع العربيه داس فرامل ونزل جرااااا على ريل شالها وبقا يحاول يهدي فيهاااا لانها كانت مخلوعه شديد... وهي بالخلعه لمن شالها بقت تصرخخخ وتبكييي وتلاوي فيهو وتحاول تتفكا منو عشان تنزل و تجيني... شافني قاعده في الارض وحالتي بالبلاء عرفها تبعي... جابها لي وهو بقووول لي البت مخلوعه شدددديددد ضُميهااااا علييييك عشان تطمن شويه... ونزلها اداني ليها وانا حالتي كان اسوأ منها لاني حرفيا اتخيلت مشهد ريل لو العربيه كان ضربتها وبقت الصوره قدام عيوني زي الحقيقيه.... ضَميتها علي شديد وانا لسه قاعده في الارض و بقيتتت ابكييييييييي... وهي بي بكاي زادت زياده...
الراجل مشا عربيتو و جاب قزازه مويه صحه مداها لي وقال لي ما حصل حاجه الحمد لله جات سليمه وربنا ستر اهدي كدا وروقي وطمنيها بدل تبكي لانو قلبها مقطوع... وانتي لمن تبكي حتخوفيها زياده...
قمت من الارض اتنفضت و شلتها حضنتها و هي لفت يدينها حولين رقبتي شديد... بقيت بهدي فيها و اقول ليها انتي كويسه يا ريل شوفي ما حصل شي الحمد لله... واشرت عليهو وقلت ليها شوفي عمو دا وقف العربيه و شالك جابك لي... و كمان شوفي جاب ليك مويه في باغه.. مش بتقولي عايزه المويه في الباغه ... اتلفتت عاينت ليهو و سكتت و هي بتتنهد... ضحك و قال ليها دقيقه طيب و مشا العربيه تاني جاب ليهو كيس فيهو كرواسون و بارد.. وتقريبا كان جايبهم لي نفسو كوجبه غدا...مدّا البارد لي ريل و قال ليها وهو بضحك ودا عصيررر في باغه برضو ينفع!؟ .. ريل عاينت لي و قالت ليهو وهي بتتنهد و بتقطع في الكلام حالتو... دالت (قالت).. عييييب.. نسيل(نشيل)...حاده(حاجه)... من زووول..
قعد يضحك و قال ليها حالتو حتخليك بس المره دي وحتكون اخر مره وتاني ما تشيلي اي حاجه من اي زول .. و اتلفت علي قال لي تمام يا حالتو... ابتسمت على لطافتو وما حبيت احرجو قلت ليها بس المره دي اتفقنا يا ريل ضحكت و شالت المويه شربتها و عاينت لي بشك قبل تشيل الكيس..ضحك و خته ليها الكيس في يدها وقال ليها قلنا اخر مره ما تخافي ما حتشاكلك.... قلت ليها قولي لي عمو شكرا... قالت ليهو يا عمو انت اسمت(اسمك) منووو ..
ضحك و قال ليها : اسمي عمو زياد
ريل : سُكْلاً(شكراً) يا عمو زياد..مسكها من انفها بلطف و قال ليهاااا عفوا يا ريييل بس عشان تبقي بت شاطره ما تمشي على الظلط تاني براك تمام.. قالت ليهو حاضر...وانا شكرتو و قلت ليهو قدر ما اقول ليك ما حأعرف اشكرك كيف لو ما انت البت كان حتروح فيها... قال لي الموضوع بسيط بس اعملي حسابك المره الجايه وحك حاجبو زي الرايحه ليهو حاجه وسألني قال لي في صيدليه قريبه من هنا اسمها صلاح عدنان؟... اتلفتت و اشرت ليهو عليها قلت ليهوووو هديييييك ليها..
__________
صلاح اتصل علي رحيق كم مكالمه ما ردت... و فضل يتصل لحدييي ما ردت ليهو بعد قريب عشره مكالمات...
رحيق بكواريك : في شنو يا صلاح الدنيا اتقلبت ضارب لي ميه مكالمه...
صلاح بنفس نبره الكواريك :ايييي يا رحيق الدنيا اتقلبتتتت...اديتي البتتتتتت شنوووو بلعتوووو انطقي
