اخر حاجه شفتها قبل يغمى علي زيااااااد و معاهووو كم نفر ماسكين سلاح وبكوركووو ثاااابت اي زول يقيف مكانو ما عايزين اي حركه او صوووووت..وتاني ما وعيت الا بكفوف في وشي وصوت مرأه بتقول لي انتي يا بت فتحي عيونك دي بالحسنه احسن ليك...فتحت عيوني بتعب لقيت نفسي قاعده في نفس مكاني وحالتي بالبلاء و طرحتي واقعه و جنبي شرطيتين كل وحده ماسكاني من يد... وحده بتقول لي اتحركي قدامي والتانيه بتقول لي قومي يا بت و بتلز فيني ويديني الاتنين مكلبشات... ومن بعيد شايفه رحيق والبنات المعاها و كميه من البنات والاولاد بضربو فيهم بالعصايات و بطلعو فيهم برا و صوت عربات الشرطه مالي المكان...للحظه حسيت نفسي بحلم غمضت عيوني على امل لمن افتح القا نفسي في بيتنااااا وتحديدا في سريري و يطلع دا كلو حلم... وبي مجرد ما غمضت حسيييييت بي كفففف في وشي والشرطيه بقت تجررر فيني وهي بتقول لي قوووووومي وقبلت على الشرطيه التانيه قالت ليها البت دي شكلها حتتعبنا معااااهااا....هنا اتأكد اني ما بحلم و بقيت اكوووورك بهستريا فكووووني انا ما عملت شي فكوووووني وبلاوي فيهااااااا وبزحف لي ورا وهي بتجرني من يديني وانا بجر يدي منهاااااا و بقول ليها فكييييينييييي انا ما عملت شي.... فكييييني الولد كان عايز يتعدا علي عشان كدا ضربتو .. واصررررخ بي اعلى صوووت و اكورك... في النهايه كل وحده مسكتني من يد و بقو يحاولو يجروني جرررر...وانا بحاول اتفكا منهم.. جروني لحدي الباب شفت زياد بركب في صلاح و معاهو راجلين في البوكس ورا... حسيت بالامان للحظه لمن شفت زياد وبقيت بكورك ليهوووو زيااااد يا زيااااااد علي اساس حيساعدني زي المره الفاتت كنت بكورك ليهو لمن حسيت حسي انقرش و بقول ليهو انا ما مافهمه شي يا زياد قول ليهم يفكوني انا جيت هنا مع صحبتي و الاتنين واالله ما عندنا علاقه بالحاصل دا .. اتفاجئت لمن جدع ليهم العصايه وهم وقعو فيني ضرب لمن اغمى علي تاني...
___________
يا نوسه اختك دي اتأخرت نسيبه ضربت لي قالت محمد حيجي يسوقها عشان يختارو الدِبل..
نوسه: يادوب المغرب اذن يا امي وهي بتجي بعد المغرب
امي : اضربي ليها انا قلبي ماكلني..وتاني ما تجيبو لي سيره صيدليه ولا سجم ... بعد دا خلاص اسبوع هي بتمشي و تجي اصلوو شنو حبوبه صحبتها دي ما بقت كويسه.. ابوها لو عرفها بكسر رقبتها..
نوسه: دقيقه طيب اضرب ليها.. و فعلا ضربت لي اكتر من تلاته مكالمات و ماكان في رد.. نوسه قالت لي امي بتكون جايه في الشارع و التلفون في الشنطه ما سامعاهووو...امي قالت ليها خلاص اضربي للكوفير اكدي الحجز لي بكره..
_________
يحي : يا زياد هسي رافع الناس دي كلها مالك... اغلب القاعدين جوا ديل ما عارفين انو الكافي دا فوق وكر وجاين على اساس انو كافي عادي...اذا كان انتو اتفاجئتو... قاطعهم مروان الجا داخل المكتب و قال ليهم ما لقووو اي شي مع العدناني.. كل الشنط فاااضيه و ماف اثر لي اي مخدرات...
زياد قلب الكرسي بيدو و قال ليهو كيف الكلام دا؟!... يعني تعبنا كلو راح في الفاضي؟!..
مروان زفر و قعد في الكرسي بتعب:والله يا زياد انا زاتي بقيت ما فاهم حاجه...
يحي : ماهو واحد من اتنين يااتلعب علينا والحركه مقصوده... يا عرفو انو نحن خاتين مشاكل وسطهم و غيرو مواعيد التسليم...
مروان : انا غايتو حأخد اجازه مرتي في شهورها الاخيره وما فاضي ليكم ...وانت وزياد شوفو نفسكم حتعملو شنو...اما بالنسبه لي كوم الناس البرا ديل اي زول ما اتقبض عليهو بمنظر مخل وخليع طلعوهو بكفاله.... زياد قال ليهو ما عدا رحيق ..
يحي بي استغراب : رحيق بتاعت الصيدليه! معاهم!! ... زياد قال ليهو انا زاتي اتفاجئت لمن شفتها هناك المهم حينطبق عليها نفس الحينطبق على العدناني وولدو..
مروان :كدي لمن تقدر تثبت عليهم حاجه قول حينطبق عليهم... زياد الناس ديل يدهم واصله ونحن اصلا ما لقينا معاهم حاجه تدينهم حجيبو ليهم محامي و بكره بالكتير بكونو طلعو.. ومروان بتكلم كدا سمعو صوتي وانا بصرخخ و بقول ليهمممم انتووووو ما بتفهمووووو قلت ليكم طلعوني من هنااااااا انا ماعملت شي..جو طالعين التلاته براااا وانا لسه بصرخخخ بأعلى حس وببكي وبضرب في الارض بيديني زي المجانيني الا يحي قال لي احسسسن تسكتي و تحترمي نفسك عشان تساعدي روحك لانو طول ما انتي بتكوركي كدا ما حتطلعي من هنا...بقيت خاته يديني الاتنين في خشمي و بحاول اكتم في صوت شهقاتي عشان ما تتسمع وبعاين لي زياد بترجييي.. و هووو عاين لي بكل احتقار ومشا وهو بقول لي واحد كدا يا يحي العدناني انا بشيل اقوالو و انت اتصرف مع ديل ...
قبلت على رحيق والبنات المعاي لقيتهم كل وحده حالتها اسوء من التانيه..قلت لي رحيق وانا بشهق بخوف.. ناس.. بيتنا.. كان.. عرفو...حيقتلوني يا رحيق...وحده من البنات المعانا قالت ليها انا اخوي حيدفني حيه لو عرف اني اتقبضت في مكان زي دا... والتانيه قالت ليها كونو انا دخلت قسم دي في حد زاتا حتخلي اهلي يتبرو مني...
رحيق قالت لينا انتو دخلتو هنا بسببي.. انا حتصرف و اطلعكم من غير ما اهلكم يعرفووو... كلنا انتبهنا معاها و شويه حسينا كدا بأمل و قلنا ليها بصوت واحد كيف...
رحيق :حينادوكم وحده وحده يشيلو اقوالكم... فلازم كلكم تقولو انكم جيتو الكافي لي عيد ميلاد صحبتكم الاسمها ناديه دي و اشرت على وحده من البنات السبعه الكانو واقفين في التربيزه لمن انا دخلت معاها الكافي قبيل... قلنا ليها تمام واصلت و قالت لينا بعداك حيقولو ليكم اتصلو بأهلكم عشان تطلعو بضمانه في اللحظه دي الخوف اتملكنا و رجعنا نبكي تاني.. الا قالت لينا اسكتو واسمعوني للنهايه لانو ما عندنا زمن انا حأدي كل وحده فيكم رقم تحفظو و تتصل عليهو على اساس هو زول من اهلها وهو حيجي يستلمها... و بكدا حتطلعو من غير ما اهلكم يعرفوووو... فاهمين وحاولو خليكم عادين وانتو بتتكلمو و ما تحسسوهم انو في اي غلط...والا حتقعدو هنا ويا عَالِم تطلعو متين ... كانت بتتكلم و بتعاين لي انا و معاي اربعه بنات بتركيز شديد وما مهتمه كتير بالباقين... وما كان واضح عليها اي توتر لا هي لا البنت الاسمها ناديه و البتين المعاهم كانو عادين خالص بعكسنا نحن الخمسه...
الاحساس بالخوف من ابوي وناس بيتنا كان متملكني لدرجه اني ما فكرت في انو الحيجي يستلمني دا منو؟ ورحيق بتعرفهم من وين وبقربو ليها شنو؟ ... كل الكان الهاميني كيف اطلع من هنا...
___________
صدام :عملت شنو في الاوراق يا مشاكل... مشاكل قال ليهو كلمت واحد يزور لي ارقام وطنيه بي اسامي البنات..وبمجرد ما يتصلو لينا الشباب جاهزين حيشيلو الورق ويدفعو الضمانه على اساس انهم اهلهم ويستلمو البنات يجيبوهم هنااااا... صدام قال ليهوووو اعمل حسابك ما عايز ولا غلطه... وحزر الشباب اقل غلطه من اي زول حنروح كلنا في ستين داهيه سامع ولالا...
_________
ونحن قاعدين ورحيق بتهدي وتطمن فينا... الضابط فتح بوابه السجن و قال لينا اطلعو وحده وحده ما عدا رحيق ازهري انتي حتقعدي معانا شويه..اتلفت على رحيق بخوف قالت لي ما تخافي علي و امشي... فعلا طلعنا وعملنا زي ما قالت لينا رحيق... وبعد عشره دقايق جو راجل وولد على اساس انهم ابوي و اخوي عملو كم اجراء كدا و ساقوني و طلعنا...
اتخلعت لمن لقيت الدنيا ليلت و انا ما عارفه الساعه كم... وناس بيتنا ما عارفين انا وين..بقيت واقفه متصمغه جنب بوابه القسم الا جاني صوت واحد من الراجلين وهو بقول لي العربيه هناك تعالي اركبي... قلت ليهو ما بحتاج انا بمشي براي لحدي هنا ما قصرتو و شكرا..قرب مني لمن خفت وهمس لي وطي صوتك نحن لسه جنب القسم لو ما ركبتي حيعرفو انو في حاجه.. عشان كدا اركبي و بننزلك قدام شويه بعداك واصلي طريقك براك ... اقتنعت بكلامهم وركبت وبمجرد مامشينا قدام شويه من القسم... وقفو العربيه دايره انزل كدا الابواب اتأمنت والكان راكل قدام جنب السواق رجع ورا بحركه سريعه وخت لي المنديل في نخرتي وتاني ما وعييت بي حاجه...
__________
زياد جا داخل المكتب و هو بكورك : يحي انا مشششش قلت ليك رحيق ولازفت دي ما تطلععععع من هنااا ...يحي قال ليهو ومنو القال ليك طلعت... زياد قال ليهوووو ماف يا يحي ماف مشيت عشان اخد اقوالها لقيتها مااااف..
يحي قال ليهو زياد انت ما بتعرف تتكلم براحه... و كورك لي الضابط عادل : يا عادل عليك الله دخل رحيق ازهري لي جنابو زياد..بعد دقيقتين جات داخله رحيق والكلبشات في يدينها... زياد عاين ليها مخلوع و قال ليها انتي رحيق ازهري؟! رحيق اشرت ليهو براسها بخوف...
زياد قام على حيلو وقال ليها م تأشري لي انطقي افتحي خشمك دا انتي رحيق ازهري الطيب سليمان؟!...
رحيق بتوتر و هي بتقطع في الكلام: ايواا... ااا. ااا.. انا.. رحيق.. ازهري..
زياد قبل على يحي وهو مخلوع وقال ليهو طيب و دييييك كانت منووووو؟!!
___________
