ختيت الفنجان و اعتذرت منهم و طلعت...لقيت عدة القهوه المفترض شالتها حسناء عشان توديها المطبخ قااااعده في تربيزه برنده انفال البرا... وهي واقفه قدام زياد و ماخده وضعيه الخجلانه و بتطقطق في اصابعها و تتبسم وراسها في الارض...وواضح انها وقفتو في اخر لحظه قبل يخش البيت.. لانهم كانو واقفين في نهايه الحوش قدام بابنا بتاع النص طوالي..مشيت على اتجاههم وانا خلاص واصله اخري منها..وهي اول ما شافتني اتعمدت تتخجل زياده وتقول ليهو والله يا زياد خجلانه منك معليش حأعزبك معاي...زياد قال ليها العفو ياخ اتفضلي ...وبي مجرد ما فتحت خشمها عشان ترد عليهو انا طوالي من دون اي مقدمات مسكتو من معصم يدو ودخلتو معاي بيتنا ورزعت باب النص في وشهاااا...
زياد بخلعه : في شنو يا براءه؟.. قلت ليهو في شنو!! انت ما شفتها واقفه كيف؟ والله البشوفكم من بعيد وهي بتتخجل وتتفصل كدا بقول هي مرتك.. وانا اللصقه المنكده عليكم عيشتكم... رد لي وهو بكورك : يا بت الناس البت وقفتني وقالت لي مدام ماشي الخرطوم عندي شويه حاجات ممكن تجيبهم لي معاك.. وشكلها خجلانه تطلب مني لكن مضطره..وواصل كلامو وقال لي براءه انا ما شافع عشان تجريني بالطريقه دي الحركه دي تاني ما تتكررر سامعه ولا ما سامعه ..وفتح الباب داير يطلع كدا قلت ليهو و العبره خانقاني : ماشي وين... قال لي ماشي اعتزر للبت الصغرتيني قدامها دي و خلاني واقفه..وطلع زعلان
بعد مسافه جا لقاني قاعده في كراسي البرنده برا... ما اشتغل بي و دخل الصالون طوالي...دخلت وراهوو قلت ليهو وانا بكورك على فكره لو هي كان خجلانه تطلب منك و مضطره بالجد كان كلمت انفال جابت ليها حاحاتها دي معاها الليله... دا لو هي عندها حاجات اصلا ودي ما مجرد حجه منها ما اكتر!...انت مش مفترض ضابط مباحث!حاجه زي دي ما مفروض اصلا تمشي عليك!! ..لكن شكلو انت مستحلي الموضوع و عامل رايح..انا بقيت ما فاهماك يا زياد...
زياد : مستحلي الموضوع!!..انا شايف انو نقفل السيره دي لحدي هنا بكون احسن.. دايره اتكلم كدا قال لي بحده وتحزير: براءه.. سكتت وتاني ما تكلمت معاهو ولا هو اتكلم معاي..وكل واحد بقا عامل فيها زعلان من التاني..
بعد شويه جاني مد لي التلفون الكان جابوهو لي مع الشيله قال لي ما عارفك ما عايزه تشغيليهو لي.. المهم انا هسي شحنتو ودخلت ليك فيهو شريحتي السوداني ..عشان اقدر اتواصل معاك ..خلي جنبك طوالي .. ما رديت عليهو.. قال لي انا بتكلم معاك لمن اضرب ليك تردي يا براءه سامعاني صح.. اكتفيت بي اني اهز ليهو براسي...وهو دخل جهز ليهو شنطه صغيره كدا و جو داخلين ناس امو وانفال و اساور و حسناء وامها..عشان يسلمو عليهو...وامو قالت ليهو انت ما تكمل معانا باقي يوم الليله دا و تمشي بكره يا ولدي..زياد قال ليها لازم امشي الليله وبعدين البشوفكم عاملين كدا ما بقول انا جاي بكره.. في شنو يخوانا قولو بسم الله...و شال شنطتو دخلها العربيه.. ورجع سلم علي انفال و ام حسناء و حسناء..بعداك جاني باسني في جبيني مسافه و ضماني عليهو من سكات..وسلم على امو بنفس الطريقه ومشى لي اساور سلم عليها و همس ليها في اضانها ما اوصيك عليها.. وركب العربيه ودورها و مشا.. وانا ماسكه دموعي بالعافيه عشان ما بكي قدامهم.. ومقهوره انو سافر ونحن زعلانين من بعض..
_______________
زياد اتفق مع يحي ومروان و عادل على انهم يتلاقو في بيت يحي... عشان كدا اتوجه علي هناك طوالي.. لمن دق الباب فتح ليهو يحي وسلم عليهوووو بترحيب وهو بضحك و بقول ليهو اوووووو زياد والله لحدي اسي ما مصدق انو انت عريس ...زياد ضحك وقال ليهو انا خليني انت ناوي تتلما متين وتمسك ليك بيت ... يحي قال ليهو بضحك انا اتلميت والله بدون عرس كدي خش الجماعه ديل جوه ...
دخل سلم على مروان وعادل و سألهم من باقي زملائهم.. و بمجرد ما قعد فتح تلفونو عشان يرسل لي انو وصل...لقاني مرسله ليهو " لمن تصل كلمني" ..ابتسم غصب عنو لمن قرا رسالتي ورسل لي "انا وصلت الحمد لله ابقي عشره على نفسك لحدي ما اجي"...
عادل بضحك:شنو يا سعادتك بتتبسم كدا من قبيل.. ما تعمل حساب لي العزابه الفاقدين حنان المعاك ديل.. ولا شنو يا يحي
زياد قعد يضحك وقال ليهو عزابي انت بس يحي دا ماشاء الله شبعان حنان..عندو وحده زي المضاد الحيوي بتقول ليهو يحيويتي كل ست ساعات ...كان اسمها منو يا يحي؟؟ عادل و مروان قعدوووو يضحكووو
يحي بضحك : عيب عليك يا زياد ما تنبش الماضي... انا اتغيرت يا زول تاني لاحنان لا مزن لا ست النفر.. شريحتي زاتها غيرتها ...
عادل و زياد الاتنين قالو ليهو في نفس الزمن وهم بضحكو: انتتتتت!!
مروان قال ليهم والله انا زاتي ما كنت مصدق لكن بات ليهو معاي كم يوم... ما سمعت ليهو بليل اي وسوسه و كلام صغار صغار..يحي قال ليهم وسوسه شنو انا بليل بقيت بستغفر بس..
مروان : يا زول من يوم عرسك... شكلو الزول دا الله هداهو
زياد بضحك :والله لو عارفك كان عرست من بدري ياخ... يحي ضحك و قال ليهو ياريت والله..بعد داك زياد استعدل في قعدتو و قال ليهم الونسه حلوه يا جماعه..لكن خلونا نخش في الموضوع عشان الزمن... واتلفت على عادل قال ليهو اتأكدت لي بكون قاعد في بيتو من الساعه كم لي الساعه كم؟
عادل : من بعد العشاء يا سعادتك نادر ما يطلع من البيت..زياد قال ليهو جميل جدا.. انا العشاء بسجل ليهو زياره وانتو حاصرو المكان من كل الاتجاهات.. دوريتين بس بكفوكم ما تكترو العربات عشان م تلفتو الانتباه... و اعملو حساب انو نحن حاليا شغالين من غير اذن الدوله...يعني لازم نطلع من هناك وفي يدنا حاجه بتدينو.. عشان ما تنقلب الطاوله علينا و نتحاكم نحن...
مروان : وطيب يا زياد نحن نعرف كيف الزمن المفترض نداهم فيهو ؟
يحي : مروان كلامو صح ممكن نداهم المكان وانت تكون لسه ما سجلت حاجه يا زياد دي. مجازفه.. زياد قال ليهم انتو حتداهمو المكان بمجرد ما تسمعو صوت ضرب نار...
_____________
حسناء طبعا بمجرد ما زياد مشى اختفت خالص.. و بقينا قاعدين انا و خالتو امال و اساور و انفال بس... كنت قاعده وسطهم وهم بتونسو وبضحكو وانا حاسه اني غربيه بيناتهم...وفاقده زياد شديد زي الكأنو ما مشى ليهو تلاته ساعات..وماسكه التلفون في يدي و منتظره رسالتو بفارغ الصبر عشان اطمن انو وصل كويس..وبمجرد ما سمعت صوت استلام رساله عرفتو دا حيكون هو... فتحتها بلهفه و ابتسمت وانا بقرا فيها..وقلت ليهم بتلقائيه زياد وصل الحمد لله...
امو قالت لي بفرحه ومن غير ما تشعر الحمد لله الله يطمنك يا بتي... فرحت شديد لمن قالت لي كدا بس قبل فرحتي تتم و ارد عليها..استرجعت ملامح الجمود الفي وشها و قال لي انفال سوقيها وامشو الحنانه...
اساور وهي بتحاول تلطف الجو : اي يا انفال انتي اصلا عايزه تتحنني عشان عبدالله جاي بكره.. سوقي معاك برو تعمل ليها شكل ظريف كدا تستقبل بيهو زياد لم يجي...وانا زاتي بمشي معاكم ارسم يدي..
انفال بضحك : نحن رجالنا جاين انتي مالك..اساور قعدت تضحك وقال ليها يا زوله مالك احتمال تبقى فاتحه خير علي و يجي راجل في باقي الليل دا يتقدم لي قبل رجالكم يجو...
خالتو امال بضحك : الليل ياتو الفضل ليهو تلاته ساعات دا ولا واحد تاني... قومو قومي سرعه امشو وتعالو...
قلت ليهم انا حأمشي البيت بهناك البس لي عبايه و اجي.. قالو لي دقيقه نلبس عبايتنا و نمشي معاك تلبسي عبايتك.. و نطلع كلنا بالباب البهناك... قلت ليهم تمام و فعلا لبسو عبايتهم و مشو معاي..وانا بطلع في العبايه من الدولاب فاجئتني اساور بي سؤالها وقالت لي انتي وزياد مالكم؟؟ كنتو كويسين لمن جينا حصل شنو فجأه لاحظت ليكم وانا بعرف زياد لمن يكون زعلان و حافظاهو؟؟ انفال قالت لي بتشجيع براءه اعتبرينا اخواتك... انا والله حبيتك و ارتحت ليك من اول يوم شفتك فيهو..وانا عشان اصلا كنت واقفه على الهبشه و لاني ما متعوده اكتم جواي انفعت ليهم بالبكا لمن استغربو..طبطبو علي و خلوني هديت شويه و حكيت ليهم بحركات حسناء من اول يوم جينا فيهو...وقلت ليهم اخوكم ما داير يقتنع بعد الحركات دي كلها...ياخ في اكتر من انها قدرت تخلينا نتشاكل و نزعل من بعض و نحن لسه عرسان؟! انفال و اساور عاينو لي بعض زي الكأنو في حاجه هم عارفنها وانا ما عارفاها....و قالو لي حسناء خليها علينا نحن..قلت ليهم زياد دايرني اسكت و انا ما بستحمل وما متعوده اسكت على حاجه انا شايفاها غلط..
انفال:ما تزعلي من زياد هو صح غلط.. لكن انتي برضو غلطانه.. زياد جنو وجن زول يصغروو قدام الناس.. انتي بكره اول ما يجي اتعاملي زي الكأنو ما حصل حاجه و هو براهو حيقعد و يتفاهم معاك براحه.. زياد قلبو لين ما تشوفيهو بكورك و يجوط كدا.. حافظي على بيتك يا براءه.. وما تخلي وحده زي دي تخش بيناتكم..
اساور : و بعدين زياد اصلا ما شايف غيرك يا برو... حتى وهو زعلان منك وصاني عليك قبل ما يمشي...وضحكت و قالت لي قومي يلا غسلك وشك دا ما تشتغلي لي بالفارغه. بلا حسناء بلا زفت...قعدت اضحك و قلت ليهم ما بتصدقو ارتحت كيف بعد كلامكم دا...ولبست عبايتي و طلعنا...
______________
زياد : انا ماشي و انتو بعد عشره دقايق كدا انتشرو حولين البيت... وزي ما اتفقنا بمجرد ما تسمعو صوت ضرب نار داهمو المكان طوالي...
مروان مسكو من كتفو و قال ليهوو زياددد اعمل حسابك.. زياد قال ليهو ما تشيل همي انا بعرف اتصرف... وركب عربيتو الموقفها في راس شارع البيت المفترض يداهموهووو....واتحرك بيها لحدي ما وصل قصاد باب الشارع الواقف قدامو تاتشر حراسه ... زياد سلم علي الحرس سلام معرفه.. وهم فتحو ليهو الباب.. و بمجرد ما دخل استقبلو اللواء يعقوب و قال ليهو اهلا اهلا نورت يا جنابو زياد ...وضحك ليهو بي استفزاز وقال ليهو كنت متوقع زيارتك بعد عرسك طوالي.. لاكن شكلو المدام اخدت زمن لحدي ما جمعت... زياد ضغط على اسنانو و قال ليهو احترم نفسك...
اللواء يعقوب : لي لي الزعل يا جنابو.. انت مفترض تشكرني لاني ما قتلتها و خليتها ليك تتسلى بيها... عشان عارف انو حتي لو عرفت توصلك لي يا زياد انا قادر اطلع منها...مدام انت برا الخدمه..كنت عارف انك حتفتش ورا الرشيد لحدي ما تصل لي..لكن انت عارف عقليتك دي حرام تشتغل مع الحكومه و تاخد ملاليم... اشتغل معاي يا زياد..وخلال شهر بس البهزك ما برميك..
زياد اتقدم خطوتين ناحيتو وقال ليهو اخر مره اقول ليك احترم نفسك .. وبعدين دايرني اشتغل معاك في ياتو وساخه بالضبط.. مخدرات ولا تجاره بنات..ولا دايرني اهرب معاك سلاح الدوله..انت عارف امثالك ديل هم المرجعين البلد لي ورا...لكن لو قايل منصبك حيحميك من انك تتحاكم صدقني انت فرحان...
اللواء يعقوب بقا يضحك ليهو بي استفزاز و قال ليهو فرحان انت والله يا زياد... و بقا يفلت في الكلام و يفضح في روحوووو...لحدي ما في النهايه رفع السلاح في وش زياد.. و زياد في نفس اللحظه رفع السلاح ووجهو عليهووو...
______________
مروان بكواريك... في صوت ضرب ناااااااار...يحي عادل...حووول
يحي بقا يكورك يلا سرعه مروان انتووو من هناااااك.... و انتا يا عادل والمعاك من ورااااااا...وانا حأخش من قدام ..وضربو نار في الجووو في لحظه وحده و داهمو البيت... لقو اللواء يعقوم مضروب رصاصه في رجلو وبكووورك... و زياد واقع في الارض سايح في دمووو و بقول ليهم بنفس متقطع جهاز.. التسجيل في.. جيبي..يا يحي.. مرواااان..
