من قمت انا زوله صريحه وتلقائيه شديد... والفي قلبي على لساني...وما بقدر اشوف الغلط و اسكت عليهو ويمكن دا سبب اغلب المشاكل في حياتي ...ابوي كان بعاملنا كصاحبنا اكتر من ابونا كان حنين علينا واقرب لينا من امي رغم انو بجينا السودان اجازات بس و بعيد مننا.. فجأة اتغير و اتقلب 360 درجه...في البدايه قلنا يمكن من ضغط الشغل ... لكن الموضوع استمر و بقا يتعامل معانا بي اسلوب انا اقول و انتو تنفذو بس بغض النظر عن الكلام البقولو دا صح او غلط... الموضوع اطور بقى ما بجينا اجازات و ما بسأل مننا خالص نحن مبسوطين زعلانين دايرين نموت ما بهمو كتيير كل البقولو لينا انا برسل ليكم قروش و ماكلين شاربين لابسين احسن لبس تاني دايرين مني شنو...وصل بيهو الحال لي انو اي زول بجي يتقدم لي وحده فينا بديهو طوالي زي الكأنو انقذو من حمل تقيل عليهو ...حاولنا نسألو كتير ونعرف مالو والحاصل عليهو و شنو و نعرف سبب تغيرو المفاجئ بس بدون فايده...وصلنا لي درجه بدينا نشك انو معرس او في مره في حياتو خلتو يتغير علينا بالطريقه دي و قلبت كل الحنيه الفي قلبو لي احساس بي إننا عبئ عليهو.. بس ما كان في حاجه زي دي خاااالص ولا بي اي شكل من الاشكال .... قلنا نصبر عليهووو صبرنا سنه.. سنتين.. ودي السنه الخامسه والوضع لسه مستمر...وشبه فقدنا فيهو الامل.. 💔
جيت من الجامعه لقيت امي واخواتي و ريل بت اختي الصغيره قاعدين في برنده المطبخ.. امي بتنضف في الخضار معاها اسيل ..و ريل فارشه لعباتها في الارض بتلعب.. وايناس بتاكل شكلها جات من الجامعه قبل ما انا اجي بشويه ... شربت لي مويه من الزير و قلت ليهم ما شفتو الليله الحصل لي شنو في الجامعه كنت واقفه في الكاشير اتخيلو بس بعد ما فاتحه نفسي و طلبت سته سندوتشات.. اتنين لي و اتنين لي رحيق و اتنين لي ليلي.. وشغاله اعزل عندكم دا و ما عندكم دا.. وبعد حرّقت روح الراجل والناس منتظره وخلاص اداني الماركات ومفترض احاسب .. فتشت شنطتي و قلبتها قلب و فضيتها كلها في الارض م لقيت جزلاني... راسي شطب كلو كلو.. اتحرجت ما عرفت اقول شنو لي بتاع الكاشير البعاين لي واصلا شاميني ... وفجأه الانظار كلها بقت علي..وبعد خلاص كنت حأبكي و اجعر ليهم في مكاني داك في واحد من الواقفين ضحك وقال لي زي البعرفني شفتي دا كلو عشان قلت ليك خليني اعزمك و ابيتي..حاسب الحساب وشال من يدي الماركات ومشا يجيب السندوتشات...وانا بس واقفه بعاين ليهو مخلوعه لحدي ما جابهم و مداهم لي... قعدت في اقرب كرسي و اعصابي بايظه قلت ليهو شكلي اتنشلت وجزلاني اتسرق.. ما عارفه اشكرك كيف بس والله ما بقدر اشيلهم منك...
سكت مساااااافه بفكر في شنو ما عارفه بعد شويه قعد يتبسم وهو بعاين لي يدي قال لي الإسوره والساعه الاّبساهم ديل! .. عاينت لي يدي و عاينت ليهو وقلت ليهو بي استفهام مالهم ما فهمت؟!
حك راسو و ضحك وقال لي عايز اجيب لي اختي هديه تخرجها لي فتره والله وماف حاجه عجبتني.. وصراحه لفتو نظري لو اديتيني ليهم تكوني شكرتيني و حليتي لي مشكله في نفس الوقت... قلت ليهو جداااً طلعتهم اديتهم ليهو..ان شاء الله شالهم وهو بقول لي انتي ما عارفه روحك اختصرتي علي مشوار و جرجره طويله قدر شنو ... المهم حتتجرجري انتي و تشتري لي روحك إسوره و ساعه جُداد على زوقك انتو البنات بتفهو في الحاجات دي وفي كسر من الثانيه طلع قروش من جيبو ختاها لي جنب السندوتشات وشال رجلينو و مشى بخطوات سريعه ما اداني فرصه زاتو اتكلم...
اسيل ضحكت و قالت لي دي اسمها خلي القروش دي معاك اتصرفي بيها بس بطريقه ظريفه عشان ما يحرجك...
نوسه :دا ياهو الغنّو فيهوو.. لوكييي القرضه و امسكي فيه راجل الستره ما تفكييييي
قعدت اضحك قلت ليها خلي محمود يسمعك عشان يفكك بي لَغَم لمن تفهمي حاجه ...
امي : ماشين كويس في قله الادب... اها والقروش وديتيها وين ريل طوالي لفحت الكلام قالت لي وهي زعلانه انتي دي.. انتييي مس(مش) دولتيييي(قلتيييي) ما تسيلوووو دلوش (ما تشيلوووو قروش) من زووووووول.. مسسس دولتييي (قلتيييي) عيييييييييب... دخلتني في ضفوري تقول ناقصه احراج اضطريت قلت ليها بالكضب انا رجعت ليهو القروش يا ريل..
امي خلت الخضار الفي يدها و بقت فيني انا قالت لي الشافعه توريك الصح من الغلط ... وانت زاتك شايله نص الكافتريا من غير ما تعرفي جزلانك في ولا مافي...شنطتك كنتي شايلاها كيف اصلو لمن نشلوك و انتي ما حاسه..
قلت ليها امييي! انتي وبت بتك محسسني شحدتو.. يخوانا انا حاولت الحقو عشان ارجع ليهو قروشو ماقدرته ... ريل بلعتني ماقدرته دي في حلقي وقالت لي ماااا دولتيييييي (قلتييييييي) رجعتيهااااااا هسييييي.. انتي يا حالتوووو مااااا دولتيييييي الكضب حلااااااام (حرام)...
قلت ليهم دي ورطه شنو دي ياخوانا انا تاني كان قلت حاجه لساني دا ينقطع والقصه زاتو خليتها ما عايزه احكي ليكم معقوله لاعارفه اكضب لا عارفه اقول الحقيقه ...نوسه قالت لي عشان تاني لمن تقولي كلام قدام ريل تبقي قدرو مالك ما عارفهاها لسانها متبري منها
____________
في نفس الزمن الكنت بحكي لي ناس امي فيهو اني اتنشلت و جزلاني اتسرق... عمو ناصر دخل المكتب سمع ابوي بسأل في التلفون عن زياد عبد الناصر واهلو هل هم ناس كويسين ولالا... استناهو لمن خلص المكالمه وعرف التفاصيل كلها..وجاهو بي فوق قال ليهو خطبت لي بناتك كلهم يا احمد.. البيناتنا عامره ماشاء الله صحبه وشغل و جيران قدام.. كان بودي والله يجمعنا نسب وبراءه تكون لي محمد ولدي
ابوي : والله يا ناصر انتو ماشاء الله عز النسب و محمد راااجل اتربى قدام عيني... لو عارفو داير وحده من بناتي م بتغلى عليهو والله...وهسي لسه ما ادينا الناس ديل كلمه صح حليمه قالت ليهم ما عندنا مشكله لكن الراي راي البت في النهايه ... لو براءه رفضت بفتح معاها موضوع محمد و ربنا يقدم الفيهو خير...
ناصر : انا والله عارفك بتعتبر محمد ولدك و عارفك م عندك مشكله... العرس دا قسمه و نصيب واهم شي عندي بتنا تكون مبسوطه لو مع محمد او مع غيرووو...
ابوي لانو عارف نسيبه مرت ناصر كويس وعارف انها بتحور الكلام قال ليهو نحن الرجال عارفين الحاصل... لكن انت عارف النسوان... كلم نسيبه عليك الله عشان ما تفهمني غلط ووضح ليها الحاصل... وريها انو محمد ولدي والله.. وانا ما كان عندي علم انو داير براءه ..ناصر قام و سلم علي ابوي بحراره و قال ليهو ولا يهمك بكلمها ان شاء الله ما تشيل هم وطلع من المكتب... وهو في طريقو على البيت اتصل على محمد ولدو قال ليهو بتردد " اسمع اصلا كلها كم يوم و حترجع السودان انا فتحت موضوع براءه مع عمك احمد...حاليا في واحد متقدم ليها ولو رفضت.. حيفاتحها في موضوعك...و احمد لو ما واثق انو بتو حترفض ما كان عشمني وقاال لي لسه ما ادينا الناس كلمه..
محمد بقا يكورك وقال لي ابوهو انا قلت ليك داير اعرس؟..اشتكيت ليك؟..قلت ليك انت و امي شوفو لي عروس؟... ناصر قال ليهو وطي صوتك و انت بتتكلم معاي انت قايلني واحد من الشماسه المباريهم لي ديل انا ابووووك انت ناسي ولا شنو! .. لي متين يعني عايز تتصايع و تقل ادبك... عايز تبقى زول مسؤول متين وريني...لا انا لا امك ما عافين ليك لو كسرت عِينا مع احمد وحليمه وريتك بس...محمد قعد يضحك وقال ليهو كويس والله برضو ما كعب عشت و شفتك انت وامي متفقين على حاجه... ان شاء الله دايما فرحتوني والله... ناصر زفر بقله حيله وعشان ما عايز يجاريهو في الكلام اكتفى بي انو يقول ليهو بعدين ما تتاخر سامع تعال البيت بدري وقفل الخط
_____________
زياد دخل البيت مبسوط وبصفر على غير العاده و ليهو كم يوم بالطريقه دي ... لقى اساور فارشه كتبها في الارض و قاعده بتقرا قال ليها امي وينها... و مالك قاعده منكوشه كدا... خلقتك بالله اخير منها المساجين..عامله في روحك كدا مالك... دي ما كانت امتحانات دي... قالت ليهو يسجنوك في كوبر شاحده ربي ... انا ما عارفه البت دي حتستحملك كيف بعدين؟... غايتو لو استخارت انت موضوعك باظ... ادعي بس انها م تستخير ليك ... زياد قعد يضحك وقال ليها موضوعك انتي وامي الباظ ... عاجباكم وطايرين بيها السماء انا لاشفتها لا رئيتها ادعو انتو... قاطعتهم امال؛ عاد البت خلقه و اخلاق الله اداك.. زياد قال ليها والله يا امي انا بقيت اخاف منك عديييل من نجيب سيرتها بتظهري بسم الله الرحمن الرحيم...جيتي متين؟ اسي سألت منك اساور...امال ضحكت وقالت ليهو سمعت صوت صفافيرك عرفتك جيت والله نفسي و مناي تكون من نصيبك يا زياد.. لمن تشوفها حتقول امي معاها حق...
زياد : انا مستغرب فيكم... يعني هسي اقنعتوني بي وحده و كلمتو امها عشان بس في البكا كانت سمحه!! ... اساور ردت ليهو بحماس اتخيل بس هي في البكا بعد عيونها المورمات و حالتها البي البلاء دي سمحه في العرس حتكون كيف.. زياد قعد يضحك قال ليها تصدقي والله منطق برضو..
امال: وبعدين يا زياد انت قبل تشوفها بتضحك و مبسوط ومؤثره فيك.. ملاحظه ليك لي كم يوم من متين انت بتضحك كدا...ما يا اما برا البيت يا صاري لينا وشك.. واخلاقك طبيعي في نخرتك
اساور قالت ليهو حافظ ليك تلاته جمل.. وواصلت وهي بتحاكي فيهو اساور اعملي اساور افعلي ... امي ياخ عليك الله انا ما داير نقه... يا يحي عليك الله م تقفلها معانا ...بالله تدي في الاوامر في البيت و في القسم..
زياد وهو بضحك : اوامر صح؟ هسي قومي سخني لي اكل.. بدل قاعده تتعاوري كدا... و سرحي شعرك دا ما ممكن الواحد عايش مع مجارمه عمرو كلو...لمن يجي البيت يلقا خلق زي دي...
اساور بهظار : تاكل السم ان شاء الله يا زياد كدا براءه ما توافق بيك لانك ما بتستاهل... امال قالت ليها يا بت تفي من خشمك هسي دعوتك دي كان صادفت مَلَكْ و قال امين .. زياد قال ليها بخلقتها دي لو صادفت مَلَكْ حيخاف خلعه ساي حيقول اعوذ بالله دي خلقه تصادف مَلَك.. دي ابليس كان صادفها بخش الاسلام لانو حيكون قايلها شيطان... و بعدين منو القال ليكم انا مبسوط عشان براءه انا مبسوط عشان عندي قضيه و اتحلت الحمد لله حأنوم لي يومين تلاته بي ارتياااااح...اساور قالت ليهو غايتو انا حأضرب تلفون واقول ليها انقذي روحك يا بت الناس... انت شخصيه م بتتعاشر اسي في واحد بقول انا ما مبسوط عشان طلبو لي يد وحده مززززه و قاطعه... و مبسوط عشان عندي قضيه اتحلت!!! ...و ضربت يد بي يد و مشت المطبخ تسوي ليهو حاجه ياكلها...
امال : زياد ياولدي صحي انت ما مبسوط؟ زياد باس راس امو و قال ليها يا امي انتي لمن قلتي لي انا عجبتني وحده و حتناسبك... صح في البدايه عارضت لانك كنتي بتتكلمي عنها شكليا بس وانا ما عارف اخلاقها شنو.. وفرق العمر بيناتنا كبير دي واحد... اتنين لاني عايز اعرس لي اساور واطمن عليها اول شي لانها وصيه ابوي الله يرحمو ... ولاني حاسي اني لسه ما لقيت البت البتستحملني ... لكن لمن حكيتي لي انو هي كيف كانت واقفه و بتساعد في الناس .. و كيف شاكلت النسوان البتونسو وبضحكو في بيت البكا ووقفتهم في حدهم...و حكيتي لي كل مواقفها الحصلت لحدي ما رفعو الفراش عرفت انو البت دي شخصيتها قويه و حنينه في نفس الوقت و اطمأنيت شويه.. وكونو انتي واساور مرتاحين ليها لدرجه انو سيرتها في البيت بقت جزو من يومنا دي براااااهاااا خلت قلبي يميل ليها من قبل ما اشوفها زاتو...ان شاء الله ربنا يكتب الفيهو خير...نحن مش سألنا و لقيناهم ناس كويسين وانتي كلمتي امها كدا عملنا العلينا و الباقي على ربنا... لو وافقت انا بكلم اعمامي و بنمشي ليهم طوالي ان شاء الله ...
امال بعيون دامعه : الله يقدم الفيهو خير يا ولدي...و اشوف اولادك مالين علي البيت..قاال ليها اللهم اميييين يا امي..
______________
ونحن قاعدين في امان الله بنشرب في شاي المغرب ...الباب دقه!! ايناس مشت فتحت الباب.. لمن سمعت صوت نسيبه جارتنا وهي بتسلم على ايناس ... قلت ليهم ما تنادوني اسلم ولا بتاع انا داخله جوااا.. امي قالت لي يا بت حركات الشفع دي حتخليها متين انتي زوله في الجامعه...قلت ليها امي بنتفاهم بعدين و جريييييت دخلت الغرفه... نهائي ما ناقصه معط من تجي بالله خالص م بتسكت تمسك ليك ناس الحله ديل نفرفر تقطع فيهم... تخلص من ناس الحله تخش في اهلهاااا ونسابتها وراجلها.. تخلص من القطيعه نبدا في موضوع محمد ولدها و انجازاتو الما بتخلص...يعني مرا ماف زول في الدنيا دي مالي عينها غير محمد ولدها .... سمعتها بتقول لي امي مبروك لي براءه قالو لي جاها عريس دربك مرق يا حليمه ما فضل ليك بنيه العرسوها عرسوها.. والخطبوها خطبوها... لكن ما بكضب عليك براءه دي كنت بدورها لي محمد ولدي.. لكن تقولي شنو القسمه زي ما بقولو...انا بيني و بين نفسي بقيت اقول مبروووووك لي براءه!!! براءه دي انا ولا وحده تانيه و عريس شنو كمان المراا دي ما جاده ولا شنو ؟؟!!! ...امي قالت ليها الله ما ضراك... لكن لسه ما فتحنا الموضوع معاها ما عارفين رايها شنو انتي الكلمك منو؟... نسيبه قالت ليها كلمني ناصر هي براءه وين النسلم عليها ... طوالي ريل بت اختي لفحت الكلام و قالت ليها حالتو بلاءه جلت منك (خالتو براءه جرت منك) انا ختيت يدي في راسي يعني البت دي تخصصها احراج و فضايح ... لبست لي عبايه سرعه سرعه و طلعت سلمت عليها و قلت ليها قايلاك منير راجل اسيل يا خالتو نسيبه عشان كدا جريت لبست لي عبايه... ريل دايره تفتح خشمها كدا عرفتها عايزه تقول لي ما قلتيييي الكضب حرااااااااام بالله قريتها في عيونها..طوالي شلتها قعدتها في رجليني و قلت ليها اسكتي بجيب ليك حلاوه بعدين وهي طبعا الكلام واقف ليها في حلقها تتململ يمين و شمال ما قادره تسكت بالله البت تقول بالعه حبه صراحه .. ايناس جابت لي نسيبه الشاي و قعدت جنبي وهمست لي منير يا كبيره... ريل قالت ليها بنفس نبره الهمس حالتو بلّو(برو) بقت جِنها تكضب حتحُش النال(حتخش النار) قلت ليها اصلا لو ما كنتي قلتي الجمله دي يا ريل كنتي حتنفجري لي هنا ان شاء الله بس بطنك بردت... الحمد لله نسيبه ما مركزه معانا اخدت ليها جغمه من الشاي و قالت لي ايناس الشاي دا خفيف جيبي لي حبه لبن بدره عليك الله ...ايناس مشت جابت ليها اللبن شربت الشاي و بقت تسأل من العريس المتقدم لي اصلو شنو وفصلو شنو و شغال شنو سألت من كل شي الا اسمو ... ودا كلو وانا اخلاقي منها في نخرتي و ماسكه لساني بالعافيه... بعد استفسرت و عرفت الحاصل كلو مشت بيتها اصلا هي ما بتجي الا تكون عايزه تتشمشر او جايبه ليها شمار ... انا طوالي قبلت على امي قلت ليها يعني الخبر ماشاء الله وصل الكويت!! ... و عمو ناصر كلم خالتو نسيبه وكمان هي جايه تبارك !!.. وسبحان الله اخر من يعلم انو متقدم لي واحد انااااا !!! .. كنتو ناوين تكلموني بعد تعقدو لي ولا شنو؟ ااااا وروني كنتو ناوين تكلموني متين؟ ... انا عرس بالطريقه العرستو بيها لي اسيل... و الخطبتو بيها لي ايناس دي ما بعرس خليكم عارفين... و موضوع العرس في راسي حاليا اصلا ماف...و اسي الولد دا بغض النظر عن هو منو انا ما عايزاهو نقطه.. و مشيت خليتهم ايناس و اسيل لحقوني و بقو يتكلمو معاي...ما عارفه هم بواسو فيني ولا بقنعو فيني... ولا بكزبو على روحهم ايناس قالت لي يمكن زول كويس يا براءه.. اسي انتي زعلانه.. م تخلي زعلك يعميك و تظلمي ود الناس وهو ما عندو ذنب..
اسيل : نوسه كلامها صح وبعدين لو ما نسيبه جات.. اكيد امي كان حتحكي ليك...قلت ليهم مالكم ما بتعرفو امي و ابوي ولا شنو؟ يتشاورو في الموضوع بيناتهم و يدو كلمه... ويختوني انا امام الامر الواقع زي ما عملو معاكم...نحن نزعل ننحرق دايرين م دايرين ما على كيفنا... و في النهايه امي تقول لينا ابوكم داير مصلحتكم .. ماف جديد نفس السناريو العملو ابوي معاكم الاتنين عايز يعيدو معاي ... وانا بتكلم كدا امي جات داخله مدت لي التلفون قالت لي هاك ابوك عايزك.. بس ختيت التلفون في اضاني كدا وقلت الو... ابوي قال لي اسمعي هنا انا قله الادب و لماضه البنات دي ما بتنفع معاي... افتحي اضانك دي و اسمعيني كويس و كلامي ما بعيدو... اصلا كان متقدم ليك واحد اسمو زياد امو شافتك في بكا استاذه بدريه الله يرحمها زول كويس شغال في المباحث مافيهو كلمه.. انا كنت حأكلمك للعلم بس وكنتي حتعرسيهو كراعك فوق رقبتك ... لكن اسي ناصر فتح معاي موضوع محمد..قدامك خيارين ما عندهم تالت.. يا زياد يا محمد ود ناصر... انا بديك اسبوع تستخيري وتوريني بقيتي على ياتو و قفل في وشي الخط... انا انفقعت بالبكااااااا وقلت لي امي دا كلو عشان جينا بنات ؟... خايفين يعني نقعد ليكم في البيت ولا شنو انا ما فاهمه؟... ولا خايفين يقولو بنات احمد و حليمه ما عرسوهم؟... على الاقل يا امي اقيفي انتي معانا م تبقو علينا انتي و ابوي... قعدت جنبي مسحت لي دموعي و حضنتني... قالت لي يا بتي ما تقولي كدا الدنيا ما معروفه نحن دايرين نستركم البت مكانها بيت راجلها... دا كلو لي مصلحتكم اسمعي كلام ابوك و استخيري انتي ما عارفه ربنا كاتب ليك الخير وين ...اختصرت الموضوع وقلت ليها خير يا امي لاني عارفه اني بنفخ في قربه مقدوده و امي ما منها امل البقولو ليها ابوي بتعملو ...قالت لي الله يهديك يا بتي وساقت ريل الكان مستغربه وما فاهمه الحاصل شنو و طلعت... بكييييت وقلت لي ايناس و اسيل اتخيلو بس ابوي بخيرني بين محمد ود نسيبه الانا اصلا اشوف العما و ما اشوفها ... و بين واحد اسمو زياد ما بعرف عنو اي شي غير انو امو شافتني في البكا وكلمت امي ...ولا سألني اصلا انا عايزه شنو ولا راي شنو و قفل في وشي الخط...انا مستغربه ابوي دا الحصل ليهو شنو.. الاتكلم معاي دا ما كان ابوي معقوله ممكن الزول يتغير و يتقلب فجأه كدا و لمن يتغير يتغير على اولادو؟ ايناس قالت لي ربنا كبير يا برو قومي صلي ليك ركعتين كدا و اهدي وروقي حنعمل شنو ما بي يدنا حاجه غير ندعي و ساقت اسيل و طلعو .. فرشت المصلايه وصليت لي ركعتين ورفعت يدي لي الله وبقيت ادعي
" اللهم ما اخشاااا ان يكون صعباً هونه؛ وما اخشااا ان يكون عسيراً يسره؛ واما اخشاااا ان يكون شراااً اجعل لي فيه خير ولا تجعلني اخشى سواك يا رب العالمين" حرفيا كل ما ادعي الدعاء دا بحس بي قوه كدا و يقين...وتلقائيا بلقى نفسي بتعامل مع كل المشاكل ببساطه والناس بكونو فاكرين انو دا برود و عدم اهتمام مني...وانا في قعدتي ديك نوسه فتحت الباب ورقدت في سريرها... دخلت وراها اسيل و قعدت في طرف السرير... قلت ليهم مالكم لمن تجو ورا بعض كدا بتخوفوني..نوسه اتعدلت في قعدتها و قالت لي نسيبه وهي طالعه قالت لي ابوكم متواصل معاكم؟! قالتها بطريقه كدا حسيت انو عايزه تتأكد من حاجه...
اسيل : شفتي يا نوسه لمن تتقمصي لي شخصيه ست الودع..وتعملي فيها عندك الحاسه السادسه دي انا بخاف..
نوسه : والله يا اسيل سؤالها دا ما ساي ...حصل قلت ليكم انا حاسه انو في إن في موضوع و طلع كلامي غلط؟!.. قلت ليها وانا محتاره حاجه زي شنو طيب يا نوسه ؟
______________
