فضل ضاميني عليهو... وقريب الدقيقتين هو ماسك فيني لحدي ما حسيت بي حاجه حاره في كتفي و جاني صوتو المبحوح وهو بقول لي ياريت لو فكيتك بي يدي... لمن كوركتي لي يا زياد قول ليهم يفكوني انا ما عملت حاجه...
ما كان متوقع مني ارد عليهو او اتفاعل معاهو.. بس اتفاجئ لمن قولت ليهو : لو كلمه ياريت بتنفع انا حاليا اكتر وحده بقول ياريت...ضغط بي يدو على عيونو و قال لي دا ماوقتو هسي..و باسني في جبيني وواصل كلامو :ربنا يقدرني اسعدك.. و اعوضك خيير عن كل التعب و الضغط النفسي العشتيهو..و يخليك لي و يجعلنا سند و ضهر لي بعض...وابتسم وهو بقول ويزقنا الذريه الصالحه و الخلقه التامه يا رب قولي امين.. سكتت وما رديت عليهو..عايز يتكلم كدا اساور دقت البات ودخلت قالت ليهو انا عندي فكره نحن نفكفك الناس البره دي على بيوتها و نقول ليهم سعيكم مشكور و ما قصرتو...وانتو واصلو حياتكم جوا هنا رايك شنو معقوله بس.. قعد يضحك و قال ليها انا غايتو ما عندي مشكله..ولو ما قالت امين من هنا ما طالع..جو داخلين انفال اختو و اسيل وايناس.. قالو لينا يلا يخوانا ...
اساور : قال ما طالع لو ما قالت امين..
انفال عاينت لي زياد مستغربه وقبلت علي و هي بتضحك قالت لي قولي ليهو امين هو كضاب لكن مشيهووو بس... يا زوله استمتعي باللحظه الرجال ديل حدهم امين بتاعت يوم العقد دي و تاني حتعديها استشهاد و استغفار... اسيييل قعدت تضحك و قالت ليها صدقتي اقسم بالله..
زياد اشر على انفال وقال بهظار :اساور البت دي العزمها منووو؟... اساور قالت ليهو والله انا عزمتها لزوم انها اختك و كدا.. نوسه واسيل بقو يضحكوووو و فرحو واطمنو اني بعد العشتو دا كلو حأعيش في جو مريح و مهيئ نفسيا..وانا شويه حسيت بسكيينه وراحه وانا بعاين ليهم بهظرو و بضحكو مع بعض ولي اول مره من طلعت من المستشفى اشوف ناس بتصرفو بطبيعتهم قدامي... حتى ناس بيتنا كنت بحس بيهم بتعاملو معاي بحذر من خوفهم على ... اسيل قالت لي اساور و نوسه شيلو صينيه الجرتق واطلعو.. هم حيطلعو وراكم...
زياد : والله انا حلفت بي الله ما طالع من هنا لو ما قالت اميييين
اساور جات وقفت قدامي و قالت لي : براءه أُخدي الولد دا على قدر عقلو معليش جاتو طفوله متأخره.. من هو صغير عايش دور الاب المربي...قولي ليهو امين عليك الله امرقونا من هنا...ضحكت على رد فعل اساور القالت الكلام ورا بعض بنرفزه من غير ما اشعر... و قلت اميييين بيني و بين نفسي ودعيت انو ربنا يجعلها بدايه خير في حياتي ... كلهم عاينو لي بفررحه وزياد قال لي بفرحه وهو بضحك لالالالا بعد الضحكه دي عفيتك بقول امين برااااي.. ورفع يدو قال بصوت عالي اميييييين يارب ..نوسه قالت ليهو وهي ميته من الضحك والحليفه طيب.. قال ليها ما مشكله بصوم تلاته يوم..وكلهم قعدو يضحكو... مسك يدي واسيل عملت لي شويه تعديلات في وشي.. ونحن طالعين اساور همست ليهو بخبث زياد عيونك دي مالا محمره كدا!! رد ليها بنفس نبره الهمس بقيت بشرب بنقوو... و ساقني و طلعنا...
____________
يحي : يعني اسي زياد عريس! والله ما قادر اصدق.. مروان قعد يضحك وقال ليهو والله انا اتوقعت خطوه زي دي منو لكن ما اتوقعت تكون بالسرعه دي...
اسراء مرت مروان : يحليلها واالله البت عاشت كتييير... انا مبسوطه من زياد لانها في الفتره دي بالزات حتكون محتاجه تحس بالامان..انت الراجل التاني الحكيت لي بيهو يا مروان قدرتو تحددو شخصيتو.. مروان قال ليها لسه والله يا اسراء..
يحي بهظار : دا شنو يا مروان انت بتسرّب اسرار الدوله لي مرتككككك...اسراء طوالي جرت ليهو نور .. اصلا عندها حساسيه مع يحي لانو عارفاهو بتاع بنات.. يحي اول ما حمرت ليهو قال لي مروان سرّب سااااي يا زول مرتك اهم من الامن والدوله... التقرير زاتو ارفعو ليها اول شي بعدين وديهو الرئاسه... مروان ماااات مضحك و همس ليهو ما لي حق ارجع البيت قبل 12... يحي قال ليهو قلبي معاك والله انت كل يوم بعاينو ليك العين دي!! اسراء قاطعتهم و قالت ليهم العرسان طلعوووو...طوالي يحي و مروان والرجال اتجو علينا وهم ببشرو... و النسوان بقو يزغرتو .. واسيل بتدق في الدلوكه معاها انفال و اسراء و البنات... ومنير شايل كاميرا و بياخد في لقطات... اساور و نوسه ختو صينيه الجرتق قصاد العنقريب المفروش بالقرمصيص...واول ما قعدنا عادل وباقي رجال الامن دورو ضرب سلاح...جات مره مسكت زياد سلمت عليهو شديد... و هو قام على حيلو حضنها و سلم عليها في راسها.. عرفتها امووو قمت و سلمت عليها وكان واضح من سلامها انو في حاجه غلط..بس زياد عشان م يحسسني بحاجه بمجرد ما فكيت يد امو قال لي بهظار دا شنو الناس ديل صدقو اني عندي طفوله متأخره ولا شنو جايبين لينا لبن!! لمن ما رديت عليهو مسك يدي لقاها بارد و بترجف و بقيت بحرك في رجولي الاتنين بحركه سريعه... بقا بقرا لي "بِسْمِ اللهِ الَّذِيْ لاَ يَضُرُّ مَعَ اسْمِهِ شَيْئٌ فىِ اْلاَرْضِ وَلاَ فىِ السَّمَاءِ وَهُوَ السَّمِيْعِ اْلعَلِيْمِ" و يكرر في الايه... و يقول لي رددي وراي وانا بردد وراهوو لحدي ما اعصابي شويه هدت... والناس كلها بقت مركزه معاي و بتعاين لي بشفقه.. زياد شاف ريل من بعيد اشر ليها قعدت تضحك و جاتو جاريه.. قعدها في نصنا مخصوص عشان شويه انشغل بيها ...وطوالي هي دورت كلام ونجحت في انها تشتت انتباهي ..بعد شويه اتقدمت امي و ام زياد علينا وبدو تقاليد الجرتق من البدايه لحدي ما وصلنا لي اخر تقليد وهو بخه اللبن..ناس اسيل بقو يكوركو لي بخيهو يا برو..وناس اساور بكوركو لي زياد بخهااااا... زياد قعد يضحك قال ليهم اصبرو دقيقه طيب و شرب جغمه و شربني جغمه... وقام وهو بخت كبايه اللبن لي ريل في يدها وشالها رفعها قصادهم و قال ليها ليها املي خشمك فللل يا ريل وبخيهم.. وريل ما قصرت طبعا غرقتهم لبن و الناس دي كلها قعدت تضحك...
بعد الناس باركت طوالي طلعنا .. بعد كميه من الوصايا من امي و اسيل و نوسه...ابوي سلم علينا ولي اول مره من فتره طويله اتكلم معاي بنبره هاديه و قال لي اربعه كلمات بس " ابقي عشره علي بيتك" زي الكأنو بقول لي اعملي حسابك ما يجيبوك لي راجعه...و من بعيد شفت نسيبه واقفه جنب باب بيتها بتعاين لي بنظرات كلها حقد و كراهيه...
ركبنا العربيه و قبل نتحرك... امي ساقت زياد على جنب و قالت ليهو بتي امانه في رقبتك يا زياد... قال ليها بتك جوا عيوني ما تشيلي هم...وقبل يطلع مسكتو انفال و ادتو مفتاح قال ليهو اساور ورتني انك ما شغال الفتره دي... انا جهزت ليكم صالون بيتنا..م تسوقها البيت... اصلا اصلا الصالون منفصل بي حمامو وماف زول قاعد فيهو خليكم قاعدين هناك الفتره دي لحدي ما امورك تظبط..وما دايره معاك كلام كتير وختت ليهو المفتاح في يدو ومشت من غير ما تديهو فرصه يتكلم...
__________
يحي: مروان البت اللابسه اسود دي اخت براءه!
مروان بتحزير : يحي دي اخت زياد لو سمعك بدفنك في الحوش دا..العب بعيد .. يحي قال ليهو بي استغراب! اخت زياد؟ زياد عندو اخت غير انفال؟ و انت بتعرفها من وين؟..
مروان : لمن امشي ليهم مع اسراء بتطلع تتونس معاها.. واقفل الموضوع دا يحي.. زياد جاهم من ورا يقفل ياتو موضوع؟..
يحي بتوتر : شغل يا زياد.. زياد قال ليهو وشغل يقفلو لي قدرتو تصلو لي معلومه عن الرشيد ..
مروان : معلومه شنو يا زياد نحن بنفتش عن شويه ملامح وصفوها لينا البنات... يعني زي البنفتش لينا في سراب..يحي قال ليهو انت حتى يوم عرسك بتفكر في الرشيد... انت يا زول طبيعي!!
زياد بحماس : ملامح!! انا لي ما فكرت في الفكره دي..براءه بتعرف ترسم.. ورسمها فوق الممتاز...
