و انتهى بي انو بقول ليها الحل انو براءه تكون وحده من الخمسه بنات الحيتباعو للرشيد... واختصري على على روحك الطريق بي ابسط الخسائر...لؤي عاين لي ليلي المنهاره من البكى و قال ليها بصدمه دي رحيق بتاعتنا الواحده دي... والبتتكلم عنها بالاسلوب دا دي براءه؟!
ليلي اشرت ليهو براسها وهي بتشهق بالبكا... قال ليها بعتاب على الاقل كان تكلميني انا طيب يا ليلي... كنت بتصرف و ببلغ قبل البت تضيع بالطريقه دي....حتى لو خفتي كان مفترض تفتحي خشمك دا وتتكلمي... كان بس تختي نفسك مكانها وما تتصرفي بي انانيه..الليله لو براءه الكانت مكانك انتي عارفه وانا عارف كويس انها كان حتعمل البي يدها كلو عشان ما تحصل ليك حاجه...ضميرك ما أَنبك خالص وانتي ساكته كدا!! كنتي ناويه تتكلمي متين طيب!!
ليلي وهي منهاره : عارفه يا لؤي عارفه انها ابسط شي كان حتسلم رحيق بي يدها لي اقرب قسم.. بس انا خفت تحصل لي حاجه ويعملوني فيني زي ماعملو فيها...و انا سمعت التسجيل اول امبارح يا لؤي انتي قايلني سمعتو من بدري..
زياد بحسم : هسي دا ما قت اللوم... اسمعوني هنا كويس ما عايز ولا جن احمر يعرف بالحصل دا..واذا عايزين بالجد تساعدوها الكلام دا يندفن هنا...وحول منها التسجيل واستفسر منهم كم استفسار...وركب العربيه اتحرك على القسم وهو سايق جاتو مكالمه.. لمن رفع الخط و قال الووو جاهو صوت واحد بقول ليهو انا لقيت الرقم دا في بورد الجامعه وفي حاجه عايز اقولها ليك بخصوص رحيق و براءه بس هو مجرد شك و ما متأكد من الكلام دا... زياااااااد حككك فرامللل و قال ليهو بلهفه اتفضل انا سامعك...
الولد: انا شفت رحيق وهي بتدي براءه حبه وشكيت انها تكون حبوب لِيرِيكا ( حبوب للاعصاب ونوبات الصرع اغلب الشباب بستعملوها كمخدر).. زياد قال ليهووو لو انت قريب من الجامعه نتلاقه في (.....) بعد خمسه دقايق انا هسي متحرك عليك...
______________
يحي : اووووووو مروان حمد الله على السلامه و يتربى في عزك يااااااخ الوليد...علي بالطلاق تسميهو يحي اضبح ليك عجلين... الجابك شنو كنا بنجيك نحن والله..
مروان ضحك و قدم ليهو علبه الحلاوه وقال ليهو والله لو ضبحت لي عجلين و ناقه شفت ما اسميهو عليك عشان يطلع لي شماسي بتاع بنات...يحي قعد يضحك وقال ليهو انت فاهمني الغلط انا ما بتاع بنات انا شغال بدل فاقد يعني اخو للما عندها اخو... و صاحب للماعندها صاحب.. و ابو للماعندها ابووو فهمتني..
مروان بضحك : في ميزان حسناتك ياااخ شغلك صعب والله الله يقويك ... يحي قال ليهو الله يخليك يااااخ... مروان ضحك و قال ليهو انت زياد وين الليله ما جا ولا شنو..
يحي بمكاواه : بكون ما عارف انو جابو ليك يحي صغير دقيقه اضرب ليهو اكلمو ..و شال التلفون ضرب لي زياد فصل في وشو مرتين..لمن رجع ليهو المره التالته رد ليهو بزهج : يحي انا ما فاضي ليك هسي....
يحي : الووو زياد... الووو...الووو يا زياد اسمعنيي... قفل الخط في وشي..🙂
مروان وهو بضحك : يا يحي زياد دا عليك الله خليهو... بكون في حاجه شاغله راسو...
يحي : يا زول من يوم جات المره وفتحت بلاغ الاختطاف... وطلع اسم المخطوفه مطابق مع اسم البت الطلعوها اهلها بي كفاله.. وهو في الحاله دي...
مروان بي استغراب : كيف يعني؟.. وياتو بت؟
يحي : شفت الكافي.. الداهمتوهو على اساس العدناني عندو تسليم بضاعه... وطلع وكر...
مروان : اي وزياد رفع الرجال و البنات الفي الكافي كلهم من طرف... وعلاقه دا بي دا شنو... ما تقول لي الموضوع عندو علاقه بالبت الكان مغمى عليها..
يحي : بسسس ياها... مش اهلها جو استلموها...
مروان : اي.. جو ابوها واخوها بتزكر..
يحي : يلا بعد يومين جات امها حالتها بالبلاء... قالت بتها مختفيه ليها تلاته يوم... ولمن قلنا ليها جاتنا هنا واسلموها ابوها واخوها... قالت هي اصلا ما عندها اخووو....وابوها برا السودان...
مروان قام على حيلو...و خبط الطريبيزه بي يدوووو..و بقا يكورك.. كيييييييييف يعنيييييي؟... يحي قال ليهو بحزن والله دا الحاصل... واسي زياد مستلم القضيه دي... وما لاقي اي طرف خيط..
___________
زياد اتلاقا مع الولد في المكان الاتفقو فيهو... و قال ليهو اول شي انت منو و شفتهم وين...قال ليهو انا اسمي عزيز.. شفتهم في عم حامد.. دي جبنه جوا الجامعه... فبراءه شافتني هناك وجات مدت لي كبايه جبنه و ادتني كبابي كرد جميل على موقف حصل بيناتنا... وقبل تديني فرقه مشت على رحيق وكان معاها بت تقريبا ... فبقيت مركز معاهم عشان القا لي فرصه معاها براها...بعد فتره شفت رحيق من بعيد وهي بتفتك كرتونه بتشبه كرتونه الليريكا وطلعت منها حبه ومدتها لي براءه بلعتها
زياد عاين ليهو بشك وقال ليهو والخلاك تشك انها حبوب ليريكا شنو؟! وانت بتعرف الليريكا من وين اصلا؟ عزيز قال ليهو بتبرير امي عندها التهاب اعصاب والدكتور صرفها لينا و حزرنا انها تصنف كحبه مخدره... فلمن شفت الكرتونه عند رحيق شكيت لانها بتشبهها... و عشان اتأكد وما احكم عليها ساي... قربت من براءه عشان اعرف انها بتتعاطى او لا... بس قبل ما اتأكد انقطع الاتصال بيناتنا وما قدرت اتصل بيها تاني..
زياد رفع ليهو حاجبو وقال ليهو : قربت من براءه!!الجمله دي شويه كدا حاسي بيها تقيله و ما وقعت لي..
عزيز بتوتر: قلت ليها كلام كتييير من ضمنو اني منجزب ليها يا سعاتك...
زياد قال ليهو وهو ضاغط على اسنانو انت عارف نحن نغلي قسم مكافحه المخدرات كلو كلو ...ونعديها انجزاب لي بنات الناس عشان نتأكد هم بتعاطو ولالا رايك شنووو...
عزيز سكت وما عرف يقول ليهو شنو... في النهايه قال ليهو لو شفت البت الكانت مع رحيق اليوم داك بتعرفها؟! عزيز قال ليهو ايواااا... قال ليهو خلي تلفونك قريب حأكون على تواصل معاك و مشى
______________
مروان كان منتظر زياد لحدي ما يجي عشان يعرف منو الحاصل كلووو... و اول ما زياد جا اول حاجه شاكلو لانو لمن اتصل ليهو وسألو من الجديد... ما وراهو اي حاجه وقال ليهو ماف اي جديد يا مروان خليك في اجازتك..
زياد : مروان عليك الله دا موقت حماقتك و زعلك انا براي الفيني مكفيني ولي كم يوم ما نايم ... براءه ما براها المخطوفه.. معاها اربعه بنات..
يحي و مروان بصوت واحد : شنووووووووو!! زياد فتح ليهم التسجيل سمعوهو وقال ليهم خلو عادل يفتش عن بلاغات الاختفاء في الاقسام التانيه بي كل اسامي البنات الطلعو مع براءه...اهلهم بكونو فتحو بلاغات في اقسام تانيه ونحن ما جايبين خبر...اما بالنسبه لي رحيق حتتعاون معانا غصب عنها بعد التسجيل دا..
______________
بعد يومين :
العدناني بفرح : صداااااام عدت على خير امشي استلم اخوك ورحيق من القسم.. وكلف زول ينتهي لينا من موضوع مشاكل جوا السجن كتامي كدا من غير ما يخلي اي اثر وراهو...
صدام : مشاكل نحن محتاجين ليهوو.. هو الوحيد العارف كل المداخل والمخارج في البلد دي... وهو البتعامل مع معارفنا هنا...
العدناني : ما عندي طريقه اطلعو كل القروش المعاي حرقتها رشاوي عشان اطلع اخوك ورحيق... انت حتستلم الشغل مكان مشاكل ... واخوك حيسلم الشغل البرا مكانك لانو واحد متهور وما بعرف يتصرف... وانا تاني ما داير اقع في نفس الغلطه...اما رحيق اول ما تجي ربطها مع الخمسه الجوا ديل... و بكدا يكون فضل لينا اربعه بنات و نسلم الرشيد...
صدام ضحك وولع سجارتو و قال لي ابوهو... لي اول مره حأتفق معاك من غير نقاش... وطلع عمل زي ما ابوهو قال ليهو وجاب رحيق و صلاح...رحيق قالت ليهم بتوتر البنات وين عايزه انتقم من براءه كل الضرب الانضربتو في السجن بسببها... صدام وضحك و قال ليها ما تستجعلي شويه كدا بوديك ليها وانتقمي منها براحتك..ومد ليها المفتاح قال ليها انتظريني في العربيه...شالت المفتاح ركبت العربيه وانتظرتو قريب نص ساعه بعد داك جاها معاهو العدناني وصلاح و اتحركو علينا...
___________
يدينا و رجلينا اتجرحت بسبب الحبال المربوطين بيها لينا ايام..وخلاص قنعنا من قصه انو نحن حنطلع من الظلام الدامس العايشين فيهو دا... بقينا ما عارفين مرو علينا كم يوم ونحن قاعدين في الغرفه دي...فجأه ونحن قاعدين كل واحده بتعاين للتانيه بأسى سمعنا صوت صرير الباب وهو بنفتح كنا قايلين انو دا واحد من العمال جايب لينا اكل و مويه كالعاده... بس اتفاجئنا بي رحيق البي مجرد ما دخلت صدام لزاها على الحيطه بقوه وهجم عليها.. بقت تكورك و تلز فيهووووو وتقاويهوووو و تصرخ بي اعلى حس...بس صلاح جا داخل اداها كفففف و مسكهاااا لي صدام الجرااا ليهو حبل وربطها بيهو ورماها جنبناااااا وضحك و قال ليها دي نهايه اي زول بتصرف من راسو... وطلعو الاتنين وقفلو الباب وراهم...
رحيق كانت بتبكييييي... سااااعه وهي بتبكي وتصرخ وتعاين لينا و تبكي زياده..
___________
العدناني وهو بكورك في صدام : البت دي لي ما لصقت ليها خشمهااااا صرعتنا بي صوت الكواريك... صدام قال لي صلاح قووووم قووم لصقو ليها انت اعمل ليك حاجه نافعه على الاقل.. وقبل يتم كلامو سمعو صوووت ضررررب نااااااارررر...والشرطه داهمت المكان ويحي قال ليهم ثاااابت يدينكم ورا رااااسكم عشان ما افرغ فيكم السلاح دا...
وزياد جراااا على سلالم البدروم ونزل وهو فاتح جهاز تحديد المواقع لحدي ما وصل غرفه في ركن بعيد مقفوووله وما قدر يفتحها..
زياد وهو بتكلم مع يحي في الاسيلكي : يحي المفتاح ماااف الغرفه الفيها البنات مقفوله..حول..
يحي كورك لي مروان : مروان فتش جيوبهم... شوف لو فيها مفاتيح فعلا مروان فتش جيوبهم ود على زياد : زياااااد لقيييت المفاتيح تعال على باب السلم ...حول
زياد جرا علي باب السلم ومروان رما ليهو المفاتيح من فوق..شالو وفتح الغرفه وهو ملهوووف لقااانا جزو مربوط ومرمي في الارض و جزو مربوط في كراسي.. و حالتنا تحنن الكافر...
____
