يحي جا لقا ناس امي بعاينو لي زياد وهو خاتي يدينو في راسو زي السمع ليهو خبر وفاه... افتكر انو زياد مصدوم من الحاصل لانو هو في حد زاتو ما قدر يستوعب و في ميه سؤال في راسو..اتلفت على منير و قال ليهو طيب لو انتو اهلها ... الجو دفعو الضمان و ساقوها ديل منوووو
منير كورك فيهو و قال ليهوووو انا المفروووووض اسألك السؤال دا ما انت...
يحي : انا مقدر الظرف الانت فيهو بس معليش نتكلم بي احترام عشان نقدر نساعد بعض...بتكم دي اتقبض عليها في كافي مشبوه... و اتصلت بنفسها على الناس الجو استلموها ديل و مشت معاهم بي كامل ارادتها ..وطلع ليهم صور من 3 ارقام وطنيه وقال ليهم دا رقمها... ودا رقم ابوها.. ودا رقم اخوهاااا..يعني نحن لمن طلعناها من هنا ما طلّعناها ساي..
محمود : يا سعادتك قلنا ليك البت دي ما عندها اخوووووو ما عندهاااا... اكيد في غلط و الارقام دي مزوره...وكان حلفت لي من هنا لي الصباح انا ما بصدق انو براءه ممكن تتقبض في مكان بالشكل دا... امي بقت تكورك وتبكي و تقول ليهم بتي خلاص راحت مني...انا اصلي ما ارتحت لي موضوع شغلها في الصيديله الفجأه دااا... انا قلبي كان حاسي انو حتحصل ليها حاجه... زياد هنا يادوب صحا من غفوتو وشال اقرب ورقه وقلم و قال ليها دقيقه دقيقه يا خالتي الصيدليه الاشتغلت فيها اسمها شنو واول يوم نزل فيهو شغل كان متين.. ودايرك تهدي كدا و توريني كل الحصل من اول يوم نزلت فيهو شغل بالتفصيل... قالت ليهو اسمها صلاح عدنان وورتو اليوم والتاريخ بالضبط... و حكت ليهو القصه من البدايه لحدي اخر يوم مشيت و ما جيت راجعه...وزياد كان بسجل كل صغيره و كبيره هي بتقول فيها بكل اهتمام...قبل على منير ومحمود و قال ليهم وانتو ما لاحظتو اي حاجه غريبه في براءه في الفتره بتاعت الاسبوع الفات دي؟!
محمود قال ليهو لالا.. و منير قال ليهو في الاسبوع دا نحن لاقيناها مره وحده... لكن اسيل زوجتي و اخت براءه كانت بتحكي لي انها خايفه عليها لانها بقت فجأه بتهدا و فجأه بتروق وشبه ما مركزه معاهم خالص... قاطعو يحي وقال ليهو طيب الحاجه دي ما لفتت نظركم؟! معقوله اسبوع ما قدرتو تلاحظو انو بتكم تصرفاتها غريبه و بتتعاطي حبوب مخدره؟دا اهمال منكم و عدم اهتمام على فكره!
محمود قال ليهو بصدمه : حبوب مخدره! يعني هي ما كان بتلعب بي اعصابهم و بتمثل دور المجنونه زي ما هم خاتين في راسهم!!
يحي بي استغراب : شنو السبب الخلاكم تختو في راسكم انها ممكن تمثل انها مجنونه؟ اكيد في سبب منطقي
امي : ابوها غاصبها على الزواج... وهي رافضه الفكره لدرجه انها قالت ممكن تعمل اي حاجه ان شاء الله كان تموت واسمها ما بتكتب مع اسم الولد دا في قسيمه وحده..ودا السبب الخلانا نتأخر و ما نفتح البلاغ من بدري لانها اختفت قبل خطوبتها بيوم... فكنا قايلنها هربت و ادّست ليها في مكان عشان الخطوبه ما تتم... لكن المده طولت و سألنا كل معارفها ماف زول عارف عنها حاجه...
زياد بينو و بين نفسو كان بقول يعني رفضوني عشان يعرسوها لي واحد تاني بالغصب!! سكت مسافه بعدين سألهم طيب ما سمعتو منها اسم رحيق او صلاح.. او العدناني؟ ما سمعتو في خشمها الاسماء دي خالص؟
محمود و منير عاينو لي بعض في نفس الزمن قالو ليهوووو رحيق و صلاح!! وحكو ليهو بقصه التسجيل الحكيت ليهم بيهو و بي سببو رسلت ليهم الرسايل... وامي قالت ليهو رحيق دي البت البتقرا مع براءه في الجامعه و قالت ليها تعالي سدي لي الاسبوع دا عشان حبوبتها عيانه..
وبعد جاوبو على كل اسئله زياد يحي اداهم استماره نزلو فيها بياناتهم وارقاهم و عنوان البيت بالضبط... و قال ليهم لو حصل اي جديد حنكون على تواصل معاكم و شال الاستمارات و مشى...زياد عايز يمشي ورا يحي كدا محمود وقفو وقال ليهو ما وريتني بتعرف خالتي من وين؟!
زياد عاين لي امي وقال ليهم : انا زياد عبد الناصر ولد امال ومشى خلى امي بتعاين ليهو وبتحاول تستوعب في كلامو ...
محمود لفتها وقال ليها دا منو يا خالتي فهمونا حاجه؟ قالت ليهو دا الولد الكان متقدم لي برو قبل محمد شفت الدنيا دي ضيقه كيف!
____________
زي المساء كدا وناس امي قاعدين في البيت كل زول في حته.. فيهم الببكي..وفيهم البصلي و بدعي... و القاعد سرحان... ومهمومين وما عارفين يعملو شنو... الباب دقه كلهم جرووو على الباب على امل انو يكون في حاجه جديده عني او اكون ظهرته.. بس اول ما فتحو الباب اتفاجئو بي ابوي الشايل شنطتو وو الواقف وراهو... وقال ليهم يعني قايلين اذا ماف زول فيكم رد علي تلفوناتي ما بقدر اصل ليكم ولا شنو؟ انااااااا بتي تكسر عيني بالطريقه دي و الحله كلها تعرف انها شردت من البيت قبل خطوبتها بيوووم..وانتو ولا واحد فيكم عايز يرفع لي سماعه تلفون عشان يفهمني الحاصل...لو ما عرفت من ناصرررر كنتوووو عايزين تستغفلوني و ما توروني صححححح خلوني أَلِم في بت الكلب دي اول واضبحها بي يدي دي.. بعداك بفضااا ليكم و حيكون حسابكم معاي عسييييرر...وانتو يا محمود و منير انا كنت قايل نفسي خليت وراي رجال والله لكن طلعت متكل على حيطه مايله... محمود قال ليهو نحن رجال في عين اي زول و براءه ما شردت براءه اتخطفت يا عمي احمد وماف زول حيقدر يقنعني بكلام غير كدا..منير قال ليهو كدي خش يا عمي واعرف الحاصل قبل تهاجمنا فعلا ابوي قعد و منير ومحمود حكو ليهو بكل الحاصل.. اما ناس نوسه وامي واسيل كانو خايفين وبعاينوووو من سكات
____________
صدام : الليله رفعو مشاكل يا ابوي البنات ديل حيقعدو عندنا كدا لمتين؟! نحن هسي في نص البحر لا قادرين نرجع ورا .. ولا قادرين نمشي قدام... وبالطريقه دي المركب حتغرق بينا...
العدناني بكواريك :المركب دي لو غرقت... ماف زول فينا حيطلع منها سليم.. اركب تعال تم البنات ديل عشره بي اي طريقه... عشان الرشيد يستلمهم قبل يموتو لينا هنا
صدام رد ليهو بنفس نبره الكوراك: انت لسه عايز تجازف بيناااااااا يا ابوي...
العدناني : جازفتو بروحكم لمن اتصرفتو من وراي حالتيييي حزرتكم متين الف مره ... كل الامور كانت ماشه في السليم و ما ماف زول كان حيقدر يثبت علينا حاجه المصايب دي كلها من تحت راسك انت و اخوك ورحيق.. تعال قبل الرشيد يكتشف انو الحكومه لافه حولينا و نبقا بين نارين.. الحكومه من جهه والرشيد من جهه تانيه...
_______
زياد بقا مستلم قضيتي من كل النواحي..وما مدي اي زول فرقه معاهووو...كفت صلاح لمن الله غفر ليهو عشان يعترف بي اي حاجه لكن صلاح كان مصر على موقفو... ورحيق بنفس الطريقه وماف واحد فيهم كان راضي يعترف بي اي حاجه...تاني يوم من الصباح مشا بيتنا اخد اقوال اسيل و نوسه الحكو ليهو بكل حاجه عني تقريبا حتى قصه انو رحيق قبل كدا وصفت لي الصيدليه عشان اجيب منها حبوب امي وانا روحت وفي النهايه لقيتها مقفله .. دخل غرفتنا وفتش بين حاجاتي كلها حتى رسوماتي لكن ما لقى حاجه ممكن تساعدو ويستفيد منهاااا...وهو لسه مواصل وبفتش في غرفتي ريل جاتو داخله و عيونها مليانه دموع وقالت ليهو :عمو زياد انت حتنقذ حالتو زي ما انقذتني ثااااح...زياد العبره خنقتو لمن قالت ليهو كدا وهي بالحاله دي شالها و حضنها عليهووو و قال ليها وهو بطمن فيهااا صاااااح يا ريل انا حأنقذ حالتو و ما حتحصل ليها حاجه ان شاء الله انتي بس ادعي تمام..
ريل ببكا : ادعي.. ادول (اقول).. سنو طيب
زياد بحنيه : قوليي يا رب تحفظ خالتو لحدي ما عمو زياد يلقاها.. ومسح ليها دموعها وباسها في خدها وقال ليها يلا اجري اتوضي و صلي عشان تدعي ليها وما تبكي تاني اتفقنا.. ريل طوالي نزلت منو وجرت عشان تعمل زي ما قال ليها..وهو طلع من غرفتنا انا ونوسه لقا ناس اسيل و ابوي وامي ومحمود و كلهم قاعدين ومنتظرنو قال ليهم انا من هنا ماشي الجامعه عشان اخد اقوال ليلي و لؤي انتي متأكده انها ما بتعرف زول تاني في الجامعه يا ايناس ممكن ناخد منو اي معلومه؟ اي حاجه تافهه بالنسبه ليكم ممكن تكون مفيده بالنسبه لي.. حاولو اتزكرو ما حكت ليكم بي اي زول تاني او ذكرت اي اسم؟ قاطعو ابوي و قال ليهو بنبره حاده دا ضياع زمن ما اكتر انا عايز اقفل ملف القضيه دي و بتي بفتش عنها براي... انا ما عارف الخلاكم متأكدين انها مخطوفه شنو مدام هي مشت مع الناس ديل بي ارادتها؟!
زياد اتصدم في ابوي لمن سمع منو الكلام دا واتفاجأ من حاله البرودو الهو فيها دي وقال ليهو: ما كل الحاجات بنقدر نوريك ليها لاسباب امنيه...اما من ناحيه تفتش عنها براك دي عايز اوضح ليك نقطه...اذا مخطوفه.. او مشت بي ارادتها.. او حتى لو انت قفلت ملف القضيه وطلعتني براااا الموضوع انا دا كلو ما بهمني كتير... انا كزياد ماف قوه حتخليني أوقف تحقيق.. وحأفتش لحدي اخر لحظه عن براءه...وان شاء الله حألقاهااااا خت الكلام دا حلقه في اضانك واتزكرو كويس قبل ما تقول لي بتي بفش عنها براي تاني .. وطلع من البيت ركب العربيه اتجه على الجامعه..وبمجرد ما زياد طلع ابوي اتلفت على امي وقال ليها دا زياد عبد الناصر؟! قريب بدريه الله يرحمها...امي قالت ليهو ياهو زاتو يا احمد...
____________
زياد مشى اداره الجامعه ووضح ليهم الحاصل كلو ..وطلب من العميد يعمل ليهو استدعاء لي ليلي ولؤي طلاب المستوى الاول في قسم الهندسه ...و ينزل بيان هام في البورد يوري فيهو الطلبه انو اي زول شاف سلوك غريب حصل مني او من رحيق يتصل بي رقمو او يجي مكتب الاداره وهم يتصلو بيهو ...
فعلا حصل زي ما طلب و عملو استدعاء ليهم الاتنين... لؤي كان مستغرب و ما فاهم شي... بعكس ليلي الانفقعت بالبكا بمجرد ما جابو ليها سيرتي..وقالت لي لي زياد الكان بسمع فيها بكل حواسو: ايام رحيق حبوبتها عيانه ما كانت بتجي الجامعه... فأنا مشيت عشان اكفر ليها وقلت ليها بالمره حولي لي تسجيل محاضره كانت فايتاني لانها ما حتجي الجامعه قريب... وشكلو اتحول لي معاهو تسجيل مكالمه ليها مع واحد بالغلط...ليلي بقت تبكي وتشهق وواصلت وهي بتقول ليهو لمن فتحت التسجيل و سمعتو ما عرفت اكلم منو او اتصل بي منو خفت و ما عرفت اتصرف كيف... اتصلت بي براءه تلفونها اداني مقفول وما خش معاي
زياد قام و قال ليها بسرعه افتحي التسجيل .. واول ما فتحتوووو التسجيل بدا بي صلاح البقول لي رحيق الدنيا انقلبت اديتي البت شنو بلعتو انطقيييييي.... و انتهى بي انو بقول ليها الحل انو براءه تكون وحده من الخمسه بنات الحيتباعو للرشيد... واختصري على على روحك الطريق بي ابسط الخسائر..
____
