زياد قبل على يحي وهو مخلوع وقال ليهو طيب والبت دييييك منووووو؟!!.. يحي قال ليهو ياتو بت تاني يا زياد
زياد عاين لي رحيق الاتوترت لمن فهمت انو قاصدني وقال لي يحي :في حاجه غلط دي ما ياها نفس البت الشفتها في الصيدليه...
يحي بحيره: كيف يعنيييي!! زياد قال ليهو كدا عديل دي ما نفس البت الكانت شغاله في الصيدليه لمن انا مشيت يا يحي ما نفسها ... يحي قال ليهو وطيب الشفتها دي منو؟! زياد اتقدم خطوتين ووقف لي رحيق في وشها و قال ليها جاوبي ليهوووو
رحيق رجعت تلاته خطووات لي ورا وقالت ليهو بتوتر : ش.ش.شنووووو
زياد ضرب الطربيزه وهو قاصد يوترها زياده وقال ليها : شنوووو الشنوووو سؤالو واضح دي منو الانا شفتها في الصيدليه و كانت شغاله مكانك؟
رحيق حاولت تستجمع نفسها وتتكلم بثقه لانو صلاح حزرها ووراها تتصرف كيف اذا سألوها سؤال زي دا.. فطوالي قالت ليهو مش قصدك يوم انت جيت وانا كنت تعبانه و عيانه شويه!! ...زياد عاين ليها بعدم استعاب.. و يحي قال ليها ايوااااا يعني افهم من كلامك انو دي انتي زاتك!... رحيق قالت ليهو ايواااا ويمكن عشان اليوم داك ملامحي كانت مرهقه شويه... وهسي اثار الضرب في وشي زياد ما قدر يميز شكلي كويس..زياد قععد يضحكككك في كميه الثقه الهي بتتكلم بيها واصلا ماف علاقه بين ملامحي و ملامحها... و يحي قال ليها اسمو جنابو زياد انتي ما قاعده في جبنه بتتونسي مع واحد صحبك سامعه..
زياد وهو بضحك قال ليها بي استهتار :خليها خليها تواصل يا يحي.. كدي عرفنا وشك المره فاتت مرهق و المره دي مشوه وانا طبعا لأني عميان وما بعرف أميز ما عرفتك... عيونك الحصل ليها شنو..
يحي : بتكون كَشّت من البكا يا زياد ما تظلم البت ساي .. و بقا يكورك عادل يا عادل... عادل جا داخل يحي قال ليهو مروان بستجوب في صلاح عدنان صح؟
عادل : ايوا يا سعادك...
يحي :قول ليهو رحيق ما نفس البت الشافها زياد في صيدليه صلاح... و خليهو يسألو و يعمل معاهو الواجب لحدي ما يورينا البت دي منو.. عادل قال ليهو حاضر و طلع...
زياد عاين لي رحيق و قال ليها : اها لسه مُصره على موقفك ولا غيرتي رايك؟!
رحيق : يا جنابو زياد لو ما مصدقني انا ممكن احكي ليك كل الحصل يوم جيت الصيدليه بالتفصيل... زياد قال ليها يعني لسه مُصره تكضبي انتي ادرى و كورك لي عادل يجي يسوقها...
بعد نص ساعه مروان جا داخل المكتب وطوالي قال لي زياد من دون مقدمات انت متأكد انها ما نفس البت؟
زياد : استغفر الله العظيم اللهم طولك يا روح...هسي كنت بقول لي يحي و حأعيد ليك نفس الكلام... البت الشفتها في الصيدليه لمن مشيت ياها البت كانت البتكورك براااا وتضرب في الارض قبيل ... وانا كنت قايلها رحيق لمن قلت رحيق ما تطلع ...
يحي : انت صلاح قال ليك شنو؟ مروان قال ليهو بحيره والله صلاح قال لي ماف زول اشتغل معاهو غير رحيق...و لمن قلت ليها حنتأكد لمن نشوف تسجلات كاميرات المراقبه... قال لي كاميرات المراقبه معطله ليها اسبوع.. لكين ممكن تشوف تسجيلات الاسبوع القبل دا لانها اشتغلت معاي اسبوعين...
زياد وهو بكورك : ما اكيد لمن نشوف تسجيلات الاسبوع القبلو حتكون رحيق الشغاله معاهوووو دا ماجادي ولا شنووو..البت انا لاقيتها عندو الاسبوع دا..يعني الكاميرات دي من دون الايام ما لقت تتعطل الا في السبوع دا..
يحي : حيكونو حذفو كل تسجيلات المراقبه لانهم ما بالغباء دا.. في لعبه في الموضوع نحن لازم نعرفها.. و يا زياد انا زول بعرف البنات كويس و البت الكان بتكورك قبيل دي واضح زي عين الشمس انها بت ناااس و ملعوب عليها...
زياد : البت بتتسطل عليك الله يايحي .. ود ناس انت دا...
مروان : يمكن ما بي ارادتها... و صلاح هو البخت ليها الحبوب ولا المصيبه دي من غير ما تعرف.. لانو براك قلت اتوتر لمن كنت عايز توديها المستشفي و اداها قهوه وبقت زي الحصان... الليله انا لو ببلع بي اراتي ما بوصل نفسي المرحله دي...ولمن انت جيت ما كان حتقول ليك انا تعبانه وحاسه نفسي بموت لانو حتكون عارفه نفسها مهببه شنو...
زياد قال ليهم وهو شبه اقتنع بي كلامهم : الجا دفع الضمانه و استلمها منو يا يحي... يحي قلب صفحات الدفتر القدامو و قال ليهو استلموها ابوها و اخوهاااا دقيقه اضرب ليهم ومسك التلفون اتصل على الرقم الانا اتصلت فيهووو... وقال ليهم الرقم بديني مقفول.. زياد قال ليهم انا ما مطمن ما كنت متوقع صلاح يقول نفس كلام رحيق...وبما انو الاتنين نكرو انو انا شفت بت غير رحيق ومصرين كل الاصرار و بكزبو في عيوني.. معناها هم متفقن مع بعض من قبل ما نعتقلهم و متأكدين انو لمن نعتقلهم حنسألهم السؤال دا...
يحي حك راسووو وقال ليهم انتو عارفين لو كلام زياد دا طلع صاح وهم بالجد عارفين انو نحن حنعتقلهم واتفقو على كل شي... معناهااااا الحاصل دا كلوووو مخطط ليهووو من يوم قبضنا مشاكل لحدي ما مشاكل قال لينا في تسليم بضاعه في كافي النجوم
مروان زفرررر وقال ليهم : السؤال المهم هم حيستفيدو شنوووو من دا كلوووو؟ ... ولي بدخلو نفسهم في حته ضيقه معانا؟ في حاجه ناقصه وانا حاسي انو مفتاح الكلام دا كلو مع صحبت رحيق دي...حاولو في الرقم لحدي ما يخش معاكم... و لو ما خشه حاولو تصلو ليها بي اي طريقه..ومشاكل لازم ياخد ليهو قرصه صغيره كدا في اضانو ... انا ماشي البيت نتلاقى بعد اسبوعييين
_____________
اسييييل الحقيينا يا اسيلللل الساعه ماشه على وحده صباحا واختك لسه ما جاااااات...وتلفونها مقفول كلو كلو...
اسيل وهي بتكورك : اختييي منووو يا اميييي...
امي وهي بتبكي : برااااءه اختك براءه يا اسيل ..مشينا ليها في الصيدليه لقيناها مقفوله.... و محمود لف بالعربيه كل الشوارع الحولينها ماف ليها اي اثرررر..ولحدي اسي بفتشو هو وايناس ما لاقنهاااااا...اتصلت على كل البنات البتعرفهم قالو ليهم زمن ما اتواصلو معاها..
اسيل قفلت الخط و صحت منير و ساقو ريل و ومشو بيتنا لقو امي حالتها بالبلاء... اسيل بقت تكورك وتقول ليهم طفشتووووو البت انتي وابوي ان شاء الله ارتحتوووو البت ما دايره الولد.... ما دايرااااهوووو قالت ليكم محمد ما طايقني.. تلفون ياخ ما رفعو ليهااااا ... بكتتتت ليكم لمن الله غفر ليها ما نفع...مثلت ليكم انها مجنونه ما نفع... اها طفشتتتتتت...و بقت تكورك لحدي ما جو محمد و نسيبه و الجيران بي صوت كواريكهاااا... و اي زول عندو عربيه اتحرك و بقا يفتش معاهم
____________
فتحت بسبب صوت الازعاج الشديد... وصوت الآلات و الضرب على الحديد واللّحااااام... لقيت نفسي مربطه في كرسي و حوليني الاربعه بنات الكانو معاي في القسم.. تلاته لسه مغمى عليهم... ووحده بتبكي من غير صوت و دموعها بس جاريه...وملصقين ليها خشمها و مربطه زييها وزي باقي البنات...فهمت اننا مخطوفين والسبب في دا كلو رحيق ...ما قدرت ابكي الدموع اتحجرت في عيوني...اول ناس جو في بالي امي و اخواتي حيكون حالتهم كيف؟ وابوي حيعمل شنو؟! .. وعزيز و ليلي و لؤي و بقيت اتزكر في الناس البعرفهم نفر نفر... و انا بقول يا ربي انا تاني حأشوفهم؟... اتزكرت انو الليله مفترض خطوبتي الانا اصلا كنت شايفه انها ابشع حاجه ممكن تحصل لي ...العبره خنقتني و قلت في نفسي ياريتني لو كنت هسي قاعده في بيتنا و بتجهز لي خطوبتي من محمد وبقول يا رب انا راضيه انو ابوي يعرسني لي محمد ارحم لي ميه مره من الانا فيهو هسي يا رب تطلعنيا من هنا سالمين و بقيت استودع في نفسي الله و ادعي " اللهم ما اخشاااا ان يكون صعباً هونه؛ وما اخشااا ان يكون عسيراً يسره؛ واما اخشاااا ان يكون شراااً اجعل لي فيه خير ولا تجعلني اخشى سواك يا رب العالمين"...دموعي خالص ما كانت راضيه تنزل... بعد شويه جا داخل راجل كبير في السن و بقا يعاين لينا بنظرات مقرفه و مستفزه وحده وحده وهو بقول جميل جدااااا وبحسب واحد اتنين تلاته ولمن وصل خمسه ضرب لي واحد و فتح الاسبيكر وقال ليهو صدام نحن ما اتفقنا على كدا ديل خمسه بنات...
صدام بنبره صارمه : اسمع هنا يا الرشيد دا البنقدر عليهوووو ودي اخر مره نشتغل فيها معاك.. استلم بناتك ويا دار ما دخلك شرررر...قال ليهوووو حسن نبرتك و انت بتتكلم معاي..كان تتفاصح و تقول الكلام دا قبل ابوك يتسلم حق العشره كااااااامل مكمل و يتصرف فيهوووو... انا م بستلم لي حاجه ناقصه لمن ابوك يطلع من الحراسه و يتمهم لي عشره بعداك بستلم و قفل الخط في وشو... انا والبت بقينا نعاين لي بعض بصدمه و تقريبا هو كان قاصد يسمعنا الكلام دا...
________
استمر الحال دا يومين.... ناس بيتنا بفتشووو فيني على اساس اني شارده من البيت عشان م يخطبوني لي محمد.. ولمن قنعو من رجعتي بقو يفتشو في المستشفيات ... و يحي بحقق مع رحيق و صلاح عشان يعرف انا منوووو.. والسبب المخليهم يكضبو و يقولو انو ماف وحده كانت شغاله في الصيدليه غير رحيق شنو...بس من دون اي فايده...في النهايه يحي كلم عادل واداهو اسمي عشان يعرف كل المعلمومات البتخصني عشان يقدرو يصلو لي...اما زياد كان مركز مع قضيه العدناني و بحاول بكل الطرق انو يثبت عليهو اي حاجه عشان ما يطلع وتعبهم يروح ساي ... بس العدناني طلع منها زي الشعر من العجينه بي محامي وعرف بي عمله رحيق و صلاح و قلب الدنيا فوقاني تحتاني و بقا يفكر في حل عشان يطلعهم من الحراسه و الورطه الدخلو نفسهم فيها دي.. اما انا والبنات كنا عايشين على المخدرات البدونا ليها صباح و مساء... لدرجه انو بقينا ما واعين بالحاصل حولينا ومقفولين في غرفه لحدي ما يتمونا عشره بنات و يسلمونا للرشيد ...لحدي ما امي و منير و محمود قررو يبلغوووو و مشو القسم وامي بتبكي وحالتها يرثى لها فتحو بلاغ واول ما دخلو بياناني ظهر ليهم اني كنت ممسوك علي في نفس القسم دا قبل يومين وابوي و اخوي استلموني..
امي هبطط وبقت تبكي و قالت ليهو بتي ما عندها اخو وابوها برا السودان... و منير و محمود حليهم برد وقالو ليهو انت متأكد انو دي براءه احمد كدي شوف تاني انت شكلك ملخبط في الاسامي ?!.. الضابط قال ليهم ماف اي غلط كدي ممكن تستنوني هنا دقيقه... ودخل المكتب لي يحي وزياد وقال ليهم البت البتفتش عنها يا جنابو يحي ..
يحي قام بسرعه : اي براءه احمد وكمل ليهو اسمي للنهايه وقال ليهو مالا عادل عرف اي حاجه جديده ... الضابط قال ليهووو لالا اهلها برا بسألو عنها وقالو انهم ما جو استلموها وهي ما عندها اخو اصلا و ابوها برا السودان ..زياد لمن سمع اسمي كامل طلع براااا وهو شبه بجري وهو بقول بي نفس شبه مقطوع وينهم اهل براءه... امي ومنير و محمود قالو ليهو بنفس الصوت نحن اهلهاااا... مشا لي امي و قال ليهااااا انتى حليمه مرت احمد ... جيران ناس بدريه الله يرحمهاااا؟!
محمود قال ليهو انت بتعرف خالتي من وين؟!.. زياد مجرد ما محمود قال ليهو كدا.. قعد في الكرسي و ختت يدينو الاتنين في راسو...يحي لحق زياد لقا ناس امي بعاينو ليهو وهو خاتي يدينو في راسو زي الكأنو سمع خبر وفاه..
__________
