وبي اي طريقه خلي براءه تجي تسد ليك نظام الصيديله قريبه من بيتهم ...
رحيق بغيظ : صلاح انا من قبيل بأذن في مالطه؟..
صلاح : انتي نصحتيني صاح؟ما قصرتي عملتي العليك وزياده ما عندك شغله بالباقي...وغمز ليها وواصل كلامو.. بعدين انتي زعلانه مالك؟ ما يكون بس الفي بالي و لسه ما قادره تتجاوزيني...
رحيق بكواريك : زعلانه؟ ازعل على منو عليييك انت؟ ما خلااااص ما شاء الله ذو خلق ودين كيف ما ازعل عليك...صلاح قعد يضحك وقال ليها اها يا العفيفه النازله من الجنه...نحن الاتنين من نفس القالب عشان كدا ما تتفاصحي...واسي لو ما زعلانه وميته من الغيره اثبتي لي واعملي زي ما قلت ليك.. قالت ليهو حأثبت ليك يا صلاح لكن كان عاينت ليك تعال تف لي في وشي دا ... ومشت وهي بتقول بينها و بين نفسها حأندمك..ولو ما شربتك من نفس الكاس الشربتني منو ما ابقى اسمي رحيق
______________
صحيت صليت العشاء ... وانا ماشه علي المطبخ عشان اكل...سمعت امي بتقول لي اسيل براءه ما جابت ليك ولا لي اختك سيره محمد ولا زياد... طوالي دخلت ليهم و قلت ليها ما جبت ليهم سيره يا امي ولا حأجيب...ومشيت المطبخ ختيت لي مكرونه في صحن و قعدت عشان اكل... جاتني امي قالت لي انتي يا بت عايزه تجلطيني... انا ما عارفه قوه الراس دي جايباها من وين...
انا ختيت الصحن من يدي و قلت ليها امي انا حاليا ما خاته موضوع العرس في راسي .. و تحديدا لمن اجي اعرس بعرس زول يختارني و اكون مرتاحه ليهو و متقبالاهو ودا حق من حقوقي.. لاني انا الحأعيش معاهو ما انتوو ...وين قوه الراس في الموضوع...قلتي لي استخيري ... استخرت يا امي وانا ما مرتاحه وما حاسه ولا بذره قبول...الزواج دا قبول ولا حاجه تانيه... بقيت ابكي وانا بقول ليها عليك الله يا امي اقنعي ابوي اني ما عايزه اعرس جبر هووو يااااخ ... حضنتني عليها و قالت لي سمح يا بتي مع انو انتي عارفه و انا عارفه ابوك حيقول شنو لكن بحاول معاهو عشان بعدين ما تقولي امي ما وقفت معاي... حسيت بفرحه كدا وامل.. لانو امي المره دي حتقيف معاي... ولي اول مره حتحاول تقول لي ابوي البتعملو في بناتك دا ما صح...كنت دايما بقول لي اسيل و نوسه يمكن لو امي ما كانت بتمشي لي ابوي غلطو..كان ِوعَاااا على نفسو شويه ورجع ابوي الزمان...لكن امي بتقول ليهو حاضر في الصح والغلط .. لدرجه انها ادت نوسه كف عشان ابوي قال ليها كفتيها لانو سمعها بتضحك بصوت عالي وهو بتكلمم مع امي في التلفون...في حين انو في يوم من الايام هو كان سبب نفس الضحكه دي...
بسبب تغّير ابوي المفاجئ دا بقا عندي عقده وما بستأمن زول.. ومتوقعه من اي زول انو يتغير علي في اي لحظه... اسيل جابت لي كبايه مويه شربت و مسحت دموعي وضحكت قلت ليها ما تقولي لي بايتين معانا؟
اسيل بضحك: انتي عندك انفصال يا بت اسي مش كنتي بتبكي.. يعني خلاص مشكلتك الاساسيه اتحلت... دي بقت مشكلتك... قلت ليها دي اكبر من مشكلتي الاساسيه... دايرين ننوم عليك الله بكره ريل من الصباح حتجي تدخل لي عصايتها البتنور العاجباها دي جوا عيني... اتقفلو انتي و بتك في اوضه ما دايرين ازعاج... انا عندي امتحان...كفايه علينا نسيبه البتجي من سته صباحا ..كمان تبقا علينا نسيبه وريل..
امي : شي غير لسانك الطويل دا جايب ليك الكفاوي ماف...نسيبه دايراك لي ولدها عشان قطامتك دي قالت ولدها مسكين الطير ياكل عشاهو ودايما حقو رايح دايره ليهو مرااا قادره تاخد لي حقو ...
انا : ولدها مسكين هه والله دي قصه دي !! بودي قارد انا ولا حاجه اا!! ...سجمي جدا زياد دا برضو امو شافتني بشاكل في النسوان البضاحكو ويتونسو في البكا يا ربي دايراااني حرس شخصي لي ولدها برضو ولا شنو ...يعني بعدين اولادي كان سألوني عرستي بابا لي اقول ليهم ابوكم مسكين عرستو عشان احرسو واخد ليهو حقو!! معقوله بس... امي و اسيل قعدو يضحكووو...شلت صحني وقلت ليهم هييي يلا تصبحو على خير اخر عمري دايرني ادافع لي راجل طول وعرض .. ومشيت عملت لي كبايه جبنه و فتحت الشيت ما فهمت اي شي الكلام بقا لي طلاسم طلاسم...بقيت افتح تسجيلات المحاضرات الحولتها من رحيق اسمع الشرح... بعدين ارجع لي الشيت.. قريت لي زي محاضرتين بس نعسته...نمت زي ساعه كدا بعد شويه اسمع ليك غنيه( ماما جابت بيبي....بيبي حلو صغييير)دي في الحلم بي صوت عااااالي...
الله!! طيور الجنه الجابها احلامي شنو... والغنيه لسه مواصله ومعاها صوت زول بقول لي انتي حالتووووو... انتي حالتووووو ولا وحش..
حالتوووو!! الصوت دا ما غريب علي نهائي...بعد شويه صحيت بي خبته في راسي... قمت مخلوعه زحيت البطانيه كدا من وشي لقيت ريل راكبه فوق لي شايله عصايتها ... و طيور الجنه شغاله بي اعلى صوووت...قربت ابكي... وريل لسه معلقه و بتقول لي انتي حالتو؟ قلت ليها تصدقي انا خالتو للاسف يا ريل انا خالتك ... قالت لي حالتو نوسه ولا حالتو برو... قلت ليها يعني يا ريل انتي عايزه تتعرفي علي الساعه 5 صباحا..
بقت تحسب لي بي يدينها حمسه... ثته... ثبعه.. تمنيه
يا الهي يا رب... ريل اقول ليك حاجه انا وحش..انااااااا دي وحش كدا مرتاحه؟...
جرت و هي بتقول لي امها الوحش قاااااادم ... استغفرت و قعدت اضحك... مشيت لقيت نوسه و اسيل ميتين من الضحك..قلت لي اسيل وانا ماسكه راسي انتي بتشربي البت دي شنو من الصباح... ريل قالت لي حليب ... ضحكت وقلت ليها انتي متأكده انو حليب ما حاجه تانيه و نزلت ليها تحت واديتها ضهري قلت ليها اركبي ارح نصلي صليتي الصبح؟ ... قالت لي لاااا لاااا واتشعبطت في ضهري من ورا .. قلت ليها يلا ارح نتوضأ نصلي طيب عشان تجهزي للروضه بابا حيجي يسوقك.. جهزتها للروضه ومنير جا ساقهم هي واسيل ... و نوسه مشت مع محمود الجامعه...بقيت قاعده انا و امي في البيت...فتحت الاغاني و نضفتتت بي مزاااااج عالي كنت مبسوطه انو امي حتتكلم مع ابوي... صح ابوي اتغير شديد لكن شويه كدا لمن امي تقول ليهو كلام بقلبو في راسو ومرات بلين لانها نادر ما تعاكسو في حاجه ...لؤي اتصل علي قال لي زي الساعه ٣ كدا بضرب ليك عشان تطلعي لي على الظلط اِناولِك الشيت وما تتأخري لي انا لاحق لي زول.. قلت ليهو سمح ما بتأخر ...مشيت كلمت امي قلت ليها امي عندي زميلي جايب لي شيت الساعه تلاته حأمشي استلمو منو...عاينت لي بطرف عينها وقالت لي زمييييييلك .. قلت ليها والله يا امي زمييل..
قالت لي دا بتااااع السندوتشات صاااح ماهي بتبدا كدا مره سندوتشات و شي قروش وشويه شويه شيت جايبو لحدي البيت يا بت هييييي انا الحركات دي ما بتنفع معاي ... قلت ليها استغفر الله يا امي ندمتوني اني حكيت ليكم ..
امي :كدي قومي امشي سوي الفطور وبنتفاهم...
فطرنا و بعد كميه من السين والجيم قالت لي اوعك تتأخري سامعه قلت ليها حاااضر يا امي دقيقتين بس والله ... قعدت اقرا لحدي ما لؤي الساعه 3 ونص ضرب قال لي انا في الظلط... كلمت امي قلت ليها انا طالعه الولد ضرب لي
قالت لي هو ما يجيبو ليك هنا
انا : يا امي قال مستعجل...
امي: مستعجل مالو ان شاء الله.. وقبل تتم كلامها تلفونها ضرب شكلو ابوي...حمدت ربنا انو انقذني من استجوابها و لبست لي توب و طلعت سرعه سرعه ...وهي اتكلمت مع ابوي وفتحت معاهو موضوعي قال ليها فتحيه انا م بكسر كلمتي عشان خاطر دلع بناتك... قالت ليهو يا احمد ما حنكسر كلمتك بس بنأجل الموضوع لحدي ما تخلص الجامعه عشان هي عاملاها عزر.. قال ليها وينها هي اديني ليها طيب ...
امي : مشت تستلم ليها شيت من واحد زميلها..
ابوي بكواريك : ما عايزه تنستر و تعرس عشان دايره تنطلق صح وانتي بتقولي لي عايزه تقرا...قرايه شنو وهي مباريه لي الصعاليق لمن بتجيب منهم شيتات لكن انا بربيها..لمن تجي قبل تعمل اي شي خليها ترجع لي سامعه ولا ما سامعه وقفل الخط ما اداها فرصه زاتو تتكلم...
جيت راجعه شايله الشيت في يدي وبقلب فيهو قلت لي امي اقسم بالله كلام الطير في الباقير يخربني كان فاهمه شي.. ما ردت علي لمن عاينت ليها لقيتها ماسكه التلفون لسه في يدها و بتعاين لي زي الكأني عامله مصيبه .. قلت ليها مالك قاعده كدا؟ ..قالت لي هاك ارجعي لي ابوك دايرك...شلت منها التلفون ويدي بترجف عرفت انو امي حكت ليهو لانها مستحيل تدس عنو حاجه... قالت لي اضربي حتقعدي تعايني للتلفون كدا ... اتشجعت ورجعت ليهو... رد من اول جرس.. قلت ليهو الوووو ابووي كيفك.. هاجمني وقال لي جابت ليها انطلاقه؟ و حوامه مع الصعاليق..
قلت ليهو بخلعه وتبرير : ابوي انا مشيت خمسه دقايق ما تميتها شلت الشيت و جيت طوالي... عندي امتح
قاطعني قال لي خمسه دقايق ولا ميه ساعه ما بهمني كتير محمد جاي بعد خمسه يوم انا هسي بضرب لي ناصر بديهو الموافقه... دمعتي طوالي جرت وانا بسمع فيهو قلت ليهو لكن يا ابوي نهرنييي قال لي اسكتيييييي والله تفتحي خشمك دا اسي اركب اجي اتكيك و اضبحك ادي التلفون دا لي امك...مديت التلفون لي امي وانا دموعي عشره عشره انتظرتها تبرر ليهو ولا تقول ليهو اي كلام... لكن هي بس كان بتقول ليهو حاضر من غير اي تبريرات ..في النهايه قالت ليهو حاضر يا احمد اسي بضرب لي امال ام زياد بكلمها..
______________
زياد كان قاعد مع الشباب في الجبنه... قال ليهم انا امشي البيت بعد دا...
مروان: انا العندي مراااا في البيت ولو اتأخرت حتسود عيشتي قاعد... انت ماشي مالك...
يحي :احتمال عندو مكالمه... وقال ليها ماشي الجبنه.. ولمن اجي برجع ليك ما تنومي..
زياد ضحك وقال ليهو مااا دي حركاتك ...والله يا مروان كان شفتو بترقد للبنات كيف والبنات يضاحكو ليهو هيهيي و هيهيي ...تحلف تقول ارقوز ما ضابط مباحث...
مروان وهو ميت من الضحك:شفتو مالي ما شفتو...يا زول مشينا كان شارع النيل جو بتين مزز قاطعات قعدو جنبنا... اقسم بالله يا زياد في كسر من الثانيه قام مشا اشترى ليهو كرت خلعني زاتو قال لي بصوت عالي تقول مغالطو اسمعني الكرت دا ابا ينزل لي كدي جربو عندك... شلت منو الكرت وقبل اجربو ختفو مني و قال لي لالا ياخ ابا ينزل عندك برضو...وطوالي يا زول قبل ليك على البنات قال ليهم معليش ياخ لو في وحده فيكم عندها شريحه زين تجرب تنزل الكرت دا وتحول لي الرصيد عندي اتصال ضروري الكرت ابا ينزل لا عندي لا عند صحبي... وسبحان الله الكرت نزل عند البت.. يعني سبحان الله الكرت الابا ينزل عندنا الاتنين نزل عند البت شفت الدنيا دي كيف... المهم يا زول البت حولت ليهو الرصيد...قال ليها بي صوت كدا طلع من وين ما عارف..ما قصرتي والله تعبتك معاي شكرا ليك يا منو؟! ... البت قالت ليهو مزن.. صحبك حفظ الرقم بي مزن...بعد يومين كدا مشينا كافي اشوف ليك مزن و صحبتها جاين علينا طبعا ضحكت بسسس حأعمل شنو سلمو وقعدووو ...وياهو هييهيهي و هيهيهي مع يحي...
يحي وهو بضحك : سبحان الله ياخ شفت الدنيا دي ضيقه كيف صدففف ياااخ ...زياد قعد يضحك وقال لي مروان اقطع علاقتك بي يحي دا احسن ليك... والله اسراء تعرف بي الصُدف دي تضيق عليكم الدنيا بالجدددد وتقرا على روحك الفاتحه..
مروان بضحك: اييييك اسراء يلا يلا يا جماعه انا ماشي والله بعد دا...
يحي : اسي في داعي الواحد يعرس و ينهرش بالطريقه دي...وقبل على زياد قال ليهو انا الليله متعشي في بيتكم... زياد قام سرعه سرعه و قال ليهو والله من هنا ما بتباريني كفايه امبارح بايت معاي الليل كلو ما نمت...اقسم بالله يا مروان الليل كلو شغال وس وس وس يوسوس في اضاني زي السوسيو الخانقو شافع بتكلم في التلفون ما سكت كلو كلو لي الصباح...
يحي و مروان قعدو يضحكو
زياد بهظار : قوم يا يحي امشي بيتكم ما تتأخر على البت حتكون منتظراك متين ترجع من الجبنه عشان ترجع ليها قوم ما تتأخر عليها..و ركب العربيه سرعه سرعه مشا البيت خلاهم بضحكو...
لمن دخل البيت لقا امووو قاعده في طرف الكنبه جنبها اساور بتكلمو.. واول ما شافوهو سكتو.. قال ليهم خير مالكم صاحين وقاعدين كدا... اساور قالت ليهو امي مصره تكلمك الليله ما عارفه الفرق بين الليله و بكره شنو... زياده قال ليهم تكلمني بي شنو؟
امال بتوتر: حليمه اتصلت... قال ليها بي استفهام! حليمه منو؟..
اساور بتردد : ام براءه... زياد غصب عنو قلبو رفاهو وقال ليها انتو حتقولو لي الكلام بالتقصيد ولا كيف..ردت ليهو امال بحزن والله يا ولدي حليمه قالت البت عايزه تقرا و ما خاته فكره العرس في راسها هسي... ولمن قلت ليها طيب لي اتأخرتو علينا في الرد قالت لي انا اصريت على براءه تستخير قلت يمكن تغير رايها.. لكن ماف نصيب.. وزياد ربنا يسعدو ويديهو بت الحلال...
زياد بلع ريقو سكت مساااافه واخد ليهو نفس طوييييل وقال ليهم وانتو زعلانين لي... خلاص ماف نصيب... ان شاء ربنا يسعدها و يوفقها في قرايتها... العرس دا قسمه و نصيب... و قسمتي ما معاها...
امال قالت ليهو زي البتواسي في نفسها وفيهووو ربنا يديك بت الحلال يا ولدي ... و يسعدك في الدارين هي الخسرانه ...اساور قامت ووقفت قصاد اخوها وقالت ليهو هي الخسرانه والله... بكره تجيب ست ستها... قال ليهم البسمعكم بتحكو عنها ليكم عشره يوم نحن بنصبح و نمسي بي سيرتها.. براءه براءه براءه قرقرتو اضاني ما يسمعكم هسي وانتو بتقولو هي الخسرانه..من هنا و لي قدام سيره العرس لو ما فتحتها انااا ماف زول يفتحها معاي ... وقومي يا اساور اعملي لي اي حاجه اكلها واكوي لي قميص لي بكره...
اساور وهي بطنطن: خلاص عُدناااااا... زياد قال ليها قلتي شنووووو! قالت ليهو ولا حاجه يا زياد.. ودخلت المطبخ...
____________
انا اسلوب ابوي معاي كان مزعلني اكتر من موضوع محمد... قلت لي امي جمله وحده بس ابوي ما عارف تربيتو شنو عشان يقول علي مطلوقه؟...سكتت ما عرفت تقول لي شنو...للحظه كدا حسيت انو انا ماعندي ضهر...ولا زول اتسند عليهو ...الشيطان بقا يلعب لي في راسي... و الكلام بقا يجيني دفعات دفعات... انتي ماف زول حاسي بيك حتى امك وابوك... انتي دايما البتقولي معليش وما مشكله... انتي كل الناس جايه عليك حتى اقرب الاقربين ليك... انتي ماف زول فاهمك... انتي و انتي وانتي..و خلاص اتملكني ضعف كدا والدنيا مسخت علي.. طوالي استغفرت و قلت يا براءه ما تدي الشيطان فرصه يستغل ضعفك ويملا راسك كلام فارغ... الدنيا دي ابتلاءات وربنا اذا احب عبد ابتلاه وصليت ركعتين و كررت نفس الدعاء البقولو طوالي " اللهم ما اخشاااا ان يكون صعباً هونه؛ وما اخشااا ان يكون عسيراً يسره؛ واما اخشاااا ان يكون شراااً اجعل لي فيه خير ولا تجعلني اخشى سواك يا رب العالمين"
وفتحت التلفون دخلت الموقع حضرت محاضراتي بتاعت الانجليزي و الفرنسي...لمن دخلت الواتس لقيت لؤي عامل ليهو قروب بتاع مراجعه فيهو انا وليلي و رحيق و رقم غريب... فتحت صوره البروفايل عشان اعرف دا رقم منو و كانت الصدمه بالنسبه لي انو دا عزيز كان ماسك بت لابسه روب تخرج بطريقه لطيفه شديد عرفت انو دي اختو...اترسمت في وشي ابتسامه من غير ما احس وحفظت الصوره في التلفون و طوالي جبت لي كبايتين مَكْ لونهم ابيض من دولابي و قررت ارسم ليهم صورتهم دي لكن تكون اقرب للكرتون كل واحد في كبايه...طلعت ادواتي وبديت ارسم شويه الرسم بخفف لي التوتر...وعلى كدا واصلت يومي عادي زي الكأنو ما حصل شي...نوسه لمن جات من الجامعه كانت حاسه انو في توتر حاصل في الجو لانو انا ما من عوايدي اسكت و ما اتكلم...مسافه ما استحمت و غيرت هدومها و اكلت ليها حاجه وجات قعدت جنبي عشان تسألني مالك... سمعنا صوت زغاريت نسيبه في الحوش....طلعنا انا وهي الاتنين مخلوعين...ونسيبه اول ما شافتني جات سلمت علي وقالت لي ربنا يتم ليكم على خير...و سلمت على امي و نوسه و هي بتزغرت..
نوسه بإستفهام : في شنوووووو؟ ردت ليها نسيبه في شنووو كيفن يعني يا ايناس.. امي اداركت الموقف سرعه و قالت ليها كيف يعني في شنو يا نوسه... الليله برو ما كلمت ابوها بموافقتها بي محمد...نوسه عاينت لي ونظراتها كلها استفهامات.. انا اخدت لي نفسسس طويييل وقعدت في اقرب كرسي وختيت يديني في وشي قلبي كان حيقيف كنت قايله ابوي عقد لي هناك وانا اخر من يعلم لانو دي حركاتو وعادي ممكن يعملها ... نسيبه عاينت لي و قعدت تضحك و قالت لي امي خجلتي البنيه يا حليمه من شده ما خجلانه لمن غتت وشها بيدينها ...لاول مره تضحكني بالجد رفعت راسي و انا بضحك قلت ليها غايتو هَم يضحك و هَم يبكي امي قاطعتني وقالت ليها خشي اتفضلي يا نسيبه...
نسيبه: انا ماشه ابشر اخواتي بالخبر دا.. اول ما ناصر كلمني بالفرحه جيتكم طوالي... امي قالت ليها ما قصرتي والله ربنا يتم ليهم على خير ويكتر الافراح يا رب ...و قدمتها وقفلت الباب وراها و طوالي جاتني... قالت لي هَم يضحك و هَم يبكي دي شنوووووو اسي ...
انا : ما صحي هَم يضحك و هَم يبكي...اكضب عليها يعني...انا في شنو و هي في شنو قال خجلانه قال...
نوسه : اسي انا ما فاهمه شي الحاصل شنو... لانو الكلام القلتيهو برا دا يا امي ما دخل لي راسي.. امي حكت ليها الحاصل كلو...قبلت علي قالت لي وانتي حتعملي شنو؟ رفعت ليها اكتافي نظام ما عارفه.. امي قالت ليها حتعمل شنو يعني تسمع كلمت ابوها...عاينت لي امي ولي نوسه وخليتهم بتكلمو ودخلت الغرفه عملت فيها بقرا عشان ماف زول يتكلم معاي... نوسه جاتني وقبل تتكلم معاي ركبت السماعه في اضاني... عاينت لي مسافه و شالت تلفونها و طلعت... وانا بديت اسمع في تسجيلات المحاضرات زي الكأنو ما حاصل شي... وانا بفتش في تسجيل المحاضره السادسه و بقلب في التسجيلات... فجاه سمعت تسجيل فيهو صوت رحيق وهي بتتكلم مع واحد ...
