فتح الغرفه وهو ملهوووف لقااانا جزو مربوط ومرمي في الارض.. و جزو مربوط في كراسي.. و حالتنا تحنن الكافر...وريحه المكان كريهه و كعبه شديد بسبب انو ما كان بفكونا حتى للحمام...بقا يفتش فيني بعيونو واول ما عينو وقعت في عيني جرا علي بخوف وطلع اللصقه الكان في خشمي و قال لي انتي كويسه!؟.. بس انا كنت بعاين في الفراغ وماف اي تعابير في وشي حاول يفك لي يديني بس ما قدر لانها مربوطه بقوه والا يقطع الحبل بي حاجه...فمشى لي باقي البنات طلع ليهم اللصقات بنفس الطريقه وهو بكورك وبتكلم باللآسيلكي وبقول عاااادل يا عااادل سامعني.. حول..
عادل :سامعك يا رييسسس... حول..
زياد : خلي جنابو ريان و المعاها ينزلو لي تحت ويجيبو معاهم مطوه او اي حاجه حاده بسرعه... حول.. رحيق قاطعتو وهي بتبكي قالت ليهو انا عملت كل الطلبتو مني والبنات كويسين ما عندهم شي يا سعادتك حتخففو لي العقوبه صح..انا امي وابوي ماتو وانا صغيره ربتني حبوبتي وفتحت في الدنيا دي لقيت اهلي ناس كعبين... ما ذنبي اني اتربيت في وسط قذر زي دا... الذنب ذنب خالي حاكموهو هوووو ما تحاكموني انا...وقف قدامها واشر ليهااا علينا وحده وحده وهو بقول ليها ذنب كل صرخه طلعت منهم و وذنب كل جرح في جسمهم... وذنب كل دقيقه راحت من عمرهم وهم هنا... وذنب كميه الخوف الاتزرع في قلبهم كلوووو في رقبتكم لي يوووووم الدين... حساب الدنيا هين شيلي هم حساب الاخره....رحيق بقت تصرخ بي اعلى صوت.. الا زياد دخل ليها قطعه فخشمها ولصقو ليها زي ما كانو عاملين لينا بالضبط وقال ليها حقو الزول يخليك هنا كم يوم عشان تجربي و تعرفي كويسين وما عندهم شي دي كيف...
بعد دقيقتين جو نفس الشرطيات الضربوني في الكافي ومعاهم كم وحده تاني واول ما قربو علي صرخت بصوت مبحوح..زياد اتلفت علي بلهفه و قال ليها خليها ما تلمسيها ووقف على بعد خطوتين مني وبقا يقول لي ما تخافي ماف زول حيقدر يئذيك تاني طول ما انا موجود...وبمجرد ما قرب خطوه ناحيتي وشال منها المطوه عشان يقطع الحبل اتزكرت منظرو وهو بجدع ليهم العصايه عشان يضربوني وبقيت اصرخ زياده...بس ما اشتغل بي وقطع الحبال الفي رجليني و يديني وهو بعاين لي بندم و حسره وشفقه في نفس الوقت..كورك ليهو عادل جنابو زياد الجروح دي ملتهبه شديد و ممكن تعمل ليهم تسممم ...زياد قال ليهو طيب منتظر شنو يا عادل اتصل بالاسعاف بسرعه.. وفعلا عربات الاسعاف جات ورفعونا في النقالات ... ما كنا قادرين نحرك لا يد ولا رجل نسبه لي اننا مربوطين و قاعدين نفس القعده لينا ايام ويدينا ورجلينا شبه اتشنجت.. بس بسبب المخدر الكنا بناخدو ما كنا حاسين بي اي ألم خالص...يحي قال لي زياد انت لازم تمشي عشان ترفع التقرير لي الرئاسه... انا بضرب لي اهل البنات وواصل التحقيق مع العدناني و المعاهو... و مروان بمشي المستشفى...وعادل حيفتش المصنع لانو احتمال كبير يكونو بنزلو شحنات الخدرات هنا..
زياد قال ليهو تمام وقبل علي مروان قال ليهو وريني الحاصل اول بي اول و وركب البوكس الرفعو فيهو العدناني و رحيق وصلاح وصدام واتحركو علي القسم... و في نفس اللحظه مروان ركب الاسعاف واتحركنا على المستشفى...
____________
زياد كان بكتب في التقرير و بالو معاي..ضرب لي مروان قاال ليهو عملت شنو يا مروان... قال ليهو يادوب دخلوهم الطوارئ حالتهم صعبه شديد يا زياد الجروح ملتهبه حينضفوها اول... بعدين حيعملو ليهم كشف عشان نتأكد من نوع المخدر الفي جسمهم انت عملت شنو...
زياد بتعب: انا قربتا ..اخلص الفي يدي واجي عليكم..مروان قال ليهو ما بحتاج تجي.. امشي بيتكم ارتاح يا زياد انت ليك ايام ما نايم.. زياد قال ليهو بتلقائيه انا تمام.. انت بس اول ما يطلعوها من الطوارئ اديني تلفون عشان اطمن...
مروان بضحك : هي بس!! يعني لو طلّعو الباقين ما اضرب ليك صح؟...زياد قال ليهو اقول ليك حاجه م تضرب زاتو وقفل الخط في وشو.. يحي جا داخل وقال لي زياد نحن ننتهي من العدناني ندخل في الرشيد.. زياد قال ليهو لي في شنو؟!
يحي :العدناني قال كل تواصلو مع الرشيد كان بالتلفون و ما شافو خالص ..والوحيد الشافو شخصيا مشاكل لمن جا على اساس يستلم منو البنات..وصدام كل العارفو انو الرشيد دا ما اسمو الحقيقي ودا مجرد لقب بستخدمو في الاعمال الغير قانونيه ... وماف زول في المنطقه عارف اسمو الحقيقي..
زياد : والمشكله وين..خليهم يدخلو لي مشاكل غرفه التحقيق وانا بتصرف معاهو.. يحي قال ليهو وانا كان غالبني اتصرف معاهو يا زياد يعني!!مشاكل لقوهو مسموم وشبعان موووت
زياد بسرعه رجع اتصل على مروان..
مروان : زياد ما هو لو حتضرب لي كل دقيقتين تعال خليك جنبها.. ما ممكن كل مره اخلي الوراي والقدامي واقعد اطمن فيك..
زياد قاطعو : شددو الرقابه على البنات يا مروان..شكلو الرشيد دا شخصيه معروفه..عشان كدا عامل لي نفسو اسم وهمي ..و عشان البنات شافوهو حيحاول يتخلص منهم بي اي طريقه.. و قفل الخط ومشى لي العدناني في الحراسه مسكو من لياقه قميصو قال ليهو انتو القتلتو مشاكل صححححح....
العدناني بضحكه مستفزه: كنت ناوي اقتلوووو لكن شكلو الرشيد سبقني... زياد كان عايز يضربو كدا يحي مسكو وطلعو برا وهو بقول ليهو اهدا يا زياد ميه مره قلت ليك ما اي شي بتحلا بالعنف والكواريك... شفت لمن اتصرفت مع رحيق بحكمه قدرت تصل للعدناني.. روق عشان نقدر نفكر...
____________
ناس امي و نوسه و اسيل وريل و محمود و منير وكل اهالي البنات كانو منتظرين برااا وحالتهم بالبلاء... منتظرين على اعصابهم متين يطلعونا من الطوارئ و يرحلونا غرف خاصه عشان يقدرو يدخلو لينا و يشوفونا...بعد قريب ساعه جا طالع واحد من الدكاتره و قال لي مروان في وحده من الخمسه بنات مناعتها ضعيفه وماخده جرعه مخدر زايده... وكمان جرحها ملتهب ووسخان شديد لدرجه انو عمل تسمم في الدم انتشر في كل الجسم..عملنا كل البنقدر عليهو لكن ربنا اخد امانتو و فقدناهااااا....
_____________
زياد بعد رفع التقرير للرئاسه اتحرك طوالي على المستشفى..لمن دخل لقاااا نسواااان ببكووو بوصفووو و بدردقو بالارض قدام الطوارئ... عرف انو في حال وفاه.. سأل اقرب ضابط قال ليهو في شنو... الضابط قال ليهو بحزن في وحده من الخمسه بنات اتوفت يا سعادتك...
زياد جسمو كلو مشا مويه... و بقا بسأل في الناس الببكو عن اسم الميت لكن هم كانو في همهم وماف زول رد عليهو... فتش بعيونو عن ناس امي ما لقاهم... من بعيد شاف ريل قاعده في كرسي جرا عليها و قال ليها بصوت مبحوح ريل خالتو كويسه؟ ناس ماما وين يا ريل!!
ريل اول ما شافتو قالت ليهو بفرح عمووو زياد!! و اشرت ليهو بيدها على الغرفه القصادها طوالي وقالت ليهو حالتو هنا...وماما هناك واشرت على الكولر...لمن اتلفت شاف اسيل جايه وشايله في يدها كبايه مويه مدتها لي ريل...وقبلت على زياد و قالت ليهو والدموع في عيونها لو ما انت اختي كانت حتروح مننا...ربنا يجعل ليك في كل خطوه سعاده يا رب..
زياد بلهفه : هي كيف هسي كويسه!.. اسيل قالت ليهو الحمد لله بس لسه ما قدرنا نتكلم معاها طلعوها في الغرفه دي و نايمه ... تعال اتفضل وفتحت الباب.. لقو ابوي بكورك في امي و بقول ليها ياريتها لو ماتتت هي بدل البت ديك وريحتنا.. بسببها سيرتنا بقت في خشم البسوا والما بسواااا... دي نهايه تربيتك كافيهات مشبووووه.. واقسام و اخر حاحه ادمان مخدرااااات...دي تاني البقبل بيها منو؟ ... حتعقد لينا كدا زي وصمه العار لحدي ما نموووت...ونوسه بتقول ليهوووو دا كل هممممك يا ابويييي!!العرس!!...خساره فيك كلمه ابوي.. بتتمنى لي بتك الموت عشان حاجه مكتوبه و مقدره و ما حصلت بيدها و بي سببها ماف زول حيقبل بيهاااا...ابوي رفع يدو عايز يديها كف... محمود مسك ليهو يدوووو وقال ليهو :عمي وبحترمك وعلى عيني و راسي لكن ايناس خططط احمررر..
قاطعهم زياد الدخل الغرفه ووقف قدام ابوي و قال ليهووو انا البقبل بيهااااا
