✨ مْــــجـــــدُول الـــذهــــــــبْ ✨
- سـنـاء الــصنــهـاجــي
خرجات من الحمام كتنزل على كمايمها شافت لجيهتو كان هاز التسبيح كيسبح ، هزات الصلاية ديالها وصلاة العشا لي فاتها سلات ومشات للبلاصتها حداه كان كيسبح وساهي وهادشي لي لاحظاتو عليه .
- صفية : الحاج شنو لي شاغل بالك شتك ساهي ؟
- عبد الرحمان (شافيها تنهد تنهيدة طويلة ونطق بصوت واخد من الهبة والوقار ) :
تمنيت بنتي ياقوت يسهل عليها الله بشي ولد الناس بحال ولدي هاشم تبارك الله ماشاء الله
- صفية [ تبسمات كتفكر ] : عندك الصح والله العظيم حتى انا تمنيت ليها شي واحد بحالو ، اللع يعمرها دار ، شفتي كيفاش ماخلاناش نشدو الطريق فطوموبيل ديالك سمح لينا فطوموبيل ديالو مسكين.
- عبد الرحمان : سمح فطوموبيلتو ، وعطاني طربوش ديالو درتو على الشمس كون بقيت فطوموبيلتي مع هاد الحرارة وتشوفي [ شاف فصفية ] والله ماكرهتو للقوت
- صفية [حدرات راسها و سكتات كتخمم ورجعات شافت فيه ] : ولكن الحاج الولد عاد مطلق و ..
- عبد الرحمان [ قاطعها ] : وشنو فيها أصفية الطلاق واخا هو أبغض الحلال عند الله ولكن راه حق مشروع ، ومحللو الله سبحانه الى كان بنادم مضرور ماشي أي واحد كيطلق أصفية راه خايب علاش أنت ماديتينيش مطلق ؟
- صفية [ تنهدات تنهيدة طويلة] : عند الصح الحاج أنا غير حيتاش يلاه طلق والواحد ماتعرف شنو تحت راسو هدا مكان وصافي ، او واخا انت مطلق الحمد لله لي رزقني ربي بيك عمرك عݣرتيني ولا قلقتيني ولا نفرتيني .
- عبد الرحمان [ كيسبح ويخمم] : الحمد لله حتى أنت احسن نقلة نحمد ربي عليها ، عوضتيني على كاع الحوايج الخايبة الله يرضي عليك .. والله العظيم أصفية الى ماكرهت لبنتي تزوج ونتهنى من جيهتها
- صفية : كلنا هكاك الحاج ولكن أنت عارف بنتك ، ماتقدش تبزز عليها شيحاجة ولي بغاتها هي كديرها والى شافت شيحاجة فيها مصلحة ليها راه كديرها ، علاش انت واش الحاج دوا معاك فشيحاجة حيت شتك حكرتي على زواج قوت وهاشم
- عبد الرحمان [ حط التسبيح حدا راسو ] :
وهو مݣاليا والو غير انا لي ݣلت ، وحتى ݣاع يݣوليا أنا مانݣد نفتي رايي على بنتي الى هي مابغياش الحاجة منݣد نبزز عليها نطلبو ربي يسهل عليها ويفتح عليها بيبان الخير وتيسير ياربي .
- صفية : اللهم آمين الحاج من فمك لباب السما .
_____________________
- الليل كلو وهو موسد المخاد ، رجل منزلها ورجل هازها داير يد على راسو ويد على كرشو وكيفكر فالكلام لي ݣالت ليه ، كلامها كان كلو معقول بحال الى كدوي عليه ، كونما كانش عارف مزيان بلي داكشي لي وقع بينو وبين نسرين مافخبار حتى واحد كان غادي يݣول بلي راه داوية عليه هو نيت .
