✨ مْــــجـــــدُول الـــذهــــــــبْ ✨
- سـنـاء الــصنــهـاجــي
إذا أغلقت الشتاء أبواب بيتك .. وحاصرتك تلال الجليد من كل مكان .. فإنتظر قدوم الربيع وافتح نوافذك لنسمات الهواء النقي ! وأنظر بعيداً فسوف ترى أسراب الطيور وقد عادت تغني .. وسوف ترى الشمس وهي تلقي خيوطها الذهبيه فوق أغصان الشجر .. لتصنع لك عمراً جديداً وحلماً جديداً .. وقلباً جديداً .
- فرحبة الحوالة الدنيا عامرة ، كل واحد وجهدو .. لي قاد على الغالي شراه ، ولي قاد على الرخيص خداه وحمد الله بيه ، أما لي مسكين ماعندوش ومايكسابش ، راه كيتسنى الفرج من عند الله سبحانه ..
- و بحال كل عيد ، نزل للرحبة ، لباسو مكانش بحال اللباس لي مالف ، لابس صندالة ديال الجلد عادية ، سروال ديال الكيطمة ، واحد تيشورت فالكحل .. كان محسن شعرو ، لباسو لباس عادي .. دخل للرحبة كيدور على البياعة ويسول ، عينيه كانت كتجول ..
- خدا السومة وعرف كل حاجة شحال ثمنها ، بعد على البياعة ، ومشا حدا مالين الكرارص لي كيعاونو الناس يديو ليهم الخرفان للدار مقابل 10 دراهم ولا 7 دراهم لي كيجمعوها مساكن مرابانا تجيب ليهم باش ياخدو ديك 4 كيلو ديال اللحم ..
- وقف عند واحد السيد ، راجل كبير مسكين ، لباسو بالي ݣالس وشاد حنكو كيخمم بصوتو الرجولي المتميز ، ولكنة المسفيوية العبدية :
واحد السلامة عليكم ..
- جاه الجواب ، من صوت باينة فيه العيا ، باين مولاها هاز من هموم الدنيا قنطار :
وعليكم السلام اسيدي ..
- هاشم : وهاد العام الكسيبة زينة .. واخا كاينة الغلا شوية ..
- ياااه أولدي ، الغلا ، وغير الدرويش والمسكين هو لي واكل الضق .. غير لي عندو لي غايعيد اما لي ماعندو اولدي ، ماعندو مايدير .. كيبقاو فينا الوليدات مساكن ..
- هاشم [ حك حاجبو ] :
وايلي اعمي ، شكون لي مغايعيد ، وݣاع لي جاي لرحبة راه معيد ..
- [ تبسم مسكين وعينيه جنابهم كانو مدمعين ، أشر بيديه للشي رجال كبار كانو واقفين حدا كرارصهم ] :
هادو كاملين أولدي مامعيدينش ، كاملين مساكن كيدابزو على طرف دالخبز ... هاد الايام كاملين كيظلو تحت شموشات ، على قبل 10 دراهم ولا 140 ريال ، مغاتجيب ليهم والو مساكن .. الله يكون فالعون أولدي ..
- هاشم [ هزهز راسو ] :
اللهم آمين اعمي ، خليت ليك الراحة الله يعاونك .. خلاه ݣالس ، رجع حط يدو على خدو كيخمم مهموم ... رجع هاشم عند واحد البياع ، ختار 10 ديال الحوالة ، شراهم .. خلصهم وخلاهم عند السيد ..
- رجع شد هوندا ، وتعاون هو وشيفور ديالها حتى طلعو دوك الحوالة للهوندا .. رجع عند واحد الكساب اخر خدا من عندو 5 على دوك 10 هي 15 ..
