✨ مْــــجـــــدُول الـــذهــــــــبْ ✨
- سـنـاء الــصنــهـاجــي
- ݣالسة فبيتها كتجمع حوايجها فباليزتها وحداها خولة .. هزات فيها راسها لقاتها كتشوف فيها .. :
مالك ؟
- خولة [وقفات من فوق النموسية ، هزات باليزتها حطاتها على جنب ] :
مالك أنت لي غير ساهية ؟
- قوت :
انا ماماليش ، غير كنفكر هاد التسافيرة كيفاش غادي دوز .. مالفين كنسافرو بوحديتنا خفاف ظراف ، كنخرجو فينما بغينا ناكلو فين بغينا ، دابا ماعرفتش ..
- خولة [ ببرودة ] :
صافي ماتسوقيش لهادشي ، تصرفي عادي كيفما مالفين ، نخرجو ندورو نضحكو نتصورو .. ماتبقايش تفكري بزاف ...
- قوت [ كطوي فالبوركيني ديالها ] :
فخبارك نسيت ماقلتش ليك ؟
- خولة [ هزهزات راسها ] :
شنو ؟
- قوت [ تبسمات ] :
ماشي صاحب هاشم جاي معانا حتى هو ، فؤاد صاحب دعوتك ..
- خولة [ بملامح جامدة ] :
كضحكي عليا ياك ؟ العار ناري كون اقلتيها ليا قبل مانجيش معاكم ولا نضرب فيها الضربة ... واش من نيتك ، يجي ولايݣعد وانا مالي ، والله مفايقة ليه من النعاس نهائيا ، راه الطريق قدامو ..
- قوت [ برضى ] :
الله يرضي عليك ، أجي شنو غاتلبسي غدا فاش نكونو غاديين ؟
- خولة :
غادي نلبس سروال ديال البيج ، مع القويميجة لي كنا خدينا انا وياك من القيسارية صافي وصندالة پلا ديك ديال الجلد ..
- قوت :
صافي مزيان ، اتجيك خفيفة ومريحة نيت ... راه قاليك غادي يدوزو النهار فمراكش ، عاد نشدو الطريق إن شاء الله ..
- خولة [ تسرحات فوق النموسية ] :
ايوا ماعليش صافي مزيان ..
- قوت [ كتشوفيها ] :
شفتك تجبدتي فبلاصتي ؟
- خولة [ صوتها مرخي بنعاس ] :
مغانعسش بوحدي انعس حداك ، باش يلاه نقد نفيق ، عرفتي عيييت والله العظيم ، فخبارك الحاج قلت ليه عطيني 20 يوم ديال الكونجي اش قالي ؟
- قوت : اش قال ؟
- خولة [ كضحك ] :
قالي مالك خدامة فبنكة ، الى عوالة على 20 يوم غير سيري ݣلسي خطرة وحدة .. وليت شمورة ضرب كاع السينين لي خدمت معاه ..
