سجين الحب «الأصلية»

مشـــــــــــهد

مشـــــــــــــــــــهد

دخلت للمخزن اخذت طحين بطاسة وطلعت بسرعة كبل لا تشوفني  جدتي تعلكني من رجليه والله

كعدت اسوي اكليجة ما اكدر اخلي بخاطره وهو مشتهيها البنوات خلصن التمر وهي كوه جمعتها من البيوت

وكعت دموعي على وضعنا وصل الحال بينا نوبات ما ناكل شي بس الجهال ووجبة وحدة باليوم وماتسد جوعتهم

ـ ماما عوفوا التمر شبقيتوا لخالكم

كملت ودخلت للفرن عيوني على الباب اخاف يدخل احد واترزل شلون مستخدمة طحين وغاز على الكليجة

دخلت نفس وهي تكول

ـ شلون ريحة الطيبة عاشت ايدج

رفعت اصبعي كبال اثمي

ـ اشش لا تسمعج جدتي تذبحني

ضحكت وهي تكول

ـ الريحة وصلتها وماحجت شي كملي براحتج حبيبتي

كعدت تلعب بالبنات حيل يحبوها شكثر نحسات ومايفعلن احد يجوسهن الا نفس يركضلها

تصفكلهن وهي تغني:-يمه البنات عشرة واكول كليلات

طلعت الكليجة فرغتها بصحن قدمت لنفس
مافعلت تاكل وهي تكول

ـ اللي على الساتر احق بيها

دمعت عيونها وهي تكول:- يمتى يخلص هذا البلاء

ـ گلبي مقبوض اخاف يصير شي على ارغد اني وادم ما نكدر بدونه

كعدت بسدها ايدي على خدي نفس من دخلول داعش لليوم صار شكثر محاصرين هين وهي ماكو على السانها غير خوفها على ارغد نوبات اكعد بالليل الكاها فارشه سجادتها بالطرمه اتصلي وتدعي

سمعت صوته يسأل عليه طلعت اركض وبيدي الصحن جوا عباتي حتى لبناتي ما انطيت منه

يتلفت خايف من جدتي ما يعرف بيها تعرف وساڪته يمكن عرفت اله لان يحبها

ـ ها يابعد اخيج سويتيها

ضحكت واني انطي الصحن

ـ عجل اخليها بنفسك يا نور عيوني انت

باس راسي واخذ وحده ياكل بيها وهو يكول

ـ الله الله

ضحكت وكتله

ـ الف عافيه انطي وياك الـ لؤي خطية دائماً يوصي آصف على كليجة من ايدي

ضحك ويكول

ـ اي، هساع يله دخلي خطر عليج الوكفه هين

ـ خل اوصلك مسافة والله مشتاقتلك اريد اشبع عيوني منك

دمعت عينه وهو يحضن راسي

اخذني جوا ايده ومشينا يسولف لي بطولاتهم وشلون آصف طلقوا عليه نسر حديثة

دنكت راسي ما حابه ذڪره سألته

ـ ارسلان شلونه؟

ـ زين حملني امانه اسلم عليج

ـ عليش ما دخلت اشوف جهالك ترى امهم راح تموت من خوفها عليك

تنهد وهو يڪول

ـ حيل مشتاقلها واخاف ادخل واتاخر على ربعي

يله ارجعي

هزيت راسي بسته بجتفه مشى وهو ياكل بالكليجة واني ادحك وراء ليما صعد الرصيف

دا التفتت وما اشوف الا اخوي ابو طول الحلو مدد بطوله على الكاع وصوت الرصاص قريب حيل…