سجين الحب «الأصلية»

الـبارت السـابع

زهـراء الحـريري

# سجين_الحب

البارت السـابع

وين نروح…
ياروحي وين نروح، والصفنة وجع ياكل بلب الروح
هاشـــــــــم

♡♡♡♡♡♡♡♡♡♡♡♡♡♡

الشيخ يقرا آيات من الذكر الحكيم وأحاديث عن الرسول الاكرم وأني صافنه أذكر شلون طلعنا من البستان

دموع بنان وحسرات هاشم يقطعون بأنياط گلبي

حجي هاشم يعصر بروحي وهو يردد على طول الطريق بـ سامحني أرغد

أني عديم الغيرة والاصل ما أستاهل خوتك ياسبع ضلوعي

غمضت عيوني عاصرتهم حيل من طلب الشيخ موافقتي ياربي بعد ما عندي حيلة ولا طريق رجعه اني شسويت بنفسي شلون اسمع لكلام بيلسان واطعن بأهلي

رجع الشيخ طلب موافقتي نوبة الثانية

اخذت نفس فتحت عيني وگتله

ـ نعم وانتَ وڪيلي

دموعي نزلوا بغزارة الندم ياكِل بـ گلبي

أنا ليش نزلت راس أهلي؟

أبوي وإخوتي شنو حالهم هساع بسببي؟

طلعنا من المكتب وكِل واحد جبل من الندم والهم شامخ على صدره

صعدنا بالسيارة، بعدين عرفت مستعيرها من صاحب المعمل اللي جان يشتغل بيه

دنگ راسه مرتاج على الستيرن تحسر بقوة أسمع خرخشت صدره همس بتعب وهو على وضعه

هاشم :- إرتاحيتي يا بنت خالي

صرت واحد عار ودوني بسببج وبسبب گلبي 

إلتفت عليّ وهو على وضعه عيونه حمر والدموع تحدر على وجهه

ضرب على صدرة ويحجي بحرقة

هاشم :- غدرت خويي إللي جان يگف بوجه أهله علمودي

بسببج

شهگت صديت على الشباك عيوني تجري دم مو دمع رجع تحسر بقوة وحرك السيارة بعد مانطق حرف بس الحسرات إلي يجرها تشرحلي حجم الغلط اللي رتكبنا صافنه على الطريق اجتي كبال عيوني جمعات اهلنا وكعداتنا من هساع حسيت بغربة واشتياق صرت اعض مو بصابعي من الندم اعض بروحي

إتصل على أحد يستفسر على عنوان، بعد ربع ساعة وگف السيارة گبال بيت من الواجهة الامامية واضح قديم

فتح الباب وحدر بدون ما يحجي حرف وياي بس أشرلي بجفه أبقى بالسيارة ما احدر وراء

إنفتح باب البيت الي بسد البيت القديم طلع رجال بعمر جدي تقريباً سلم على هاشم وسلمه مفتاح

الرجال صد عليه خطف ودخل هاشم فتح الباب اشرلي بيده احدر وهو يسحب السويچ

دخلنا للبيت الطرمة مساحته وسط وعبارة عن صبابة مفطرة بوسطها حديقة مربعة مآخذة نص الطرمة، بالجانب الأيسر مغسلة بيضة بس مباقي من بياضا غير الأسم وباب صغير حديد مزنجر عرفته باب الصحيات ..