قيود من لهب (حرمان الفلذات)

البارت10

....مساء الخير ....

قيود من لهب

زعلان
بس يازعل لمن ترد للصدك كبل المناده اجي
وشلون جيه اجي اركض ركض محترك
كلتلك بريتي وين الكه مثلك هوه
لولاك والله اختنك
هيه شراكة نفس
لوسكت كلبك سكت كلبي
ويدك لويدك
ولوما وكتنه ماجان ابد نفترك
.....

دخل سلام فجأه...
كمت ارجف اريد وحده تجيبلي الكب البسه
اجه كعد يمي بس مدنك
صحت لزمت ايد وحده من البنات
حبابه صيحي ماما
تماره:ها ماما نداوي
-ماما اريد الكب شي البسه
تماره:هسه ماما قبل ليدخل السيد البسج
-خزرتهه ماما هسه لبسيني
راحت جابتلي الكب لبستني والنسوان يهوسن وره دقايق دخل الشيخ كعد كدامنه ع كرسي
وبلش يعقدلنه
للحضات اجيت اموت من القهر صفنت اني شداسوي بنفسي وهذا منو الي بصفي معقوله اكمل ويا عمري كله مستحيل..
ابجي والسيد منتضر اجاتي
جاوبت بس بلحضتهه ماعقدت عقد زواج عقدت ويه الموت..كلبي انكسر
طلع السيد ...
دخلو عمامي باسني من راسي عمو ابو رياض وبلشت الهوسات
جابت ندى الحلقات ..
انطتني حلقة سلام انطاني ايده
ماشوف ايده من الدموع ايدي ترجف مو خجل لا قهر خذلان
اخذ الحلقه من ايدي بقوه ولبسهه ماكدرت البسه بقيت صافنه
مدلي ايده يريد انطيه ايدي يلبسني الحلقه
انطيته ايدي لبسني الحلقه هنا باوعت عليه شفته
اني ماشايفته سلام ماعنده اختلاط ولا يتدخل ولا يتواجد نادراً ب المناسبات
صفنت عليه مرتب وحلو وثكيل
اجت عينه بعيني انطاني نضرة قهر ؟؟؟؟
مدمع!!!!
نضرة متحسف!!!!
بيداء تلح تريده يكمل يلبسني باقي الذهب
ماقبل وسد علبة الذهب حيل وانطاني ياهه
خليتهه ع صفحه
بيداء:سلام يلا تعالو اركصو راح اشغللكم ع ذوقي
سلام:بيداء سويلي طريق اريد اطلع بسرعه
بيداء:يا هسه دخلت هيه مره ب العمر شبيك دومك مطنكر
سلام: ليش تخليني اكلبهه عليكم عزه هسه سويلي طريق
-طلعت كدامه بيداء وطلع وراهه راح بدون ميحجي كلمه ويايه ابد
باركولي البنات وعمامي وطلعو
...
فرغ البيت وماما بلشت تنضف رحت للحمام نزعت الفستان شمرته ع صفحه سبحت واجلف بنفسي حيل احسني وصخه من المكياج وشعري
..
طلعت انطيت الفستان الماما نزعت الحلقه
-هاج ماما ضميهه ويه الذهب توكع مني لتضيع
تماره:يا جبيره
-ايي ماما حنام تعبت
تماره:روحي ماما
-رحت لغرفتهم ع جربايه تمددت صافنه ع السقف
ماعندي اي شعور
دخل امير كعد يمي ع طرف الجربايه
امير:اخاف اباركلج وتضوجين
-ع شنو ههههههه تباركلي ع الضلم امير سلام ماطايقني هههههه بلكوه عليه جاي للخطوبه اليوم
امير:لا هوه سلام من يوم يومه هيج مطنكر
-ابصملك ب العشره ماطايقني كلش
عوفك من عندي ومن سلام شنو راح ترجع تروح تنام وتكعد ب المحل
امير:مرتاح ندى كلش من ابويه من عمامي ومن كلشي
-حباب امير ابقه والله اريدك تبقه
امير:خلي يجي ابويه اسلم عليه واذا بسمرني اطلع اذا سكت ابقه
-شنو تخاف من ابويه
امير:اخاف شنو ولج بس كمت ما اتحمل لا كلمه ولا ايد تنمد عليه من عنده ...اشتري راحتي احسن
نامي خويه نامي شو ادني ليغاد خلي انام جو الغرفه ينعس
-دخلت ماما كامت تصيح
تماره:ولكم الله واكبر شياطين دنيا مغرب اذن وصلو المؤمنين شنو كفره انتو كومو صلو
امير:يمه شايفه نومة المغرب تخبل
-ماما والله عندي خمول بيهه نومه للصبح اجرهه
تماره:دكومو ليجي جعفر يسويلكم عرس كلشي ولا نوم المغرب
-شغلت الضوه ماما وفتحت الباب يعني مابيهه نومه بعد
كمنه نصلي
وكفنه مثل قبل نصلي سويه
...
ثاني يوم
العصر اجونه بيت عمو ابو رياض
بس سلام مجاي !
دخلت سلمت عليهم صاحني عمو ابو رياض اكعد بصفه
كمت يمه
ابو رياض:يابه ابو امير احنه مستعجلين ونريد العرس هلاسبوع باجر تجيكم ام رياض تاخذ ام امير ونداوي للسوك يحضرون الجهاز
اني ما احب الخطوبه تطول وسلام موافقني الرأي
شتكولون؟
جعفر:رأيي من رأييك خويه توكلو ع الله
عفتهم قررون كمت طلعت ب الحديقه مختنكه اريد هوه
سمعت صوت فيفي ب الحديقه مالتهم رحت يم السياج صحتهه
اجتي وجهه ثكيل كلش
شبيج فيفي زعلانه شنو
فيفي:خطوبتج ندى ومتدزين عليه ع خواتي ع امي
-هههه فيفي شايفه الجماد اني هيج ديحركوني بكيفهم ويقررون ولج فستان الخطوبه الصالون المكياج الحفله العريس كلشي مو اختياري وهسه همه هنا يردون الزواج هلاسبوع بعد ما اتحمل راح انفجر
فيفي:انتي ضعيفة شخصيه شنو هاي احجي كولي
-شحجي فيفي شبعت كتل ما اكدر الهم كلش
فيفي:امير وين
-باوعتلهه فيفي تدرين بابا ميحبكم
فيفي:اي ادري ههههه
-لعد لتتعلقين ب امير من هسه اكلج
فيفي:اني وامير مو مثلج يمكن
-براحتج نصحتج بعد بقينه نسولف طلعو بيت عمو هيه راحت واني دخلت جوه شفت تليفون ماما ع ميز
رجعت اتصلت ع ياسر
مغلق!
زين اني متصله شنو اريد مثلاً شكول وشيكول هوه
لليل
اندك الباب حيل
طلع امير يركض وكفنه بباب المطبخ نشوف منو وشكو
دخل امير
امير:بيداء بنت عمو ابو رياض مدري شبيهه يكولون داخل بيهه جن معرف شنو
تماره:ولك هسه جانو يمنه امهه وابوهه وخواتهه شو كلشي طبيعي
امير:اي ماعرف هسه اجه اخوهه رياض يريدج بره
تماره:يا شيريد
امير:ماعرف يلا منتضرج ب الباب
راحت ماما بقيت منتضرتهه طولت كلش
راحو بابا وامير وراهه البيت عمو ابو رياض قلقت
بقيت ب الحديقه رايحه راجعه خطيه بيداء حبابه متستاهل
دافكر دخلو اهلي
ها ماما شكو شبيهه بيداء
تماره:ماعرف مغمضه عينهه متقبل تفتحهه تكول اخاف طالعه المغرب للحديقه شامره حجاره ع شجرة السدر جبيره وصايره بيهه خوفه داخله تركض وتعيط ...
عساس هيج الموضوع
-ياخطيه وهسه شنو
تماره:رحنه اني وام رياض اخذناهه للسيد الي ب.....
يرقيهه وكامت بس تعيط
رجعناهه وجلبت بيه تكول اخاف من اهلي ابقي يمي
-شنو ليش تخاف من اهلهه
تماره:ماعرف ماما وامهه قاسيه وياهه تغلط وتضربهه تكللهه عياره
-يمه شلون راح اعيش يمهم
تماره:شلج علاقه انتي لتفكرين وتطلعيلج سالفه صفح روحي نامي يلا مو نعسانه عساس
-ي خوش
...
رحت نمت ثاني يوم اجت ام رياض من الصبح تريد نروح للسوك ولاجن بنتهه مريضه
كلت هسه يأجلون العرس
رحنه للسوك اتجهز ع كيفهه وبرأيهه هيج جايين اني وماما بس تعب
تشوفني اختار وشنو الي اختاره تاخذ العكس حته ماما ضاجت منهه
الي موتني ماما متفتح حلكهه ابد ولا تحجي صم بكم
خوافه كلش
...
رجعنه هلكانين تعب عزمتهه ماما تدخل شويه يمنه ماقبلت راحت
..
سبحت وتغدينه اجه امير من الشغل صبيتله غده ماقبل
امير:اني اصب النفسي بعد لتعبين نفسج
-مو انت جاي من الشغل وتعبان
امير:عادي اني اخدم نفسي روحي اني اغسل مواعيني واسوي جاي
-ماصدكت رحت نمت تعبانه
كعدتني ماما المغرب كالت ميصلح كعدي
هيه ماما بعون متسمع شي مشدده علينه اني وامير المغرب لازم منسبح منضف منطلع بره منسولف
نتوضأ ونحضر السجادات ونستمع للقرءان والأذان طقوس مهمه عند ماما نوب سمعت بيداء بيهه جن
كمت طلعت من الغرفه صار بوجهي امير هم ساحلته سحل من الفراش
شبعنه ضحك
تماره:ولكم لتضحكون شياطين توضو بسرعه راح ايأذن ولج ندى ديري التلفزيون ع القرءان
-توضينه رحت شغلت التلفزيون ع القرءان
حضرنه السجادات
اني احب المغرب اوكف بباب المطبخ صوت العصافير والجامع قريب علينه يقره قرءان والجو يبلش يصير ليل
واكفه بباب المطبخ واسمع عياط ب الشارع
خفت ...
دخلت اركض اصيح امير
امير عياط ب الشارع ماعرف شكو
صعدنه اني وماما فوك نباوع من الشباك
منشوف شي بس نسمع عياط
شفنه امير اجه نلزلت اركض
امير:بيداء حاركه نفسهه مفحمه اخذوهه للمستشفى ببطانيه ابويه وعمو ابو سمير وابوهه وامهه
-يااااااا ليش وشلون يعني نتحرت شنو
تماره:لا حول ولا قوة الا بالله العلي العضيم سترك يارب سترك يارب
صلو ماما صلو وادعولهه
-كلبي كام يوجعني متت قهر عليهه يربي بنيه حلوه وصغيره وشابه
صليت وبقيت ادعيلهه
ماشتهينه نتعشاء منتضرين بابا يجي يكول النه خبر
كاعدين ع السجادات و دعاء كميل بصوت عالي ب التلفزيون وماما تردد وراه وتبجي وتدعيلهه
ليلة الجمعه
ع كعدتنه دخل بابا كلنه وكفنه بخوف منتضرين الخبر
جعفر:صار ساعه نفتر ع مستشفيات محد يستقبلهه ب الكوه استقبلوهه مستشفى.... مفحمه بس نفس يصعد وينزل
تماره: يمه سوده عليه زين صدك هيه حاركة نفسهه وليش
جعفر:يكولون امهه كايلتلهه كومي خبزي عياره مابيج شي ماعدنه خبز للعشاء
وهيه متقبل تكوم باقيه بفراشهه تخاف اصلا تطلع راسهه من البطانيه متلاغيه ويه امهه
جاي ابو رياض ضاربهه ب العوجيه مالته فالته منه وطالعه ب الطارمه
ماخذه جلكان الصوبه مفرغته ع نفسهه ب الطارمه وشاعله ورقه وذابتهه بثوبهه من يم صدرهه
ومحتركه وع عياط ام رياض جايين اخوتهه مطفيهه ب البطانيه واخذناهه للمستشفى
اني جنت يم ابو سمير كاعدين ب الباب وسمعنه العياط
-سمعت الحدث متت خوف وقهر
جعفر:المستشفى كالو متطول نسبة الحرق ٩٥%
تماره: ومنو يمهه ب المستشفى
جعفر: امهه وابوهه واخوتهه راحو رجعنه بس اني وابو سمير
تماره:اروحلهم للبيت اخاف يحتاجون شي
جعفر: اي روحي
-لبست عبايتهه ماما وراحت بقيت اني وامير سوينه عشاء
تعشينه وغسلته مواعين
ب١٠ ب اليل رجعت ماما كالت مطلعيهه اهلهه من المستشفى
ملفلفيهه بباندج من فوك الجوه ومتبين مفحمه
...
ثاني يوم
رحنالهم العصر
جنت خايفه اشوفهه ماعندي جرأه لكينه بابهم مفتوح ويمهم خطار كومه
وميقبلون احد يدخل يمهه لان يصير عدهه تسمم
منوميهه بغرفه وحدهه ويمهه امهه وماما غسلت وعقمت نفسهه ودخلت الهه
اسمعهه تبجي تريد مي عطشانه وميقبلون ينطوهه
يكولون موزين
تموت
سمعت صوت ماما تقرالهه قرءان هدأت بيداء

خواتهه كاعدات يم باب الغرفه يسمعن صوت ماما تقره ويبجن كعدت يمهن انهضمت واني ارريد بس حجه ابجي كمت بس ابجي
دنبجي واجه رياض كومن الخطار يريد مي جاي شلون بالا وحده منجن تكوم خويه
كمت اني وياه وداني للمطبخ واجه يساعدني
يدليني حضرت الاستكاين وشكرتهم
خليت الجاي ومتوتره احس اول مره اسوي جاي
حضرت المي جايبين كراتين كاسات
مجرد فرغته ب الصنيه واخذه..
راح واني صفنت ع البيت مداخلتلهم قبل من جنت طفله وبس
بيتهم راقي اثاث ونضافه يلمع والبخور يجنن
بصفنتي صاح بيه سلام
سلام: الجاي يمعوده عطب
-ها اي اي التفتت شفت الجاي يفور طفيته
لهيت نفسي ارتب ب الاستكانً وهنه مرتبات حسيت بيه ورايه ب الضبط
رفعت عيني صارت ع باب الكاونتر بيه مرايه باوعتله ب المرايه وهوه يباوعلي عيونه قاسيه ويخزر دوم وحواجبه كثيفات ورموشه طوال واسمر وشعره اسود فحم  واكف ورايه ب الضبط
ضخم وفرق الطول رهيب
توترت بقيت ارجف
ماحس اله ايده تمشي ع ضهري بهدوء خزرته ماهتم
التفت اريد امشي قطع طريقي
سابح ب العطر ولابس دشداشه لونهه ذهبي
بقه خازرني واني ارفع عيني وانزلهه ماكدر اباوع بعينه حاده ويخزر يحسسني مسويه شي
ع هلوضع و
..............

لتنسون⭐️⭐️⭐️⭐️
علقو وتفاعلو والله تفاعلكم صفر ميسوي واهس كلش
التقيكم بجزء اخر من قصة قيود من لهب
....للكاتبه زينب علي.....
دمتم سالمين
...........