قيود من لهب (حرمان الفلذات)

بارت 13

..مساء الحب ..
#قيود من لهب

هذا التشتت والضياع لا اتمناه لأي من كان انا ندى تلقيت الصدمات من الأقربون الذين هم أولى بقلبي
ومايحملهُ من مشاعر هُناك مكان مهجور في داخلي لا أسمح لأي قريب ولا بعيد أن يدخلهُ بعد الأن لا للتخريب والتحطيم ولا حتى للأصلاح هكذا هو أضلم منطفئ من الحياة ويخرج منه دُخان الخيبة والخذلان وهوه الأن تحت قيد التخطي هل سأتخطى بعد سنواااات عديده من الاحتراق ام لا
.......
سلام :بيداء اني واسيل ع علاقة حب من زمان واني
_لتكمل بشرفك بعدين كافي اني موبيداء مووو بيداء
سلام:أسف مامتقصد بس فهمي وركزي ويايه
أذا حابه تنهين كلشي انهي انتي بلشي انتي لتنتضرين مني اطلكج وانهي هذا الزواج بس اذا انتي طلبتي ب لسانج اني حاضر
_هههه لك انت شنو جبان جبان بمعنى الكلمة اذا تحب اسيل ليش وافقت تتقدملي انت تعرف اني ماريدك ولا مجلبه بيك عندي طلب يمك ع اقل اكبر بعيني ولو شويه وخلي ننهي كلشي هسه بيناتنه وهناااا
سلام:اول شي احترميني  مو لأن اني جبان خطبتج وما اكدر اواجه احد مثل ماببالج اني شرطت والشرط كله تعرفه اتزوووج وما ابقه عليج وب المقابل ما اطلكج
_هاااا يعني متفقين من ورايه شلون تكسرون بيه ولكم حرام عليكم والله حرام بعدين اني ماريدك بعد واكرهك
سلام:اتكرهيني تحبيني ميفرق عندي مر زين وافقت ونقذتج من سمير الزعطوط وامه ومن عدي السكير والسربوت شوفي لج تريدين طلاك اسهل شي عندي بس اني متفق ويه ابوج وعمامج ما اطلك اتزوج بس ابقيج ع ذمتي
_يعني قصدك اكوللهم اني اريد الطلاك
سلام:لعد صار ساعه شنو نحجي اي ب الضبط
ومن هسه اكلج عيشتي متوالمج وخاصه اني اتزوج اسيل وره ما افض زواجنه بسرعه
_واسيل عادي عدهه تتزوجني
سلام:تحبني ولو انتي متعرفين شنو حب كلج حقد عليه وع الناس وع اهلج هم
_منو كلك ما اعرف الحب صح ماحبكم كلكم وحته اهلي هيج هيج يكسرون بيه ويتفقون من ورايه
بسيطه ردت اطلع افتح ب الكيلون مينفتح وابجي بحركه التفتت عليه ضربته ع ايده انطيني المفتاح ماتحمل ابقه اشوفك دقيقه وحده
سلام:اهدي وفكري ولتنزلين هيج الكل يعرف تره شوفي حالتج
_هههه تخاف ولك شلون راح ترهم وانت لهلدرجه تخاف من الناس شلون راح تكدر تعيش ويايه ولك والله اصبعي متلزمه خاف عبالك واني راح انهي كلشي هسه انزل واسويهه كربلاء عليهم مدامهم ملتمين الشلون ناس استغفر الله شنو اني تمثال بدون مشاعر بدون احساس
سلام:بديتي تخربطين شوفي لج لتجبريني احركج هنا
_مثل ماخليتو بيداء تحترك مو
ما احس اله خنكني حيل ويركع براسي ب الباب
سلام:شنو قصدج بنت الكلب بنت الحرام
_عبالك تدخل العقل بيداء بيوم وليله صارت تخاف وحركت نفسهه
خنكني ب الزايد
سلام:تدخل عقلج متدخل لتجيبين هذا الطاري ع السانج ولا كدامي ب الضبط شوفي لج بعد وقت مو هسه تحتركين بعد وراج هوااااي حته بيوم وليله تصيرين جنازه
_وخر عوفني ولك عوفني الله ياخذك انت والي تحبهه
سلام:تغارين ههه محد مكلبج
_وخر مني وخله المفتاح ب الباب
سلام:يلا ولي
_فتحت الباب حيل طلعت دعاء من غرفة سلام جانت تنتضر كلتلهه
مع الأسف عليج .....
ونزلت ابجي لبست صايتي والحجاب وطلعت رجعت لبيتنه بحيث حته ابو الاسواق الي بصف بيت عمامي بيت عمو ابو رياض وبيت عمو ابو سمير انتبهلي شفته يباوع ب استغراب
دخلت للبيت محد موجود كعدت بجيت لحد ما الله كلي بس
اخخخخ يلحركه البيهه اني هسه الله لاينطيهم كلهم
سمعت باب الشارع انفتح دخلت ركض للحمام فتحت الدوش وكعدت ع صفحه ابجي
ندك الباب اجاني صوت عبد الله ابن عمو ابو سمير
كلي
_ندى انتي هنا امج تدور عليج
_اي اي كللهه تخربطت شويه وتعبت ليضل بالهه راح اسبح وانام
_خوش
_سبحت وطلعت فرشت وبقيت بفراشي ابجي متزوهره مقهوره
غفيت ....
ما حسيت لمن امير وبابا يسولفون ع سياره ماعرف شنو
واجت ماما تسولف الهم ع السبعه مالت بيداء
بعدين اجتني
تماره:ندى ندى شو كعدي عبد الله يكول تخربطت غير تجين تكوليلي وبعدين شلون ترجعين بدون متكولين
_ماما عوفيني راسي يوجعني اريد انام
تماره:كعدي اكلي واخذي براسيتول
_اخذت ماما بس عوفيني انام
رجعت غفيت والثاني يوم ...
كعدتني امي
تماره:ولج شسالفتج ندى يمه ولك جعفر البنيه متخربطه من البارحه جعفررر
_اريد ارفع راسي ما اكدر احس خدر بكل جسمي وراسي ثكيل احس دوخه ومعدتي نار
رجعت غفيت !....
ما احس اله صوت المضمده ام فاطمه تجي مرات الماما ومرات نروح الهه
تحجي هيه وماما تستفسر منهه وتضرب ع خدي وترفع ايدي بعدين ضربت ع ايدي من يم الوريد احس وخزة ابره وايدي صارت ثلجج بلعومي مرر كلش
رجعت غفيت !.....
ما حسيت مرة الخ اله ع صوت قرءان وبعدين أذان المغرب فتحت عيني كدرت ارفع راسي شويه وأخيرا
امير يمي فارش سجادته وكاعد منتضر الأذان
وكانيولا بأيدي والمغذي معلك ب البسمار فوك راسي وفارغ ساديه وع صفحه مغذياات وعلاكة علاج
ويم راسي قرءان مفتوح ومدثره فوكايه الفروة مالت بابا فوك بطانيتي
كمت شويه احس جسمي متكسر شافني أمير
اجه عليه
امير:ها خويه شبيج متكليلي ولاصحيتي فد مره شصار
_شو هوه سألني واني كمت ابجي وبصوت عالي !!
تهسترت كمز لزم ايدي يقره بوجهي
.سلامً قولاً من رب رحيم .
بقه يردد بيهه واني املخ بشعري متت اريد اطلع القمته الي بداخلي
اجت ماما تركض تمسح ع شعري شفتهه كلتلهه
_متحبيني انتي محد يحبني كلهه متريدني
محد مستوعب شكو ..
هدأت صفنت بوجه امير رجعت لفراشي تغطيت وامير  اخذ القرءان  الكريم الي يم راسي  وبلش يقره يمي
بلشت استوعب
اني ماجنت اغفه جنت افقد ...دكة قهر هيج صار بيه
بسيطه سلام ..بسيطه لكل شخص ضلمني ..ووصلني لهنا
قاطع تفكيري صوت الأذان وامير صدق وباس القرءان الكريم  ورجعه يم راسي وكام يصلي
كمت بسرعه اريد الحك اصلي ويا مثل قبل اختل توازني انتجيت ع الحايط ورحت ع كيف امشي توضيت ورجعت فرشت سجادتي صليت
ورجعت لفراشي..
امير:ندى بيج شي خويه تطلعين تشمين هواء
_أي طلعني داختنك
تماره:يلا خلي نتعشه واخذهه مشيهه ع شارع
_احس اهلي قلقين يمكن من سالفة بيداء دخل بابا مد راسه للهول
جعفر:ها شلون صارت
تماره:لا زينه يلا صلي حته اصب العشه
_راحت ماما صبت العشه وجبروني اكعد اكل واني ما اشتهي العسل ب الكوه اكلت شويه
كملنه امير كلي البسي واني منتضرج ب الباب علمود نتمشه
لبست ع سريع كوت طويل فوك تراكي باوعت مرتب والشال  شمرته هيج وهيج وطلعت لكيت امير ب الباب
امير:جيبي ايدج الزمي ب ايدي خاف ادوخين
_لزمت ايده واخذني مشاني شارع شارع ارتاحيت
فاتت من يمنه دراجه سلم ع امير صوت سلام..
بقيت مدنكه
سلام:شنو ندى سلاماات
امير:من رجعت منكم وكعت وهسه اله صحت
سلام:لااا سلامتج تعال امير اخذ الدراجه واني وياهه نرجع
_جلبت ب امير حيلل ورفعت عيني خزرت سلام
امير:لا روح سلوم راجعين سوه
سلام:شبيك يمعود دعوفنه لوحدنه لزكت خلي اتحمد السلامه لزوجتي المستقبليه
_جلبت ب امير ب الزايد دنك راسه يمي يسمعلي كتله
امير لا انت وصلني حباب مابيه امشي وياه
امير:يمعود تخجل توكل
_ما احس اله سلام نزل من الدراجه واخذني من امير
سلام:انت توكل يلا ابو الميم
_صعد امير وراح سريع بسرعه صار بعيد وجعني كلبي وتوترت اجيت اوكع
وسلام لزم ايدي ويمشي لابس اسود ولحيته طولانه وشعره مخربط مخلي سماعات التليفون ع ركبته
ابد ماحجه ولا اني حجيت فتنه من يم اسواق هنا اله صار بيناتنه كلام
سلام:انتضريني هنا وديري وجهج هيج لتبقين تباوعين ع شارع
_درت وجهي ع البيت الي بصف الاسواق طلع بيده علاكه لزم ايدي
سلام:الزمي بيه
_ماحجيت شي ابددد مشينه واني كوه جارعته  فتنه شارعنه شفت دراجة سلام من بعيد بباب بيتنه
وصلنه البيت عفت ايده ومشيت الوحدي اريد ادخل
لزمني قوي
سلام:ديري بالج ع نفسج وهاج هايه العلاكه الج
اني رايح
_رفعت عيني بعينه ودفعت ايده الي بيهه العلاكه
وانداريت اريد افوت رجع لزمني قوي ونتر بيه
سلام:اخذذذي
_عوفني شووو اخذت العلاكه خليتهه بدراجته ودخلت ع السريع طبكت الباب حيييل
ونتجيت ع الباب مقهوره ...مقهوره منه ومن ياسر ومن اهلي ومن حضي
دخلت
لكيت امير ب المطبخ يسوي جاي نومي
امير:تعالي منتضرج سويت جاي نومي زين نشرب سويه
_انت شلون تعوفني مو جلبت بيك وكتلك لتعوفني
بجيت
امير:شبيج ندى ع اقل شي صايره تبجين مو جنتي تافهه وبس تضحكين هسه بس تبجين وتنفعلين ع اقل شي بعدين ويامن عايفج وسلام هم جلبلي
_كعدت ع كرسي جاب الجاي شربنه وكمت لفراشي
مريت ب ايام بس مريضه واتقيئ وع مغذيات عايشه
اربع ايام ضبط ع نفس الوضع اجونه بيت عمو ابو رياض ب اليل رابع يوم يشوفوني الضاهر سلام كال الهم وهم بابا موصل الهم اكيد
واني حالتي حاله كانيولا وشعري مخربط وولابسه تراك قديفه وجواريب مالت امير عبالك وحده ستوهه جايبه
دخلو فلتت لغرفة امي
كعدت ع الجربايه
انفتح باب الغرفه رفعت راسي دخل سلام
انصدمت رجعت شعري وره اذني توترت
كعد بصفي ع الجربايه
سلام:شلونج
_من الله بخير بس هسه صرت موزينه من شفتك
سلام:عفيه السان مينطق بس بالسم
_اطلع منا
سلام:ندى انسي الحجي الصار ببيتنه وانسي اسيل وركزي بصحتج انسي كل الكره والحقد اترجاج
ولتفكرين ويه الأيام تتأقلمين وتتقبلين
_ضحكت بصوت عالي تشاقه لك انت شنو بابا اطلع منا لو جاي تكمل عليه متشوف شوف ايديه شلون اتزرفت من المغذيات مجرد تحاجينه وطلعتلي اسيل وسمعت ب الاتفاق لا اني اجزم وابصملك ب العشره اذا دخلت بيتكم اموت ب اول ايام
سلام:سلامتج واسم الله عليج
_باوعت عليه مصدومه شفت نضرته حلوه
ضحكت هههه انت ايع كلك ايع
سلام:شوفي ندى باجر اجي الكاج بدون كانيولا وراجعه تاكلين وومصحصحه ونشيطه وانسي كلشي اوك
_كام يريد يطلع شفت ع ميز باكيت كلنس شمرته بقوه وراه
التفت خزرني وطلع
بقيت كاعده لوحدي طلعو يلا طلعت
تماره:تعالي ندى سلام جايبلج هذني
_ههه جايب عصاير طبيعيه وحلويات ولحم بعجين ع صفحه
عفت كلشي وفتت نمت
ثاني يوم كمت تريكت ومصحصحه ونشيطه الحمد الله
للعصر اجه سلام دك الباب ودخل جان مامسحوب السركي
واني جنت اسولف ويه فيفي نصدمت شافني ابتسم
اجه تقدم يااا شو خفت دخلت بسرعه لغرفة امي
سمعته دك باب المطبخ حيل
اجتني ماما
تماره:امشي الرجال مستعجل يريد يشوفج ويروح
_طلعت وماما عافتنه
سلام:انتي ليش تعاندين عود ليش اسأل امج وتكول الشهاده الله ما اكلت ولا شي من الجبتهم الهه
_وليش تتعب نفسك ما اكل شي تجيبه انت ماشي وهسه اني زينه خف رجلك مو جنه منشوفك قبل
هسه اني تمام
سلام:الله كريم
_طلع ولا اهتميتله
بعد فتره طويله واني صفيت جلد وعضم اخر شي ماما جابتلي مشهي صرت أكل احسن من قبل وبين عليه ...
قبل اربعين بيداء بيوم صادف خميس وبيت عمو ابو رياض عازمين ثواب الروح  بيداء
راحت ماما من وقت الصبح كلتلهه اجي ويه امير وبابا بعدين
تماره:امي عيب من عدهم تجين حالج حال الخطار
_اي واني خطار لعد شنو عود لاحكه ع الكراب ببيتهم
ضاجت ماما مني راحت
اجه امير من الشغل سبح وكعدنه بابا جهزنه نفسنه
لبست فستان اسود جابته ماما الي جديد بهاري حلو
وكفت كدام المرايه واحجي ويه نفسي
سلام معليج بيه تجاهليه واذا اسيل موجوده ضغطيهه تجاهليهه
ولتحجين وياهم كلمه
...بعدين صفنت.  ع المرايه وكلت
اني ليش ما اتسغل لمتهم واطالب بحقي
قررت احجي خلاص
واعلم نفسي.
رحنه اول ما دخلنه للطارمه هوسه بشكل يوزعون سفري للناس وبعدهم ممسوين سفرة العزيمه
امير:امشي دخلي ب العجل ولترفعين راسج كومه ناس
_دخلت ع السريع ومثل ماتوقعت اسيل وامهه وخواتهه موجوداات
اتسحبت من الهوسه ديجهزن للسفره ورحت كعدت يم بيبي
سلمت عليهه شلونج بيبي؟
بيبي:يمه هلا بلوجه الحسن يمه هلا ب الي يداوي الروح تعاي ليه بيبي شلونج ؟
_كعدت يمهه كلتلهه الحمد الله بيبي.
رفعت راسي وك العاده ماما تخزر وتأشر تريدني اكوم
ولا كمت واني ناويه غير نيه هلمره تشجعت وكلت مدام الكل متجمع ...
فرشو سفرتين ب الصاله للرياجيل وسفره للنسوان ب الهول
كعدت مثل الخطار اكلت وغسلت رجعت يم بيبي صاحتني ماما
تماره:ولج شسالفتج امشي اوكفي ع الجاي
_خوشش .
رحت وكفت يم الجاي
اسيل:ها ندى شلونج
_خزرتهه وماجاوبتهه شمرت الوصله مالت الطباخ  ع الطباخ وطلعت صارو بوجهي سلام ورياض داخلين للمطبخ علمود ياخذون كاساات المي والجاي
رياض:بعد اخوج وين الجاي
_ها اي هسه رجعت للطباخ لكيت اسيل تكمل وتتعارك ويه الاستكاين ضحكت وطلعت للطارمه وكفت يم الباب شفتهه هوسه بشكل يغسلن مواعين النسوان ويعزلن وماما وياهن
صاحت عمتي ام سمير
ام سمير: ها ندى ماخذه دور العروس من هسه جنتي تكربين كراب يمي
_جنننت اي جنت هسه لا
التفتت شفت سلام واكف يم اسيل ياخذ الجاي ويباوع عليه
دخلت اخذت كلاص مي شربته وشمرت الكلاص ب الطارمه يم الزبل ع صفحه وطلعت يم يبيبي واحسه يباوعلي بكل حركه ولاهتميتله
كعدت يم بيبي كلتلهه بيبي .
بيبي:ها يبيبي
_اريد احجي وياج بغرفتج حبابه كومي
بيبي:ياع خير شاوريني محد يسمع
_بيبي انتي متسمعين كلهه تسمع كومي
بيبي:جا دسنديني وديني لحجرتي
_يلا انطتني ايدهه وانطيتهه العوجيه انتجت ع العوجيه من جهه وعليه من جهه ورحنه كعدتهه ع سريرهه وسديت الباب
بيبي:احجي خايبه افادي صار يتراجف
_كعدت يم رجليهه ب الكاع ولزمت اديهه بيبي اريد توكفين ويايه احلفج بروح بيداء اريد تخلصيني من هلزواجه ما اريد سلام سلام يحب اسيل وهوه كلي ب السانه وكلي اني اتزوجج صح بس اتزوج اسيل عليج بيبي ترضيهه عليه
كمت ابجي بحركه واحجي بيبي اوكفي ويايه ما عندي احد اني امي صم بكم وبابا ضالم وحجايه توديه وحجايه تجيبه الله يخليج بيبي حاجيهم هسه
وشيصير اني اتحمل المهم اخلص من سلام
بيبي:ياع انديه شني هلقرار الأكشر ترديهه تصير عزه
_بيبي لو بيداء شاكيتلج شنو سبب انتحارهه وحركت نفسهه متساعديهه مو متندمه هسه انتي لأن متعرفين شنو بيهه وببالج كومه أسأله ليش اله اسوي بنفسي شي يلا تحسون وتتندمون
بيبي:شنهي تخبلتي انديه يبيبي سلام خوش سلام وبيت عمج ابو رياض زوينين
_دتحجي وقاطعتهه بيبي انتي تفهميني سلام يحب ويريد يتزوج عليه بيبي لكفتهم ب الغرفه سويه كاعده يمه وتدلك رجليه ونازعه حجابهه
بيبي:شني هلحجي ندى لا لا يبيبي انتي تكدرين تكسبين سلام ولاتنطين مجال الأسيل انه اعرف مصلحتج يبيبي
_بيبي فهميني والله ماريده ولا اريد عدي ولا اريد زواج هسه بيبي بروح بيداء بروح جدو ساعديني
بيبي:واذا اكلج ما اخليه يتزوج اسيل وانه اوكف بضهرج واصير بسدج واسندج
_تمسح ع شعري كلتلهه بيبي المشكلة مو اذا اتزوج هوه يحبهه بس فهميني والله اذا متحجين وتوكفين ويايه اسوي بنفسي مثل بيداء واكثر انهي حياتي كبل
بيبي:وروح اجديدج ما اسامحج كل العمر اذا تفكرين  ب الحرام ولج حرااام قتل النفس والتفكير بما يغضب الله
_ومو حرام داتوسلج تخلصيني كافي تضغطون عليه حرام الدتسوو مو الي افكر بيه كتلج اني اذا متساعديني ميصير خير اطلع اني احجي واذا اتأذيت انهي حياتي خوش
بيبي:امشي امشي سنديني خل اشوف نهايتهه شنهي
ولو راح نصفه خسرانين ونطلع ب الوجه الأسود انه وانتي
_مسحت دموعي سندتهه وطلعنه صارت بوجهي ماما تفاجأت وديتهه لمكانهه وبقيت كاعده يمهه خايفه وساعه اتردد ساعه اتشجع لمن الكل راح بقو بس العمام طلعو من الصاله وكعدو يم بيبي
والكل كاعد
اجتي عمتي ام رياض كومتني تكعد هيه يم بيبي اجيت اكوم لزمت بيه بيبي وكلتلهه
بيبي:خلهه يمي انه اريدهه كاعده حذاي
اسمعوني ابو سمير وابو عدي اريد منكم تاخذون عوائلكم  وتروحون عندي سسالفه بيني وبين ابو امير وابو رياض
ابو سمير:شنهي يمه من شوكت هيج صار الحجي جا اول تالي نعرف
بيبي:شنهي كلمتي صارت ماتمشي
ابو سمير:حشاج حجيه طالعين
_طلعو بس وجوهم ثكلت وزعلو ومارفعت راسي ابد اخاف من النضراات احس الكل يعرف
بيبي:دعاء ندهيلي سلام
_وره شويه نزل سلام من فوك سابح ومبين هستوه رايد يرتاح  ينام لابس تراك اسود وشعره مخربط
سلام:ها حجيه صحتيني
بيبي:اكعد بيبي
_كعد ع  الطبله مالت بيبي الخشب مقابيلهه
رفعت عيني خزرني
بيبي:اسمعوني وب التفاهم والي يعارض وروح بيداء الغاليه وروح ابوكم الحجي ما ارضه عليكم منا ليوم الدين ولا انه امكم ولا تعرفوني واروح اعيش عد النسيب ولحد يوصلني
ابو رياض:شنهي يمه خشي ب السالفه عليش هلحجي قبل الزبده
بيبي:الزواجه السويتوهه ومتفقين من وراي سلوم يتزوج  ع هلبت ماريدهه ولا هلبت تزوج اي واحد هلسالفه كلهه من راس ام سمير الماعدهه حيا مشتكم بكيفهه
جعفر:يمه رجائا اني موافق والزواج ماضله شي عليش هلحجي هسه
_بيبي دكت عوجيتهه ب الكاع حيل وصاحت
بيبي:وانه ماريد هلبت الهلولد وفضت وسمعني انت
_اشرت ع سلام
بيبي:تطلك هلبت عكبهه روح تزوج العاشكهه التتختل بيهه بهلبيت وانت ماضللهه شي زواجتك ع هلبت شنهي كفار يهود
_رفعت عيني اشوف ردة فعل سلام بعد هلحجي
خزرني خزره كلبي مات من الخوف
سلام:بيبي شنو هلحجي انه بكيفي اتزوج ثنين وتلاثه واربعه وماطلك حتلو ولدج وافقو ع كلامج انه ما اطلك خلي اشوف شلون هلحقيره لاعبه براسج وموصلتلج حجي
_أيأشر عليه ويحجي بعصبيه كتله
واني ماريدك يا اخي طلكني هسه احسن من المشاكل وروح اتزوج عشره
سلام:انجبي حقيره وماطلكج وشتريدين سوي
امير:ها سلام اضربهه كدامنه مو احسن
سلام:اختك مامتربيه وتمشينه بكيفهه والله لأكسر راسج كلبه
_لاتكسر ولا تضرب هسه تطلكني ماريدك ماريدك
ما احس اله كمز عليه  بيبي كامت بوجهه واني ختلت وراهه
سلام:شو وخري بيبي والله لأربيج وما اطلكج لو اعرف اخليج عد اهلج فهمتي
_صارت مشادات كلاميه والكل يصيح والكل ماقابل وعمتي ام رياض تصيح عياره احنه المنريدج طلكهه سلام
وسلام معاند واني ابجي ومجلبه ببيبي
صحت بصوت عالي
والله اذا ماطلكتني اكتل نفسي هسه طلكني ماريدك
ماريدك اصيح وابجي
كمز عليه دفع بيبي بصفي ع التخم جانت واكفه وعثر ب التخم نام فوكانه اني وبيبي
خنكني
ويباوع بعيني بخزره
اجه امير يدفع بيه وتضاربو رحت ركض وره امير
واصيح
الجبان انت كتلي انتي احجي وكولي طلكني واني اطلكج واني احب اسيل واتزوجهه شتغير هاي اني حجيت
جته كتلي عيشتي متفيدج 
اباوعله من وره امير صارت عيونه بكصته شاف الصنيه ب الكاع بيهه استكان شالهه وشمرهه ب الكاع تطشر الشكر والاستكاين نطحنت دفر قوري الجاي تطشر
سلام:وما اطلكج وروح بيداء خوش وعلى مابخيلج اركبي واتزوج واكسر خشمج بسيطه
امير:احترم نفسك وتطلك غصباً عليك واذا ماطلكت ب الغصب ب القوه وانتو زلم اوصلو الندى بعد
_ماما تصيح ولك اششش امير وملتمات ع بيبي دعاء وماما ورواء وعذراء خوات سلام يشربوهه مي ويغسلون وجههه وبابا  وعمو ابو رياض مصدومين وحيرتهم قويه
طلعنه وسلام يصيح ورانه
والله هلاسبوع اخذهه واشوف منو يمنع خوش وما طلك لو ع جثتي
رجعنه للبيت متت بجي امير يسألني وما اكدر اجاوب
خايفه اذا رجع بابا شحيسوي
يلا تعودت
رحت غسلت لليل رجعو ماما وبابا بس عصبي من وجهه وماحجه ولا سوه شي ماعرف ليش
تماره:ولج ندى تطبخيهه ويه بيبيتج واني امج ولج متريدين سلام ولج علكتيهه علك هسه
_وعلكتهم عساس ماكو هيج اذا كتلج راح توكفين هلوكفه وتطالبين بطلاكي هوه انتي تخافين
تماره:خلي ببالج سلام ميطلك وخلاج براسه عناد
_يطلك يعني يطلك
غطيت نفسي ونمت ابجي

ثاني يوم الاربعين يرحون للنجف وماما تريد تروح وهيه بشهر الثامن وحملهه ثكيل
تماره:كومي ستسمحي من سلام وعديهه ع خير وحصليلج زياره مدام الجو حلو لا بارد ولا حار
_والله ولا استسمح وماروح ماطيق المقابر واخاف

راحو اهلي وامير ب الشغل ووحدي ب البيت وهذا افضل شي حابه ابقه وحدي
وره شويه طلعت صحت ع فيفي وبقينه نسولف سولفت الهه كلشي
فيفي:عفيه ندى عفيه عجبتيني كملي طريقج واني بضهرج
_باوعت الهه وضحكت لو اعرف اعفطلج جان عفطتلج امداج
دنسولف وندك الباب
فيفي:منو مو محد كلهم ب النجف وامير ب الشغل
_اي خاف امير اجه من وقت
رحت يم الباب صحت منو ماكو جواب منو ماكو جواب
غلست رجعنه نسولف ورجع اندك
رحت بعصبيه افتح الباب شنو جاهل يضحك عليه هايه سوالفي من جنت صغيره ..
فتحت الباب بعصبيه وبيدي حفنة حب اكرز من فيفي
انصدمت من شفت سلام
دفعني ودخل
.......

لتنسون التفاعل حبايب كلبي
لتنسون التصويت
علقو متابعه تفاعلكم
التقيكم بجزء اخر من قصة قيود من لهب
..للكاتبه زينب علي..
دمتم سالمين 
احبكم
...........