■■■■■■■■■■■■■■■■■■■■
قد يحمل هذا الجزء ومايليه احداث مؤلمة وقاسيه ولكنها تخفي بين طياتها مغزى عميق لايصل اليه سوى أصحاب القلوب الحية وأولوا الألباب فهنيئا سلفا لكل من يقرأ بعمق ليصل للعبرة🌸
/////////////////////////////////////////////////////////////
#طوبى "جنة طوبى"
#جمان_فريد
#الجزء_127"إمتحان/استعانة"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام
#الصبر
يقول الإمام أحمد رحمه الله..
ذكر الصبر في القرآن في نحو تسعين موضع وهو نصف الإيمان فالإيمان نصفه صبر ونصفة شكر (الحمد)
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃﴿فَاصْبِرْ عَلَىٰ مَا يَقُولُونَ وَسَبِّحْ بِحَمْدِ رَبِّكَ﴾🍃
______________________________________
يوم السبت
5يونيو...سنة 2021..
الساعه 7:00مساءا..
في حوش طوبى..تحديدا الصاله..
كانوا بنات الواعر ومعاهم نساوين عمهم مقعمزات يسمعوا في طليقة ولدهم وهي تحكي عن اللي داره فيها ..
كانت فاتن تحكي بحرقه وألم واحيانا تسكت لأن البكاء يمنع فيها عن الاسترسال في الكلام وهما حواليها يبكوا معاها بالذات طوبى كانت تبكي بوجع واضح..
🍃فاتن ببكي:ماصبرني كان ربي والله حتى توا صابرة بربي لولاه راني هبلت..
حطت طوبى يدها ع فمها وغمضت عيونها بشده وهي تبكي..
سدرة بألم:طوبى يابنتي راك تنسي انك حامل تبي تفقديه حتى هو لاقدر الله..
حاولت تهدا وهي تقول بالعبرة..
/هو قالي كله منك..
فاتن بنبرة باكيه:كله منه هو ومن افعاله ياطوبى اللي داره فيا واللي داره فيك واللي داره فهلبه ناس غيرنا ربي خلصه منه،صح مقهورة ومحروقه ع ولدي لكن في النهايه اللي داره ربي هو الخير خلالي ولدي شفيع ليا يوم القيامه بدل مايخليه يكبر ع ايدين واحد زيه يخليه نسخة منه ويكون مصيره زيه..
الكلام اللي قالاته فاتن خلا نفس طوبى تهدا شويه وتأنيب ضميرها يوقف..
فاتن:انتي درتي فينا خير ياطوبى وماجاني من شر هو مني اني اللي عطيت واحد زي هدا فرصه وتأملت فيه خير وقعدت ندافع عنه ومانبيش نصدق اللي ينقال عليه..اني اللي اصريت نجيب منه صغار اني..كان في حد راكبه ذنب علي هو اني بس ياطو
قربتلها طوبى وضمتها وهي تقول..
/مقدر ومكتوب حبيبتي وزي ماقلتي اللي صار كله فيه خير قولي ديما ربي اجرني في مصيبتي واخلفني خيرا منها..
ضمتها فاتن بقوة وهي تبكي وسدرة تشوفلهم بألم..
🍃🍃🍃
ماقدرتش طول فاتن اكثر من ساعه جاها بوها بسيارة اجرة توجهت بيهم طول للمطار وفي الطريق طلبت من السواق يوقفهم ع المقبرة المدفون فيها ولدها اللي كانت اول مكان جاته بعد ماوصلت من السفر وياما صار فيها لما وصلت لقبر ولدها لدرجة انها قعدت تلم في ترابه بإيديها وتبوس فيه..
وصل السواق في المقبرة نزلت المرش وهي تشوفلها بحزن شديد وتقول..
/مع السلامه ياماما مع السلامه ياحبيبي مع السلامه..
وانهارت بالبكي..
خداها بوها في حضنه وقال بنبرة مخنوقه للسواق..
/تحرك..
🍃وسافرت فاتن وودعت ليبيا هالمرة من غير رجعه🍃
🍀🍀🍀🍀🍀
وتمضي الأيام وينفرط عقد اسبوع كامل،فهالأيام..
🍁قرر عبد القيوم يخلي طوبى ترجع للخدمه بش يتغير جوها وتتعدل نفسيتها وهالقرار نفذه مطمن لما دارولهم حمايه قعدوا وراهم وين مايمشوا..
🍃واللي قاعدين يحموا فيهم منه مالاش حس ولاخبر ومعاش تواصل مع أي حد من اهله حتى خديجه والكل كان متوقع ان ورا اختفائه هدا مصيبة جديده تعددت ليها التوقعات..
☘من جهة تانيه خبر حمل سدرة اللي فرح راجلها وصغاره فرح كبير خلاهم يحطوها ع كفوف الراحات ويزيدوا في التعبير عن حبهم ليها ويدللوها دلال عمرها ماشافت زيه في حياتها وهي فهمت من تصرفاتهم هادي انهم كانوا خايفين تفارقهم يوماما..
🍃"انتي توا في حكم امي مانبي حد يمشي يخطبلي غيرك"
سدرة بإبتسامه:حاضر..المهم انت متأكد من روحك مش حيجي يوم وتندم!؟ رد بالك ولدي الحكايه بعدين يولي فيها عشم وكسر خاطر
محمد وهو مبتسم..
/ولأني عارف الحاجه هادي كويس شديت في الموضوع..
سدرة:راما بنيه طيبه وكويسه لكن قلبها مكسور رد بالك تزيدها على مابيها سلم ولدي..
قاللها:ريحي بالك خالتي مستحيل نرخي بيها..
سدرة:مش غير هكي بس خليك راجل حقاني وعاملها احسن معامله
قاللها:واني راجل حقاني لبوي..
قالتله:هو بوك راجل حقاني وسيد التريس لكن عنده طبايع ربي فكك منهم هدا علاش اني شبه مطمنة لموضوعك مع راما..
محمد بضحكه:باهي قولي امتى بتمشولهم؟
سدرة:خل نشوف عمتك ونحددوا اني وياها يوم وبعدين نقولك عليه..
ابتسم وقال:منورة..
قالتله:بوجودك..وخلاته يضحك..
🍃لكن موقف سدرة الصغيره كان يختلف اختلاف جذري عن الكبيرة..
..جهة الشلال كانت مقعمزة مع بنت خالتها وبنت عمها هي تتكلم بغضب وهما يسمعولها بإستياء..
/تولي كويسه لعمرها مادخلناش بيها..
سدرة حامد:خوك هو اللي يبي ياسدرة..
قالتلها بقهر:اني هدا اللي بيهبلني مش عارفه كيف رضاها ع روحه يولي مضحكه هكي..
جوري:كلهم موافقين ياسدرة كان انتي ديري حركة هكي ولاهكي يتعاركوا معاك ومعاش يكلموك..
سدرة حامد:وتطلعي انتي العافنه بعدين خوك كبير يتحمل مسؤولية نفسه ماتدخليش بيه..
غمضت عيونها وتنفست بعصبيه بعدين فتحتهم وقالت..
/باهي هو حر يدير اللي يبيه واني حرة اني مانقبلهاش ولانرضى وحده زيها تولي مرت خوي..
🍃🍃🍃🍃
"بالك يحبها"
تاله: يحب وحده زي هادي كان عندها ماضي!؟
مروة:قولي استغفر الله والكلام هدا معاش تعاوديه يولي عليك راهو..
تاله بضيق:استغفر الله..
مروة:ربي يستر عليها ويتتملهم ع خير..
تأففت تاله وقالت..
/مش عارفه كيف بنتفاهم معاها بعدين!؟.
مروة بإستغراب..
/مافهمتش!
تاله:مش بتولي سلفتي كيف بنتحملها بس!
ضحكت مروة من قلبها..
تاله بإمتعاض:ماقلتش نكته..
مروة بضحكه :غير يولد ويسموه..
تاله بغرور:شكلي ماقتلكش يزن قال لسدرة توصلي انه مش حياخد غيري وكان فكرت في غيره يقتله..
وتنفجر مروة ضاحكه لين دموعها نزلوا وخلت تاله تنزعج منها وتاخد وساده تضربها بيها وهي تقول..
"مبردك"
ومروة كل مالها تزيد تضحك..
🍃ومنهم لأختهم اللي كانت مقعمزة تشرب في قهوة العشيه مع عزوزتها وحمواتها وبنت سلفها..
نجاح:قالت بدير لمة وحده للعيلتين حني وماليها..
نجمه:بتحملنا شقتهم!؟
نجاح:اللهم بارك يام يلهد فيها الخيل..
عواطف:ماشاء الله..
صفاء:قالت منى مساحتها كبيرة..
نجمة:الحمد لله ربي عوضهم خير عن حويشهم اللي راح فهالحرب..
🍃ومنهم للمربوعه كان اشرف مقعمز مع بوه وواحد من خوته وحديثهم يتعلق بموضوع شقة خوه..
ادريس:كبيرة هلبه تبي بش تكسيها..
اشرف:بنأثث نصها توا والباقي ان شاء الله نكملوه بعدين بالشويه بالشويه..
خوه قاله؛الحق يابوي العمارة نظيفه وحاجه صح وجايه في منطقة حية واهم حاجه مهما صارت من حروب ماطق فيها شي..
ادريس:كويس كويس اهو تتجاوروا انت وخوك..
اشرف:واني هادي اكثر حاجه شجعتني..
خوه قال:وامتى بتم فيها؟
اشرف: الاسبوع الجاي بإذن الله..
ادريس:على هكي المحوال قريب؟
اشرف:نقولوا قرب العيد الكبير ان شاء الله..
هز بوه راسه وقال:ان شاء الله ع خير..
🍃🍃🍃🍃
"نتلاقوا الخميس ياعساسيل"
ردوا عليه بصوت واحد..
"بإذن الله"
طوبى بإبتسامه مرسومه ع ملامح وجهها الحزينه قالت..
/بإذن الله..
ومشت فتحتلهم الباب وهما طلعوا ورا بعض بعدين طلعت وراهم وسكرت الفصل..
توجهت لمكتب راجلها وصلت فيه ودقت ع الباب..
هو اللي كان لاهي باللاب توب لما سمع دقة الباب شافله ابتسم من قلبه لما جو عيونه عليها واشرلها تجيه..
خشت ومشتله وهو يقوللها..
/عطيني رايك بحياديه..
وصلت فيه وقفت جنبه وطبست شويه وشافت للشاشه كان فيها تصميم للوحة بيكتبها لأحد المؤسسات..
ابتسمت وقالت..
/حلوة بالمرة..خاطري نتعلم نكتب هكي..
قاللها:انتي توا ماشاء الله اتقنتي خط الثلث غيره ولى ساهل عليك..
وقفت ع حيلها وقالت..
/ان شاء الله..كان معاش عندك شي نروحوا؟
سكر اللاب وناض وهو يقول..
/ايه ماعندي شي..
حط اللابتوب في الشنطه وسكرها بعدين لبسها وقال..
/قدامي ياسمح..
ابتسمت ابتسامه خفيفه ومشت هو لحقها وقلبه موجوع على حالها..
🍁بعد ماطلعوا سكر المكتب وتوجهوا لخارج المعهد..
وهما طالعين تلاقوا مع سلافه وهي خاشه سلموا ع بعض بالكلام وكملوا طريقهم وسلافه خشت، وهي ماشيه لمكتبها شافت ميار نازله تجري من فوق وقفت في مكانها من الخوف..
وصلت فيها ميار وقالت بضحكه..
/معز ولبانه روحوا..
سلافه بدهشه..
/قولي والله!
ميار بضحكه:والله..
مشت سلافه تجري لمكتبها وميار لحقتها وهي تضحك..
🍃🍃🍃🍃
"مامي"
فتحت طوبى ايديها لبنتها اللي جتها تجري وقالتلها..
/حبيبة مامي..وصلت فيها وضموا بعض..
وغرفه وهي تشوفلهم بإبتسامه قالت..
/بتتغدوا هني غدوة ولا؟
طوبى:بنروح من المدرسه هني طول..
غرفه هزت راسها بصمت..
طوبى:تصبحوا ع خير..
غرفه:قدامكم كل خير..وقعدت واقفه تشوف لطوبى وجنة وهما طالعين من الحوش بعد ماتسكر الباب تنهدت بضيق ولفت وخشت للحوش..
🍃🍃🍃🍃
حطت شيشة الميه البارده مع طاسه ع الكامدينو بعدين خشت للسرير وهي تقول..
/اشرف..علي المكيف شويه..
هو بعد حط هاتفه في الشحن خدي جهاز المكيف وعلاه بعدين مشي غطا ولده كويس واخر شي خش للسرير وهو يقول..
/بيبدا مسلسل هروب الضي والنكد..
صفاء بإنزعاج:استغفر الله..
اشرف:عندك علم ان العمارة اللي ساكن فيها خوي كريم مايعرفوش حاجه اسمها هروب ضي حتى كان هرب بالكثير ساعه ولاساعتين..
صفاء بضحكه؛حسدتهم..
ابتسم وقال:ماري ولاتكون حسود..
ضحكت بإستغراب..
اشرف قال بإبتسامه..
/حبي..بنشري شقه في نفس العمارة..
تبدلت ملامح ضحكتها لملامح مفاجأة ممزوجه بالضيق..
اشرف لاحظها وقال..
/اكيد ماكنتيش تفكري ان بنكملوا عمرنا في الحوش العيله..
قالت:ايه لكن عابيه انك بتبني فوق..
قاللها:فكرت فيها وغيرت رأيي..المنطقه اللي ساكن فيها كريم ممتازة والعمارة حاجه ماصارتش الحق السكنه غادي فرصة ماتتفوتش صفاء بضيق:بنولي بعيدة ع امي..
ابتسم وقال:لاان شاء الله ماتوليش بعيده عليها..في العمارة هادي في شقة تانيه فاضيه غير اللي بناخدها قولي لأمك تبيع الشقه اللي عندها وتاخد هادي،الشقه اللي عندها توا لو باعتها تجيبلها مبلغ كويس..
صفاء بحيرة:ونسيبوا شارع القهوة؟
اشرف:يعني لأمتى بنقعدوا فيه الواحد لازم مايقعدش واقف في مكانه ياصفاء كان عنده كيف يطور في حياته يقدم مايوخرش..
شافتله شويه بعدين قالت..
/غدوة ان شاء الله نمشيلها ونفتح معاها الموضوع..
ابتسم وقال:وماتطلعيش من عندها قبل لتقنعيها..
هزت راسها بإيجاب وقالت..
/إن شاء الله..
🍃🍃🍃🍃
ويجي تاني يوم..الإثنين..
فهاليوم روحوا نضال واريج من شهر العسل وكان في استقبالهم في المطار محمد ولد المهدي..
محمد لما بان عليه امه لاحظ عليه التغيير وزنه زايد ومزيان وضحكته طالعه من القلب..ضحكله ورفع يده وحياه بعدين قدمله لين وصل فيه وحضنوا بعض بحرارة..
محمد المهدي:حمد لله ع السلامه عريسنا..
نضال بضحكه:الله يسلمك والفال ليك ياصقر..
تباعد عنه محمد وقال بضحكه..
/ان شاء الله..بعدين نزل عيونه وقال..حمد لله ع السلامه خالتي.
اريج ردت عليه:الله يسلمك..
مشي خدي وحده من الشناطي وقال..
/هيا..
نضال:هيا..
وشد يد مرته ومشي ولد خوه وهو يسأل فيه عن احوال البلاد والاجواء لعند ماطلعوا من المطار..
🍃🍃🍃🍃
بعد ماقطعوا مسافه لاباس بيها وصلوا للشارع اول ماخشله محمد ضرب ع منبه السيارة وعمه جنبه يضحك..
وصلوا لباب القراج اللي انفتح تلقائيا وخش بالسيارة..
🌺🌺🌺
وتستقبل سدرة بنت اختها بالأحضان وهي تباركلها ولما سلمت ع باقي افراد العيله قعدت تتفحص فيها لاحظت انها محلوة بزياده ووجهها منور والفرحه باينه في عيونها زادت انهمت وخافت هلبه من اللي حيصير القدام..
🌺قبل الغدي..
اجتمع نضال مع بوه وخوته في المربوعه..
عمر والمهدي كانوا مركزين ع خوهم نفسيته مرتاحه وجوه ولى احلى من قبل..
طول فترة سفره لما كان يتواصل معاهم مالمحولاش حتى مجرد التلميح عن اللي صار في غيابه ووين يسأل عن الجالي يقولوله قاعد برا لاهي في خدمته وهو صدقهم او كان يبي يصدقهم لأنه مايبي شي يفسد عليه سعادته..
🌺🌺🌺🌺
"شن حال امك نفيسة؟"
نفيسه بإبتسامة:الحمد لله خير من قبل..
اريج:خلاتك تمشيلها؟
نفيسه:ابدا سكرت راسها لاتجيني ولانجيها الا بعد مانجيب.
سميرة:امها ترعش ع صغارها هلبه من زمان،كان تجيهم بردة تخش في عقلها وتطلع..
سدرة:زي اختي غرفه..
اريج: خالتي كان عطسوا صغارها عطسة عابرة دير حالة استنفار..
ضحكوا..
نسرين وهي تتفحص في اريج قالت..
/ماشاء الله اريج سامنه..
اريج بإبتسامه مجامله..
/اهو جو هياجه وماكله..
سدرة:مهناك سمن اللي لابستيه واسع مبينك سمينه..
شدت اريج ضحكتها وهي تقول..
/بالك..
ونسرين فهمت ع سدرة وطنشت..
وتخش مغليه بكرسيها المتحرك ناضتلها اريج وقدمتلها طول..
وصلت فيها سلمت عليها بالخد وكبت راسها وهي تسأل عن احوالها بعدين مغليه قالتلها..
/تعالي حداي..
لحقتها اريج وراجتها لين وقفت بكرسيها وقعمزت ع الكرسي اللي في جنبها..
مغليه بإبتسامه:ماشاء الله ماشاء الله تبارك الرحمن هدا وين بنتي..
نسرين ترقبت رد اريج..
اما سميرة ونفيسه كانوا يراجو في رد سدرة..
اريج بضحكه مرتبكه قالت..
/لهالدرجة السمن محليني!؟
سدرة:غزاله من نهار جاباتك امك ماخلا ربي ماعطاك غير ردي بالك تزيدي تسمني عمتي تحب كناينها رشيقات ماتبيه السمن..صح ولا عمتي!؟
☘عرفت هلبه تفاصيل من اللي صار مع طوبى وعيلة شنيبه من اريج وخواتها هالتفاصيل اللي رفضت طوبى تحكيلها عنهم☘
مغليه ردت عليها وهي تقول من فوق نفسها..
/صح..
سميرة ونفيسه شدوا ضحكاتهم بالغصب ونسرين كانت تشوف لسدرة المنتهى بإبتسامه وهي مضيقه عيونها بعدين ردت نظرها لأريج لما سمعتها قالت..
/ان شاء الله تو نشد لروحي..
رفعت مغليه حاجبها وقالت..
/بنمشي نشوف ولدي نوضوا وتوا الغدي..
ومشت بكرسيها المتحرك طلعت من الصاله وهي تسمع في نسرين تقول..
/حاضر..بعدين ناضت وهي تقول..تعالي نوتوه اني وياك سدرة..
سميرة جت بتنوض وهي تقول..
/جايه معاكم..
ناضت سدرة وهي تقول..
/والله مانك نايضه..
سميرة:غير علاش تحلفي بس!
طلعت سدرة بدون ماترد عليها..
تنهدت سميره بعدين شافت لاريج بإبتسامة وقالت..
/انستينا ياعروس..
نفيسة ابتسمت واريج قالت بضحكه..
/الله يأنسك..
🍃وفي الكوجينه..
اول ماخشولها الحمي ومرت خوها قالت نسرين..
/ارخي روحك شويه سدرة..
سدرة رفعت حواجبها وقالت..
/نعم!
نسرين:اسلوبك هجومي شويه..
ضحكت سدرة وقالت..
/فوتيه الجو هدا نسرين ماديريشي عليا اني تمام..!
نسرين:ياسدرة ماتخليش اللي صار قبل يأثر علينا توا معاش دققي في كلمه وتصرف فوتي..
سدرة بإبتسامه:حتى انتي معاش دققي وفوتي..وتوا خلينا من هالفتفتة الزايده وقوليلي امتى بنمشوا نخطبوا لحميدا؟
تنهدت نسرين بإبتسامة وقالت..
/شن رايك في نهار الخميس؟
سدرة:كويس بكل الخميس..خلاص بعدين تو نكلم عواطف..هي ابدي وتي السفر..
🍃🍃
وتغدوا غداهم وقيلوا وبعد العصر رفع نضال مرته ومرت خوه لحوش طوبى..
🌺🌺🌺
"روجتي.."
"بيبو ياعمري"
كان استقبال طوبى لأريج بشوق عارم وبالدموع حست وكأنها مفارقتها سنين وأريج كانت حاسه بنفس الشعور..
بعد سلامهم الحار ع بعض سلمت اريج ع باقي العيله بعدين الصغار اللي طاروا من فرحتهم لما شافوها لدرجة انها لما جت قعمزت قعمزوا حواليها..
🌸اريج بضحكه..
/سلمهم ياربي نجيهم..
غرفه بإبتسامه..
/مهاب يوميا ينشد وين هاريج ومرات يجيبلي في التليفون ويقولي كلمي هاريج..
حضناته اريج بقوة وقالت..
/سلم وليدي..
جنه:واني واني..
ضمتها بيدها التانيه وقالت..
/انتي عمك ماخلا ماخدالك جبنالك عرم هديه..
طوبى بإبتسامه:ربي يبارك فيكم ويرزقكم الذريه الصالحه..
اريج بإبتسامه:آمين..شن دايرة مع الحمل؟
طوبى:اهو مرة هكي ومرة هكي..
غرفه:ماعندكش مفاجأة حتى انتي!
اريج بضحكه:ماحلي نهاري!
غرفه:تو قريب يبان عليك وتجيبي انتي وخويلتك في نهار واحد..
ضحكوا وسدرة تشوف لغرفه بإبتسامة امتعاض..
اريج بضحكه:لا صعب في يوم واحد بيبو قداش ليها حامل..
مطيره:تي اين بيبو متاعك حني نحكوا ع سديرة..
اريج شافت لسدرة بدهشه وقالت..
/الله!
ضحكت سدرة وهزت راسها بإيجاب..
اريج بضحكه مفاجأه..
/وعلاش ماقلتيش!؟
سدرة بضحكه احراج قالت..
/شن بنقولك..اني الحق مشوبه صعب الحمل في العمر هدا وعندي عيل مازال ماسكر السنة..
غرفه:انشديني عليها اني المعاناة هادي..
سدرة:ربك يعين وخلاص..
غرفه:هي هادي وفي النهايه نعمه من ربك قولي الحمد لله..
سدرة:الحمد لله..
🍃وهما يتكلموا طوبى واريج يسرقوا في النظر لهاديه ومطيرة..يبانوا مبتسمات وهما يسمعوا في حديث غرفه وسدرة لكن العيون ماتعرفش درق..
تنهدت طوبى تنهيده غير واضحه بعدين شافت لأريج لقتها تشوفلها ابتسموا لبعض واريج قالت..
/حقه سمنت؟
هاديه:الله يبارك وباينه فيك العرسه..
مطيره:شهر عسل دهوير وماكله مطاعم..
اريج بضحكه:صح..
سدرة:شهقوا فيها نسرين ومغليه لاومغليه قالت..هدا وين بنتي..قالتها وهي تقلد فيها..
ضحكوا ومطيره قالت..
/هالعنقروفه ماتهمد بكل..
اريج:لكن خالتي قعدت تصلي فيهم ..
مطيره رفعت قبضة يدها وقالت وهي تحرك فيها القدام والخلف..
/زيد تحدى زيد ياصقر الوحيد..
غرفه خفت ضحكتها لما سمعت اخر جمله..
مطيره:منورة بنت خوي..
رفعت سدرة حواجبها ونزلتهم وهي تقول..
/بوجودك ياعسل..
اريج:ايه حقه خالتي لما رفعاتك نسرين للكوجينه شن قالتلك..
سدرة:بدير روحها شخصيه فشيتها..
غرفه:مازال عندها لسان تحكي بيه!؟
سدرة:هي كويسه لكن مرات دير في جو يكسرالرقبه داروه حتى لنفيسه لما كانت هديكا الشومه قاعده لكن سميرة بالمرصاد..
غرفه:هدا اللي يمشي معاهم العيله هادي الكنه اللي تخشلهم لازم يكون معاها مرافق يقدهم..
مطيره:وكان نندري بيهم هكي راني جيت ع مغليه نهار خدوا اميمة وطوبى...تعالت اصوات ضحكاتهم..
كلهم كانوا يضحكوا من قلوبهم ماعدا طوبى اللي ضحكتها كانت من ورا قلبها..
*********
اريج:مش عاجبتيني وجهك اصفر وتباني مهمومه..
طوبى وهي تحول في ملاية الصلاة قالت..
/الوحم تعبني المده اللي فاتت..
اريج:طوبى اني نعرفك من عيونك حسيتك حزينه..
مشت علقت الملايه وهي شاده دموعها بالسيف بعدين قالت بضحكه..
/من يوم عيوني هكي يبانوا..التفتت عليها وقالت..ديما تقولوا عيونك حزينه حتى وانتي تضحكي..
اريج قعدت تشوفلها بعدم تصديق..
طوبى قدمتلها حطت يدها ع شعرها وقالت..
/سفهتيني نصبغ اصفر لكن نحس فيه مايطلعش عليا..
اريج:اصبغي عسلي يمشي معاك..
طوبى:المشكله اللون هدا يبي سحب نخاف ندمر شعري كان درته..
اريج:في نوع حنة يعطي شعرك لون قريب من العسلي حنة****
طوبى:ايه سمعت عنها تو نجربها..هي تنوضي نطلعوا..
ناضت اريج وحاوطتها من وسطها وهي تقول..
/هيا..
حاوطتها طوبى من وسطها وهي مبتسمه ومشوا طلعوا من الدار وهما يهدرزوا..
🍃🍃🍃🍃
"المنطقه هديكا مشتيلها كذا مرة عندي زباين فيها"
صفاء:شن رايك فيها؟
فايزة:منطقه راقيه وعامرة..
صفاء:باهي ياماما شن رايك في اللي قتلك عليه؟
فايزة:الحق ليا فترة نفكر في المحوال الشقه هادي صغيره معاش تناسبنا لكن قلت لروحي كيف بتعيشي مع بناتك في مكان ماتعرفي فيه حد..
صفاء:اهو ان شاء الله بنسكنوا في عمارة وحده بينا دروج بس..
ابتسمت فايزة بحماس..
صفاء ابتسمت لإبتسامتها وقالت..
/نقول لأشرف يشوفهالك..
فايزة هزت راسها بالموافقه وقالت..
/قوليله..
🍃وروحت صفاء من حوش امها وهي فرحانه بموافقتها وفايزة برغم حماسها للفكرة لكن في نفس الوقت وجعها فراق احبابها وشارع القهوة اللي عاشت فيه اغلب سنين عمرها..
🍃مروة:هو صح صعب لكن هكي خير شقتنا صغيرة هلبه..
نزلوا دموع تاله وهي تقول..
/باهي وجيرانا وصاحباتي والمدرسة متاعي..!
فايزة:مش محولتكم،اصلا مدارسكم قريبة من هديكا المنطقه والباص داير حل..
تاله ببكي:مافيش مكان يجي زي شارع القهوة..
فايزة:بنجوه زيارات ياماما مش قاطعينه بكل..
ناضت تاله ومشت تجري لدارها وهي تبكي..
فايزة بضيق:الله غالب ماعندي ماندير الشقه هادي معاش تصلح بينا وحتى ع خاطر اختك صفاء نبيها تقعد قريبة عليا..
مروة:فاهمه ياماما فاهمه وتاله ماتعدليش عليها بعدين تتعود..
هزت فايزة راسها بعدين قالت..
/إن شاء الله يصير منه..
مروة:إن شاء الله..
🍃🍃🍃
تاني يوم..
في المدرسه وقت الاستراحه..
كانت تاله مع السدرات وجوري مقعمزات مع بعض في الساحه..
تاله تحكي وتبكي وسدرة حامد وجوري متأثرات..
اما سدرة المهدي كانت تبكي معاها..
🍃تاله ببكي:كله من الدراه اشرف كرهته كرهته...
سدرة المهدي وهي تبكي قالت..
/باهي علاش مايبنيش فوق حوش بوه؟
تاله رشفت وقالت بغل..
/زمان هكي قال وتوا غير كلامه هاللي ماعنده كلمة..
سدرة حامد:عادي توتي نتلاقوا في المدرسه وتجينا ونمشولك..
تاله بحزن:اني نبي نقعد في شارع القهوة مانبيش نخليه..رفعت عيونها وقالت..ياربي مايصير منها هالشقه الغبره ياربي..
سدرة المهدي قالت من قلبها..
/آمين..لايصير منها ولايصير من موضوع راما مع خوي محمد..
تاله:يارب..
وجوري وسدرة حامد يشوفولهم ويسمعولهم بإستياء وحزن..
🍀لكن مش كل دعواتنا لازم تتحقق..لان الخيره مش فيها والنصيب غلاب..
🍃وجي يوم الخميس ومشوا سدرة ونسرين ومعاهم سميره لحوش الصيد وتكلموا في راما لمحمد ونجمه رحبت بالموضوع وشكليا طلبت يعطوهم وقت بش تفكر البنت وتعطيهم ردها..ويوم الاحد جاهم الرد بموافقه راما واتفقوا ع يديروا فضانيه يوم الاربعاء السادس عشر من شهر يونيو..
🍃وكذلك صار لفايزة من الشقه اللي في عمارة بنتها دفعت عربونها وتوا تراجي تبيع شقتها بش تدفع حقها كامل..
🌺🌺🌺🌺
يوم الثلاثاء..
15يونيو...سنة 2021..
في احدى المدن التركيه..
ع متن يخت فاخر كان الجالي موجود مع معارف واصدقاء الكل مستمتعين بالأجواء وهو يمثل انه مستمتع زيهم..
واحد من اصدقائه ركز عليه كيف يشبح للبحر ويسرح فيه مشاله وقف جنبه وقال..
/وينك؟
الجالي:جنبك..
ضحك وقال..
/المدام ناويتلك ع نيه واني معاها..
رفع حاجبه وهو يشوفله من ورا النظارات وقاله..
/شن هي ترا؟.
شاف صاحبه لجهة محددة وقاله..
/شفتها هديكا ام الشعر الاصفر..
التفت وشاف وين يشبح صاحبه..
=هادي بنت دبلوماسي سابق ومن عيله معروفه خريجه قانون من جامعه***** مثقفه وعندها لغات هدا غير جمالها تشوف فيه بعيونك..تعرف ياصاحبي كان يصيرلك منها ع قولة المصاروة تاخدك لحتة تانيه..
الجالي:وخيرها ماتزوجتش لتوا؟
=قاعده صغيره عمرها تقريبا مافاتش 25 جوها هلبه لكن هي شايفه رويحتها شويه.. شافله وقال..نحس فيك تقدها..وغمزله..
قعد يشوفلها الجالي بتمعن كان يدور ع شي يجذبه فيها مش لاقي تنهد بعدين قال لصاحبه..
/خل نمشي نعاين عن قرب..
ضحك صاحبه وقاله..
/GOOD LUCK..
ومشي الجالي بإتجاه البنت اللي كانت واقفه ع وحده سلم عليهم وفتح معاهم حديث واستخدم قداراته المعروفه في جذب اي أنثى ليه ونجح في جذب البنت لدرجة انه خداها ع انفراد ووقف هو وياها ع سياج اليخت وكملوا هدرزتهم..
البنت كانت منجذبتله هلبه بس هو ع قد ماحاول يخلي شي في داخله يتحرك اتجاهها ماقدرش حتى الاعجاب ماقدرش يحس بيه..
وجه نظره للبحر ورجع سرح بخياله فيه وهو يسترجع في ذكريات بعيده..
والبنت جنبه تحكي في قصة حياتها وهو مايسمعش منها في حرف..
"جالي..جالي..انت معاي"
شافلها جنبه بعدين قال بإبتسامه مجامله..
/سامحيني سرحت شويه عاودي شن كنتي نقولي..
🍃🍃🍃🍃
الساعة 9:00ليلا..
في شقة عبد القيوم وطوبى..
تحديدا الصالون..
هو مقعمز ع الأرض لاهي بلوحه يكتب فيها..
وطوبى مقعمزة مقابلاته ولاهية باللابتوب..كانت ترد ع الرسائل اللي جايتها ع خاص صفحة"حنة"،اما جنة فهالوقت راقدة..
وفي عز الهدوء اللي هما فيه سمعوا صوت رنين هاتف طوبى ..
عبد القيوم وهو يكتب قال..
/قلبي..
طوبى وهي تكتب في رد ع رساله قالت..
/امم..
عبد القيوم:ماتسمعيش في هاتفك!
طوبى:شويه نكمل هادي ونوضله..
شافلها شويه وضحك بعدين رجع لشغله..
وقف رنين هاتفها لحظات ورجع رن مرة تانيه..
عبد القيوم؛عدي ردي ع هاتفك..
تأففت بضجر بعدين حطت اللابتوب ع جهة وناضت وهي تقول بنرفزة..
/مانحبش من يقطع عليا..
شافلها وهي ماشيه بعصبيه ضحك ضحكه خفيفه ورجع لهي بلوحته..
🍁وهي خشت للدار قعدت دور ع الهاتف لعند مالقاته ع الزيانه مشتله خداته لقت رقم دولي يتصل بيها..
قلبها انقبض خافت لتكون امينه بتقوللها خبر جديد مفجع 🍃من لما سافروا بمختار وهما يتواصلوا ع الماسنجر تاخد منها في اخبار عن صحة مختار اول بأول ومختار حاليا في فترة نقاهه بعد مادار عمليه ع القلب..🍃
بلعت ريقها بخوف وفتحت الخط وحطاته ع وذنها وقالت..
/السلام عليكم..
وتسمع صوت حد يبكي لكن صوت البكاء كان لراجل مش لمراة ..
من الخوف فصلت المكالمه فورا وخشت ع الماسنجر بسرعه لقت حساب امينه نشط كلمتها وسألتها عن حال مختار وهي جاوبتها انه قاعد كما هو عليه..
استغربت هلبه بعدين بعتتلها..
(سمحوله ياخد الهاتف)
ردت عليها..
(لسا ممنوع عنه اي شيء يجهده او يثير انفعاله)
طوبى
(باهي يصير اي شي جديد كلميني. )
ردت عليها.. (حاضر)
طلعت طوبى من الماسنجر وهي تقول في نفسها ان اللي كلمها اكيد غالط في الرقم..
خشت للرقم طول حطاته في الحظر وداراته صامت ورداته لمكانه بعدين طلعت من الدار...
🍃في الصالون..
خشت ع عبد القيوم اللي سألها..
/مني!؟
طوبى توترت وبسبب التوتر لقت روحها تكذب عليه وهي تقوله..
/وحده من بنات حلقة التحفيظ..
سكت ماعلقش وهي اللي كانت مضايقة من نفسها قعمزت وخدت اللابتوب ورجعت لهت بالصفحة..
🍃وتمر الساعات متواليه في هدوء للساعه 12 بعد منتصف الليل الزوز كانوا منهكين وغالبهم النوم خشوا لدارهم ورقدوا طول..
🌺لكن نضال واريج قعدوا سهرانين وهما يلعبوا في البلاستشين..
اريج بحماس النصر صاحت تقول..
/خشي..شافت لراجلها وهي تقول بشماته..صدارة معليشي..
استفزاته وخلاته يفك اليد متاع اللعبه ويلف الخيط عليها ويقول..
/اني خليتك تربحيني ياشفشفه..
اريج:هدا اللي عندك انت كل مانغلبك تقول في نفس كلمة..
ضحك وفكها بعدين قال..
/نوضي ديريلنا ماناكلوا..
اريج بتعجب:خاسر ويتشرط!! انت اللي بدير يابابا ولانسيت الشرط متاعي!؟
ضحك وناض نكشلها شعرها ومشي للكوجينه وخلاها تساويه فيه وهي تقول بإنزعاج..
/يامالغ..
بعدين خدت هاتفها وقالت..
/خل نفسفس شويه قبل ليجي..
وخشت ع الفيس وقعدت تتصفح بملل بعدين قالت..
/قداش ليا ع صفحة الحنة خل نخش نزل فيها حاجه نلقط منها حسنات..
وخشت ع صفحة الحنه اللي كانت "آدمن" فيها نزلت منشور فيه فائدة دعويه..شافت للرسايل لقت وحده بس خشت عليها لقتها جايه من حساب بدون صورة والاسم كان بلغة غريبه..
خشت عليه لقتها رساله طويله عريضه بدايتها خلتها تقراها
وكل مرة تقرا منها سطر كانت تحس بقلق وخوف لعند ماوصلت في اخر تلاته سطور وتنصدم بقوة...
