🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 لله قدر تولُّعي وتمنُّعي
يا شوقَ يعقوبَ الذي في أضلُعي."🍃
____________________________________
🍀🍀بعد مرور ثلاثة أيام🍀🍀
يوم الخميس..
29يوليو...سنة 2021..
...طرابلس...
في عز القايله الساخنه ليوم صيفي بإمتياز..
كانت الكهرباء مقطوعه ع المنطقه اللي يقع فيها شارع القهوة..
وفي حوش طوبى تحديدا الصاله..
كانوا اهل الحوش وضيوفهم الشراقه راقدين وحواليهم زوز مراوح كهربائيه دور عليهم ويدوب قاعده تهون عليهم في سخونة الجو..
🍃نفسها المروحه اللي كانت مشغلتها طوبى في دار البنات وحاطتها قبالتها وهي مقعمزة ع السرير ورافعه ركابها لفوق وضامتهم بيد والتانيه شاده بيها هاتفها اللي تقرا منه في القرآن الكريم..
ليها فترة متمسكه بقراءة سورة الانبياء مع البقره..
السورة هادي كانت تحكي ع ابتلاءات الانبياء المختلفه وكيف كل واحد فيهم تعامل مع مصيبته..
اللي ابتلي بالنعم..واللي ابتلي بالحرمان من النعم..
واللي ابتلي في ايمانه..زي سيدنا يونس..
يونس اللي فقد الأمل من قومه وسيبهم من قبل ماالله يعطيه امر بهذا كان عارف في قرارة نفسه ان اللي داره غلط لكنه توقع كون انه صاحب مكانة عند الله انه مش حيحاسبه ع فعله..
اما ايوب فكان الابتلاء متاعه اشد واقوى وهو تحول الحال في كل شي انقلاب تام في حياته من كل النواحي..
وكل مايشتد عليه الابتلاء كان يواجهه بصبر عجيب لامثيل له..لا بل الأعجب من هكي..كان راضي..راضي تمام الرضا كان حريص ان الله لما يطلع ع قلبه مايلقاش ذرة تسخط ع ماصابه..
حتى انه لما جي يدعي الله بش يرفع عنه العذاب ماقالش ياربي سادني ماجاني..ولاقال هلبه عليا ياربي هدا كله..ولاقال علاش درت فيا هكي شن هو الذنب اللي درته في حياتي يش تعاقبني هكي..
اللي قاله وهو يدعي كلام في منتهى الأدب واللطف والحب..
قاله..
"إني مسني الضر وانت ارحم الراحمين"
وفي آيه تانيه في سورة تانيه قال..
"إني مسني الشيطان بنصب وعذاب"
يعني ماباش يقول يارب ابتليتني ودرتلي من حبه الشديد لله وتأدبه العظيم معاه ويقينه ان الله مايقدرش الا الخير..
🍃سيدنا يونس..بعد خدي درسه اعترف بذنبه وفي عز الظلمات اللي عاش فيهم ماكانش فيه ع لسانه الا دعاء واحد..
"لاإله إلا انت سبحانك اني كنت من الظالمين"
يعني اللي جاني بسبب ظلمي لنفسي اغفرلي ونجيني..
والله استجابله ونجاه وانعم عليه..
وكذلك ايوب تكافىء ع صبره وتكافئ عليه بنعم اضعاف مضاعفه ع اللي كانت عنده..
🍃وفرج الله ع عباده ونعمه عليهم مالهمش صورة وحده..
في اللي يفرج عليه لما يعطيه قوة ايمان تخليه يتحمل ويقبل مانزل بيه من ابتلاء وينعم عليه بالرضا ع قدره.
وطوبى ماكانتش تبي اكثر من هكي..لأنها بعد كل اللي مرت بيه ايقنت ان مافيش نعمه اعظم من الرضا بالذات ع قضاء الله شره قبل خيره..
ختمت السورة وضمت الهاتف لصدرها وهي تذرف في الدموع وتقول..
/لاإله إلا انت سبحانك اني كنت من الظالمين..
"قلبي..كان كملتي تعالي اشربي معاي الشاهي"
غمضت عيونها بشده وقعدت تبكي بحرقه وصوت مكتوم..
قاعده عايشه معاه كل لحظه مع كل تفصيل حلو من تفاصيل حياتهم وحبهم..
ع قد مامر عليهم كانوا وين يلاقوا بعض وقلوبهم تحضن بعضها..يتحاكوا..يتناقروا..يتغازلوا..ينسوا الدنيا باللي فيها وكأن مافي حد موجود في هالكون غيرهم..
لكن توا لازم ينسوا بعض..ينسوا ان مازال حتكون في ليهم حياة مع بعض..ينسوا حتى حبهم ان لزم الأمر..
ايه تبيه ينساها ويعيش حياته بعيد عنها..حياة حلوة يستحقها زي ماهي كانت تقوله ديما انت تستاهل خير مني..
واكيد تنفيد شي زي هدا حيكون صعب جدا عليهم لدرجة الموت لكن مش مستحيل ع حسب وجهة نظرها هي..
🍃هدت بكي ومسحت دموعها..بعدين رفعت ايديها للأعلى وقالت..
"ياربي اعتصمت بيك وتوكلت عليك..كون معاي..قويني وثبتني وانعم عليا بالرضا ع قضائك يارب..يارب اللي بيدك القلوب طلعني من قلبه وخليه يكرهني خليه يطلعني من حياته وينساني وينسى كل شي جاه مني.."
وبنبرة مخنوقه كملت تقول..
"وصبرني ع فراقه وهون ع قلبي ياارحم الراحمين"
🍁🍁🍁
"مش قال الدكتور يفيق توا؟"
سامي:شويه صبر ياربيع..
عبد الله:عيونه يتحركن ولانا نتخيل!؟
ركزوا عليه بالنظر لقوه كيف بادي يفتح في عيونه..
ابتسم ربيع براحه وعبد الله قعد يشوفله بلهفة قلق..
اما سامي كلمه وهو يقول..
/عبدو..
حرك عبد القيوم عيونه لمصدر الصوت شاف سامي اللي ابتسم في وجهه وقاله...
/حمد لله ع السلامه..
ربيع:عبدو ياوحش حمد لله ع السلامه..
غير نظره لربيع شافله لقاه يضحك وهو يقول..
/قست غلاك ع المزبوط
"عبد القيوم..ولدي"
غير نظره لعمه اللي كانت باينه ع وجهه ملامح الخوف وهو يسأل فيه..
/شن حالك؟
وهو يشوف لعمه عقله اللي وعي تماما فكره باللي صار معاه..
بدت ع وجهه ملامح الخوف بعد ماعقد حواجبه وقال بصوت متعب بانت فيه نبرة الخوف..
"طوبى"
تبدلت ملامح وجوه سامي وربيع للأسف والضيق لكن عمه كان يشوفله بحزن..
صمتهم خلا الخوف يوصل عنده لأقصى مراحله..
غير نظره لسامي وقاله.
"مرتي شن صار فيها قول ياسامي..كانت معاها بنتها..قول ماصارلهم شي بالله عليك ياسامي"
من الانفعال حس بألم في مكان جرح العمليه واماكن تانيه في جسمه بدت ع وجهه ملامح الألم اللي لما شافهم عمه قال..
/مافيهم شي ماصارلهم شي..هلك بخير..هوينا قاعده مع بنتها عند هلها في طرابلس..
قال لعمه..
/تقول في الصادقه ياعمي!؟
عبدالله:وربك شاهد ياعمي..
قعد يشوف لعمه بألم وفي باله سؤال تاني الحياء منعه يقوله لكن قال..
/نبي نحكي معاهم..
ربيع:مش توا ياعبد القيوم مش توا..
عبد القيوم:معناها في حاجه داسينها!
سامي:والله العظيم مادرقنا عليك حاجه..
ويدق باب الحجره ويخش حسين لما شافه عبد القيوم قلبه فز وكأنه شاف طوبى قدامه قال بلهفه..
/حسين!
حسين قدم ووقف في نهاية السرير وهو يقول بإبتسامه..
/حمد لله ع السلامه ياأسد..
عبد القيوم..
/بنت عمك وجنة وينهم ياحسين؟.
حسين:اطمن ياغالي في حوش العيله حالهم باهي وامورهم تمام..
عبد القيوم؛باهي احكي مع حد من العيله يعطيهاليا نكلمها..
حسين قعد يشوفله ومش عارف بشن يرد..
سامي:خلينا نطلعوا حني وخدوا راحتكم..
مشي ربيع وهو مضايق ومعاه سامي طلعوا من الحجرة وعبد الله بعد ماشاف لولد خوه بأسف طلع وراهم..
عبد القيوم:هيا ياحسين..
حسين بإستسلام رفع هاتفه واتصل بأمه..
🍃في هالوقت..
طلعت طوبى من دارها وهي رافعه المروحه..
توجهت بطريقها للكوجينه طلعت منها ومشت للكوجينه الخارجيه..
خشتلها وسكرت عليها الباب..بعدين حطت المروحه ع الرخامه وكيف جت بتشغلها رجعت الكهرباء..
شافت للمكيف اللي كان في الكوجينه..تنهدت بعدين مشت شغلاته..
وانطلقت في الكوجينه دور ع مواد معينه..
🍃ومن الكوجينه الخارجيه للصاله..
استاقظت غرفه من نومها لما سمعت صوت المكيف..
ناضت ومشت طفت المراوح وعلقت خيوطهم في الضي بعدين شغلت المكيف..
ويرن هاتف صفيه صوت نغمته كان عالي فيق سدرة مع صفيه..
سدرة وهي تشوف لهاتف صفيه قالت..
/ان شاء الله خير..
وصفيه قامت الهاتف وهي متمدده الفراش شافت المتصل قالت..
/حسين..
سدرة وغرفه قعدوا يشوفولها بترقب وقلق..
وهي ردت ع ولدها..
/ايوه حسين..
فاقت سالمين لما خش اسم حسين لوذنها قعدت تشوف لصفيه وهي عاقده حواجبها..
ناضت صفيه قعمزت وهي تقول..
/فاق!؟..
ناضوا سدرة وسالمين قعمزوا..
صفيه:يعني مافيه شي خطير!
"ايه يام وضعه كويس..امي..مرته حداك يبي يكلمها"
مررت نظرها عليهم وهي تقول..
/يبي يكلم طوبى..
سدرة:بريلها ياغرفه بري..
مشت غرفه بسرعه وفي يدها جهاز المكيف وصلت في الدار فتحت الباب لقتها فاضيه استغربت..
فكرت انها ممكن تكون في الحمام مشتله طول دقت ع الباب اكثر من مرة وهي تقول "طوبى"..
ولما ماجاهاش رد خافت تكون دايخه ولاصاير فيها شي لهدا فتحت الباب..
وتلقى الحمام فاضي..زادت خافت ومشت بسرعه لدار المعيشه لقتها فاضيه قالت بخوف..
/يانهاري وين مشت!؟
وقعدت دور فيها وسدرة تسأل فيها..
"وينكم"
قالت:مالقيتهاش بكل..
ويفزوا سدرة وسالمين ويطلعوا يجروا من الصاله..
صفيه بخوف:وين مشت!؟
استاقظت كاريمان وشافت لصفيه لقتها تكلم في ولدها وهي تقول...
/راجي شويه ياولدي..
كاريمان:شن في!؟
صفيه بقلق:طوبى اشبح وين مشت..
انفجعت كاريمان وناضت طول وهي تقول..
/كيف وين مشت!؟
ومشت طلعت بسرعه من الصاله..
🍃وفي الكوجينه الخارجيه..
كانت طوبى تطرح في عجينه وتفرد فيها بعصاة طويله وهي تردد..
"لاإله إلا انت سبحانك اني كنت من الظالمين"
وينفتح باب الكوجينه ويخشوا عليها..
هي انفجعت وهما تفاجئوا..
غرفه:شن ديري؟!
طوبى:بكلاوة..
بدت ع وجوههم ملامح الاستغراب..
هي قالت:خيركم!؟
ع خشة كاريمان شافتها وقالت بخوف واستنكار..
/شن اللي ديري هذى !!؟ فيك صحة للحركه انتي!
طوبى بضحكه مرسومه ع وجهها المتعب والباهت..
/ريت هالبساطات اللي نغسل فيهم ولا الحوش اللي نقلب فيه..
سدرة:يابنتي ليك يومين بس طالعه من المستشفى وجهم قاعد اصفر وشواربك بيض حتى عيونك محلقات..في اي لحظه طيحي من طولك ..
طوبى:نحس في روحي عاديه مافيا شي..
ع خشة صفيه وهي تقول..
/طوبى انتي هني؟! اهي ياحسين..
مدت الهاتف لطوبى وهي تقول..
/راجلك فاق ويبي يكلمك..
كاد قلبها يطلع من مكانه من قوة الدق..بلهفه ودموعها ينزلوا قالت..
/فاق!؟
صفيه:ايه وحاله باهي.هاك كلميه..
غيرت نظرها للهاتف وهما يشوفولها بترقب..
خدت نفس بعدين خدت الهاتف من مرته عمه وفصلت المكالمه..
بدت ع وجوههم ملامح الأسف ماعدا صفيه اللي قالت بإستغراب..
/علاش سكرتي!؟
مدتلها الهاتف وقالت بنبرة مخنوقه..
/مانبي نكلم حد..
خدت صفيه الهاتف اللي رن مرة تانيه .
شافتله طوبى ودموعها ينزلوا وهي تقول..
