🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿 🍃عندما لا تستطيع أن تقترب، ولا أن تبتعد، ولا تستطيع أن تَنسى، ولا أن تَتَجَاوز فأهلاً بك في المُنتصف المُميت الذي لا حول لك فيه ولا قوة. - محمود درويش🍃 ___________________________________________ في حجرة مغلقه.. كانوا مقعمزات قبالة بعض وحده تبكي وهي تتكلم بألم و التانيه تسمعلها وهي دمع بألم وندم.. 🍃طوبى ببكاء.. /علاش ياسلافة ديري هكي ربي يسامحك.. سلافة بألم.. /لما شفت اللي صاير فيه كرمالك شفقت عليه كتير ياريتك شفتي حالته وهو عم يسمعك وانتي عم تحكي معي امبارح! طوبى وهي تبكي قالت.. /باهي شفتيه كيف رايح جلد ع عظم!!؟ تعرفي بسبب شني!؟. الطعنه جاته في المعده والامعاء معناها انحرم ياكل هلبه حاجات والله اعلم قداش بيقعد يعاني من هالحالة وكله من مني ياسلافه قوليلي!؟ نزلت سلافه عيونها بحزن واحراج وهي تمسح في دموعها.. وطوبى كملت كلامها تقول.. /هكي خيرله والله هكي خير..ماارتاحش معاي من لما عرفني ولابعد خداني وعمره ماحيكون مرتاح معاي..انتي تعرفيه كويس واحد زيه مايستاهلش وحده بحالتي اني ياسلافه هو يبي يضيع روحه معاي واني مانبيش..سكتت وهي تبكي بحرقة.. سلافه بحزن ونبرة باكيه.. /انا اسفه كتير والله كنت مفكره اني عم ساعدكن..اسفه كتير.. وطوبى مازال تبكي بقهر وحرقة قلب.. سلافه ناضت وهي تقول بقلق.. /عندك مي بالشنطه!؟ مدتلها طوبى الشنطه وهي تحاول تهدي بكي.. خدت سلافه الشنطه فتحتها وطلعت منها شيشه وفتحتها حتى هي ومدتها لطوبى وهي تقول.. /خدي اشربي.. خدت الشيشة وهي تحاول تبلع عباراتها بعدين سمت بالله وشربت شويه شويه.. نزلت الشيشة بسرعه لما سمعت صوت رنين هاتف سلافه.. التفتت سلافة لشنطتها خدتها وطلعت منها الهاتف شافت المتصل وقالت.. /هو..غيرت نظرها لطوبى وقالت..اذا سألني شو قلو!؟ طوبى خدت نفس بعدين قالت بتفكير وارتباك.. /قوليله..قوليله كلمتني وقالت ماصارلهاش من المشية.. هزت سلافه راسها بعدين فتحت الخط وردت.. /مرحبا.. "اهلا سلافه..سلافه قعدت نرجى فيها لعند ماطلعوا اللي في المدرسة كلهم وسكروها!" غمضت عيونها وقاطعاته تقول.. /ايه ايه..قبل شوي اتصلت فيني وقالت انها غيرت رأيها وماراحت ع المدرسة.. سكت شويه وطوبى تشوف لسلافه بنظرات كلها ألم وحزن وسلافه تبادل فيها نفس النظرات.. تكلم وقال.. "انتم تبوا تتلاقوا اليوم؟" سلافه وهي تحاول تخفي توترها.. /ايه بالاول اتفقنا نلتقي بمحل معين بعد ماتطلع من المدرسه وقبل شوي اتصلت فيني وقالت..تعالي لعندي ع البيت.. "تمام تمام..ع العموم مشكورة واجد وبارك الله فيك" سلافه بأسف.. /ياريت لو قدرت ساعدك.. نزلت طوبى عيونها اللي كانوا يذرفوا في الدموع.. "مش مشكله مش مشكلة..السلام عليكم" سلافه:وعليكم السلام.. نهت المكالمه وهي مضايقه ع الآخر.. "شن قالك؟". قالتلها:قال ظل يستنى لسكرت المدرسه.. شدت ع قبضة يدها وحطتها ع فمها ورجعت تبكي. وسلافه اللي قلبها تألم ع حالها قربتلها وضمتها وقعدت تهدي فيها... 🍃🍃🍃 وبعد ما عدى وقت لابأس بيه هدت فيه طوبى تماما غيرتلها سلافه جوها بالكلام عن التسجيل في الدورة التعليميه وبعد ماخلتها تسجل فيها قالت طوبى.. /حلو يومين في الاسبوع حتى الوقت مناسب.. سلافه:رح نبلش من الاسبوع الجاي.. طوبى:ان شاء الله..حمحمت بعدين قالت..وتوا خلينا في الموضوع الاساسي اللي جاياتك ع خاطره.. سلافه:ايه تذكرت قلتيلي بدك اياني في موضوع مهم.. بدت ع وجه طوبى البائس ملامح ابتسامه هاديه وهي وتقول.. /اني رسول وعليا البلاغ واللي باعتني اهل واحد عجبتيه هلبه ويبي يخطبك.. ضحكت سلافه.. طوبى بإبتسامه:ندوي جد.. سلافه بضحكه استغراب.. /قلتي واحد عجبته قصدك هو اللي شايفني ؟ طوبى هزت راسها بإيجاب.. بنفس الاستغراب قالت سلافه.. /وين؟ طوبى:ياستي خو سلفة اختي سدرة شايفك لما جيتونا اخر مرة.. سلافه:من هداك اليوم!. طوبى:سأل عنك وعن عيلتك بعدين كلم اهله.. ضحكت سلافه وقالت.. /بصراحة موضوع الزواج صار عندي فيه شروط كتيرة مابعتقد يقبل فيا اي رجال.. طوبى:زي شني!؟ سلافه:مابدي اترك شغلي ابدا ولاالجمعيه وماما اذا تزوجت رح ضل لحالها واكيد مافي رجال بيقبل ان حماتو ظل معه ببيت واحد.. طوبى وهي تفكر في كلامها شبه اقتنعت بيه بالذات الجزء اللي يخص امها.. ابتسمت سلافه وقالت.. /مارح تزبط.. طوبى:باهي اني نوصللهم شروطك ماتندريش مرات يوافق عليهم.. سلافه:مع اني بعرف النتيجة مسبقا بس ماعليه خبريهن مارح اخسر شي.. طوبى بإبتسامة.. /ان شاء الله خير.. سلافه ابتسمت وقالت.. /إن شاء الله... ******** ميار بإستغراب.. /غريبة كيف عطيتي للموضوع فرصة من البدايه! لبانه شافت لميار بضيق وسلافه قالت بتساؤل.. /مافهمت!شو الغريب ؟!. ميار:سلافه حني صاحبات ونعرفوا بعض كويس معقوله نسيتي التارقي بهالسرعه!؟ سلافه حافظت ع هدوئها وهي تقول.. /انا حبيته كتير..وتأملت فيه كمان حتى بعد زواجه لأن ظروفه كانت غامضه فكرت انه كانت لأي سبب تاني غير الحب..بس بعدين شفت بعيني قديش هني بيحبوا بعض وهو كيف حارب حتى اهله مشانها فقدت الامل منه بالمرة واحترمت حالي واحترمتن وقررت اتخطى ونفذت والحمد لله اتخطيت،وطبيعي جدا فكر اتزوج واستقر مارح كمل حياتي وانا عم ببكي ع اطلاله!. ابتسمت لبانه اعجابا بكلام اختها.. ميار:باهي كلام حلو وعجبني لكن مالاحظتيش حاجه.. ميار واستغرب وسلافة كذلك وقالت بإستغراب.. /شو ؟! ميار:طوبى هادي تغير منك هلبه ع راجلها ولاحظنا اكثر من مرة الحركات اللي ديرلك فيهم قبل من غيرتها معقوله بالسرعة هادي تتقبلك وتصاحبك لا وفوقها تجيبلك عريس..وتوا بالذات!!؟ لبانه بعدم فهم.. /ايه وشو يعني مافهمت!؟ ميار:اللي نبي نوصله ان البنادمه هادي مش ساهله بكل..في الاول خلت علاقتها بيك حلوة بش تبان قدام راجلها مراة عاقله لأن اكيد لاحظ عليها حركات الغيره الهبله وكلمها عليهم هدا علاش جاك كلمك عليها وقالك سايري ومشي.. سلافه وهي تفكر في كلامها قالت.. /طيب وان فرضنا انو هالحكي صحيح..شو علاقته بقصة العريس!؟ ميار:تو نقولك..ياحنة هي جابتلك العريس بش تحولك من طريقها احتمال كبير هي اللي تكون مكلمه اهله عليك يعني لاشافك ولايعرفك.. لبانه:ايه يعني شو رح تستفيد ماهي بدها تطلق من زوجها!.. ميار؛طروح حبيبتي طروح..هي بلعاني تبي تحول ذنب الراجل اللي قريب رزاته في عمره من علي كتافها يعني تبي تبين للكل واولهم ماليه ان هي ماليها ذنب في شي واهي سيباته وتبي تطلق ولأنها عارفه انه حيقعد يجري في جرتها ضامنه انها حتوليله بس لازم قبل تحولك من طريقها خوف منك تستغلي الوضع وتاخدي عبد القيوم وتخربي عليها.. سلافه حست بريبة وشبه مالت لتصديق كلام صاحبتها لأن فيه شي من المنطقيه في النهايه طوبى تعرف انها تكن مشاعر لراجلها الا مايكون في قلبها غيرة منها.. لبانة:بغض النظر عن كل هالحكي..الموضوع بإيد سلافة توافق او ترفض اذا مانك مرتاحة ارفضيه بالمرة.. ميار:وفكك منها طوبى هادي ماتعرفيش شن ديرلك ياسوفي.. لبانة:مو لهالدرجة المخلوقه بتخاف الله.. ميار بتهكم:وشن شقيتي ع قلبها بش عرفتي انها تخاف ربي! مايغركش الجو اللي دير فيه وطروح المدينات هدا تي هادم اشر خلق الله كان ماتعرفيش اسأليني اني عنهم.. هزت سلافة راسها بضيق وقالت.. /رح احكي معها وقلها تسكر ع الموضوع بالمرة.. ميار:احسن ماديري.. ولبانه تشوف لاختها بإستياء وهي ملتزمه الصمت.. ☘وتغدت ميار في حوش خوها من تحت ايدين شاديه وبعد الغدي روحت وقعدوا اهل لبانه ناويين المبيت عندها.. ومع امهم رجعوا فتحوا موضوع الخطيب اللي جي عن طريق طوبى وسلافه قالت لأمها عن وجهة نظر ميار في الموضوع.. ☘شاديه:بدك الصراحة حبيبتي..صحيح ميار حبابة وعندها مواقف حلوة بش فيها شغلات مو مقبوله.. لبانه:بالحقيقه هي مو احسن من بنات عيلتها.. سلافه بإستغراب.. /غلطت معك بشي!؟ لبانه:لاوالله ماشفت منها شي بيزعل بس انا عم بحكي عن طريقة تفكيرها وكرهها الغير مبرر لطوبى.. شاديه:خلينا نقول انو سوء ظن وان بعض الظن اثم لك بنتي.. حطت ايديها حوالين راسها وقالت.. /مابعرف تشتت تفكيري.. شاديه:استخيري امي استخيري.. لبانة:رأيي من رأي ماما.. وغاص عقل سلافه في التفكير في كل الآراء اللي سمعتها وقلبها ولى متوجس من طوبى.. 🍃🍃🍃🍃 طلعت للجنان وفي يدها صحنين..واحد فيهم كبير بعض الشي فيه حليب والتاني اصغر منه وفيه ميه.. حطت صحن ع الارض وقعدت تنادي في القطط بطريقة معينه ويطلعوا من كل جهة متوجهين للصحن شافتهم وهما يشربوا ابتسمت.. بعدين مشت بإتجاه كرم العنب..وصلت فيه وحطت ع الخشبة متاعه صحن الميه للعصافير.. وخرت وهي تشوف للسمي وبدت تردد في الأذكار بعدين لفت بتخش ومرت عمها معاها بعيونها وهي تشوفلها من شباك الكوجينه بإبتسامه.. "طوبى تليفونك يشرين" بعد ماسمعت نداء اختها خشت بسرعه للكوجينه وطلعت منها متوجهه لدار.. وصلت فيها وخشتلها..خدت هاتفها من ع الزيانه ولما شافت المتصل خافت واستغربت في آن واحد.. ********* غرفه:شن غير رايها؟ طوبى:مش عارفه بالك كلمت حد في الموضوع وشار عليها تسكره.. غرفه:زعمه امها تبيها تقعد معاها؟ هاديه:لالا شاديه قدامي اكثر من مرة دعتلها بالزواج وتقول الله يطمني عليها مثل ماطمني ع اختها.. طوبى:مرات هي زادت فكرت في الموضوع وماهانش عليها تسيب امها.. غرفه:ممكن.. تنهدت طوبى وقالت... /فيها خيره..خل نخبر سميرة..وقامت هاتفها وحطت ع رقم سميرة واتصلت بيها.. 🍃🍃🍃 وفي منطقة تانيه في العاصمة.. تحديدا حوش اهل عدي.. خش بسيارته للحوش لقي صغار اخته زينب يلعبوا في الجنان ابتسم بعدين درس السيارة ونزل منها.. جوه الصغار سلم عليهم وخلاهم يلعبوا وخش للحوش.. 🍃توجه لدار المعيشه..لما قرب يوصل فيها سمع اسم دقله قلبه بقوة.. زينب:والله فرحتلها من وسط قلبي وفي نفس الوقت غبطتها ع قد مايصير فيها علاقتها بالله سبحانه وتعالى تزيد قوة مع كل ابتلاء..هنيئا ليها.. امها قالت:عطاهاربي..فكرتني بالحاجه ونسه ماتوا وليداتها وبعدين بنيتها ترملت وجاها الخبيث وفي كل مصيبه تنزل عليها تقول..مولاي ياربي شن مايدير فيا راضيه..وتلقيها تحمد في ربي وتذكر في الله في كل وقت.. زينب:ايه..مع انها مراة اميه حتى القرآن ماتعرف تقراه.. اشرت ايمان بيدها ع مكان قلبها وقالت.. /كله هني..هني.. زينب:صدقني ربي يطهر قلوبنا ويزكيها.. خش عدي وهو يقول بإبتسامه.. /آمين.. ايمان:افوكاتو! عدي بضحكه:خديتي كلمة راجلك.. ضحكت وقالت.. /شن جو؟ هو قال:تمام الحمد لله..شن حال شيختنا.. زينب:زعلانه لين فايت فيا.. بضحكه قال.. /علاش!؟ امهم بإبتسامه قالت.. /قالت ديما عند ايمان ومعاش يجيني بكل.. قال:والله ماهكي..غير في مواضيع بيني وبين ايمن.. ايمان:اها صار انت تجيني ع مواضعيك مع ايمن.. بانزعاج قال.. /ايييه علينا! امه ضحكت وهي تقول.. /خلاص خلوا خوكم في حاله.. عدي:واشبطوا في التانيين عندكم غيري خمسه.. امه قالت:الله يبارك.. زينب:انت غير.. ايمان:صح انت بخوتي كلهم.. عدي بضحكه:كان يسمعوك.. ايمان:راي ويعرفوه وديما نقول فيه وجوههم.. امه:هادي انتي كلمتك تحطيها وماتعدلي ع حد.. ضحكت ايمان وهي ترقص في حواجبها.. كلمها عدي وقال.. /باهي خليك معاي..امتى بتروحي؟ قالت:بعد العشي.. عدي:بيتعشى هني ايمن؟ ايمان:ايه.. هز عدي راسه بصمت.. 🍃🍃🍃🍃 "الموضوع بياخد وقت يبي منك صبر ياعبد القيوم" عبد القيوم:يعني بحدود شني؟ ايمن وهو يمرر في نظره قدامه قال.. /قول شهر بالكثير.. بدت ملامح الاحباط مع الضيق ع وجه عبد القيوم شافله ايمن وقال.. /معليشي تحمل المهم في النهايه توصل للي تبيه.. هز راسه وقال.. /ان شاء الله.. ايمن:بعون الله..المهم شن صار في اللي قتلي عليه؟ عبد القيوم:بكرا ان شاء الله نجيبه لك.. هز ايمن راسه وخدي فنجان قهوته ورشف منه.. 🍃وطلع عبد القيوم من المقهى بعد ماودع ايمن..ركب سيارته وقعد يمشي بيها في الشوارع وعقله مابطلش تفكير في طريقة توصله لطوبى هو حاليا مش طامع في رجوعها ليه كل اللي يبيه انه يحكي معاها فقط لاغير.. 🍃وهو عز تفكيره لقي روحه قريب في مسجد موجود في المنطقه اللي يسكن فيها حسين.. ويرتفع صوت آذان المغرب لما سمعه درس قدام الجامع ونزل خشله.. 🍁داخل المسجد.. دور ع حسين ماكانش موجود بين المصلين واول مابدي صلاة تحية المسجد خش حسين.. ..ويأدوا حتى صلاة الفريضه بدون ماينتبه اي منهم لوجود التاني لعند ماجو بيطلعوا من المسجد تلاقوا في الباب.. ******** عبد القيوم:انت اول من رافقت في شارع القهوة ياحسين مفروض درت اعتبار للعشرة.. حسين بضيق:لو كنت مكاني ماقلتش كلامك هدا.. عبد القيوم:لاوالله مانديرها ياغالي الا الرفقة الطيبه مستحيل نفرط فيها لأي سبب كان.. تنهد حسين وقعد ساكت.. عبد القيوم:ليش انت ماتحط نفسك مكاني ياحسين؟.. عقد حسين حواجبه بإستياء.. قاله:ماتحملاش الوضع اللي نا فيه حتى في خيالك ياحسين صح؟ حسين:مش انت بس اللي تعاني..حتى هي تعاني وحني نعانوا معاها وين نشوفوا حالها..قبل قتلك طوبى عندي زي بنتي مانتحمل فيها شي . عقد حواجبه بغيره وهو يقول.. /هذي زوجتي فاهم شن معناها زوجتي!!..نقولها ومش متحشم منك معناها هي هلي وحياتي كلها ومافي حد يعنيه امرها اكثر مني.. حسين:كان يهمك امرها حق بعدها عن كل شي يوجعها ويقهرها.. عبد القيوم:المعنى!؟ حسين:واصلك ياصديقي.. قعد يشوفله بنظرات غضب للحظات بعدين تمالك نفسه وقال.. /ماتشجعش ع فراق زوج عن زوجته بيش ربك يسهلك امرك ويلم شملك انت واللي رايدها قلبك.. ابتسم وقال.. /لاخلاص تم النصيب.. بمفاجأة قال عبد القيوم.. /بالله! حسين بإبتسامه.. /والله..والفرح ان شاء الله في شهر عشرة.. بدت ع وجهه البائس ابتسامه فرح وهو يقول.. /ع البركه ع البركه..بحت..راني مازلت عند كلامي فاتحتك من بابها لمحرابها عليا.. حسين بضحكه:بارك الله فيك..ساد حضورك.. عبد القيوم:حاضر من غير ماتحكي وغصب عنك وغصب عنك فاتحتك عليا والله مانك معارض بكلمة.. ضحك حسين بقلة حيلة وقالت . /مدام حلفت معاش فيها كيف..ابتسم بأسف وقال..غير راهم ماليك يسمعوا يديرونا استغليناك حتى في هادي.. قال بإحراج وضيق.. /اللي داروه كله امسحوه في وجهي..من محبتهم ليا تصرفوا من غير تفكير.. حسين:ماعندي مانقول غير ربي يسامحهم وخلاص.. حط عبد القيوم يده ع كتف حسين وقال.. /نا دخيلك ياعشيري.. صابت حسين قشعريرة لما سمع شن قال عبد القيوم وركز معاه وهو يقول.. /مجار مجار... 🍃🍃🍃🍃 الساعة 12:00ليلا.. كانت مقعمزه ع سرير غرفه..مسندة راسها للشباك..وبفكرها سارحة في اللي صار اليوم ودموعها تنزل.. استاقظت لما سمعت صوت المنبه في هاتفها..طفاته ونزلت من السرير وجت لبنتها فيقتها بش دخلها للحمام.. نظام داروه هي وغرفه بش يعودوا صغارهم يقعدوا من غير حفاظ ليل ونهار.. ☘بعد مادخلت جنة للحمام ردتها مرة تانيه للدار ورقدتها ع السرير.. بعد مارجع النوم خدي جنه..رن هاتفها هالمرة لكن بإتصال.. ناضت خداته من ع سرير غرفه..شافت المتصل لقاته رقم لكن مش غريب عليها..رقمه اللي تحفظه صم.. نزلوا دموعها..مسحتهم وهي تفكر لعند مافصل الخط فرحت وجت بتحظره اتصل مرة تانيه.. غمضت عيونها..خدت نفس..قالت.. "يارب" وتفتح عيونها والمكالمه وتحط الهاتف ع وذنها بدون ماتتكلم.. سمعت صوته الملهوف وهو ينادي بأسمها.. "طوبى" قلبها كاد يوصل لحلقها لكنها نزلاته لتحت اقدامها ودهست عليه لما قالت متسائلة.. /من معاي!؟ "تعرفي كويس من معاك" زادت دهست قلبها وقالت بقسوة مصطنعة.. /لا مانعرفش.. "تمام حنسايرك ونقولك..معاك عبد القيوم" قالت:غالط ياخوي مانعرف حد بالإسم هدا.. ونهت المكالمه وهي ترجف وبسرعة حطاته في الحظر وقلبها راح دهسا بين اقدام قسوتها اللي جبرتها عليها الظروف.. 🍁وهو كان في حالة صدمه..ممكن سمع صوت كسر قلبه لأجزاء مجزئة..قعد عايش لحظة عدم استيعاب مش عارف كيف يطلع منها..وكإنه غايص في عمق البحر...يكاد يختنق ويموت.. 🍃ليله مش عارفين كيف مرت عليهم...من كثر ماكانت صعبه حسوها ولت طويله وكأنها ليلة شتويه بردها القوي جمد القلوب... 🍃🍃🍃🍃 ويجي تاني يوم.. وكأنك ياطوبى ماكملتيش ليلك بكي..عيشتي نفسك الفرحة مع غرفه اللي اليوم بيخطبها حسين من خالها.. رفع حسين بوه وامه ومعاهم عمته ومرت بوه لحوش خالها.. الكلام كان جدي بين عبد المطلب والمحجوب.. لكن مشي بالضحك والتعليقات بين نبيله وهاديه وصفيه ومطيرة... ******** هاديه بضحكه:ماشيه نخطبك من مرت خالك وانتي بطوبتك عايشة معاي في حوش واحد..هدا المثل اللي يقول وين وذنك ياجحي.. غرفه بضحكه:خطرتي عليا حسين لما قالي جيت بنخطبك من بوي لكن عارفه مكرة فيا مش حيعطيك.. تعالت اصوات ضحكهم ع كلامها بعدين سدرة قالت.. /بنبدوا من غدوة نجروا ونوتوا العرس مازال عليه شهر بس.. طوبى:ايه هداكا هو.. اريج:للأسف نضال محرم عليا طلعة السوق.. طوبى:اريحلك.. مطيره:ماعندك ماديري بيه خلوه ليا اني عارفيني مغلى عليا طلعة السوق.. سدرة:خلاص نديروا قائمة ونبدوا بالحاجه. وهما يهدرزوا عن التجهيزات للعرس ماكانتش غرفه متحمسة هلبه..تساير مسايرة وخلاص واريج ركزت عليها.. ******* طوبى:مش متقبله دير عرس قالت تشوف فيها بايخة.. اريج بدهشه:جديات!؟ طوبى:للأسف.. اريج:صدمتني الحق.. طوبى:ان شاء الله ماتقعدش هكي للعرس بدل ماتفرح بروحها تتنكد ع خاطر كلام الناس ونظرتهم.. اريج بإستياء.. /خسارة توقعت شخصيتها ولت اقوى من هكي.. طوبى:في ناس تأثر فيهم هلبة نظرة المجتمع مايقدروش يتجاهلوها.. اريج:قولي ان شاء الله ماتعبهاش القدام.. طوبى:ان شاء الله.. ضيقت اريج عيونها وهي تقول.. /حتى انتي مش عاجبتيني عيونك منفوخات ونعرفها نفختهم هادي كويس .. نزلوا دموعها لاإراديا وقالت.. /كان تعرفي شن درت.. اريج بخوف.. /شن درتي!؟ 🍃وحكت لأريج ع المكالمه ولاول مرة اريج تلومها وتعاتبها ويسمعوا حتى سدرة وغرفه والزوز كان موقفهم زي موقف اريج.. هي كابرت قدامهم وقعدت تقنع فيهم بإن اللي داراته صح لكن مجرد مااختلت بنفسها تقطع كبدها من البكاء.. 🍀🍀🍀🍀 وتعدي الايام.. ويخش شهر سبتمبر... وهي عايشه حياتها بين بنتهاوالتجهيزات لفرح غرفه ودورة الخط اللي لاحظت ان الاستاذة متاعها"سلافة" تغيرت معاها وبدت تعامل فيها بشي من الرسميه وكان تفسيرها لهالتغيير ع قد ماهو موجع لكن في نفس الوقت خلاها تقنع نفسها ان هدا الافضل للجميع... 🍃"خزي والله مافيها امان" طوبى:اني قاعده نتوقع يااريج وبعدين حتى كان طلع توقعي صح هي ماغلطتش هو راجل ع وشك الطلاق وهي اكثر وحده تناسبه.. اريج:بالله عليك مقتنعه بالفتفتة هادي!؟ طوبى ودموعها في عيونها قالت.. /ايه حتى لو كنت كارهتها مقتنعه بيها..وصدقيني بعد اللي درته اخر مرة حيطلعني من حياته مرة وحده.. تنهدت اريج بضيق وقعدت ساكته.. 🍃🍃🍃🍃 في فيرندا شقته مقعمز يتأمل في البحر وينقطع تأمله فجأة لما توصله رساله ع هاتفه.. قامه وشاف محتوى الرساله لقاه مقطع فيديو وصله من احدهم..مقطع كان يستنى فيه بفارغ الصبر.. فتحه..ويشوف مايخليه يرسم ابتسامة نصر ممزوجه بالتشفي.. شاف الشرطه وهي تلقى القبض ع مجموعه من الرجال والنساء كانوا موجودين في مكان ما مجتمعين لإتمام صفقة مشبوهه.. ومن ضمن المقبوض عليهم طليقته اللي يوما ما وجهتله طعنة غدر مسمومه هو ردها بأشر منها.. 🍃وفرحة نصره هادي لازم يشاركها مع حد وطبعا مافيش غيرها اخته وشقيقته في كل شي..خديجه.. ولما وصل الخبر لخديجه من فرحتها وصلاته لنسرين.. ونسرين تلقاته بصدمه واكيد مش حدسه عندها. بدون وعي طلعت من الحوش بإتجاه شقة خوها المهدي.. ******** سدرة بدهشه:احلفي! نسرين:والله توا توا خبرتني خديجه وقالت الراجل اللي واخدها باعها ع خاطر مصالحه والقضية اللي انحبست فيها تخليها تخلد في الحبوس.. سدرة:ان شاء الله معاد تولي.. 🍃وتسمع هالأخبار سدرة المهدي لكن ماقدرتش تفرح بيها لما فكرت بحالة جوري لو وصل لمسامعها خبر زي هدا.. لهذا قبل لتطلع عمتها من عندهم شدتها وهي تقول برجاء.. /بالله عليك ماتخليهاش تعرف بالله عليك عمتي.. نسرين والدمعه في عينها قالت.. /اكيد حبيبتي مستحيل نخليها لاهي ولاخوها تسمع بحاجة زي هادي . 🍃لكن خديجه خبرت راما..وراما قالتها لخوها محمد..ومحمد حكاها لباقي ولاد العيله بدون حضور حمزة.. 🍃يزن بضيق:خلاص سكروا ع الموضوع ومعاش تجبدوه بكل.. محمد حامد:يكون افضل.. ع جية حمزة وصل فيهم وقال.. /عطلت عليكم؟ نكشلها يزن شعره وقال.. /بالعكس جيت بكري..هي توزعوا ياولاد.. 🍃وبدوا لعب كرة القدم وحمزة كان اكثرهم حماسا.. 🍃🍃🍃🍃 غرفه:اللهم اضرب الظالمين بالظالمين.. طوبى بحقد:الفال ليه ان شاء الله.. هاديه وغرفه قالوا بأصوات متقطعه.. "إيه والله..آمين يارب العالمين"
#امتحان #طوبى
...يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
